HOSIA 7 - WƖA TENIŊ

Iziral tɩŋŋaa cho nɩbɔŋ wɩaa

¹ Dɩ mɩ nɩɩ chɛ dɩ mɩ vaarɛ Iziral tɩŋŋaa na-kala, Efirem wʋbɔŋŋɔɔ yie chaasa lɩɩ chɩŋ nɛ kporo, Samarɩa ma nɩbɔŋ wɩaa chɩŋ kporo. Baa nyɩsɛ nɩaa nɛ, gaaraa boro jʋjʋʋ nɩaa dɩɩsɩŋ wɛŋ-boruroo gurigoo laa nɩaa kɩaa womporunuŋ lɛ.

² Ama ba bɩ jɩŋ dɩ mɩɩ liisi ba wʋbɔŋŋɔɔ kala nɛ. Ba wʋbɔŋŋɔɔ golliba nɛ, ba hɛ mɩ sɩpaaŋ bʋa na-kala.

³ Ba yie ŋaa wʋbɔŋŋɔɔ a leŋ kuoro tʋɔŋ tɔrɛ, a nyɩɛ wɩaa ba sɩpaalaaraa ma tʋɔŋ tɔrɛ.

⁴ Ba kala ka ŋaa wʋlɩɩlɩŋ nɛ. Ba nagɛ tabʋʋŋ ba sɩ hɛ nyiniŋ ʋ faasa didii nɛ, nɩɩ-la sɩɩ wasɛ boroboro bɩra bɩ kaa hɩhɛ, aŋ buu munuŋ bil halɩɩ ʋ sii pʋɔra dɛrɛ.

⁵ Kuoro gbiele tapʋlʋŋ, ʋ dɩ ʋ tɩntɩnnɩ-hɩasɩŋ yie nyʋa sɩnɩŋ bugi nɛ. Ʋ dɩ nɩalɩŋ sɩɩ sieru lɛ ŋaa wʋtɔɔnʋŋ.

⁶ Ba tʋɔŋ nagɛ nyiniŋ sɩ hɛ tabʋʋŋ lɛ a didii nɛ, ka ba ŋɩŋaa badɛ wɩaa. Ba tʋɔbɩɩnaa nʋnʋgɛ tɩtaŋɩŋ kala, chʋchʋɔŋ, ba hosi a nagɛ nyiniŋ sɩ hoso.

⁷ Ba kala lɩma nɛ a nagɛ tabʋʋŋ. Ba kpʋ ba sɩpaalaaraa nɛ. Ba kuoroo kala sʋʋ tɩtɩgɛ dɔŋɔ lɛ, ka ba kʋŋkala bɩ bunso pɩmɛ, dɩ mɩ pɛ ʋ lɛ.

⁸ Efirem guoli tinteyee tʋɔŋ nɛ, ʋ nagɛ kɩŋkɛsɩmɩŋ ba sɩ bɩ kaa bɩrɩmɛ nɛ.

⁹ Nʋhʋɔraa lɩɩsɛ ʋ doluŋ, ama ʋ bɩ jɩŋ. Ʋ nyuŋ pʋlla nɛ, ama ʋ bɩ jɩŋ.

¹⁰ Iziral sɩɩ-duoŋ daga arɩ ʋ laa cheeriŋ nɛ. Ama wɩaa deemba kala lɛ, ʋ bɩ mɩɩra kɔ ʋ TƖƖNA Wɩa teeŋ, a bɩ bee chɛʋ ma.

¹¹ Efirem nagɛ kokomo nɛ a yaarɛ, ʋ nyɩsɩŋ ŋaa mɔlɩɩ. Ʋ yie yɩrɛ Ijipiti nɩaa dɩ ba pɛ ʋ lɛ, aŋ mɩɩra fá mʋ Asiiria nɩaa teeŋ.

¹² Dɩ ba nɛ mʋa, mɩ jaŋ joŋ mɩ jóŋ a yuo kɛsɛba. Mɩ jaŋ lɛrɛba tuu a nagɛ diibiisiŋ sɩɩ fil wɩa-nyuŋ. Dɩ mɩ nɛ nɩa dɩ ba kʋ hɛ dɔŋɔ, mɩ jaŋ kɛsɛba.

¹³ Wɩɩŋ puuba, bɛɛ wɩaa ba yeŋŋe nɛ mɩ teeŋ. Mɩ jaŋ cheiba, bɛɛ wɩaa ba vɩa mɩ niiŋ nɛ. Mɩ fa cho dɩ mɩ laaba ta nɛ, ama ba nyɩɛ wɩaa nɛ pɩpɩmɛ.

¹⁴ Ba tʋɔŋ kala dee ba kaa yele pɩpɩmɛ, ba mɩɩrɛ mɩ harɩŋ nɛ. Dɩ ba nɛ sʋla chɩchɛ kʋdiilee arɩ sɩnɩŋ ba yie pɩŋ ba bɔsʋnʋŋ lɛ nɛ a ŋmuŋmoo niiŋ a nagɛ nɩalɩŋ sɩ bɩ mɩ jɩŋ sɩɩ ŋaa ŋɩɩ.

¹⁵ Mɩ dagɛba nɛ woruŋ a leŋ ba kɛŋ doluŋ, ka ba vʋʋrɛ wʋbɔŋŋɔɔ a tɩgɛ mɩ lɛ.

¹⁶ Ba bɩ mɩɩra kɔ mɩ-na Wɩa sɩ kɩɩ kʋŋkala teeŋ, ba nagɛ toŋ sɩ golibo nɛ. Ba jaŋ kpʋ ba sɩpaalaaraa laalɩŋ lɛ, a tɩŋ nii-jɩgɩ wɩalɩŋ ba sɩɩ bʋl. Wɩɩŋ deeŋ wɩaa, ba jaŋ mɔmba Ijipiti tinteeŋ lɛ.”