ƐZƖRA 10 - WƖA TENIŊ

Nɩaa dagɛ ba wʋbɔŋŋɔɔ

¹ Ɛzɩra fa sɩ chʋɔlɛ Wɩa aŋ pɛ dɩdagɛ wɩalɩŋ ba sɩ ŋaa chei, a yiyel a foro titel Wɩa dɩa sɩpaaŋ, ŋɩɩ nɛ Iziral tɩŋŋaa nɩ-daŋ, baalaa, haalaa arɩ hambiisiŋ kʋ chɩna gollu, a ma faasa yiyel.

² Ŋɩɩ nɛ Jɛhɩɛl nanʋala Sɛkanɩa, Ɛlam doho nɩaa dɔŋɔ bʋla pɩ Ɛzɩra, “La bɩ La TƖƖNA niiŋ to la sɩ jaa nɩwogusuŋ sɩ golli la toloo. Ama la Iziral tɩŋŋaa ha kɛŋ yɩɛlaa nɛ.

³ Lɛɛlɛ, má leŋ dɩ la bil niiŋ la dɩ la Wɩa pɛgɛ, aŋ kiri haala-la arɩ ba biiriŋ dɩ ba viiri. La jaŋ ŋaa wɩɩ-la ŋ-na mɩ kʋhɩaŋ arɩ nɩalɩŋ sɩɩ zil la Wɩa sɩ daga. Má leŋ dɩ la ŋaa ŋɩɩ Wɩa wombiiŋ sɩ daga.

⁴ Sii chɩŋ, wɩɩŋ deeŋ hɛ ŋ nɩsɩŋ lɛ nɛ, la jaŋ pɛ ŋ lɛ, ŋɩɩ wɩaa nyɩrɛ bɔyɛ aŋ ŋaa wɩɩ-la.”

⁵ Ŋɩɩ nɛ Ɛzɩra sii chɩŋ, a leŋ Wɩɩsʋllɩ sɩpaalaaraa arɩ Levi doho nɩaa, a pɛ Iziral tɩŋŋaa kala lɛ ba ŋmɩɛsɛ arɩ ba jaŋ ŋaa wɩɩ-la Sɛkanɩa sɩ bʋla. Ŋɩɩ nɛ ba ŋmɩɛsɛ.

⁶ Ŋɩɩ nɛ Ɛzɩra sii Wɩa dɩa-la sɩpaaŋ, a mʋ Ɛlɩasɩb nanʋala Jehohanaŋ dɩa, a chʋa nɩmɛ. Ama ʋ bɩ kʋŋkala die, ʋ bɩ lɩɩŋ ma nyʋa nɩmɛ, bɛɛ wɩaa ʋ fa haa yel nɛ a tɩŋ nɩalɩŋ sɩ lɩɩ yoŋ-baga kɔ sɩ bɩ Wɩa niiŋ to.

⁷ Ŋɩɩ nɛ ba heele bʋl Juda arɩ Jerusalɛm kala lɛ dɩ nɩalɩŋ sɩ lɩɩ yoŋ-baga kɔ kala kʋ hilimi Jerusalɛm lɛ.

⁸ Dɩ nʋʋkala nɛ bɩ kɔ a kaa mʋ yi tapʋlaa batori pɛgɛ, ba jaŋ laa ʋ dʋa kala, arɩ tɩntɩnnɩ-hɩasɩŋ arɩ nɩhɩasɩŋ sɩ dagɛ ŋɩɩ, aŋ kiru ta nɩalɩŋ sɩ lɩɩ yoŋ-baga kɔ tʋɔŋ.

⁹ Tapʋlaa batori-la pɛgɛ, chɛŋ-nibi tapʋl mara chɛɛŋ nɛ ŋɩɩ, baala-la kala sɩ hɛ Juda arɩ Bɛnjamɩŋ lɛ kɔ Jerusalɛm, a hɔŋ ba dɩ-hilimiŋ, Wɩa dɩa-la sɩpaaŋ. Ba tʋɔŋ kala fa chaasa chei nɛ a tɩŋ hilime-la arɩ duonuŋ fa sɩɩ nɩɩ wɩaa.

¹⁰ Ŋɩɩ nɛ Wɩɩsʋllɩ sɩpaalaara Ɛzɩra sii chɩŋ a bʋla pɩba, “Ma bɩ Wɩa niiŋ to, aŋ jaa tintee-wogusuŋ toloo a leŋ Iziral tɩŋŋaa cheeriŋ wasɛ yʋgɛ.

¹¹ Lɛɛlɛ, má dagɛ wɩalɩŋ ma sɩ ŋaa chei a pɩ La TƖƖNA ma naabalɩmaba Wɩa aŋ ŋɩŋaa wɩalɩŋ ʋ sɩɩ chɛ. Má pɔrɛ ma tɩtɩa a lɩɩ nɩalɩŋ sɩ gollima tʋɔŋ arɩ tintee-wogusuŋ toloo-la ma sɩ jaa lɛ.”

¹² Ŋɩɩ nɛ nɩalɩŋ kala sɩ hilime faasa suri ba yikorusuŋ a laa bʋl, “Ŋ bʋl woruŋ nɛ, la maga la ŋaa ŋɩɩ ŋ sɩ bʋla nɛ.

¹³ Ama la faasa yʋgɛ nɛ daha, ka ʋ ŋaa yibiiŋ ma. La bɩ jaŋ wuo chɩŋ jeeŋ harɩŋ. Bɩra ma, wɩɩŋ deeŋ bɩ jaŋ wuo dɛrɛ chɛ-bala koo tapʋlaa balɩa pɛgɛ, bɛɛ wɩaa la chaasa ŋaa wʋbɔŋ nɛ woruŋ wɩɩŋ deeŋ lɛ.

¹⁴ Leŋ dɩ la tɩntɩnnɩ-hɩasɩŋ laa la kala nyuŋ a ŋaa wɩɩŋ deeŋ pɩla. Leŋ dɩ nʋʋkala sɩ hɛ la tasɩŋ lɛ a jaa tintee-wogusuŋ toloo kɔ bʋa-la lɛ ba sɩ daga, ba dɩ taŋ-la sɩpaalaaraa arɩ sarɩya diiree, a kaa mʋ yi bʋa-la lɛ La TƖƖNA baaŋ-la ʋ sɩ faasa na la nyuŋ a tɩŋ wɩɩŋ deeŋ wɩaa sɩ jaŋ fɩɛlɛ.”

¹⁵ Nɩaa deemba-na fa bɩ wɩɩ-la sɛyɛ, Asahɛl nanʋala Jonataŋ arɩ Tɩkɩva nanʋala Jazeya, Mesulam Sabɛtaɩ sɩ ŋaa Levi doho nʋʋ ma chɩŋ ba harɩŋ.

¹⁶ Ŋɩɩ nɛ nɩalɩŋ sɩ lɩɩ yoŋ-baga kɔ ŋaa ŋɩɩ ba sɩ daga. Ɛzɩra sɩ ŋaa Wɩɩsʋllɩ sɩpaalaara lɩɩsɛ dɩa dɩa nɩhɩasɩŋ. Ba kʋbala kala chɩŋ ʋ nyɩŋ-nɩaa nyuŋ, ba ŋmʋnsɛ ba kala yɩraa. Chɛŋ-fii tapʋl-bumbuŋ chɛɛŋ, ba suomi dɩ ba beŋ wɩalɩŋ na.

¹⁷ Ʋ mʋʋ yi chɛŋ-bumbuŋ tapʋl-bumbuŋ chɛɛŋ, dɩ ba bʋl wɩaa a mʋ tɩgɛ nɩalɩŋ kala sɩ jaa tintee-wogusuŋ toloo wɩaa a dɛrɛ.

Nɩalɩŋ sɩ jaa tintee-wogusuŋ toloo

¹⁸ Wɩɩsʋllɩ sɩpaalaaraa doho nɩaa tʋɔŋ, nɩaa deemba nɛ jaa tintee-wogusuŋ toloo: Jozadak nanʋala Jesua arɩ ʋ naambiiriŋ doho nɩaa tʋɔŋ, Maasɛya, Elieza, Jarɩb arɩ Gedalia.

¹⁹ (Ba kala hɛ niiŋ nɛ arɩ ba jaŋ vɩa ba haala-la, aŋ ka ba kʋŋkala lɩɩsɛ pie-bele dɩ ba kaa ŋaa ba cheeriŋ Wɩɩsʋlʋŋ.)

²⁰ Ima ma doho nɩaa tʋɔŋ, Hanani arɩ Zɛbadɩa.

²¹ Harɩm ma doho nɩaa tʋɔŋ, Maasɛya, Ɩlaaja, Sɛmaaya, Jɛhɩɛl arɩ Uzia.

²² Pasɩhɔ doho nɩaa ma tʋɔŋ, nɩalɩŋ sɩ jaa tintee-wogusuŋ toloo nɛ ŋ-la: Elionai, Maasɛya, Ɩsɩmɛl, Nɛtanɛl, Jozabad arɩ Ɛlasa.

²³ Levi doho nɩaa ma tʋɔŋ, nɩaa deemba nɛ jaa tintee-wogusuŋ toloo: Jozabad, Sɩmɛɩ, Kɛlaaya (ʋ nɛ ha Kɛlɩta), Pɛtahɩa, Juda arɩ Elieza.

²⁴ Yɩɩlɩ yɩɩraa ma tʋɔŋ nɩɩ-la sɩ jaa tintee wogo tolo nɛ Ɛlɩasɩb. Boi-pɔɔrɔɔ ma tʋɔŋ nɩalɩŋ sɩ jaa tintee-wogusuŋ toloo nɛ, Salum, Tɛlɛm arɩ Uri.

²⁵ Iziral tɩmma-la tʋɔŋ nɩalɩŋ dɔnsʋŋ ma sɩ jaa tintee-wogusuŋ toolo nɛ ŋ-la: Parɔs doho nɩaa tʋɔŋ, Ramɩa, Izia, Malɩkɩja, Mɩjamɩŋ, Eliaza, Malɩkɩja dɔŋɔ arɩ Bɛnaaya.

²⁶ Elam ma doho nɩaa tʋɔŋ: Matanɩa, Zɛkarɩya, Jɛhɩɛl, Abidi, Jɛrɛmɔf arɩ Ɩlaaja.

²⁷ Zatu ma doho nɩaa tʋɔŋ: Elionai, Ɛlɩasɩb, Matanɩa, Jɛrɛmɔf, Zabad arɩ Aziza.

²⁸ Bɛbaɩ ma doho nɩaa tʋɔŋ, Jehohanaŋ, Hananaaya, Zebai arɩ Afɩlaɩ.

²⁹ Banɩ doho nɩaa ma tʋɔŋ: Mesulam, Maluk, Adaaya, Jasub, Sɩal arɩ Jɛrɛmɔf.

³⁰ Pahaf-Mʋab ma doho nɩaa tʋɔŋ: Adɩna, Kɛlal, Bɛnaaya, Maasɛya, Matanɩa, Bɛzalɛl, Binui arɩ Manasɛ.

³¹ Harɩm doho nɩaa ma tʋɔŋ: Elieza, Ɩsɩja, Malɩkɩja, Sɛmaaya, Simioŋ,

³² Bɛnjamɩŋ, Maluk arɩ Sɛmarɩa.

³³ Hasum doho nɩaa ma tʋɔŋ: Matɛnaɩ, Mataata, Zabad, Ɛlɩfɛlɛt, Jɛrɛmaɩ, Manasɛ arɩ Sɩmɛɩ.

³⁴ Banɩ doho nɩaa ma tʋɔŋ: Maadaɩ, Amɩram, Uwel,

³⁵ Bɛnaaya, Bedeya, Keluhi,

³⁶ Vanɩa, Mɛrɛmɔf, Ɛlɩasɩb,

³⁷ Matanɩa, Matɛnaɩ arɩ Jaasʋ.

³⁸ Binui doho nɩaa ma tʋɔŋ: Sɩmɛɩ,

³⁹ Sɛlɛmaaya, Netaŋ, Adaaya,

⁴⁰ Makinadebai, Sasaɩ, Saraɩ,

⁴¹ Azarɛl, Sɛlɛmaaya dɔŋɔ, Sɛmarɩa,

⁴² Salum, Amarɩa arɩ Josɛf.

⁴³ Nebo doho nɩaa ma tʋɔŋ: Jɛyɛl, Matɩtɩa, Zabad, Zebina, Jadaɩ, Jowɛl arɩ Bɛnaaya.

⁴⁴ Nɩaa deemba kala fa jaa tintee-wogusuŋ toloo nɛ, ba dɔnsʋŋ kɛŋ haala-la a lʋl biiriŋ.