ƐZƖKƖƐL 43 - WƖA TENIŊ

Wɩa tʋla mɩɩra kʋ jʋʋ ʋ dɩɩ-balɩŋ

¹ Ŋɩɩ nɛ baal-la kɛmmɛ kɔ boi-baal-la sɩ chaasɛ wɩɩpɔsʋŋ dɩɩrɩŋ.

² Mɩ na Iziral tɩŋŋaa Wɩa tʋla dɩ ʋ lɩɩ wɩɩpɔsʋŋ dɩɩrɩŋ kʋkɔ. Ʋ dɔmɔ nagɛ lɩɩŋ sɩ faasa pɛllɛ a dʋdɔŋ nɛ. Ʋ tʋla-la leŋ tinteeŋ kala tʋtʋl.

³ Wɩaa deemba mɩ sɩ na a nagɛ duosoo tʋɔŋ, ma yie nagɛ wɩalɩŋ mɩ fa sɩ laa sɩpaaŋ na nɛ dɩ La TƖƖNA kɔ dɩ ʋ chei Jerusalɛm a bɩra nagɛ wɩalɩŋ mɩ fa sɩ na Keba fuo-la niiŋ. Ŋɩɩ nɛ mɩ tuu tele chu.

⁴ La TƖƖNA tʋla to boi-baal-la sɩ chaasɛ wɩɩpɔsʋŋ dɩɩrɩŋ a kʋ jʋʋ ʋ dɩɩ-bal-la tʋɔŋ.

⁵ Ŋɩɩ nɛ Wɩa Dɩma jommi a kaa kʋ jʋʋ tʋɔŋ kaala-la, ka La TƖƖNA tʋla su ʋ dɩɩ-bal-la kala.

⁶ Baal-la sɩ chɩŋ mɩ sɛmɛ ŋɩɩ, mɩ nɩɩ La TƖƖNA bʋl wɩaa mɩ teeŋ ʋ dɩɩ-bal-la tʋɔŋ.

⁷ Ʋ sɩ, “Nuhuobiiŋ, mɩ kuoru kpasa arɩ mɩ naasɩŋ dɩ-wiesi nɛ ŋ-la. Leriŋ deeŋ nɛ mɩ jaŋ hɛ a guoli Iziral tɩŋŋaa tʋɔŋ a kaa mʋ wuu. Iziral tɩŋŋaa bɩra bɩ jaŋ chei mɩ yɩrɩ-zɔŋ-la. Ba tɩtɩa koo ba kuoroo bɩra bɩ jaŋ kpʋkpaarɛ vesiŋ dundolluŋ nyuŋ, koo a saa ba kuoroo vaamaa a kpʋkpaarɛ.

⁸ Ma kuoroo hɛ ba boiŋ niiree a tɩgɛ mɩ boiŋ niiree lɛ nɛ, a hɛ ba boro daasɩŋ ma tɩgɛ mɩ kɩaa lɛ, jeeŋ nɛ kɛrɛ mɩ dɩ ba pɛgɛ. Ba chei mɩ yɩrɩ zɔmʋŋ nɛ a tɩŋ wʋkɩsɩa-la ba sɩ ŋaa wɩaa. Ŋɩɩ nɛ mɩ na baanɩŋ a cheiba.

⁹ Lɛɛlɛ ba maga ba leŋ vʋɩyaa kpaarɩŋ arɩ ba kuoroo vaamaa ba sɩ saa bil a kpʋkpaarɛ. Dɩ ba nɛ ŋaa ŋɩɩ, mɩ jaŋ hɛ ba tʋɔŋ a kaa mʋ wuu.”

¹⁰ La TƖƖNA bɩra bʋl, “Nuhuobiiŋ, dagɛ mɩ dɩɩ-bal-la nagɩŋ pɩ Iziral tɩŋŋaa dɩ ba kaa bɩɩnɛ. Ŋɩɩ jaŋ wuo leŋ dɩ hɩɩsɩŋ kɛmba a tɩŋ wʋbɔmɔ-la ba sɩ ŋaa wɩaa.

¹¹ Dɩ hɩɩsɩŋ nɛ kɛmba a tɩŋ wɩalɩŋ ba sɩ ŋaa wɩaa, dagɛ mɩ dɩɩ-bal-la nagɩsɩŋ kala pɩba: ŋɩɩ ba sɩ saaʋ, ʋ boye-la ba sɩ too jʋʋ arɩ boye-la ba sɩ to lɩlɩɩ, ŋɩɩ ba sɩ kɩɛlɛ ʋ kʋŋkala, a pɛ wombie-la mɩ sɩ bile arɩ wɩalɩŋ kala sɩ maga dɩ ba to lɛ. Ŋmʋnsɛ wɩaa deemba kala bil a pɩba, dɩ ba jɩŋ ŋɩɩ kʋŋkala sɩ kɩɛla, a wuo to wombie-la kala mɩ sɩ bile dɩ ma tuto mɩ dɩɩ-bal-la lɛ.

¹² Mɩ dɩɩ-bal-la wombiiŋ mɩ sɩ bile dɩ ma tuto nɛ ŋ-la: Lee-la kala sɩ gollu peel-la nyuŋ, ʋ jaŋ ŋaa lee zɔmʋŋ sɩ bɩ magɩa kɛnɛ. Wombii-la mɩ sɩ bile dɩ ma tuto a mʋ tɩgɛ mɩ dɩɩ-balɩŋ lɛ nɛ ŋɩɩ.

Wɩɩsʋlʋŋ koruŋ

¹³ Kʋ-la ba sɩ kaa magɩsɛ Wɩa dɩɩ-bal-la nɛ ba jaŋ kaa magɩsɛ Wɩɩsʋlʋŋ koru-la ma. Ŋɩɩ ba sɩ jaŋ magɩsa saa Wɩɩsʋlʋŋ koru-la nɛ ŋ-la: Buotuo-bie jaŋ hɛ koru-la gentine lɛ a golli, dɩ ʋ luŋuŋ ŋaa naakieliŋ kpaa magɛ dɔŋɔ, ʋ jalɩŋ ma ŋaa naakieliŋ kpaa magɛ dɔŋɔ, ʋ niipiniŋ ma ŋaa vama kʋbala a golli. Wɩɩsʋlʋŋ Koru-la kala leŋiŋ jaŋ ŋaa:

¹⁴ A chɩŋ bʋbʋɔ-chal bumbuŋ buotuo-bie-la lɛ a kaa jɩl tʋtʋɔbaanɩŋ kʋa leŋiŋ jaŋ ŋaa naakieli bala, aŋ jalɩa kɩɩ tʋtʋɔbaanɩŋ kʋ-la naakieliŋ kpaa magɛ dɔŋɔ, a bɩra chɩŋ tʋtʋɔbaanɩŋ kʋ-la lɛ a kaa jɩl nyuŋ kʋa ma leŋiŋ jaŋ ŋaa naakieliŋ bʋlɩa, aŋ jalɩa kɩɩ nyuŋ kʋ-la naakieli bala a golli.

¹⁵ Wɩɩsʋlʋŋ koru-la nyuŋ dɩɩrɩŋ lee-la ba sɩ yie joŋ Wɩɩsʋlʋŋ kɩaa daŋ a nyɩgɛ leŋiŋ jaŋ ŋaa naakieliŋ bʋlɩa, ka dɩ kɩaa chɔŋɔ lɩɩ ʋ gʋnaa banɛsɛ lɛ a nagɛ nyilliŋ.

¹⁶ Wɩɩsʋlʋŋ koru-la nyuŋ lee-la ba sɩ yie joŋ Wɩɩsʋlʋŋ kɩaa daŋ jaŋ kɛŋ sɛsɩŋ banɛsɛ, dɩ ba kala duomo magɛ dɔŋɔ. Ʋ duomuŋ jaŋ ŋaa naakieliŋ bʋlɩdʋ, jalɩŋ ma ŋaa naakieliŋ bʋlɩdʋ.

¹⁷ Bʋbʋɔ-chal tori-la nyuŋ Wɩɩsʋllɩ koru-la sɩ jaŋ daŋ ma jaŋ kɛŋ sɛsɩŋ banɛsɛ, dɩ ba kala magɛ dɔŋɔ. Sɛmɛ-kala jaŋ ŋaa naakieliŋ bʋlɩpɛ, ka ba biere golli ʋ niiŋ. Ʋ barɩmɩŋ bɩ jaŋ yi naakieliŋ kpaa magɛ dɔŋɔ. Buotuo bie ma jaŋ gollu, dɩ ʋ luŋuŋ ŋaa naakieliŋ kpaa magɛ dɔŋɔ. Lusuŋ chol-sɩa-la sɩɩ jɩl koru-la jaŋ hɛ wɩɩpɔsʋŋ dɩɩrɩŋ.”

¹⁸ Ŋɩɩ nɛ La TƖƖNA bʋl, “Nuhuobiiŋ, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Dɩ ba nɛ saa Wɩɩsʋlʋŋ koruŋ deeŋ, wombie-la ma sɩ jaŋ to a ŋaa kʋnyɩgaa Wɩɩsʋlʋŋ a joŋ chalɩŋ mɩmɩsɛ koru-la nɛ ŋ-la:

¹⁹ Ma jaŋ joŋ nɛ-bel-pɔrʋŋ pɩ Zadɔk doho nɩaa sɩ ŋaa Levi tɩmma, Wɩɩsʋllɩ sɩpaalaaraa a tɩtɩŋ mɩ sɩpaaŋ dɩ ba kaa ŋaa wʋbɔŋŋɔɔ joŋo chɛnɩŋ Wɩɩsʋlʋŋ. Mɩ-na ma TƖƖNA Wɩɩjarɩbakɔ nɛ bʋla.

²⁰ Ma jaŋ ŋaa nɛŋ-la chalɩŋ a taa nyilli-la sɩ hɛ Wɩɩsʋlʋŋ koru-la gʋnaa banɛsɛ lɛ, a ŋaa taa bʋbʋɔ-chal tori-la nyuŋ koru-la sɩ daŋa gʋnaa banɛsɛ-la ma lɛ, a ŋaa taa niipiŋ-la ma ba sɩ biere golli. Ŋɩɩ nɛ ma jaŋ to a pɩɩsɛ ʋ disiniŋ ta a joŋu hɛ mɩ nɩsɩŋ lɛ.

²¹ Ma jaŋ joŋ wʋbɔŋŋɔɔ joŋo chɛnɩŋ Wɩɩsʋlʋŋ nɛ-bele-la a kaa lɩɩ mɩ dɩɩ-bal-la harɩŋ a nyɩgʋ lee sɩ maga.

²² Tapʋl lɩa, ma jaŋ kpʋ gbuŋgbogo sɩ bɩ nyɔɔ kala kɛnɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ, a kɛŋ ʋ chalɩŋ pɩɩsɛ Wɩɩsʋlʋŋ koru-la disiniŋ ta arɩ ma sɩ kɛŋ nɛ-bele-la ŋaa ŋɩɩ.

²³ Dɩ ma nɛ pɩɩsɛ ʋ disiniŋ ta dɛrɛ, ma jaŋ lɩɩsɛ nɛ-bel-pɔrʋŋ arɩ pie-bele, ba kʋŋkala bɩ maga dɩ ʋ kɛŋ nyɔɔ.

²⁴ Ma jaŋ kɛmba kɔ mɩ-na ma TƖƖNA sɩpaaŋ, dɩ Wɩɩsʋllɩ sɩpaalaaraa laa a joŋ yɩsɩŋ mɩsɛ aŋ jomba ŋaa kʋnyɩgaa Wɩɩsʋlʋŋ a pɩ mɩ-na ma TƖƖNA.

²⁵ Tapʋlaa balɩpɛ-la tʋɔŋ, tapʋlɩɩ kala, má jaŋ kɛŋ gbuŋgbogo dɩ ba kaa ŋaa wʋbɔŋŋɔɔ joŋo chɛnɩŋ Wɩɩsʋlʋŋ. Ma jaŋ pɛ kɛŋ nɛ-bel-pɔrʋŋ arɩ pie-bele kɔ, ba kʋŋkala bɩ maga dɩ ʋ kɛŋ nyɔɔ.

²⁶ Tapʋlaa balɩpɛ nɛ ma jaŋ ŋaa Wɩɩsʋlʋŋ koru-la lɛ a pɩɩsɛ ʋ disiniŋ ta ka dɩ ʋ zɔŋ dɩ ma joŋo hɛ mɩ nɩsɩŋ lɛ.

²⁷ Tapʋlaa balɩpɛ-la dɩdɛrɩŋ, a chɩŋ tapʋl chori kaa mʋ, Wɩɩsʋllɩ sɩpaalaaraa jaŋ kɛŋ ma kʋnyɩgaa Wɩɩsʋlʋŋ kɩaa arɩ ma nii-magɛ dɔŋɔ Wɩɩsʋlʋŋ kɩaa kʋ ŋaa Wɩɩsʋlʋŋ koru-la nyuŋ. Ŋɩɩ lɛ nɛ mɩ jaŋ laama, mɩ-na ma TƖƖNA Wɩɩjarɩbakɔ nɛ bʋla.”