HOSIA 13 - WƖA TENIŊ

La TƖƖNA baanɩŋ sii Iziral tɩŋŋaa nyuŋ

¹ Faafaa-la dɩ Efirem doho nɩaa nɛ bʋl wɩaa, fawʋllʋŋ yie jʋʋ Iziral doho doho-la dɔnsʋŋ nɩaa nɛ. Ba faa beŋ Efirem lɛ nɛ, ama ʋ nɩaa mɩɩra ŋaa wʋbɔŋ nɛ ba sɩ kpaarɛ vene-la ba sɩɩ yɩrɛ Baal, ŋɩɩ leŋ ba jaŋ sʋʋ.

² Bʋa deeŋ lɛ ba ŋaa wʋbɔŋŋɔɔ kɩŋkɛŋ kɩŋkɛŋ ba kɛŋ ba hɔpʋla nɛ a libi tɔŋŋɔɔ a pɩ ba tɩtɩa. Ba jɩma libiba nɛ woruŋ ba nagɛ nɛ-biisiŋ, gɔgɔɔ nɛ libi kɩalɩŋ kala. Ŋɩɩ nɛ aŋ bʋl, “Maa kpaarɛ kɩalɩŋ la sɩ libe a guguori kɩalɩŋ la sɩ libe ba nagɛ nɛ-bie.”

³ Ŋɩɩ wɩaa ba jaŋ nagɛ bʋrʋŋ sɩ tɔ chʋchʋɔŋ, a nagɛ chʋchʋɔ-fɩɛla nyalɩŋ sɩ guu huo, a nagɛ peliŋ sɩ paa mɩɩ-jɔrʋŋ taha lɛ viiri, a nagɛ nyʋɔsʋŋ sɩ to viise lɩlɩɩ.

⁴ La TƖƖNA sɩ, “Mɩ nɛ ma TƖƖNA Wɩa, Nɩɩ-la sɩ kɛmma kʋ lɩɩ Ijipiti tinteeŋ lɛ. Ma maga ma jɩŋ arɩ mɩ dʋndʋŋa nɛ Wɩa, Laataarʋ dɔŋ tuo, see mɩ-na.

⁵ Mɩ nɛ beŋ ma nyuŋ tintee-hɩlɩŋ lɛ lee-la wulumuŋ sɩ yʋga.

⁶ Mɩ nɛ fa pɩba kʋdiilee, ba dii vɔgɛ. Ba sɩ vɔgɔ, ba kɛŋ sɩɩ-duoŋ, a yʋ mɩ wɩaa.

⁷ Ŋɩɩ wɩaa mɩ jaŋ fɩla chaalɛba a nagɛ naachigiŋ, mɩ jaŋ faa gbɛrɛba wombiiŋ lɛ a nagɛ kpe-fɩaŋ-mie.

⁸ A nagɛ ba sɩ kɛsɛ lʋgʋmʋŋ biiriŋ ʋ yaraa hosi ŋɩɩ. Mɩ jaŋ luri ba fehe. Mɩ jaŋ chamba a nagɛ naachigiŋ a kɛmba pʋɔsɛ a nagɛ baga kʋa.

⁹ Iziral tɩmma, ma chei ma tɩtɩa, bɛɛ wɩaa ma lɩɩ mɩ-na Nɩɩ-la sɩɩ pɛ ma lɛ harɩŋ nɛ.

¹⁰ Nɩɩ nɛ ma kuoro hɛ dɩ ʋ laama ta? Nɩɩ nɛ ma sɩpaalaara-la kala sɩ hɛ ma tasɩŋ lɛ hɛ, nɩalɩŋ ma sɩ sɩ mɩ lɩɩsa pɩma?

¹¹ Mɩ na baanɩŋ nɛ a lɩɩsɛ kuoro pɩma, a bɩra na baanɩŋ a joŋu viiri.

¹² Efirem cheeriŋ pɩna nɛ, ba ŋmʋnsɛ ʋ wʋbɔŋŋɔɔ bil nɛ.

¹³ Ʋ jaŋ na hɛɛŋ a nagɛ haala luoruŋ sɩɩ wɩɩ ʋ nɩna hɛɛŋ ŋɩɩ, Ʋ nagɛ bie ba sɩɩ chɛ ba lʋl nɛ, bʋa-la sɩ yie dɩ ba lʋlʋ, ʋ bɩ lʋla leriŋ kɔ.

¹⁴ Mɩ time laaba dɩ sʋʋŋ sɩ́ ba wuoo? Mɩ laaba ta sʋʋŋ nɩsɩŋ lɛ? Sʋʋŋ, nɩɩ nɛ ŋ huoŋ hɛ? Lɛlɛɛ-jaŋ, nɩɩ nɛ ŋ huo-la sɩɩ chei nɩaa hɛ? Mɩ bɩ jaŋ fá ba nenige.

¹⁵ Efirem pʋŋa yʋgɛ nɛ woruŋ ʋ naambiiriŋ tʋɔŋ, ama La TƖƖNA jaŋ leŋ dɩ peliŋ lɩɩ wɩɩpɔsʋŋ dɩɩrɩŋ a kɔ a lu lɩɩ tintee-hɩlɩŋ, dɩ ʋ lɩɩ-bul-sɩɩŋ tɔ, dɩ ʋ viliŋ ma hɩl. Ba jaŋ jʋʋ dii ʋ chʋgʋsʋŋ dɩa a paa dʋa-la kala ʋ sɩ bile.

¹⁶ Nɩalɩŋ sɩ hɛ Samarɩa lɛ, ba cheeriŋ jaŋ nyʋa ba nyuŋ lɛ, bɛɛ wɩaa ba lɩɩ ba Wɩa harɩŋ nɛ. Ba jaŋ kpʋba laalɩŋ lɛ, aŋ paa ba biibiisiŋ vɩɩrɛ tinteeŋ kpʋ, a kɛsɛ ba hapuugoo ma kpɛrɛ.”