ƐZƖKƖƐL 7 - WƖA TENIŊ

Iziral tɩŋŋaa dɩdɛrɩŋ yie nɛ

¹ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, wɩɩ-la mɩ-na ma TƖƖNA Wɩɩjarɩbakɔ sɩ bʋlaa tɩgɛ Iziral tɩŋŋaa tinteeŋ lɛ nɛ ŋ-la: Ma tinteeŋ kala cheyiŋ dɩdɛrɩŋ kɔ nɛ.

³ Lɛɛlɛ, ma cheyiŋ kɔ nɛ, mɩ jaŋ joŋ mɩ baanɩŋ a fɩɩsɛ ma lɛ. Mɩ jaŋ dii ma sarɩya a mʋ tɩgɛ ma wʋŋaalaa lɛ, a joŋ wʋkɩsɩa-la kala ma sɩ ŋaa chɩmɩŋ a tiŋ ma lɛ.

⁴ Mɩ bɩ jaŋ fá ma nenige koo a lemma. Mɩ jaŋ dɔgɩsɛma a tiŋ ma wʋŋaalaa arɩ wʋkɩsɩa-la ma sɩ ŋaa chɩmɩŋ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.”

⁵ La TƖƖNA Wɩɩjarɩbakɔ bɩra sɩ, “Wʋlɔrʋnʋŋ jaŋ kɔ ma lɛ a lɩɩ aŋ ka pɩpɩ dɔŋɔ.

⁶ Ma dɩdɛrɩŋ kɔ nɛ, ʋ kɔ nɛ a chɩna gbɛrɛma, ʋ kɔ nɛ.

⁷ Cheeriŋ puu ma nɩalɩŋ sɩ hɛ tintee-la lɛ nɛ. Bʋa-la yie nɛ, tapʋlɩɩ-la kpaga nɛ, nɩaa ka chel nɛ, tʋɔtɔrʋŋ bɩra tuo ba peelee nyuŋ.

⁸ Ʋ bɩ jaŋ dieni, mɩ jaŋ faasa na baanɩŋ ma nyuŋ. Mɩ jaŋ dii ma sarɩya a dɔgɩsɛma a mʋ tɩgɛ ma wʋŋaalaa arɩ wʋkɩsɩa-la kala ma sɩ ŋaa lɛ.

⁹ Mɩ bɩ jaŋ fá ma nenige koo a lemma. Mɩ jaŋ dɔgɩsɛma a tiŋ ma wʋŋaalaa arɩ wʋkɩsɩa-la ma sɩ ŋaa chɩmɩŋ. Ŋɩɩ nɛ ma jaŋ jɩŋ arɩ mɩ-na ma TƖƖNA nɛ dɔgɩsɛma.

¹⁰ Tapʋlɩɩ-la yie nɛ, ʋ kɔ nɛ, cheeriŋ tapʋlʋŋ puu Iziral tɩŋŋaa nɛ. Toŋguluŋ je ba nyuŋ nɛ. Ba babii-ballɩŋ paala yʋga kieli nɛ.

¹¹ Doluŋ diiniŋ paala pʋrɩgɛ nɛ a nagɛ toŋguluŋ sɩ je dɩ ʋ dɔgɩsɛ nɩbɔŋŋɔɔ. Nɩalɩŋ kʋŋkala bɩ jaŋ ka, nɩ-daŋ-la, ba dʋa arɩ ba kʋŋkala ma sɩ kɛŋ yuŋuŋ.

¹² Bʋa-la yie nɛ, tapʋlɩɩ-la kɔ nɛ. Nɩalɩŋ sɩ yɔɔ kɩaa, má sɩ́ leŋe dɩ ma tʋɔŋ tɔrɛ, nɩalɩŋ ma sɩɩ yallɛ kɩaa, má ma sɩ́ leŋe dɩ ma tʋɔŋ chei, bɛɛ wɩaa Wɩa baanɩŋ sii ma kala nyuŋ nɛ.

¹³ Nɩɩ-la sɩ yallɛ ʋ tinteeŋ bɩra bɩ jaŋ wuo laa ʋ tintee-la dɩ ʋ dɩ tɩɩna ʋ sɩ yalla pa kala nɛ hɛ ba mɩɩsɩŋ lɛ, bɛɛ wɩaa wɩalɩŋ Wɩa sɩ joŋo dagɛmɛ a nagɛ duosoo tʋɔŋ a mʋ tɩgɛ ma nɩ-daŋ-la lɛ, ʋ bɩ jaŋ kaa bɩrɩmɛ. A tɩŋ ma wʋbɔŋŋɔɔ wɩaa, ma kʋŋkala bɩ jaŋ kɛŋ mɩɩsɩŋ.

¹⁴ Ba ŋmʋʋ banyile nɛ a nyɩgɩlɛ, ama nʋʋkala bɩ jaŋ mʋ laalɩŋ, bɛɛ wɩaa mɩ na baanɩŋ nɛ nɩ-daŋ-la kala nyuŋ.

¹⁵ Laalɩŋ jaŋ kpʋ nɩalɩŋ sɩ hɛ jeeŋ harɩŋ, ka dɩ losuŋ arɩ nyanyal bɔŋŋɔɔ ma kpʋ nɩalɩŋ sɩ hɛ jaŋ lɛ.

¹⁶ Nɩalɩŋ kala sɩ ka a bɩ sʋba jaŋ fá jɩla hɛ peelee nyuŋ a yiyel a nagɛ kokosuŋ sɩ hɛ fuonaaŋ lɛ, a tɩŋ ba wʋbɔŋŋɔɔ wɩaa.

¹⁷ Ba nɩsaa jaŋ ŋaa gbɛlɛɛ, dɩ ba naadʋsʋŋ kala chichel.

¹⁸ Ba jaŋ laalɛ tʋɔ-chei gɛnnɩŋ dɩ fawʋllʋŋ chaasa jʋʋba. Hɩɩsɩŋ jaŋ jʋʋba, ba jaŋ fʋŋ ba nyusuŋ.

¹⁹ Ba jaŋ joŋ ba hɔpʋla yuo ta womporunuŋ lɛ, ba sɛlɩmɛ jaŋ ŋaa kʋŋ sɩ kɛŋ disiniŋ a pɩba. Ba sɛlɩmɛ arɩ ba hɔpʋla bɩ jaŋ wuo laaba ta tapʋlɩɩ-la La TƖƖNA sɩ jaŋ na baanɩŋ ba nyuŋ. Kɩalɩŋ bɩ jaŋ leŋ dɩ ba vɔgɛ, ba nɛ fa leŋe ba ŋaa wʋbɔmʋŋ.

²⁰ Ba fa kɛŋ ba yaraa kpɩɛraa ŋmuŋmoo bɔyɛ nɛ, a kɛmba ŋaa tɔŋŋɔɔ sɩ ŋaa disiŋ kɩa arɩ vesiŋ mɩ sɩɩ kɩsʋ. Ŋɩɩ wɩaa, mɩ jaŋ kɛŋ kɩalɩŋ bɩrɩmɛ kɩaa sɩ kɛŋ disiniŋ ba teeŋ.

²¹ Mɩ jaŋ leŋ dɩ tintee-wogusuŋ kʋ yuo laaba, nɩbɔŋŋɔɔ jaŋ yuo paa kɩalɩŋ a ŋaa dɩ ba kɛŋ disiniŋ ba teeŋ.

²² Mɩ jaŋ joŋ harɩŋ yɩaba, dɩ nɩbɔŋŋɔɔ nɛ chei lee-la mɩ sɩ cho a leŋ dɩ ʋ kɛŋ disiniŋ, gaaraa jaŋ kʋ jʋʋ lee-la a ŋaa dɩ ʋ kɛŋ disiniŋ.

²³ Ba libi chɔrʋmɔɔ ba sɩ jaŋ kaa vɔɔ nɩaa, bɛɛ wɩaa nɩaa kpʋnʋŋ su ba tintee-la kala nɛ, ba tasɩŋ ma su arɩ yuosuŋ.

²⁴ Mɩ jaŋ kɛŋ tintee-la nɩaa sɩ chaasa bɔŋ a kʋ hɛ ba lɛ dɩ ba laa ba dɩɩsɩŋ. Ba nɩduoruŋ babii-ballɩŋ kala jaŋ dɛrɛ dɩ mɩ nɛ leŋe dɩ tinteye-la ŋaa disiniŋ hɛ lere-la ba sɩɩ kpaarɛ ba vesiŋ.

²⁵ Dɩ fawʋllʋŋ nɛ chaasa jʋʋba, ba jaŋ chɩchɛ dɩ ba hɔŋ arɩ fɩɛlɩŋ, ama ba bɩ jaŋ na.

²⁶ Wʋlɔrʋnʋŋ jaŋ jʋʋba a lɩɩ aŋ ka pɩpɩ dɔŋɔ, dɩ ba nɩnɩɩ wʋbɔŋŋɔɔ bʋa na-kala lɛ. Ba jaŋ sʋl mɩ wʋlaabʋllaa dɩ ba dagɛba wɩalɩŋ ba sɩ jaŋ ŋaa. Wɩɩsʋllɩ sɩpaalaaraa sɩɩ dagɛ nɩaa wombii-la mɩ sɩ bile dɩ ba tuto bɩ jaŋ kɛŋ wɩɩ ba sɩ jaŋ bʋla pɩ nɩalɩŋ, nɩhɩasɩŋ ma bɩ jaŋ kɛŋ wɩɩ ba sɩ jaŋ dagɛba.

²⁷ Kuoro jaŋ yel, dɩ ʋ sɩpaalaaraa ma tʋɔbɩɩnaa kala vʋgʋmɛ, dɩ fawʋllʋŋ kɛŋ nɩalɩŋ dɩ ba chichel. Mɩ jaŋ dɔgɩsɛba a tɩŋ wɩalɩŋ kala ba sɩ ŋaa wɩaa, a nagɛ ŋɩɩ ba sɩ dɔgɩsɛ nɩaa dɔnsʋŋ. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”