ƐZƖKƖƐL 8 - WƖA TENIŊ

Iziral tɩŋŋaa ka kpaarɛ vʋɩyaa Wɩa dɩa lɛ

¹ Iziral tɩŋŋaa fa sɩ hɛ yoŋ-baga lɛ jɩ-dʋ tʋɔŋ chɛŋ-dʋ tapʋl-nɔŋ chɛɛŋ, mɩ dɩ Juda nɩaa sɩpaalaaraa hɔŋ mɩ dɩa lɛ, ŋɩɩ nɛ La TƖƖNA Wɩɩjarɩbakɔ doluŋ kʋ jʋʋmɛ.

² Ŋɩɩ nɛ mɩ beŋ a na kʋŋ sɩ nagɛ nuhuobiine. A chɩŋ ʋ tɩŋa kaa tuu nagɛ nyiniŋ, nyuŋ dɩɩrɩŋ ma chaasa fɩɛsɛ a nagɛ hɔɔŋ sɩ hɛ nyiniŋ lɛ.

³ Ŋɩɩ nɛ ʋ kɛŋ kʋŋ sɩ nagɛ nɩsɩŋ tɩɛnɛ a kɛŋ mɩ nyu-pʋnaa lɛ a kɛmmɛ joŋ. Wɩɩŋ deeŋ sɩ nagɛ duosoo tʋɔŋ, Wɩa Dɩma jommi kaa jɩl wɩa-nyuŋ a kɛmmɛ mʋ Jerusalɛm. Ʋ sɩ kɛmmɛ mʋ nɩmɛ, ʋ kɛmmɛ mʋ Wɩa dɩɩ-bal-la tʋɔŋ kaala-la sɩ hɛ wɩɩpɔsʋŋ nagʋa boi-baalɩŋ lɛ, lee-la tɔŋ kʋbala fa sɩ chɩna, La TƖƖNA baanɩŋ chaasa sisii ʋ nyuŋ.

⁴ Nɩmɛ nɛ mɩ na Iziral tɩŋŋaa Wɩa tʋla, a nagɛ kʋ-la mɩ fa sɩ na a nagɛ duosoo tʋɔŋ dɩ mɩ hɛ Keba fuo-la leriŋ.

⁵ Ŋɩɩ nɛ Wɩa fa bʋla pɩmɛ, “Nuhuobiiŋ, beŋ wɩɩpɔsʋŋ nagʋa dɩɩrɩŋ.” Mɩ sɩ bene, mɩ na dɩ tɔŋ-la fa sɩ leŋe La TƖƖNA baanɩŋ sii chɩna kpagɛ Wɩɩsʋlʋŋ koru-la wɩɩpɔsʋŋ nagʋa boi-baal-la niiŋ.

⁶ Ŋɩɩ nɛ ʋ pɩɛsɛmɛ, “Nuhuobiiŋ, ŋ na wɩalɩŋ ba sɩɩ ŋaa nɛɛ? Bee na wʋkɩsɩa-la Iziral tɩŋŋaa sɩɩ ŋaa daha, wɩalɩŋ sɩ kiri mɩ tɩta mɩ dɩa lɛ. Ama ŋ ha jaŋ na wʋkɩsaa a kɩɩ wɩɩŋ deeŋ.”

⁷ Ʋ kɛmmɛ kaa mʋ Wɩa dɩɩ-bal-la kaala boiŋ niiŋ, mɩ beŋ a na bʋa jeeŋ lɛ.

⁸ Ŋɩɩ nɛ ʋ bʋla pɩmɛ, “Nuhuobiiŋ, luri bʋa jeeŋ lɛ.” Mɩ luri jee-la a na boiŋ niiŋ nɩmɛ.

⁹ Ʋ bɩra bʋla pɩmɛ, “To boi-nii-la jʋʋ a na wʋbɔmɔ-la arɩ wʋkɩsɩa-la ba sɩɩ ŋaa nɩmɛ.”

¹⁰ Ŋɩɩ nɛ mɩ jʋʋ a na dɩ ba tuuri kɩalɩŋ sɩɩ vaamɛ tinteeŋ arɩ pʋsʋ-la dɔnsʋŋ sɩ kɛŋ disiniŋ a hɛ jee kala lɛ, a pɛ tɔmɔ-la Iziral tɩŋŋaa sɩɩ kpaarʋ lɛ.

¹¹ Iziral tɩŋŋaa sɩpaalaaraa mahɩŋ batori arɩ fii hɛ nɩmɛ a pɛ Safaŋ nanʋala Jazanɩa lɛ. Sɩpaalaara-la kʋŋkala fa kori kʋ-la ba sɩ kaa nyɩnyɩgɛ kʋsʋɔrʋsʋŋ nɛ, ka nyʋɔsʋŋ sisii kʋsʋɔrʋsʋŋ sʋɔra sɩ sɩma lɛ.

¹² Wɩa pɩɛsɛmɛ, “Nuhuobiiŋ, ŋ na Iziral tɩŋŋaa sɩpaalaaraa sɩɩ ŋaa wɩalɩŋ birimiŋ tʋɔŋ nɛɛ? Nʋʋkala hɛ ʋ vʋɩyaa dɩa lɛ nɛ. Ba yie bʋl, ‘La TƖƖNA bɩ laa na, ʋ vɩa la tinteeŋ ta nɛ.’

¹³ Ʋ bɩra sɩ, ‘Ŋ ha jaŋ na wʋkɩsɩa-la dɔnsʋŋ ba sɩ ŋaa sɩ paala kɩɩ wɩɩŋ deeŋ.’ ”

¹⁴ Ŋɩɩ nɛ ʋ kɛmmɛ kɔ Wɩa dɩɩ-bal-la wɩɩpɔsʋŋ nagʋa boi-baalɩŋ, mɩ na haalaa dɩ ba hɔnɔ a yiyel vene-la ba sɩɩ yɩrɛ Tamus sɩ sʋba wɩaa.

¹⁵ Ʋ bʋla pɩmɛ, “Nuhuobiiŋ, ŋ na wɩɩŋ deeŋ nɛɛ? Ŋ ha jaŋ na wʋkɩsaa sɩ kɩɩ ŋɩɩ.”

¹⁶ Ʋ kɛmmɛ kaa kʋ jʋʋ La TƖƖNA dɩ-bal-la kaala tʋɔŋ, mɩ na baalaa mara arɩ banɔŋ dɩ ba chɩŋ Wɩa dɩɩ-bal-la boi-baalɩŋ lɛ, zawʋra arɩ Wɩɩsʋlʋŋ koru-la pɛgɛ, ba harɩŋ jɩa Wɩa dɩɩ-bal-la ka ba sɩaa chaasɛ wɩɩpɔsʋŋ dɩɩrɩŋ a kpirime chʋchʋɔlɛ wɩɩpɔsʋŋ.

¹⁷ Ŋɩɩ nɛ Wɩa pɩɛsɛmɛ, “Nuhuobiiŋ, ŋ na wɩɩŋ deeŋ nɛɛ? Ʋ bɩ wʋbie ŋaa Juda doho nɩaa sɩ ŋaa wʋkɩsaa deemba daha. Ʋ maga dɩ ba leŋ dɩ yuosuŋ su tintee-la nɛ a leŋ dɩ mɩ baanɩŋ sisii? Bee na ba sɩ paa daa-biisiŋ jɩjɩl ba mɩɩsɩŋ a chichesi vʋɩ-kpaaraa ŋɩɩ.

¹⁸ Ŋɩɩ wɩaa, mɩ jaŋ dagɛba arɩ baanɩŋ, mɩ bɩ jaŋ fá ba nenige koo a lemba. Ba jaŋ faasa suri ba yikoro a sʋsʋlmɛ, ama mɩ bɩ jaŋ jegili ba teeŋ.”