ƐZƖKƖƐL 9 - WƖA TENIŊ

Ba kpʋ vʋɩ-kpaaraa

¹ Ŋɩɩ nɛ mɩ nɩɩ La TƖƖNA faasa kpɩa, “Má kɔ, ma nɩalɩŋ sɩ jaŋ dɔgɩsɛ tabal-la nɩaa, nʋʋkala kori ʋ bayuori kɩaa.”

² Ŋɩɩ nɛ mɩ na baalaa balɩdʋ dɩ ba lɩɩ wɩɩpɔsʋŋ nagʋa boi-baala-la sɩ hɛ nyuŋ dɩɩrɩŋ kʋkɔ, ba kʋŋkala kori bayuori kʋŋ nɛ. Ba tʋɔŋ, baal kʋbala nɛ fa hɛ nɩmɛ a laalɛ gɛrɩpɛ fʋfʋlʋŋ gɛrɩŋ, ka kʋŋ ba sɩ kaa ŋmʋŋmʋnsɛ kɩaa hɛ ʋ sɛmɛ. Ba kɔ a chɩŋ kɔlɩɩŋ Wɩɩsʋlʋŋ koru-la sɛmɛ.

³ Ŋɩɩ nɛ Iziral tɩŋŋaa Wɩa tʋla lɩɩ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ lɛ a jɩl wɩa-nyuŋ, lee-la ba fa sɩ chɩna, a mʋ Wɩa dɩɩ-bal-la boiŋ nii-jʋʋlʋŋ. Ŋɩɩ nɛ La TƖƖNA yɩrɛ baal-la sɩ laalɛ gɛrɩpɛ fʋfʋlʋŋ gɛrɩŋ, ka kʋ-la ba sɩ kaa ŋmʋŋmʋnsɛ kɩaa hɛ ʋ sɛmɛ,

⁴ a bʋla pʋ, “Gɔllɛ Jerusalɛm tabal-la lɛ a tuuri magɩlɩŋ hɛ nɩaa tilliŋ lɛ, nɩalɩŋ tʋɔŋ sɩ cheye ba yiyel a tɩŋ wʋkɩsɩa-la kala nɩaa sɩɩ ŋaa taŋ-la lɛ wɩaa.”

⁵ Ŋɩɩ nɛ mɩ nɩɩ dɩ ʋ bʋla pɩ nɩalɩŋ dɔnsʋŋ ma, “Má to ʋ harɩŋ a gɔllɛ tabal-la a kpʋ nʋʋkala sɩ bɩ magɩlɩŋ kɛnɛ. Má sɩ́ nʋʋkala nenige fá koo a leŋ nʋʋ.

⁶ Má kpʋ banɩhɩasɩŋ, bapʋɔsaa, hatoloo, naamba arɩ hambiisiŋ. Ama má sɩ́ nʋʋkala sɩ kɛŋ magɩl-la digu. Má suomi mɩ dɩa lɛ.” Ŋɩɩ nɛ ba suomi sɩpaalaara-la sɩ hɛ Wɩa dɩɩ-bal-la sɩpaaŋ.

⁷ Ŋɩɩ nɛ ʋ bʋla pɩba, “Má ŋaa disiniŋ hɛ Wɩa dɩɩ-balɩŋ lɛ, a paa sʋʋnʋŋ su ʋ kaalɩsɩ-la kala. Má mʋ a ŋaa ŋɩɩ.” Ŋɩɩ nɛ ba lɩɩ a suomo kpʋkpʋ nɩaa tabal-la kala lɛ.

⁸ Ba fa sɩɩ kpʋ nɩaa ŋɩɩ, ka mɩ chɩŋ mɩ dʋndʋŋ, ŋɩɩ nɛ mɩ tele chu a ŋmoo niiŋ a pɩɛsɛ, “Ou, La TƖƖNA Wɩɩjarɩbakɔ, ŋ baanɩŋ chaasa sii Jerusalɛm nyuŋ nɛ ŋ chɩchɛ dɩ ŋ kpʋ nʋʋ na-kala sɩ hɛ Iziral lɛɛ?”

⁹ Ŋɩɩ nɛ Wɩa bʋl, “Iziral arɩ Juda nɩaa chaasa ŋaa wʋbɔŋ bal nɛ, ba kpʋ nɩaa yʋgɛ nɛ tintee-la lɛ, ka Jerusalɛm kala su arɩ wʋbɔŋŋɔɔ ŋaanɩŋ. Ba yie bʋl, ‘La TƖƖNA vɩa la tinteeŋ ta nɛ, ʋ bɩ laa na.’

¹⁰ Ŋɩɩ wɩaa, mɩ bɩ jaŋ kɔ dɩ mɩ fá ba nisusuŋ koo a lemba, ama mɩ jaŋ joŋ wɩalɩŋ ba sɩ ŋaa a tiŋ ba lɛ.”

¹¹ Ŋɩɩ nɛ baal-la fa sɩ laalɛ gɛrɩpɛ fʋfʋlʋŋ gɛrɩŋ, ka kʋ-la ba sɩ kaa ŋmʋŋmʋnsɛ kɩaa hɛ ʋ sɛmɛ mɩɩra kɔ a bʋl, “Mɩ ŋaa wɩɩ-la ŋ sɩ sɩ mɩ ŋaa nɛ.”