HOSIA 10 - WƖA TENIŊ

Ba jaŋ kɛŋ Iziral tɩŋŋaa mʋ yoŋ-baga a tɩŋ ba wʋbɔŋŋɔɔ wɩaa

¹ Iziral fa nagɛ girep tɩa sɩ jɛrɛ woruŋ nɛ, a nɩnɛŋ woruŋ. Ʋ nɛnɛɛ sɩ kʋ yʋgɛ woruŋ ŋɩɩ, ʋ saa veŋ-kpaarɛ korunuŋ yʋgɛ. Ʋ tinteeŋ sɩ kɛŋ kɩaa woruŋ ŋɩɩ, ŋɩɩ tɩtɩa nɛ ʋ kpɩɛrɛ tabɩa-la sɩ ŋaa vesiŋ.

² Ba tʋɔbɩɩnaa ka nyɩsɛba nɛ, lɛɛlɛ ʋ maga dɩ ba na hɛɛŋ a tɩŋ ba cheeriŋ wɩaa. La TƖƖNA jaŋ ŋmoo ba korunu-la ta aŋ yɛrɛ ba tabɩa-la sɩ ŋaa vesiŋ.

³ Ŋɩɩ nɛ ba jaŋ bʋl, “La bɩ kuoro kɛnɛ, bɛɛ wɩaa la bɩ La TƖƖNA zile. Dɩ la nɛ fa paala kɛŋ kuoro ma, wʋbɛɛ nɛ ʋ jaŋ wuo ŋaa pɩla?”

⁴ Ba yie hɛ niiriŋ yʋgɛ, a ŋmɩŋmɩɛsɛ pɛɩpɛɩ, a nyɩɛ wɩaa hɛ niiŋ pɩpɩ dɔŋɔ. Ŋɩɩ wɩaa wʋtɩtɩɩ bɩrɩmɛ wʋnyɩɛrɩŋ a tɛllɛ naaŋ, a nagɛ saga sɩ hɛ paara baga lɛ.

⁵ Nɩalɩŋ sɩ hɛ Samarɩa lɛ ka fá tɔŋ-la ba sɩ bile Bɛf Avɛŋ lɛ ʋ nagɛ nɛ-bie nɛ. Nɩalɩŋ sɩɩ to tɔŋ-la jaŋ yel ʋ wɩaa, ŋɩɩ tɩtɩa nɛ nɩalɩŋ sɩ kpʋ pʋsʋŋ pʋpʋ ma jaŋ ŋaa, nɩalɩŋ sɩɩ bigisi ʋ wɩaa, bɛɛ wɩaa ba kɛnʋ laa ba teeŋ nɛ a kaa mʋ yoŋ-baga.

⁶ Ba jaŋ kɛnʋ mʋ Asiiria a joŋo pɩ kuoru-balɩŋ a zilu. Efirem jaŋ dii hɩɩsɩŋ, hɩɩsɩŋ jaŋ kɛŋ Iziral tɩŋŋaa a tɩŋ ba sɩ kɛŋ daaŋ saa tɔmʋŋ aa tou.

⁷ Ba jaŋ kɛsɛ Samarɩa tɩŋŋaa arɩ ba kuoro viiri a nagɛ lɩɩŋ sɩ joŋ daa-bie kaa mʋ.

⁸ Ba jaŋ chei vesiŋ dɩ-kpaarɩa-la sɩ hɛ Bɛf Avɛŋ lɛ ba kaa ŋaa nɩbɔŋ wɩaa. Ʋ nɛ leŋe Iziral tɩŋŋaa ŋaa wʋbɔŋŋɔɔ. Sɔsʋŋ arɩ chɛɛŋ jaŋ lugo tɔ ba vʋɩ-kpaarɛ korunu-la. Ŋɩɩ nɛ ba jaŋ bʋl, “Peelee, má tɔla, dundolluŋ, má tele tɔla.”

⁹ La TƖƖNA sɩ, “Iziral tɩmma, bʋa-la ma sɩ hɛ Gɩbɩa lɛ, ma ŋaa wʋbɔŋŋɔɔ nɛ, aŋ ha ŋɩŋaa wʋbɔŋŋɔɔ. Laalɩŋ fa bɩ kʋ kpʋ wʋbɔŋ ŋaaraa Gɩbɩa lɛɛ?

¹⁰ Bʋa-la lɛ mɩ sɩ cho, mɩ jaŋ dɔgɩsɛba, mɩ jaŋ leŋ dɩ tinteyee nɩaa sii hɛ dɔŋɔ a kɔ ba lɛ, a kɛsɛba a dɔgɩsɛba a tɩŋ ba sɩɩ ŋaa wʋbɔŋŋɔɔ bʋlɩa bʋlɩa.

¹¹ Efirem nagɛ na-paha ba sɩ daga nɛ, ʋ cho mɩaa ŋmobuŋ. Ama lɛɛlɛ mɩ jaŋ chɛ daaŋ vɔɔ mɛrɛ ʋ baŋŋa-la sɩ zɔmɔ lɛ. Mɩ jaŋ kiri Efirem dɩ ʋ vɩvɛŋ, Juda maga dɩ ʋ pɛrɛ, dɩ Jekɔb ma bugili tinteeŋ.

¹² Má duu kɩaa arɩ tʋɔpʋla, a kɛŋ chono-la sɩ bɩ dɛrɛ kʋŋ kɩalɩŋ. Má pɛrɛ ma tintee-la lɛ ma ha sɩ bɩ pɛrɛ. Bʋa-la yie nɛ a magɛ dɩ ma chɛ mɩ-na ma TƖƖNA, a kaa mʋ yi bʋa-la lɛ mɩ sɩ jaŋ kʋ leŋ dɩ ma kɛŋ tʋɔpʋla woruŋ.

¹³ Ama ma kɛŋ tʋɔhɛɛŋ nɛ duu kɩaa, a kɛŋ tʋɔbɔmʋŋ kʋŋ kɩalɩŋ. Ma dii wʋnyɩɛrɩ kɩaa nɛ, bɛɛ wɩaa ma joŋ ma yɩɛlaa hɛ ma tɩtɩa doluŋ arɩ ma laalɩyuori wajɩaba-la sɩ yʋga lɛ nɛ.

¹⁴ Ŋɩɩ wɩaa laalɩŋ jaŋ sii ma nyuŋ a chei ma dɩ-duoruŋ kala, a nagɛ baal kʋbala ba sɩɩ yɩrɛ Salɩmaŋ fa sɩ chei taŋ-la ba sɩɩ yɩrɛ Bɛf Abɛl ŋɩɩ laalɩŋ tapʋlʋŋ. Bʋa-la lɛ nɛ ba paa naamba arɩ ba biiriŋ vɩɩrɛ tinteeŋ kpʋ.

¹⁵ Ŋɩɩ tɩtɩa nɛ jaŋ ŋaa ma Bɛtɛl nɩaa lɛ, bɛɛ wɩaa ma nɩbɔŋ wɩaa yʋga. Dɩ tapʋlɩɩ-la nɛ yie, ba jaŋ chaasa kpʋ Iziral kuoro.”