ƐZƖKƖƐL 40 - WƖA TENIŊ

Ɛzɩkɩɛl na Wɩa dɩɩ-falɩɩ-la dɩ-saalɩŋ a nagɛ duosoo tʋɔŋ

¹ La sɩ hɛ yoŋ-baga lɛ jɩsɩŋ mara arɩ banɔŋ chɛŋ bumbuŋ tapʋl fii chɛɛŋ, dɩ ba sɩ yuo dii Jerusalɛm ma ʋ jɩsɩŋ fii arɩ banɛsɛ tʋɔŋ nɛ ŋɩɩ. Tapʋlɩɩ-la la TƖƖNA doluŋ kʋ jʋʋmɛ a jommi kaa mʋ Iziral tinteeŋ.

² A nagɛ duosoo tʋɔŋ, Wɩa jommi kaa mʋ Iziral tinteeŋ a kɛmmɛ mʋ sagɛ peel-leŋii kʋbala nyuŋ. Peel-la wɩɩpɔsʋŋ nadiiŋ dɩɩrɩŋ, dɩɩsɩŋ hɛ nɩmɛ a nagɛ tabal.

³ Ʋ kɛmmɛ mʋ kpagɛ lee-la, mɩ na baal kʋbala sɩɩ tʋl a nagɛ kɔlɩɩŋ. Ʋ fa chɩŋ boi-baalɩŋ niiŋ nɛ a kori gɛrɩpɛ fʋfʋlʋŋ ŋmɛnɩŋ arɩ daaŋ ba sɩ kaa mɩmagɩsɛ kɩaa duomuŋ.

⁴ Ŋɩɩ nɛ baal-la bʋla pɩmɛ, “Nuhuobiiŋ, suri ŋ sɩaa, a wuoli ŋ dɩgɩlaa ma a jegile nɩɩ wɩalɩŋ kala mɩ sɩ jaŋ dagɩŋ, ŋɩɩ wɩaa nɛ mɩ kɛnɩŋ kɔ daha. Bʋl wɩalɩŋ kala ŋ sɩ na daha a pɩ Iziral tɩŋŋaa.”

Wɩa dɩɩ-bal-la wɩɩpɔsʋŋ kaala boi-baalɩŋ

⁵ Mɩ na kɛrɛ dɩ ʋ golli Wɩa dɩɩ-bal-la kala. Daa-la baal-la sɩ koro a kaa magɩsɛ kɩaa duomuŋ fa ŋaa naakieliŋ butori nɛ. Ʋ kaa magɩsɛ jebii-la, ʋ barɩmɩŋ ŋaa naakieliŋ butori, ʋ leŋiŋ ma ŋaa naakieliŋ butori.

⁶ Ŋɩɩ nɛ ʋ mʋ boi-baal-la sɩ chaasɛ wɩɩpɔsʋŋ dɩɩrɩŋ, a jɩl ʋ lusuŋ-chol sɩaa a magɩsɛ ʋ boiŋ-nii-jʋʋlʋŋ. Ʋ ŋaa daa-la bala.

⁷ Dɩɩ-biisi-la lɛ nɩalɩŋ sɩɩ pɔ leriŋ ma sɩ hɛ duomuŋ ma ŋaa daa-la bala nɛ, ʋ jalɩŋ ma ŋaa daa-la bala. Jebie-la fa sɩ hɛ dɩɩ-biisi-la pɛgɛ barɩmɩŋ ŋaa mʋa tuo daa-la bala nɛ. Boi-baal-la boiŋ-nii-jʋʋlʋŋ sɩ tɩgɛ zawʋra lɛ a chaasɛ Wɩa dɩɩ-bal-la ma ŋaa daa-la duomuŋ bala nɛ.

⁸ Ŋɩɩ nɛ ʋ magɩsɛ boi-baal-la zawʋra.

⁹ Ʋ ŋaa naakieliŋ bʋnɛsɛ, ʋ jebiee ma barɩmɩŋ ŋaa naakieli bala. Boi-baal-la zawʋra-la chaasɛ Wɩa dɩɩ-bal-la nɛ.

¹⁰ Wɩɩpɔsʋŋ dɩɩrɩŋ boi-baal-la tʋɔŋ, dɩɩ-biisiŋ batori nɛ hɛ ʋ sɛmɛ kala, dɩɩsɩ-la kala magɛ dɔŋɔ nɛ. Jebie-la ma sɩ hɛ ba pɛgɛ barɩmɩŋ kala magɛ dɔŋɔ nɛ.

¹¹ Ŋɩɩ nɛ ʋ magɩsɛ boi-baal-la jalɩŋ, ʋ ŋaa naakieliŋ bʋnɔŋ, ʋ duomuŋ ma ŋaa naakieliŋ bʋlɩdʋ arɩ kpaa magɛ dɔŋɔ.

¹² Dɩɩ-biisi-la kʋŋkala sɩpaaŋ, jebiiŋ nɛ hɛ nɩmɛ, ʋ leŋiŋ ŋaa naakieliŋ kpaa magɛ dɔŋɔ. Dɩɩ-biisi-la fa kɛŋ gʋnaa banɛsɛ banɛsɛ nɛ. Gʋŋ kala duomuŋ ŋaa naakieliŋ butori a golli.

¹³ Ŋɩɩ nɛ ʋ magɩsɛ dɩɩsɩ-la dɔŋɔ harɩŋ kɛrɛ a kɛŋ ŋɩɩ mʋ yi kʋ-la sɩ chaasʋ harɩŋ dɩɩrɩŋ jebiiŋ. Ʋ duomuŋ ŋaa naakieliŋ fii arɩ balɩa arɩ kpaa magɛ dɔŋɔ.

¹⁴ Boi-baal-la tʋɔŋ jebie-la sɩ chɔŋɔ lɩɩ, ʋ magɩsɛ ba ma. Ʋ ŋaa naakieliŋ mara arɩ fii. Ʋ fa magɩsa a mʋ yi zawʋra-la sɩ chaasɛ kaala-la nɛ.

¹⁵ A chɩŋ boi-baal-la niiŋ a kaa mʋ yagɛ zawʋra-la dɩdɛrɩŋ ŋaa naakieliŋ mara arɩ banɔŋ nɛ.

¹⁶ Bʋa-biisiŋ nɛ fa hɛ dɩɩsɩ-la harɩŋ jebiee lɛ arɩ tʋɔŋ jebiee kala, arɩ zawʋra-la sɩ nagɛ ŋɩɩ. Jebie-la sɩ chɔŋɔ lɩɩ, ba tuuri kɩaa sɩ nagɛ abɛ tɩɩsɩŋ nɛ a kpɩɛrɛ jeyee-la.

Kaala-la sɩ hɛ harɩŋ

¹⁷ Ŋɩɩ nɛ ʋ kɛmmɛ kaa kʋ jʋʋ harɩŋ kaala-la tʋɔŋ. Nɩmɛ mɩ na ba saa dɩɩsɩŋ mara arɩ fii a yelli kaala-la jebiiŋ. Dɩɩsɩ-la sɩpaaŋ, ba kɛŋ tabɩaa ŋaa wombiiŋ,

¹⁸ a golli kaala-la kala. Wombii-la jalɩŋ arɩ boi-baal-la jalɩŋ kala magɛ dɔŋɔ nɛ. Wombiiŋ deeŋ fa tuu tinteeŋ mʋa nɛ.

¹⁹ Ŋɩɩ nɛ baal-la chɩŋ boi-baal-la sɩ tuu tinteeŋ lɛ aŋ magɩsɛ a mʋ yi tʋɔŋ kaala-la harɩŋ. Ʋ duomuŋ ŋaa naakieliŋ mahɩŋ balɩa arɩ fii, wɩɩpɔsʋŋ dɩɩrɩŋ arɩ wɩɩpɔsʋŋ nagʋa dɩɩrɩŋ kala.

Wɩɩpɔsʋŋ nagʋa boi-baalɩŋ

²⁰ Ŋɩɩ nɛ ʋ magɩsɛ boi-baal-la sɩ chaasɛ wɩɩpɔsʋŋ nagʋa a lɩlɩɩ harɩŋ kaala-la, ʋ duomuŋ arɩ ʋ jalɩŋ kala.

²¹ Ʋ magɩsɛ dɩɩsɩŋ batori-la sɩ hɛ ʋ sɛmɛ na-kala, jebie-la sɩ hɛ ba pɛgɩsɩŋ arɩ ʋ zawʋra, ba kala magɛ wɩɩpɔsʋŋ boi-baal-la magɩsɩŋ. Ʋ duomuŋ ŋaa naakieliŋ mara arɩ banɔŋ nɛ, ʋ jalɩŋ ma ŋaa naakieliŋ fii arɩ balɩa arɩ kpaa magɛ dɔŋɔ.

²² Ʋ dɩɩsɩŋ tokoroba, ʋ zawʋra arɩ abɛ tɩɩsɩ-la ba sɩ tuuro kpɩɛrɛ jebie-la kala magɛ boi-baal-la sɩ chaasɛ wɩɩpɔsʋŋ kɩaa nɛ. Lusuŋ-chol-sɩaa balɩpɛ nɛ ŋ jaŋ jɩl aŋ-na yi boi-baal-la, ka ʋ zawʋra chaasɛ tʋɔŋ kaala.

²³ Boi-baal dɔŋ ma nɛ fa hɛ nɩmɛ a jʋjʋʋ tʋɔŋ kaala-la a chaasɛ wɩɩpɔsʋŋ nagʋa dɩɩrɩŋ boi-baalɩŋ, a nagɛ dɔŋɔ-la sɩ chaasʋ a hɛ wɩɩpɔsʋŋ dɩɩrɩŋ. Ʋ magɩsɛ boi-baala-la sɩ chaasɛ dɔŋɔ pɛgɛ, ʋ ŋaa naakieliŋ mahɩŋ balɩa arɩ fii.

Wɩɩpɔsʋŋ nadiiŋ boi-baalɩŋ

²⁴ Ŋɩɩ nɛ ʋ kɛmmɛ mʋ wɩɩpɔsʋŋ nadiiŋ dɩɩrɩŋ. Mɩ na boi-baalɩŋ dɔŋɔ sɩ chaasɛ wɩɩpɔsʋŋ nadiiŋ. Ʋ magɩsɛ ʋ tʋɔŋ jebiee arɩ ʋ zawʋra, ba ma magɛ ŋɩɩ dɔnsʋ-la sɩ maga.

²⁵ Boi-baal-la arɩ ʋ zawʋra fa kɛŋ tokoroba nɛ a golli, a nagɛ boi-baala-la dɔnsʋ-la sɩ kɛŋ ŋɩɩ. Boi-baal-la duomuŋ fa ŋaa naakieliŋ mara arɩ banɔŋ nɛ, ʋ jalɩŋ ma ŋaa naakieliŋ fii arɩ balɩa arɩ kpaa magɛ dɔŋɔ.

²⁶ Lusuŋ-chol-sɩaa balɩpɛ nɛ ŋ jaŋ jɩl aŋ-na yi boi-baal-la. Ʋ zawʋra-la ma fa chaasɛ tʋɔŋ kaala-la nɛ. Ba tuuri abɛ tɩɩsɩŋ a kpɩɛrɛ jebie-la sɩ chɔŋɔ lɩɩ sɛmɛ kala.

²⁷ Tʋɔŋ kaala-la ma kɛŋ boi-baalɩŋ nɛ a chaasɛ wɩɩpɔsʋŋ nadiiŋ dɩɩrɩŋ. Ŋɩɩ nɛ ʋ chɩŋ ʋ lɛ a magɩsa lɩɩ yagɛ harɩŋ boi-baal-la ma sɩ hɛ wɩɩpɔsʋŋ nadiiŋ dɩɩrɩŋ. Ʋ duomuŋ ŋaa naakieliŋ mahɩŋ balɩa arɩ fii.

Boi-baala-la sɩɩ jʋʋ tʋɔŋ kaala

²⁸ Ŋɩɩ nɛ ʋ kɛmmɛ to wɩɩpɔsʋŋ nadiiŋ dɩɩrɩŋ boi-baalɩŋ a kɛmmɛ kaa kʋ jʋʋ tʋɔŋ kaala-la. Ʋ magɩsɛ wɩɩpɔsʋŋ nadiiŋ boi-baal-la, dɩ ʋ ma magɛ boi-baala-la dɔnsʋŋ.

²⁹ Ʋ dɩɩ-biisiŋ, ʋ jebie-la sɩ chɔŋɔ lɩɩ arɩ ʋ zawʋra, ba kala fa magɛ boi-bala-la dɔnsʋŋ kɩaa nɛ. Boi-baal-la arɩ ʋ zawʋra-la fa kɛŋ tokoroba nɛ a golli. Ʋ duomuŋ fa ŋaa naakieliŋ mara arɩ banɔŋ nɛ, ʋ jalɩŋ ma ŋaa naakieliŋ fii arɩ balɩa arɩ kpaa magɛ dɔŋɔ.

³⁰ (Zawʋraba-la sɩ hɛ boi-baala-la niiŋ a golli tʋɔŋ kaala-la tʋɔŋ jalɩŋ fa ŋaa naakieliŋ fii arɩ balɩa arɩ kpaa magɛ dɔŋɔ nɛ, ba duomuŋ ma ŋaa naakieliŋ bʋlɩa arɩ kpaa magɛ dɔŋɔ.)

³¹ Ʋ zawʋra-la chaasɛ harɩŋ kaala-la nɛ, ba tuuri abɛ tɩɩsɩŋ a kpɩɛrɛ ʋ jebiee. Lusuŋ-chol sɩaa chori nɛ ŋ jaŋ jɩl aŋ-na yiu.

³² Ŋɩɩ nɛ ʋ kɛmmɛ to wɩɩpɔsʋŋ dɩɩrɩŋ boi-baalɩŋ a kʋ jʋʋ tʋɔŋ kaala-la. Ʋ magɩsɛ boi-baal-la, dɩ ʋ ma magɛ ŋɩɩ dɔnsʋ-la sɩ maga.

³³ Ʋ dɩɩ-biisiŋ, ʋ jebie-la sɩ chɔŋɔ lɩɩ arɩ ʋ zawʋra, ba kala magɛ boi-baala-la dɔnsʋŋ kɩaa nɛ. Boi-baal-la arɩ ʋ zawʋra-la kɛŋ tokoroba nɛ a golli. Boi-la duomuŋ fa ŋaa naakieliŋ mara arɩ banɔŋ nɛ, ʋ jalɩŋ ma ŋaa naakieliŋ fii arɩ balɩa arɩ kpaa magɛ dɔŋɔ.

³⁴ Ʋ zawʋra-la chaasɛ harɩŋ kaala-la nɛ, ba tuuri abɛ tɩɩsɩŋ kpɩɛrɛ ʋ jebiee sɛmɛ kala. Lusuŋ-chol-sɩaa chori nɛ ŋ jaŋ jɩl aŋ-na yiu.

³⁵ Ŋɩɩ nɛ ʋ kɛmmɛ kaa kɔ wɩɩpɔsʋŋ nagʋa dɩɩrɩŋ boi-baalɩŋ a magɩsɛ ʋ ma, ʋ ma magɛ dɔnsʋ-la,

³⁶ ʋ dɩɩ-biisiŋ, ʋ jebie-la sɩ chɔŋɔ lɩɩ arɩ ʋ zawʋra ma magɛ dɔnsʋ-la nɛ. Ʋ ma fa kɛŋ tokoroba nɛ a golli. Ʋ duomuŋ ŋaa naakieliŋ mara arɩ banɔŋ nɛ, ʋ jalɩŋ ma ŋaa naakieliŋ fii arɩ balɩa arɩ kpaa magɛ dɔŋɔ.

³⁷ Ʋ zawʋra-la chaasɛ harɩŋ kaala-la nɛ, ba tuuri abɛ tɩɩsɩŋ kpɩɛrɛ ʋ jebiee sɛmɛ kala. Lusuŋ-chol sɩaa chori nɛ ŋ jaŋ jɩl aŋ-na yiu.

Dɩɩsɩ-la tʋɔŋ ba sɩ jaŋ bɩbɩrɩmɛ Wɩɩsʋlʋŋ pʋsʋŋ

³⁸ Boi-baala-la kʋŋkala zawʋra sɛmɛ lɛ, tʋɔŋ boi-baalaa nɛ fa hɛ nɩmɛ. Nɩmɛ nɛ ba yie chɛsɛ kʋnyɩgaa Wɩɩsʋlʋŋ pʋsʋŋ nammɩa.

³⁹ Zawʋra-la sɩ hɛ boi-baalɩŋ lɛ, teebʋlba banɛsɛ nɛ fa chɩŋ nɩmɛ, balɩa chɩŋ sɛmɛ dɔŋɔ, balɩa ma chɩŋ sɛmɛ dɔŋɔ. Ba nyuŋ nɛ ba yie kpʋ kʋnyɩgaa Wɩɩsʋlʋŋ pʋsʋŋ, wʋbɔŋŋɔɔ joŋo chɛnɩŋ Wɩɩsʋlʋŋ arɩ cheeriŋ Wɩɩsʋlʋŋ pʋsʋŋ.

⁴⁰ Boi-baal-la zawʋra-la jeeŋ harɩŋ ma, teebʋlba-la dosunuŋ banɛsɛ nɛ fa chɩŋ wɩɩpɔsʋŋ nagʋa boi-baal-la lɛ. Balɩa chɩŋ lusuŋ-chol sɩaa sɛmɛ dɔŋɔ, balɩa ma chɩŋ sɛmɛ dɔŋɔ.

⁴¹ Teebʋlba-la kala ŋaa chori nɛ boi-baal-la lɛ. Banɛsɛ hɛ tʋɔŋ, banɛsɛ ma hɛ jeeŋ harɩŋ. Ba nyuŋ nɛ ba kpʋkpʋ Wɩɩsʋlʋŋ pʋsʋŋ.

⁴² Tabɩaa nɛ ba saa ba magɛ dɔŋɔ ba kaa ŋaa kʋnyɩgaa Wɩɩsʋlʋŋ teebʋlba banɛsɛ ma, ba kʋŋkala duomuŋ ŋaa naakieliŋ kpaa magɛ dɔŋɔ arɩ mʋa. Ba jalɩŋ ma ŋaa naakieliŋ kpaa magɛ dɔŋɔ arɩ mʋa, leŋiŋ ma ŋaa naakieliŋ kpaa magɛ dɔŋɔ. Ba nyuŋ nɛ ba joŋ kɩalɩŋ ba sɩ kaa kpʋkpʋ kʋnyɩgaa Wɩɩsʋlʋŋ pʋsʋŋ arɩ Wɩɩsʋlʋŋ pʋsʋŋ dɔnsʋŋ daŋ.

⁴³ Hɔɔnʋŋ sɩ kɛŋ kerikee balɩa balɩa, ba kʋŋkala jalɩŋ magɛ nachala nɛ ba joŋo mɛrɛ jebiiŋ lɛ a golli. Teebʋlba-la nyuŋ nɛ ba yie joŋ Wɩɩsʋlʋŋ nammɩa dɩdaŋ.

Wɩɩsʋllɩ sɩpaalaaraa dɩɩsɩŋ

⁴⁴ Ŋɩɩ nɛ baal-la kɛmmɛ kʋ jʋʋ tʋɔŋ kaala-la. Dɩɩsɩŋ balɩa nɛ fa hɛ nɩmɛ. Dɔŋɔ hɛ wɩɩpɔsʋŋ nagʋa boi-baalɩŋ dɩɩrɩŋ, aŋ chaasɛ wɩɩpɔsʋŋ nadiiŋ, dɔŋɔ ma hɛ wɩɩpɔsʋŋ nadiiŋ boi-baalɩŋ dɩɩrɩŋ aŋ chaasɛ wɩɩpɔsʋŋ nagʋa.

⁴⁵ Ŋɩɩ nɛ ʋ bʋla pɩmɛ, “Dɩa-la sɩ chaasɛ wɩɩpɔsʋŋ nadiiŋ ŋaa Wɩɩsʋllɩ sɩpaalaaraa kʋa nɛ. Ba nɩɩ beŋ Wɩa dɩɩ-bal-la.

⁴⁶ Dɩa-la dɔŋɔ ma sɩ chaasɛ wɩɩpɔsʋŋ nagʋa, ŋaa Wɩɩsʋllɩ sɩpaalaaraa sɩɩ tɩŋ Wɩɩsʋlʋŋ koru-la nyuŋ kʋa nɛ. Nɩaa deemba ŋaa Zadɔk doho nɩaa nɛ. Ba dʋndʋŋa nɛ ŋaa Levi doho nɩalɩŋ sɩ jaŋ wuo mʋ La TƖƖNA sɩpaaŋ a tɩma pʋ.”

⁴⁷ Ŋɩɩ nɛ ʋ magɩsɛ kaala-la ma sɩ hɛ Wɩa dɩɩ-bal-la sɩpaaŋ, dɩ ʋ sɛsɩŋ banɛsɛ kala magɛ dɔŋɔ. Ʋ duomuŋ ŋaa naakieliŋ mahɩŋ balɩa arɩ fii, jalɩŋ ma ŋaa naakieliŋ mahɩŋ balɩa arɩ fii. Ka Wɩɩsʋlʋŋ koru-la chɩŋ Wɩa dɩɩ-bal-la sɩpaaŋ.

Wɩa dɩɩ-bal-la

⁴⁸ Ŋɩɩ nɛ ʋ kɛmmɛ kɔ Wɩa dɩɩ-bal-la zawʋra a magɩsɛ ʋ tʋɔŋ jebiee. Ba jalɩŋ ŋaa naakieliŋ bʋlɩa arɩ kpaa magɛ dɔŋɔ sɛmɛ na-kala. Boiŋ nii-la ma jalɩŋ ŋaa naakieliŋ bʋlɩpɛ nɛ, tʋɔŋ jebie-la sɩ chɔŋɔ lɩɩ ma barɩmɩŋ ŋaa naakieli bala arɩ kpaa magɛ dɔŋɔ sɛmɛ na-kala.

⁴⁹ Zawʋra-la tʋɔŋ jalɩŋ fa ŋaa naakieliŋ fii nɛ, ʋ duomuŋ ma ŋaa naakieliŋ bʋlɩdʋ. Lusuŋ-chol sɩaa fii nɛ ŋ jaŋ jɩl aŋ-na yiu. Jebiee balɩa nɛ fa hɛ lusuŋ-chol sɩaa-la sɛsɩŋ. Dɔŋɔ hɛ sɛmɛ dɔŋɔ, dɔŋɔ ma hɛ sɛmɛ dɔŋɔ.