HOSIA 14 - WƖA TENIŊ

Ma bɩrɩma lɩɩ wʋbɔŋŋɔɔ lɛ dɩ Wɩa pɛ ma lɛ

¹ Iziral tɩmma, má mɩɩra mʋ ma TƖƖNA Wɩa teeŋ. Ma wʋbɔŋŋɔɔ nɛ leŋe ma tel.

² Má kɛŋ ma tɩtɩa hɛ dɔŋɔ aŋ mɩɩra mʋ La TƖƖNA teeŋ, a bʋla pʋ, “Fá la nenige aŋ joŋ la wʋbɔŋŋɔɔ kala chɛla, aŋ chaga laala dɩ la wuo suri la niiŋ a dɛnnɩŋ.

³ Asiiria tɩŋŋaa bɩ la wuo laa ta, laalɩyuori janɩŋ bɩ la wuo pɔ. La bɩra bɩ jaŋ kɔ dɩ la bʋla, ‘La wɩa nɛ kɩalɩŋ la tɩtɩa sɩ ŋaa,’ bɛɛ wɩaa La TƖƖNA, ŋ nɩɩ fá biisinsiŋ nenige.”

⁴ La TƖƖNA sɩ, “Mɩ jaŋ vaarɛ ba dɩgɩlɩŋ-bɩnɩɩ-la sɩ hɛ ba lɛ, aŋ choba woruŋ, bɛɛ wɩaa mɩ baanɩŋ fɩɛlɛ ba nyuŋ nɛ.

⁵ Mɩ jaŋ nagɛ nyalɩŋ a nyala hɛ Iziral tɩŋŋaa lɛ. Ʋ jaŋ fɩɩlɛ a nagɛ tɩa sɩ fɩɩla. Ʋ jaŋ nagɛ kuolo sɩ hɛ Lɛbanɔŋ lɛ, ʋ naapoloo tuu tinteeŋ,

⁶ ʋ naakel-falaa jaŋ waa woruŋ. Ʋ jaŋ zɔŋ a nagɛ Olif tɩa, dɩ ʋ sʋɔra sɩŋ a nagɛ kuolo sɩ hɛ Lɛbanɔŋ lɛ.

⁷ Nɩaa jaŋ bɩra hɔŋ ʋ fɩɛlɩŋ lɛ. Ʋ jaŋ jigi a nagɛ mɩɩŋ. Ʋ jaŋ fɩɩlɛ a nagɛ girep tɩa aŋ kɛŋ yɩrɩŋ a nagɛ girep nɛnɛɛ sɩnɩŋ sɩ lɩɩ Lɛbanɔŋ.

⁸ Efirem, ŋ dɩ ŋ tɔŋŋɔɔ bɩra bɩ wɩɩ pɛ. Mɩ jaŋ laa ŋ sʋla aŋ beŋ ŋ nyuŋ woruŋ. Mɩ nagɛ bʋtʋma pɩpaarɩŋ sɩ bire woruŋ nɛ, ŋ wʋzɔŋ kala lɩɩ mɩ teeŋ nɛ.”

⁹ Nɩɩ-la kala sɩ kɛŋ wʋjɩmɩŋ, ʋ jaŋ jɩŋ wɩaa deemba. Nɩɩ-la sɩɩ jɩŋ wɩaa sɩaa, ʋ jaŋ jɩŋ ba bʋbʋɔŋ. La TƖƖNA wombiee ŋaa wʋtɩtɩɩ wombiee nɛ, tʋɔpʋl tɩŋŋaa vɩvɛŋ ba lɛ, ama nɩalɩŋ sɩ vɩaba gɛrɛ titel nɛ.