ƐZƖKƖƐL 6 - WƖA TENIŊ

Ba bʋl wɩalɩŋ sɩ jaŋ ŋaa Iziral peelee lɛ

¹ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, joŋ ŋ sɩaa chaasɛ Iziral peelee a bʋl wɩaa deemba mɩ doluŋ lɛ a hɛ ba lɛ:

³ Iziral peelee, má jegile nɩɩ La TƖƖNA Wɩɩjarɩbakɔ wɩaa. Ŋ-la nɛ ma TƖƖNA Wɩɩjarɩbakɔ bʋlaa pɩ peelee arɩ dundolluŋ arɩ fuonaa-luŋoo arɩ fuonaasɩŋ, mɩɩ chɛ mɩ kɛŋ laalɩŋ kʋ hɛ ma lɛ nɛ. Mɩ jaŋ chei ma vesiŋ dɩ-kpaaraa kala.

⁴ Mɩ jaŋ ŋmoo ma vʋɩyaa korunuŋ kala lo, a yɛrɛ ma kʋsʋɔrʋsʋŋ korunuŋ a kpʋ ma vʋɩ-kpaaraa ba tɔŋŋɔɔ sɩpaaŋ.

⁵ Mɩ jaŋ kɛŋ Iziral tɩŋŋaa kʋsʋʋnʋŋ pɩsa bil ba tɔŋŋɔɔ sɩpaaŋ, a kɛŋ ba haŋgbelee ma pɩsa golli ba korunuŋ.

⁶ Ma tasɩŋ kala jaŋ pɩŋ jikpeeniŋ, dɩ ma vesiŋ dɩ-kpaaraa kala tele pɩŋ, dɩ ma tɔŋŋɔɔ arɩ ma vʋɩyaa korunuŋ kala yɛrɛ pɩŋ muno muno. Ma kʋsʋɔrʋsʋŋ korunuŋ jaŋ pɩsɛ, dɩ kʋŋkala ma sɩ ŋaa lɛl.

⁷ Ba jaŋ kpʋ ma nɩaa dɩ ba sʋʋ pɩŋ lee-kala. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

⁸ Ama, mɩ jaŋ leŋ ma dɔnsʋŋ, laalɩŋ bɩ jaŋ kpʋma, aŋ kɛmma pɩsa hɛ tintee-wogusuŋ dɔnsʋŋ lɛ.

⁹ Tinteye-la lɛ ba sɩ jaŋ kɛsɛba mʋ dɩ ba hɛ yoŋ-baga lɛ, ba jaŋ liisi ŋɩɩ ba sɩ ŋaa mɩ tʋɔŋ chei a tɩŋ ba sɩ bɩ wʋtɩtɩɩ kɛnɛ a joŋ harɩŋ yɩamɛ a cho vʋɩyaa. Ba tʋɔŋ jaŋ lɩɩ ba tɩtɩa a tɩŋ wʋbɔmɔ-la arɩ wʋkɩsɩa-la kala ba sɩ ŋaa.

¹⁰ Ba jaŋ jɩŋ arɩ mɩ nɛ ba TƖƖNA, mɩ sɩ kpʋrɩsɛ ba dɩgɩlaa arɩ mɩ jaŋ joŋ wʋbɔŋŋɔɔ hɛ ba lɛ, ŋɩɩ bɩ pɛɩ ŋaa.”

¹¹ La TƖƖNA Wɩɩjarɩbakɔ bɩra sɩ, “Porisi ŋ nɩsaa, a yagɛ ŋ naasɩŋ, aŋ yel ‘Ou’ a tɩŋ wʋbɔmɔ-la arɩ wʋkɩsɩa-la Iziral tɩŋŋaa sɩ ŋaa wɩaa. Ba dɔnsʋŋ jaŋ sʋʋ laalɩŋ lɛ, ka dɩ losuŋ arɩ nyanyal bɔŋŋɔɔ ma kpʋ ba dɔnsʋŋ.

¹² Nɩalɩŋ sɩ hɛ dɩ-bolii, nyanyal bɔŋŋɔɔ jaŋ kpʋba, nɩalɩŋ sɩ kpaga ma jaŋ sʋʋ laalɩŋ lɛ, nɩalɩŋ ma sɩ ka a bɩ sʋba, losuŋ jaŋ kpʋba. Ŋɩɩ nɛ mɩ jaŋ joŋ mɩ baanɩŋ a fɩɩsɛ ba lɛ.

¹³ Sʋʋnʋŋ jaŋ jaasa pɩŋ ba tɔŋŋɔɔ arɩ ba korunuŋ, ba dundolluŋ arɩ ba peelee nyuŋ, tɩɩ-lugunuŋ arɩ tɩɩ-balaa bʋbʋɔŋ arɩ lere-la kala ba sɩ nyɩgɛ kʋsʋɔrʋsʋŋ sʋɔra sɩ sɩma pɩpɩ ba tɔŋŋɔɔ. Ŋɩɩ nɛ ba jaŋ jɩŋ arɩ mɩ nɛ ba TƖƖNA.

¹⁴ Mɩ jaŋ lɩɩsɛ nɩsɩŋ liesi ba tinteeŋ lee na-kala ba sɩ hɛ a cheyu dɩ ʋ pɩŋ hoi a chɩŋ tintee-hɩlɩɩ-la lɛ a kaa mʋ yi lee-la ba sɩɩ yɩrɛ Dibila. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”