HOSIA 2 - WƖA TENIŊ

¹ Má yɩyɩrɛ ma naambiiriŋ ‘Mɩ Nɩaa’, a yɩyɩrɛ ma dɩhaalaa ‘Mɩ Nɩchooloo’.

Wɩa dɔgɩsɛ Iziral tɩŋŋaa aŋ bɩra laaba

² Má kpɩa ma naaŋ lɛ, má kpɩa ʋ lɛ, bɛɛ wɩaa ʋ tuo mɩ haal, mɩ ma tuo ʋ bala. Má leŋ dɩ ʋ lɩɩsɛ ʋ sɩaa hachɔrʋŋ wʋŋaalaa lɛ a leŋ dɩ hachɔrʋŋ wɩaa dɛrɛ ʋ tʋɔŋ lɛ.

³ Ŋɩɩ dee, mɩ jaŋ wuri ʋ kɩaa ka dɩ ʋ kɛŋ yarɩ-biree a nagɛ tapʋlɩɩ-la ba sɩ lʋlʋ. Mɩ jaŋ leŋ dɩ ʋ nagɛ tintee-hɩlɩŋ a nagɛ tinteeŋ sɩ hɩla kori-kori dɩ lɩɩnyʋasʋŋ kpʋʋ dɩ ʋ sʋʋ.

⁴ Mɩ bɩ jaŋ dagɛ mɩ chonuŋ ʋ biiriŋ lɛ, bɛɛ wɩaa ba ŋaa mɛŋgaa biiriŋ nɛ.

⁵ Ba naaŋ ŋaa hachɔrʋŋ nɛ a ŋaa hɩɩsɛ wɩaa a kɛŋ ba luoruŋ. Ʋ sɩ, “Mɩ jaŋ kire to mɩ hɩɩlaba harɩŋ, nɩalɩŋ sɩɩ pɩmɛ mɩ kʋdiilee arɩ lɩɩŋ, pie-pʋnaa gɛnnɩŋ arɩ gɛrɩ-fʋfʋlʋŋ, nʋʋŋ arɩ girep nɛnɛɛ sɩnɩŋ.

⁶ Ŋɩɩ wɩaa, mɩ jaŋ ta sɔsʋŋ a tɔ ʋ wombiiŋ, mɩ jaŋ saa jeeŋ a kɛrʋ dɩ ʋ sɩ́ wuo na wombiiŋ a lɩɩ.

⁷ Ʋ jaŋ kire to ʋ hɩɩlaba harɩŋ, ama ʋ bɩ jaŋ puuba. Ʋ jaŋ bee chɛba, ama ʋ bɩ jaŋ naba. Ŋɩɩ nɛ ʋ jaŋ bʋl, ‘Mɩ jaŋ mɩɩra mʋ mɩ bala teeŋ, mɩ faafaa-la nɛ kpɩa mɩ lɛɛlɛ.’

⁸ Ʋ bɩ sɛyɛ arɩ mɩ nɛ nɩɩ-la sɩ pʋ mɩaa, girep nɛnɛɛ sɩ-falɩŋ arɩ nʋʋŋ, a pʋ hɔpʋla arɩ sɛlɩmɛ, kɩalɩŋ ʋ sɩ joŋo pɩ vene-la ba sɩɩ yɩrɛ Baal.

⁹ Ŋɩɩ wɩaa mɩ jaŋ laa mɩ mɩaa dɩ ba nɛ bɩa, a laa mɩ girep nɛnɛɛ sɩ-falɩŋ dɩ ba nɛ ŋaaʋ dɛrɛ. Mɩ jaŋ laa mɩ pie-pʋnaa gɛrɩ-la arɩ mɩ gɛrɩ-fʋfʋlɩɩ-la mɩ fa sɩ joŋo tɔ ʋ yarɩ-biree.

¹⁰ Mɩ jaŋ wuri ʋ gɛnnɩŋ kala ʋ hɩɩlaba-la kala sɩpaaŋ, ka nʋʋ tuo sɩ jaŋ laaʋ mɩ nɩsɩŋ lɛ.

¹¹ Mɩ jaŋ giri gbieli dosunu-la kala ʋ sɩɩ gbielu ta: jɩna jɩna gbiele, chɛŋ-falɩŋ gbiele, chɛ-wiesii-la arɩ gbiele-la dɔnsʋŋ kala.

¹² Mɩ jaŋ chei ʋ girep nɛnɛɛ bagɩsɩŋ arɩ ʋ tutogusuŋ, kɩalɩŋ ʋ sɩ sɩ ʋ hɩɩlaba joŋo timu. Mɩ jaŋ leŋ dɩ ba lugo kɛŋ dɔŋɔ woruŋ a nagɛ tiiŋ, dɩ baga kɩaa joŋo dii.

¹³ Mɩ jaŋ dɔgʋsʋ a tɩŋ tapʋlɩa-la ʋ sɩ nyɩgɛ kʋsʋɔrʋsʋŋ a pɩ vene-la ba sɩɩ yɩrɛ Baal. Ʋ fa kpɩɛrɛ ʋ tɩtɩa nɛ a joŋ nenii-pɩraa arɩ banzɔlɔba hɛ a kire to ʋ hɩɩlaba harɩŋ aŋ yʋ mɩ wɩaa. Mɩ-na ma TƖƖNA nɛ bʋla.

¹⁴ Ŋɩɩ wɩaa, mɩ jaŋ bʋl nii-sɩŋ wɩaa kɛnʋ, mɩ jaŋ kɛnʋ kaa jʋʋ tintee-hɩlɩŋ a fɩɛla bʋl wɩaa pʋ.

¹⁵ Nɩmɛ nɛ mɩ jaŋ bɩra joŋ ʋ tɩɩnɛnɛɛ bagɩsɩŋ pʋ, a leŋ dɩ Akɔ fuonaa-la fa sɩ ŋaa wʋjʋʋlaa lee, dɩ ʋ mɩɩra ŋaa lee sɩ kɛŋ yɩɛlaa. Nɩmɛ nɛ ʋ jaŋ yɩɩ yɩɩlaa a nagɛ ʋ hambiiriŋ bʋa lɛ, a nagɛ tapʋlɩɩ-la ʋ sɩ lɩɩ Ijipiti tinteeŋ lɛ.

¹⁶ Mɩ-na ma TƖƖNA nɛ bʋla, tapʋlɩɩ-la ŋ jaŋ kɛmmɛ yɩrɛ ŋ bala, ŋ bɩra bɩ jaŋ yɩrɛmɛ, ŋ kʋhɩaŋ.

¹⁷ Mɩ jaŋ leŋ dɩ ŋ sɩ́ Baal yɩrɩŋ yɩrʋ, a bɩra sɩ́ ŋ yɩrɩŋ kaa ŋmɩɛsɛ.

¹⁸ Tapʋlɩɩ-la, mɩ jaŋ hɛ niiŋ mɩ dɩ baga kɩaa arɩ diibiisiŋ sɩɩ zaarɛ wɩa-nyuŋ arɩ kɩalɩŋ sɩɩ tuuri tinteeŋ pɛgɛ dɩ ba sɩ́ ba walɩmʋ. Mɩ jaŋ giri laalɩŋ ta tintee-la lɛ dɩ bayuori kɩaa lɛl, tosuŋ arɩ tokobiee, ka dɩ mɩ nɩaa wuo hɔŋ sɔm.

¹⁹ Mɩ jaŋ leŋ dɩ ŋ ŋaa mɩ haala a kaa mʋ wuu, mɩ jaŋ dagɩŋ mɩ tʋɔpʋla arɩ mɩ wʋtɩtɩɩ, a kɛŋ chono-la sɩ bɩ dɛrɛ arɩŋ, a fɩfá ŋ nisusuŋ.

²⁰ Mɩ jaŋ jaaŋ arɩ wʋtɩtɩɩ. Ŋɩɩ nɛ ŋ jaŋ sɛɩ arɩ mɩ nɛ ŋ TƖƖNA.

²¹ Mɩ-na ma TƖƖNA nɛ bʋla, tapʋlɩɩ-la mɩ jaŋ nɩɩ mɩ nɩaa Wɩɩsʋlʋŋ ba sɩ sʋlaa chɛ duonuŋ, a leŋ dɩ ʋ nɩɩ,

²² dɩ mɩaa, girep tɩɩsɩŋ arɩ olif tɩɩsɩŋ wasɛ Jɛzɩrɛl tinteeŋ lɛ.

²³ Mɩ tɩtɩa nɛ jaŋ holluŋ tintee-la lɛ, mɩ jaŋ dagɛ mɩ chonuŋ Lo-Ruhama lɛ, nɩɩ-la mɩ fa sɩ sɩ mɩ bɩ ʋ cho. Mɩ jaŋ bʋla pɩ Lo-Ammi, nɩalɩŋ ma mɩ fa sɩ sɩ ma bɩ mɩ nɩaa ŋaa: Ma ŋaa mɩ nɩaa nɛ lɛɛlɛ. Ba ma jaŋ bʋl, ‘Ŋ nɛ La Wɩa.’ ”