HAGAƖ 1 - WƖA TENIŊ

Ba yɩrɛ nɩaa dɩ ba kʋ saa La TƖƖNA dɩɩ-balɩŋ

¹ Daarus sɩ dii Pɛsɩa tinteeŋ kuoru-balɩŋ, ʋ jɩ-lɩa, chɛŋ-dʋ tapʋl-bumbuŋ lɛ nɛ, La TƖƖNA to ʋ wʋlaabʋlla Hagaɩ lɛ a bʋl wɩaa pɩ Zerubabɛl arɩ Josua. Zerubabɛl nɛ fa ŋaa nɩɩ-la sɩɩ beŋ Juda tinteeŋ, ʋ nyɩmma nɛ Sɩalɩtɩɛl. Josua ma nɛ fa ŋaa Wɩɩsʋllɩ sɩpaalaaraa nɩhɩaŋ, ʋ ma nyɩmma nɛ Jehozadak.

² Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Nɩaa deemba sɩ, ‘Bʋa-la ha bɩ yie dɩ la paa La TƖƖNA dɩɩ-balɩŋ saa.’ ”

³ Ŋɩɩ nɛ La TƖƖNA to ʋ wʋlaabʋlla Hagaɩ lɛ a bʋl:

⁴ “Bʋa deeŋ lɛ nɛ maga dɩ ma jʋjʋʋ dɩɩ zɔŋŋɔɔ, ka mɩ dɩɩ-balɩŋ pɩŋ jikpeeŋ?”

⁵ Wɩɩ-la La TƖƖNA doluŋ kala Tɩɩna bɩra sɩ bʋla nɛ ŋ-la, “Má fɩɛlɛ ma sɩaa a kɛŋ ma wʋŋaalaa bɩɩna na.

⁶ Ma duu kɩaa a yʋgɛ nɛ, ama kɩalɩŋ ma sɩ kʋma bɩ wɩɩ maga. Ma yie dii kɩaa, ama ma bɩ vɔgɛ. Ma yie nyʋa kɩaa, ama ma bɩ vɔgɛ. Ma yie laalɛ gɛnnɩŋ, ama ba bɩ ma waarɩŋ ka tɔ. Ma yie laa time, ʋ dɛrɛ a nagɛ ma joŋo hɛ gɛrɩ-fehe sɩ luro lɛ nɛ.”

⁷ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má fɩɛlɛ ma sɩaa a kɛŋ ma wʋŋaalaa bɩɩna na.

⁸ Má jɩl peelee a keri doloo kaa tuu a paa mɩ dɩɩ-bal-la saa, dɩ mɩ tʋɔŋ tɔrɛ ʋ nyuŋ, dɩ nɩaa chʋchʋɔlɛmɛ nɩmɛ. Mɩ-na ma TƖƖNA nɛ bʋla.

⁹ Ma faa yɩɛlɛ dɩ ma na ma baga kɩaa a yʋgɛ nɛ, aŋ mɩɩra na mʋa. Mʋa-la ma ma sɩ kaa kɔ dɩa, mɩ ŋmooba ta nɛ. Bɛɛ nɛ tɩɩ? Mɩ-na ma TƖƖNA doluŋ kala Tɩɩna nɛ pɩɛsa. Mɩ dɩɩ-bal-la sɩ pɩŋ jikpeeŋ, ka nʋʋkala fɩɛsɛ sɩɩŋ ʋ tɩtɩa dɩa wɩaa nɛ tɩɩ.

¹⁰ Ŋɩɩ wɩaa nɛ tɩɩ duonuŋ bɩ nɩɩ, ma kʋduuloo ma bɩ wasɛ.

¹¹ Mɩ leŋe hɩlɩŋ chɩŋ ma bagɩsɩŋ arɩ peelee lɛ nɛ, mɩaa, tɩɩnɛnɛɛ sɩnɩŋ arɩ olif nʋʋŋ nyaa tinteeŋ lɛ. Hɩl-la chei nuhuobiinee arɩ pʋsʋŋ kala nɛ arɩ tɩntɩmɩɩ kala ma sɩɩ tɩŋ.”

¹² Ŋɩɩ nɛ Sɩalɩtɩɛl nanʋala Zerubabɛl arɩ Jehozadak nanʋala Josua sɩ ŋaa Wɩɩsʋllɩ sɩpaalaaraa nɩhɩaŋ arɩ nɩkaana-la kala sɛɩ ba TƖƖNA Wɩa niiŋ arɩ wɩalɩŋ Wɩa wʋlaabʋlla Hagaɩ sɩ bʋla, bɛɛ wɩaa ba TƖƖNA Wɩa nɛ tɩmʋ. Ŋɩɩ nɛ nɩalɩŋ fa fɩfá La TƖƖNA.

¹³ Ŋɩɩ nɛ Hagaɩ, nɩɩ-la La TƖƖNA sɩ tɩma, joŋ tɩndaarɩ-la La TƖƖNA sɩ bʋla pʋ a to pɩ nɩalɩŋ. La TƖƖNA sɩ, “Mɩ hɛ ma teeŋ nɛ.”

¹⁴ Ŋɩɩ nɛ La TƖƖNA joŋ tʋɔbɩɩnaa hɛ Zerubabɛl lɛ, nɩɩ-la sɩɩ beŋ Juda tinteeŋ arɩ Josua ma sɩ ŋaa Wɩɩsʋllɩ sɩpaalaaraa nɩhɩaŋ arɩ nɩkaanaa kala lɛ. Zerubabɛl nyɩmma nɛ fa Sɩalɩtɩɛl, Josua ma nyɩmma nɛ fa Jehozadak. Ba kʋ suomo tɩtɩŋ ba TƖƖNA doluŋ kala Tɩɩna dɩɩ-bal-la tɩntɩŋŋaa.

¹⁵ Dɩ Daarus sɩ dii Pɛsɩa tinteeŋ kuoruŋ, ʋ jɩ-lɩa chɛŋ-dʋ tapʋlaa mara arɩ banɛsɛ lɛ nɛ ŋɩɩ.