HOSIA 1 - WƖA TENIŊ

¹ La TƖƖNA fa bʋl wɩaa pɩ Beri nanʋala Hosia nɛ, bʋa-la lɛ dɩ Uzia, Jotam, Ahas arɩ Hezikaaya nɛ fa ŋaa Juda tinteeŋ kuoroo, ka Jehuas nanʋala Jerobuam ma ŋaa Iziral kuoro.

Hosia haala arɩ ʋ biiriŋ

² La TƖƖNA sɩ suomo dɩ ʋ to Hosia lɛ a bʋl wɩaa pɩ Iziral tɩŋŋaa, ʋ bʋla pʋ, “Mʋ jaa hachɔrʋmʋŋ dɩ ʋ lʋl mɛŋgaa-biiriŋ, bɛɛ wɩaa ŋɩɩ tɩtɩa nɛ mɩ nɩaa vɩa mɩ-na ba TƖƖNA aŋ kpʋkpaarɛ vʋɩyaa.”

³ Ŋɩɩ nɛ Hosia mʋ jaa Dibilem tolo Goma, ʋ kɛŋ luoruŋ a lʋl hambolibie pʋ.

⁴ Ŋɩɩ nɛ La TƖƖNA bʋla pʋ, “Hɛ ʋ yɩrɩŋ Jɛzɩrɛl, bɛɛ wɩaa mɩ bɩ jaŋ dieni aŋ dɔgɩsɛ kuoro Jehu doho nɩaa a tɩŋ nɩalɩŋ ʋ sɩ kpʋa Jɛzɩrɛl lɛ wɩaa. Mɩ jaŋ leŋ dɩ Iziral kuoruŋ dɛrɛ.

⁵ Tapʋlɩɩ-la mɩ jaŋ bori Iziral tɩŋŋaa toŋ Jɛzɩrɛl fuonaaŋ lɛ.”

⁶ Goma bɩra kɛŋ luoruŋ a lʋl hantolibie. Ŋɩɩ nɛ La TƖƖNA bʋla pɩ Hosia, “Hɛ ʋ yɩrɩŋ Lo-Ruhama. Ʋ bʋbʋɔŋ nɛ ‘chonuŋ tuo’, bɛɛ wɩaa mɩ bɩra bɩ jaŋ dagɛ mɩ chonuŋ Iziral tɩŋŋaa lɛ, a joŋ ba wʋbɔŋŋɔɔ chɛba.

⁷ Ama mɩ jaŋ dagɛ mɩ chonuŋ Juda doho nɩaa lɛ, a laaba ta. Ama laalɩyuori kɩaa deemba dee mɩ jaŋ kaa laaba ta: Toŋ koo tokobiiŋ koo laalɩŋ janɩŋ koo laalɩŋ ja-jɩllaa. Mɩ-na ba TƖƖNA Wɩa nɛ jaŋ laaba ta.”

⁸ Goma sɩ kɛrɛ Lo-Ruhama yɩlɩŋ lɛ, ʋ bɩra lʋl hambolibie.

⁹ Ŋɩɩ nɛ La TƖƖNA bʋl, “Hɛ ʋ yɩrɩŋ Lo-Ammi. Ʋ bʋbʋɔŋ nɛ ‘mɩ nɩaa dee’, bɛɛ wɩaa ma bɩ mɩ nɩaa ŋaa, mɩ ma bɩ ma Wɩa ŋaa.

¹⁰ Ama bʋa kʋbala jaŋ yi dɩ Iziral tɩŋŋaa pʋŋ a nagɛ hagɩla sɩ pɩŋ mʋgʋ-balɩŋ niiŋ nʋʋ sɩ bɩ jaŋ wuo magɩsɛ koo a dɩɩsɛ. Lee-la ba sɩ bʋla pɩba arɩ ba bɩ mɩ nɩaa ŋaa, ba jaŋ bɩra kɛmba yɩrɛ ‘Wɩa sɩ weye biiriŋ’.

¹¹ Juda nɩaa arɩ Iziral tɩŋŋaa jaŋ bɩra kɛŋ nii-bala. Ba jaŋ lɩɩsɛ sɩpaa-laarɩ bala, ba jaŋ pʋŋa pɛ a dʋa ba tinteeŋ lɛ, dɩ ŋɩɩ ŋaa tapʋl-bal a pɩ Jɛzɩrɛl.”