ƐZƖKƖƐL 5 - WƖA TENIŊ

¹ La TƖƖNA sɩ, “Nuhuobiiŋ, joŋ tokobiiŋ sɩ kɛŋ niiŋ a kaa fʋŋ ŋ nyu-pʋnaa arɩ ŋ tɔŋŋɔɔ. Joŋ sanɩa a magɩsɛ pʋna-la ŋ sɩ fʋma a kaa kpaa leree batori.

² Dɩ tapʋlɩa-la ŋ sɩ golli tabal-la a yuyuo nɛ kʋ dɛrɛ, joŋ pʋna-la sɛmɛ dɔŋɔ nyɩgɛ tabal-la tʋɔŋ. Joŋ pʋna-la sɛmɛ dɔŋɔ ma a kɛŋ tokobii-la ta kikeri aŋ gugolli tabal-la. Joŋ sɛmɛ dɔŋɔ ma yuo dɩ peliŋ kaa jaasɛ. Mɩ jaŋ leŋ dɩ laalɩŋ kire to ba harɩŋ.

³ Lɩɩsɛ pʋna-la mʋa a gul ŋ gɛrɩŋ niiŋ.

⁴ Bɩra lɩɩsɛ pʋna-la mʋa a joŋo yuo hɛ nyiniŋ lɛ dɩ ba dii. Nyiniŋ jaŋ lɩɩ nɩmɛ a mʋ tɔ Iziral tɩŋŋaa kala hɛ.”

⁵ Wɩɩ-la La TƖƖNA Wɩɩjarɩbakɔ sɩ bʋla nɛ ŋ-la: “Má bee na Jerusalɛm, mɩ joŋu a kɩɩ dʋnɩa kala tʋtʋɔbaanɩŋ nɛ tinteyee chɩna gollu.

⁶ Ama a tɩŋ ʋ bɔnsʋŋ wɩaa, ʋ vɩa mɩ wombie-la mɩ sɩ bile dɩ ba tuto arɩ wɩalɩŋ mɩ sɩ daga nɛ, a kɩɩ tinteye-la nɩaa sɩ gollu. Ʋ vɩa mɩ wombie-la mɩ sɩ bile nɛ, a bɩ wɩalɩŋ mɩ sɩ daga maa to.

⁷ Ŋɩɩ wɩaa, wɩɩ-la mɩ-na ŋ TƖƖNA Wɩɩjarɩbakɔ sɩ bʋla nɛ ŋ-la: Ŋ nɛ paala hɛ wɩaa a kɩɩ tinteye-la sɩ golluŋ, a tɩŋ ŋ sɩ bɩ wɩalɩŋ mɩ sɩ daga arɩ mɩ wombie-la mɩ sɩ bile dɩ ba tuto to. Ŋ to tinteye-la sɩ golluŋ wʋŋaalaa nɛ.

⁸ Ŋɩɩ wɩaa, wɩɩ-la mɩ-na ŋ TƖƖNA Wɩɩjarɩbakɔ sɩ bʋla nɛ ŋ-la: mɩ chɩŋ ŋ-na Jerusalɛm lɛ nɛ. Mɩ jaŋ dɔgʋsʋŋ tinteye-la kala sɩɩŋ lɛ.

⁹ A tɩŋ mɩ sɩɩ kɩsɛ tɔmɔ-la kala ŋ sɩ mɛ wɩaa, mɩ jaŋ dɔgʋsʋŋ a magɛ ŋɩɩ mɩ ha sɩ bɩŋ dɔgɩsɔ magɛ, aŋ maachie kala bɩra bɩ jaŋ dɔgʋsʋŋ ŋɩɩ.

¹⁰ Jerusalɛm, ŋ lɛ nyɩmmaba jaŋ chaŋ ba biiriŋ, dɩ biiriŋ ma chɩchaŋ ba nyɩmmaba. Mɩ jaŋ dɔgʋsʋŋ, aŋ kɛŋ ŋ nɩalɩŋ sɩ ka kaa pɩsa hɛ lee-kala.

¹¹ Ŋɩɩ wɩaa, mɩ-na ŋ TƖƖNA Wɩɩjarɩbakɔ ŋmɩɛsa nɛ, a tɩŋ ŋ sɩ ŋaa wʋkɩsɩa-la a kɛŋ tɔŋŋɔɔ sɩ ŋaa disiŋ kɩa kʋ jʋʋ mɩ dɩa a leŋ ʋ kɛŋ disiniŋ, mɩ jaŋ lɩɩsɛ mɩ nɩsɩŋ ŋ lɛ, mɩ bɩ jaŋ fá ŋ nenige, mɩ jaŋ dɔgʋsʋŋ.

¹² Nyanyalaa arɩ losuŋ jaŋ kpʋ nɩalɩŋ dɔnsʋŋ sɩ hɛ ŋ lɛ, ba jaŋ kpʋ dɔnsʋŋ ma laalɩŋ lɛ taŋ-la harɩŋ, ka mɩ kɛŋ ba dɔnsʋŋ ma pɩsɛ lee-kala, aŋ kire to ba harɩŋ arɩ laalɩŋ.

¹³ Ŋɩɩ nɛ mɩ baanɩŋ jaŋ fɩɛlɛ, baaŋ-la mɩ sɩ faasa na ŋ nyuŋ ka dɩ mɩ yaraa pɛ dɔŋɔ lɛ. Dɩ mɩ nɛ ŋaa wɩaa deemba kala ŋ lɛ, ŋɩɩ nɛ ŋ jaŋ jɩŋ arɩ mɩ-na ŋ TƖƖNA yaraa nɛ biere, mɩ bʋl wɩaa deemba.

¹⁴ Mɩ jaŋ leŋ dɩ ŋ pɩŋ jikpeeŋ a ŋaa mɔmɩɩ tinteye-la sɩ golluŋ teeŋ arɩ nʋʋkala sɩ jaŋ to lee-la bɩbal.

¹⁵ Ŋ jaŋ ŋaa mɔmɩɩ, dɩ nɩaa bʋl wɩaa sisii ŋ baanɩŋ. Dɩ mɩ nɛ faasa na baanɩŋ a dɔgʋsʋŋ, ŋɩɩ jaŋ ŋaa chagɩlɩna a pɩ tinteye-la sɩ golluŋ, dɩ fawʋllʋŋ kɛmba dɩ ba hirigi. Mɩ-na ŋ TƖƖNA nɛ bʋla.

¹⁶ Mɩ jaŋ joŋ losuŋ bɔmʋŋ yagɛ Jerusalɛm a nagɛ to-hɛmɩŋ, dɩ ʋ cheima. Mɩ jaŋ keri ma kʋdiilee ta dɩ losuŋ jʋjʋʋma bʋa na-kala.

¹⁷ Mɩ jaŋ joŋ losuŋ arɩ baga kɩaa hɛ ma lɛ, dɩ ba kpʋ ma biiriŋ kala. Nyanyalaa arɩ yuosuŋ arɩ laalɩŋ ma jaŋ diima. Mɩ-na ma TƖƖNA nɛ bʋla.”