HOSIA 5 - WƖA TENIŊ

Wɩa jaŋ dii Iziral tɩŋŋaa sarɩya

¹ La TƖƖNA sɩ, “Ma Wɩɩsʋllɩ sɩpaalaaraa, má nɩɩ wɩɩŋ deeŋ. Iziral sɩpaalaaraa, má jegili. Kuoro dɩa nɩaa, má ma jegili. Wɩɩŋ deeŋ ŋaa ma wɩɩ nɛ. Mɩzɩpa lɛ ma nagɛ bɛrɛ́ nɛ ma nɩaa lɛ, a ŋaa jóŋ, ba sɩ joŋo yuo peel-la ba sɩɩ yɩrɛ Tabɔ lɛ.

² Nɩalɩŋ sɩ vɩamɛ ka kpʋ nɩaa kɩŋkɛŋ nɛ, mɩ jaŋ dɔgɩsɛba.

³ Mɩ jɩŋ Efirem wɩɩkala nɛ, Iziral wɩɩ tuo a faamɛ. Efirem, ŋ mɩɩra joŋ ŋ nyuŋ hɛ wʋlɩɩlɩŋ lɛ nɛ, Iziral kala chei.

⁴ Ba wʋŋaalaa bɩ jaŋ sɛɩ dɩ ba mɩɩra mʋ ba Wɩa teeŋ. Wʋlɩɩlɩŋ ŋaanɩŋ sɩ hɛ ba nyuŋ lɛ leŋe ba bɩ ba TƖƖNA jɩŋ.

⁵ Iziral tɩŋŋaa sɩɩ-duoŋ daga arɩ ba laa cheeriŋ nɛ, Iziral tɩŋŋaa arɩ Efirem nɩaa wʋbɔŋŋɔɔ leŋe ba gɛrɛ tel nɛ. Juda nɩaa ma to ba harɩŋ a gɛrɛ tel ŋɩɩ tɩtɩa.

⁶ Dɩ ba nɛ kɛŋ ba piesee arɩ nɛsɩŋ mʋ dɩ ba ŋaa Wɩɩsʋlʋŋ a chɛ na La TƖƖNA, ba bɩ jaŋ naʋ, bɛɛ wɩaa ʋ mɩɩrɛ ba harɩŋ nɛ.

⁷ Ba bɩ wʋtɩtɩɩ kɛnɛ La TƖƖNA teeŋ, ba lʋl mɛŋgaa-biiriŋ nɛ. Lɛɛlɛ ba chɛŋ-falɩŋ gbielee jaŋ chei ba dɩ ba bagɩsɩŋ kala.

⁸ Má ŋmʋʋ banyile Gɩbɩa lɛ, a ŋmʋʋ nyile Rama ma lɛ. Má ŋaa laalɩyuori goŋ Bɛf Avɛŋ lɛ. Bɛnjamɩŋ, laa sɩpaaŋ dɩ la mʋ laalɩŋ.

⁹ Efirem jaŋ pɩŋ hoi tapʋlɩɩ-la ba sɩ jaŋ dɔgɩsɛ nɩaa. Iziral doho doho tʋɔŋ, wɩɩ-la mɩ sɩ bʋla sɛnɛ jaŋ ŋaa.

¹⁰ Juda nɩaa sɩpaalaaraa nagɛ nɩalɩŋ sɩ kɛŋ tabɩa-la ba sɩ joŋo magɩlɛ tinteeŋ bʋa gɛbɛ nɛ. Mɩ baanɩŋ jaŋ sii ba nyuŋ, a nagɛ lɩɩ-balɩŋ sɩ tɔ leriŋ.

¹¹ Ba nyagɛ Efirem bil nɛ, a nʋɔsʋ bil sarɩya dɩ-diiliŋ, bɛɛ wɩaa ʋ faa kpaarɛ vʋɩyaa nɛ.

¹² Mɩ nagɛ mʋgʋlʋŋ nɛ a joŋ Efirem didii, a leŋ Juda nɩaa ma chichei.

¹³ Efirem sɩ na dɩ ʋʋ wɩɩlʋ, Juda ma na dɩ ʋ kɛŋ naawɩɩlaa, Efirem mɩɩra mʋ Asiiria tinteeŋ a chɩchɛ dɩ kuoru-balɩŋ pɛ ʋ lɛ. Ama ʋ bɩ wuo vaarɛ Efirem, a bɩ wuo ŋaa Juda ma naawɩɩlaa fɩɛlɛ.

¹⁴ Mɩ jaŋ nagɛ naachigiŋ Efirem lɛ, a nagɛ naachigi-balɩŋ Juda lɛ. Mɩ jaŋ kɛmba pʋɔsɛ muno muno aŋ viiri. Mɩ jaŋ chʋmba viiri, ka nʋʋ tuo dɩ ʋ laaba ta.

¹⁵ Ŋɩɩ lɛ nɛ mɩ jaŋ mɩɩra mʋ mɩ dɩjʋʋlʋŋ a kaa mʋ yi bʋa-la lɛ ba sɩ jaŋ sɛɩ dɩ ba cheye nɛ, a bee chɩchɛmɛ. Hɛɛŋ nɛ jʋʋba, ba jaŋ chaasa bee chɩchɛmɛ.”