ƐZƖKƖƐL 4 - WƖA TENIŊ

Ɛzɩkɩɛl ŋaa wɩaa aa dagɛ ŋɩɩ laalɩyuoroo sɩ jaŋ kʋ golli Jerusalɛm chu

¹ Wɩa sɩ, “Nuhuobiiŋ, joŋ tiebiiŋ a bil ŋ sɩpaaŋ a tuuri Jerusalɛm sɩ ŋaa tabal nagɩsɩŋ a hɛ ʋ lɛ.

² Saa lusuŋ-chol sɩaa a tɩgɛ tiebii-la lɛ, a ŋaa leree a nagɛ laalɩyuoroo nɛ ŋmoo bugoo a gollu, a ŋaa doloo ma ba sɩ jaŋ kaa ŋmobu lo a golli ʋ kala.

³ Joŋ hɔɔŋ pɩratɩ a pɛ dɩ ʋ nagɛ hɔɔŋ kɛrɛ ŋ dɩ tiebii-la sɩ kɛŋ tabal-la nagɩsɩŋ pɛgɛ, aŋ chɩna chaasʋ. Ʋ jaŋ nagɛ laalɩyuoroo nɛ kʋ golli tabal-la chu a yuyuo, ka dɩ ŋ nɛ nagɛ laalɩyuoro-la sɩɩ yuo tabal-la, ŋɩɩ jaŋ ŋaa magɩl a pɩ Iziral tɩŋŋaa.

⁴ Pɩŋ ŋ nagʋa sɛmɛ lɛ, aŋ joŋ Iziral tɩŋŋaa wʋbɔŋŋɔɔ kala a daŋ ŋ nyuŋ. Ba wʋbɔmɔ-la jaŋ daŋ ŋ nyuŋ deeŋ deeŋ a mʋ yi tapʋlɩa-la sɩ maga dɩ ŋ pɩŋ ŋ sɛmɛ-la lɛ.

⁵ Ŋ jaŋ pɩŋ nɩmɛ tapʋlaa zɔɔ-batori arɩ mahɩŋ banɛsɛ arɩ fii, a na hɛɛŋ a tɩŋ ba wʋbɔmɔ-la wɩaa. Tapʋl bala kala jaŋ chɩŋ jɩna nyuŋ ŋ sɩ jaŋ na hɛɛŋ a tɩŋ ba wɩaa.

⁶ Dɩ ŋ nɛ ŋaa ŋɩɩ dɛrɛ, bɩra bɩrɩma pɩŋ ŋ nadiiŋ sɛmɛ ma lɛ a laa Juda nɩaa ma wʋbɔŋŋɔɔ chʋŋ. Ŋ jaŋ pɩŋ ŋɩɩ tapʋlaa mahɩŋ balɩa, tapʋl bala kala jaŋ chɩŋ jɩna nyuŋ.

⁷ Bɩrɩma chaasɛ laalɩyuoro-la sɩ golli Jerusalɛm, kɛŋ ŋ gɛrɩŋ nɩsɩŋ kuro ta dɩ ʋ jɩl aŋ bʋl wɩaa mɩ doluŋ lɛ a hɛ Jerusalɛm lɛ.

⁸ Mɩ jaŋ vɔbʋŋ arɩ ŋmɛsɩŋ a bil dɩ ŋ sɩ́ wuo bɩrɩmɛ, see dɩ ŋ yuo taŋ-la dɛrɛ.

⁹ Lɛɛlɛ, ŋaa mɛmpɛ, mɩaa, suonoo, sinsuoŋ, mɩɩpʋlʋmaa arɩ bɔndaa, joŋ ba kala guoli dɔŋɔ gbaŋa lɛ a kaa ŋaa boroboro pɩ ŋ tɩtɩa. Boroboro-la nɛ ŋ jaŋ didii tapʋlaa zɔɔ-batori arɩ mahɩŋ banɛsɛ arɩ fii-la ŋ sɩ jaŋ pɩŋ ŋ nagʋa sɛmɛ lɛ.

¹⁰ Tapʋlɩɩ kala, magɩsɛ boroboro-la mʋa tuo kilo kpaa magɛ dɔŋɔ a dii bʋa-la sɩ maga dɩ ŋ dii lɛ.

¹¹ Tapʋlɩɩ kala ŋ jaŋ magɩsɛ lɩɩŋ nyʋnyʋalɩ-bie sɩɩŋ bʋlɩa a nyʋa bʋa-la lɛ sɩ maga dɩ ŋ nyʋa.

¹² Kɛŋ bɩŋ-golimoo hɛ nyiniŋ a wasɛ boroboro-la nɩaa sɩɩŋ lɛ, a diiu arɩ ŋ sɩ jaŋ dii mɩaa boroboro ŋɩɩ.”

¹³ La TƖƖNA sɩ, “Dɩ ŋ nɛ ŋaa ŋɩɩ, ʋ jaŋ dagɛ ŋɩɩ Iziral tɩŋŋaa sɩ jaŋ dii kʋdiile-la sɩ kɛŋ disiniŋ tintee-wogusu-la lɛ mɩ sɩ jaŋ kɛmba pɩsa hɛ lɛ.”

¹⁴ Ŋɩɩ nɛ mɩ bʋl, “Aɩ, La TƖƖNA Wɩɩjarɩbakɔ, mɩ ha bɩ kʋdiilii kala sɩ kɛŋ disiniŋ die. Bʋa-la lɛ mɩ sɩ ŋaa hambie a kaa kɔ jɩnɩŋ, mɩ ha bɩ kʋsʋʋ koo kʋŋ baga kʋŋ sɩ kpʋa chaŋa. Nammɩa kala sɩ kɛŋ disiniŋ ha bɩ mɩ niiŋ jʋa.”

¹⁵ Wɩa bʋla pʋ, “Ʋ zɔmɔ, mɩ jaŋ leŋ dɩ ŋ mɩɩra wasɛ ŋ boroboro-la nɛ-bɩnɩŋ lɛ aŋ leŋ bɩŋ-golimo-la.”

¹⁶ Ʋ bɩra bʋl, “Nuhuobiiŋ, mɩ jaŋ keri kʋdiilee fa sɩ magɛ ŋɩɩ a jʋjʋʋ Jerusalɛm ta. Nɩalɩŋ jaŋ magɩsɛ kʋdiilee didii aŋ chɩl, a magɩsɛ lɩɩŋ ma nyʋnyʋa arɩ tʋɔ-cheeŋ.

¹⁷ Kʋdiilee arɩ lɩɩŋ jaŋ nyaa, dɩ ba kala yʋɔrɛ a tuo beŋ dɔŋɔ. Ba jaŋ na hɛɛŋ a tɩŋ ba wʋbɔŋŋɔɔ wɩaa.”