ƐZƖKƖƐL 39 - WƖA TENIŊ

¹ Nuhuobiiŋ, mɩ doluŋ lɛ bʋl wɩalɩŋ sɩ jaŋ ŋaa Gɔg lɛ. Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ chɩŋ ŋ-na Gɔg sɩ ŋaa Mɛsɛk arɩ Tubal nɩaa sɩpaalaarʋ lɛ nɛ.

² Mɩ jaŋ kɛnɩŋ viire kɩɩ, a lɛrɩŋ mʋ. Mɩ jaŋ kɛnɩŋ lɩɩ wɩɩpɔsʋŋ nagʋa dɩɩrɩŋ dɩ-bolii a kaa kʋ hɛ Iziral peelee lɛ.

³ Mɩ jaŋ ŋmoo ŋ nagʋa nɩsɩŋ lɛ dɩ ŋ toŋ foro tel, a ŋmoo ŋ nadiiŋ nɩsɩŋ ma lɛ dɩ ŋ to-hɛŋŋɛɛ foro tel.

⁴ Gɔg, ŋ dɩ ŋ laalɩyuoroo arɩ tinteye-la nɩaa kala sɩ kʋ pɛ ŋ lɛ jaŋ sʋʋ pɩŋ Iziral peelee nyuŋ. Mɩ jaŋ joŋ ma kʋsʋʋnʋŋ pɩ zaaraa arɩ baga kɩaa dɩ ba dii.

⁵ Ma jaŋ sʋʋ pɩŋ ŋmaŋkaaŋ nyuŋ. Mɩ-na ma TƖƖNA Wɩɩjarɩbakɔ nɛ bʋla.

⁶ Mɩ jaŋ joŋ nyiniŋ hɛ Magɔg tinteeŋ lɛ, a pɛ nɩalɩŋ sɩ hɔŋ mʋgʋ-balɩŋ niiŋ a ta jɩa lɛ, ŋɩɩ nɛ ba jaŋ jɩŋ arɩ mɩ nɛ ba TƖƖNA.

⁷ Mɩ jaŋ leŋ dɩ mɩ nɩaa Iziral tɩŋŋaa jɩŋ mɩ yɩrɩ-zɔŋ-la. Mɩ bɩra bɩ jaŋ leŋ dɩ ba chei mɩ yɩrɩ-zɔŋ-la. Ŋɩɩ nɛ tinteyee nɩaa jaŋ jɩŋ arɩ mɩ nɛ ba TƖƖNA sɩ ŋaa Iziral tɩŋŋaa Wɩa a bɩ disiniŋ kɛnɛ.

⁸ Tapʋlɩɩ-la wɩaa mɩ sɩ bʋla jaŋ kɔ, ʋ sɛnɛ jaŋ kɔ. Mɩ-na ma TƖƖNA Wɩɩjarɩbakɔ nɛ bʋla.

⁹ Nɩalɩŋ sɩ hɛ Iziral tasɩŋ lɛ jaŋ lɩɩ paa bayuori kɩalɩŋ ba sɩ vɩa ta a hɛ nyiniŋ. Ba jaŋ paa hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ, ba kʋbiisiŋ arɩ kʋjalaa, tosuŋ, to-hɛŋŋɛɛ, tiŋŋee arɩ toŋguloo a kaa hɛ nyiniŋ a mʋ yi jɩsɩŋ balɩpɛ.

¹⁰ Ba bɩra bɩ jaŋ mʋ gɩrɩŋ a jaa daasɩŋ koo a keri tɩɩsɩŋ duuŋ lɛ, bɛɛ wɩaa bayuori kɩalɩŋ nɛ ba jaŋ kaa hɩhɛ nyiniŋ. Nɩalɩŋ fa sɩ yuo a paa Iziral tɩŋŋaa kɩaa, Iziral tɩŋŋaa ma jaŋ paa ba kɩaa. Nɩalɩŋ fa sɩ kɛŋ ba kɩaa laa, ba ma jaŋ kɛŋ ba kɩaa laa. Mɩ-na ma TƖƖNA Wɩɩjarɩbakɔ nɛ bʋla.

¹¹ Tapʋlɩɩ-la, mɩ jaŋ dagɛ Gɔg dɩ-huguŋ Iziral tinteeŋ lɛ. Ʋ jaŋ hɛ wɛŋ-vɛnnɛɛ fuonaaŋ sɩ hɛ Mʋgʋ-sʋʋŋ wɩɩpɔsʋŋ dɩɩrɩŋ. Ʋ jaŋ tɔ wɛŋ-vɛnnɛɛ wombiiŋ, bɛɛ wɩaa ba jaŋ hugi Gɔg arɩ ʋ laalɩyuori daŋ-la kala nɩmɛ. Ba jaŋ yɩyɩrɛ lee-la Hamɔŋ Gɔg laalɩyuoroo fuonaaŋ.

¹² Iziral tɩŋŋaa jaŋ hugi ba kʋsʋʋnʋŋ ŋɩɩ chɛnsɩŋ balɩpɛ, a pɩɩsɛ tintee-la disiniŋ ta.

¹³ Nʋʋkala sɩ hɛ tintee-la lɛ jaŋ pɛ a hugiba. Tapʋlɩɩ-la mɩ yɩrɩŋ sɩ jaŋ yɩrɛ, nɩalɩŋ ma sɩ hugiba jaŋ laa yɩrɩŋ. Mɩ-na ma TƖƖNA Wɩɩjarɩbakɔ nɛ bʋla.

¹⁴ Dɩ chɛnsɩŋ balɩpɛ-la nɛ bala, ba jaŋ lɩɩsɛ baalaa dɩ ba gɔllɔ beŋ tintee-la kala a paa nɩsʋʋnʋ-la ba sɩ ka ta a hugi, dɩ tintee-la sɩ́ disiniŋ kɛŋ.

¹⁵ Dɩ nɩalɩŋ nɩɩ gɔllɛ tintee-la lɛ a mʋ na nuhuobiine haŋgbeliŋ, ba jaŋ joŋ kʋa pɛ a magɩlɛ lee-la, dɩ nɩalɩŋ sɩɩ lu bʋa kɔ, a lu bʋa Hamɔŋ Gɔg fuonaa-la lɛ a joŋo hugi.

¹⁶ (Ba jaŋ kɛŋ taŋ-la sɩ hɛ lee-la yɩrɛ Hamona.) Dɩ ba nɛ paa haŋgbele-la hugo dɛrɛ, ba pɩɩsɛ tintee-la disiniŋ ta nɛ ŋɩɩ.

¹⁷ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Nuhuobiiŋ, yɩrɛ zaaraa arɩ baga kɩalɩŋ kala sɩɩ dii nammɩa, a bʋl: Má hɛ dɔŋɔ lɛ a lɩɩ lee-kala kɔ a dii Wɩɩsʋlʋŋ kʋdiile-la mɩ sɩ ŋaa bil ma lɛ. Kʋdiile-la jaŋ yʋgɛ woruŋ Iziral peelee nyuŋ. Nɩmɛ nɛ ma jaŋ chaŋ nammɩa aŋ nyʋa chalɩŋ.

¹⁸ Ma jaŋ dii laalɩyuoroo kʋsʋʋnʋŋ, aŋ nyʋa dʋnɩa kuoroo chalɩŋ. Ma jaŋ chaŋ nɩaa deemba kala a nagɛ pie-belliŋ koo pie-pɔrɔɔ, koo bʋʋnaa koo nɛ-belliŋ. Ma kala nagɛ pʋsʋŋ sɩ nɛrɛ nɛ a lɩɩ Basaŋ tinteeŋ.

¹⁹ Dɩ mɩ nɛ kpʋ nɩaa deemba a nagɛ Wɩɩsʋlʋŋ pʋsʋŋ, zaaraa arɩ baga kɩaa jaŋ dii ba nʋʋŋ a kala vɔgɛ, a nyʋa ba chalɩŋ ma a kala bugi.

²⁰ Mɩ kʋdiilee leriŋ, ma jaŋ dii janɩŋ, ja-jɩllaa, laalɩyuori duoruŋ arɩ laalɩyuori doho na-kala a vɔgɛ. Mɩ-na ma TƖƖNA Wɩɩjarɩbakɔ nɛ bʋla.

²¹ Mɩ jaŋ leŋ dɩ mɩ yɩrɩŋ yɩrɛ tinteyee lɛ, dɩ ba kala na ŋɩɩ mɩ sɩ dɔgɩsɛba a dagɛ mɩ doluŋ ba lɛ.

²² A chɩŋ tapʋlɩɩ-la a kaa mʋ, Iziral tɩŋŋaa jaŋ jɩŋ arɩ mɩ nɛ ba TƖƖNA Wɩa.

²³ Tinteyee nɩaa jaŋ jɩŋ arɩ Iziral tɩŋŋaa mʋ yoŋ-baga a tɩŋ ba wʋbɔŋŋɔɔ wɩaa nɛ, ba sɩ bɩ mɩ to arɩ wʋtɩtɩɩ. Mɩ joŋ harɩŋ yɩaba nɛ, aŋ jomba hɛ ba dʋndɔŋŋɔɔ nɩsɩŋ lɛ ba kpʋba laalɩŋ lɛ.

²⁴ Mɩ joŋ wɩaa deemba ŋaa ba lɛ a tɩŋ ba disiŋ wʋŋaalaa arɩ ba nɩbɔŋ wʋŋaalaa wɩaa nɛ, a joŋ harɩŋ yɩaba.

²⁵ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Lɛɛlɛ, mɩ jaŋ fá Jekɔb doho nɩaa sɩ ŋaa Iziral tɩŋŋaa nenige, a leŋ dɩ ba mɩɩra lɩɩ yoŋ-baga kɔ, a tɩɩ ba tinteeŋ. Mɩ tʋɔŋ ka wɩɩ mɩ yɩrɩ zɔmʋŋ lɛ nɛ.

²⁶ Dɩ ba nɛ bɩra hɔŋ sɔm ba tɩtɩa tinteeŋ lɛ, nʋʋkala bɩ baa walɩmɛ, ba jaŋ yʋ hɩɩsɩ-la ba sɩ die arɩ ŋɩɩ ba sɩ bɩ wʋtɩtɩɩ kɛnɛ arɩ mɩ.

²⁷ Dɩ mɩ nɛ kɛmba lɩɩ tinteye-la lɛ ba sɩ hɛ, ba dʋndɔŋŋɔɔ tinteye-la lɛ a mɩɩra kɔ, ŋɩɩ lɛ nɛ mɩ jaŋ to a dagɛ mɩ yɩrɩ-zɔŋ-la a pɩ tinteye-la nɩaa.

²⁸ Ŋɩɩ lɛ nɛ mɩ nɩaa jaŋ jɩŋ arɩ mɩ nɛ ba TƖƖNA Wɩa, a kɛmba mʋ yoŋ-baga tintee-wogusuŋ lɛ, aŋ kɛmba mɩɩra kɔ ba tɩtɩa tinteeŋ. Ba kʋbala ma bɩ harɩŋ ka.

²⁹ Mɩ bɩra bɩ jaŋ joŋ harɩŋ yɩa Iziral tɩŋŋaa. Mɩ jaŋ joŋ mɩ Dɩma hɛ ba lɛ. Mɩ-na ma TƖƖNA Wɩɩjarɩbakɔ nɛ bʋla.”