ƐZƖKƖƐL 36 - WƖA TENIŊ

Wʋzɔmɔ-la Ɛzɩkɩɛl sɩ bʋla Wɩa doluŋ lɛ a mʋ tɩgɛ Iziral tinteeŋ arɩ ʋ nɩaa lɛ

¹ La TƖƖNA sɩ, “Nuhuobiiŋ, bʋl wɩaa mɩ doluŋ lɛ pɩ Iziral peelee dɩ ba jegile nɩɩ wɩɩ-la mɩ sɩ bʋla.

² Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Ma Iziral dʋndɔŋŋɔɔ jʋɔsa nɛ a bʋl, ‘Ahaa, peel-bɩnɩa-la bɩrɩmɛ la kɩaa nɛ.’

³ Ŋɩɩ wɩaa bʋl wɩaa mɩ doluŋ lɛ a pɩba. Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: A tɩŋ ba sɩ chei ma tinteeŋ a kirima gɔllɔɔ baarɛ sɛmɛ na-kala a jomma hɛ tinteye-la sɩ gollima nɩaa nɩsɩŋ lɛ, ba bʋl wʋbɔŋŋɔɔ ma lɛ a chichei ma yɩrɩŋ,

⁴ ŋɩɩ wɩaa, Iziral peelee, má jegile nɩɩ wɩɩ-la mɩ-na TƖƖNA Wɩɩjarɩbakɔ sɩ kɛnɛ dɩ mɩ bʋla pɩ ma-na peelee arɩ dundolluŋ, fuonaa-luŋoo arɩ fuonaasɩŋ, lere-la sɩ pɩŋ jikpeeniŋ a ŋaa hoi arɩ tasɩ-la kɩaa ba sɩ yuo paa ka tinteye-la sɩ gollima sisieri ma lɛ:

⁵ Mɩ-na ma TƖƖNA Wɩɩjarɩbakɔ na baanɩŋ nɛ tinteye-la sɩ gollima arɩ Ɛdɔm tinteeŋ kala nyuŋ. Ba mɔŋ mɩ nɩaa nɛ a sieri ba lɛ, a laa mɩ tinteeŋ ma ʋ ŋaa ba kʋŋ a kɛŋ ʋ pʋsʋŋ dɩ-diilee ma kaa laa.

⁶ Ŋɩɩ wɩaa, bʋl wɩaa mɩ doluŋ lɛ a mʋ tɩgɛ Iziral tinteeŋ lɛ, bʋla pɩ peelee arɩ dundolluŋ, fuonaa-luŋoo arɩ fuonaasɩŋ arɩ mɩ-na ba TƖƖNA Wɩɩjarɩbakɔ faasa na baanɩŋ nɛ a bʋl wɩaa a mʋ tɩgɛ ŋɩɩ tinteye-la sɩ tʋʋsɛba a hɩɩsɛba lɛ.

⁷ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ chaasa ŋmɩɛsɛ nɛ arɩ mɩ jaŋ dɔgɩsɛ tinteye-la sɩ gollima a leŋ dɩ ba dii hɩɩsɩŋ.

⁸ Ama ma-na Iziral peelee, tɩɩsɩŋ jaŋ waa ma nyuŋ a kel naakelee a nɛŋ nɛnɛɛ a pɩ ma-na mɩ nɩaa Iziral tɩŋŋaa. Ʋ bɩ jaŋ dieni ka dɩ ma mɩɩra kɔ dɩa.

⁹ Mɩ chɩl ma wɩaa nɛ, mɩ jaŋ dagɛ mɩ chonuŋ a pɩma, ma jaŋ bɩra pɛrɛ ma tinteeŋ lɛ a duu kɩaa nɩmɛ.

¹⁰ Mɩ jaŋ leŋ dɩ ma nɩaa pʋŋa pɛ. Ma Iziral tɩŋŋaa kala jaŋ bɩra hɔŋ ma tabalaa lɛ a wasa saa lere-la kala fa sɩ pɩŋ jikpeeniŋ.

¹¹ Mɩ jaŋ leŋ dɩ ma nɩaa arɩ ma pʋsʋŋ pʋŋ. Ma jaŋ yʋgɛ a kɩɩ ŋɩɩ ma fa sɩ maga, dɩ ma biiriŋ ma pʋŋa pɛ. Mɩ jaŋ leŋ dɩ ma hɔŋ nɩmɛ arɩ ma fa sɩ hɔŋ ŋɩɩ, a dʋa kɩaa a kɩɩ ŋɩɩ ma fa sɩ kɛnɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

¹² Mɩ jaŋ kɛŋ ma-na Iziral tɩŋŋaa, mɩ nɩaa mɩɩra kɔ tintee-la. Ʋ jaŋ ŋaa ma kʋŋ, ʋ bɩra bɩ jaŋ leŋ dɩ ma biiriŋ sʋsʋʋ.

¹³ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Wʋtɩtɩɩ nɛ, nɩaa ka bʋl arɩ tintee-la ka dii nɩaa nɛ, a pɔ dɩ ʋ nɩaa sɩ́ bii kɛŋ,

¹⁴ ama a chɩŋ lɛɛlɛ a kaa mʋ, ʋ bɩra bɩ jaŋ dii nʋʋ koo a pɔ dɩ ma bɩra sɩ́ bii kɛŋ. Mɩ-na ma TƖƖNA Wɩɩjarɩbakɔ nɛ bʋla.

¹⁵ Tintee-la nɩaa bɩra bɩ jaŋ nɩnɩɩ ŋɩɩ tinteye-la nɩaa sɩɩ mɔmba lɛ koo a sisieri ba lɛ. Tintee-la bɩra bɩ jaŋ kpʋkpʋ ʋ nɩaa. Mɩ-na ma TƖƖNA Wɩɩjarɩbakɔ nɛ bʋla.”

¹⁶ Ŋɩɩ nɛ La TƖƖNA bɩra bʋl wɩaa pɩmɛ, ʋ sɩ:

¹⁷ “Nuhuobiiŋ, Iziral tɩŋŋaa fa sɩ hɛ ba tɩtɩa tinteeŋ lɛ, ba mɛlɛ arɩ ba wʋŋaalaa leŋe tintee-la kala kɛŋ disiniŋ nɛ. Ba wʋŋaalaa fa nagɛ haala sɩ hɛ tɩŋa a kɛŋ disiniŋ ŋɩɩ nɛ mɩ sɩpaaŋ.

¹⁸ Ŋɩɩ nɛ mɩ na baanɩŋ ba nyuŋ a dɔgɩsɛba a tɩŋ ba sɩ kpʋ nɩaa tintee-la lɛ, aŋ pɛ kpaarɛ tɔŋŋɔɔ a ŋaa disiniŋ hɛ tintee-la lɛ.

¹⁹ Mɩ kɛmba pɩsa hɛ tinteyee lɛ nɛ, ba jaasɛ tintee-wogusuŋ lɛ, a tɩŋ ba mɛlɛ arɩ ba wʋŋaalaa wɩaa mɩ dɔgɩsɛba.

²⁰ Tinteye-la lee na-kala ba sɩ mʋa, ba yie chei mɩ yɩrɩ-zɔŋ-la nɛ. Nɩaa yie bʋl ŋ-la nɛ a tɩgɛ ba lɛ: ‘La TƖƖNA nɩaa nɛ ŋ-la, ama ʋ leŋe ba lɩɩ ʋ tinteeŋ lɛ nɛ.’

²¹ Mɩ chɩl mɩ yɩrɩ-zɔŋ-la wɩaa nɛ. Iziral tɩŋŋaa cheyu nɛ tinteye-la kala lɛ ba sɩ mʋa.

²² Ŋɩɩ wɩaa, bʋla pɩ Iziral tɩŋŋaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Ma wɩaa dee mɩɩ chɛ mɩ ŋaa wɩaa deemba, ama mɩ yɩrɩ-zɔŋ-la wɩaa nɛ. Ʋ nɛ ma chei ŋɩɩ tinteye-la kala lɛ ma sɩ mʋa.

²³ Mɩ jaŋ dagɛ ŋɩɩ mɩ yɩrɩ-zɔŋ-la sɩ kɛŋ doluŋ, mɩ yɩrɩ-la ma sɩ cheye tinteyee lɛ. Ŋɩɩ nɛ tinteye-la nɩaa jaŋ jɩŋ arɩ mɩ nɛ ba TƖƖNA. Mɩ-na ma TƖƖNA Wɩɩjarɩbakɔ nɛ bʋla. Mɩ jaŋ to ma lɛ a leŋ dɩ ba jɩŋ arɩ mɩ bɩ disiniŋ kɛnɛ.

²⁴ Mɩ jaŋ kɛmma lɩɩ tintee-wogusuŋ kala tʋɔŋ, a kɛmma mɩɩra kɔ ma tɩtɩa tinteeŋ.

²⁵ Mɩ jaŋ joŋ lɩɩzɔmʋŋ a mɩsɛma, dɩ ʋ ŋaa dɩ ma zɔŋ. Mɩ jaŋ pɩɩsɛ tɔmɔ-la ma sɩ kpaara a kɛŋ disiniŋ arɩ disiŋ dɔŋ kala ma sɩ ŋaa a ta.

²⁶ Mɩ jaŋ pɩma tʋɔ-falɩŋ, a joŋ dɩŋ-falɩŋ ma hɛ ma lɛ. Mɩ jaŋ lɩɩsɛ tʋɔ-dol-la ma sɩ kɛnɛ sɩ nagɛ tabɩɩŋ ta, aŋ pɩma tʋɔ-la sɩ pʋnyɛ.

²⁷ Mɩ jaŋ joŋ mɩ Dɩma a hɛ ma lɛ, a leŋ dɩ ma to mɩ wʋdagaa a fɩɛlɛ ma sɩaa a to wombie-la mɩ sɩ bile dɩ ma tuto.

²⁸ Ma jaŋ hɛ tintee-la mɩ sɩ joŋo pɩ ma naabalɩmaba lɛ. Ma jaŋ ŋaa mɩ nɩaa, dɩ mɩ ma ŋaa ma Wɩa.

²⁹ Mɩ jaŋ laama ta wɩalɩŋ kala sɩ leŋe ma kɛŋ disiniŋ lɛ. Mɩ jaŋ leŋ dɩ mɩaa chaasa pʋrɩgɛ, dɩ losuŋ bɩra sɩ́ ma jʋʋ.

³⁰ Mɩ jaŋ leŋ dɩ ma tɩɩsɩŋ faasa nɛnɛ yʋgɛ, dɩ ma kʋpɛrɛɛ ma faasa wasɛ, dɩ hɩɩsɩŋ bɩra sɩ́ ma dii tinteye-la lɛ a tɩŋ losuŋ wɩaa.

³¹ Ŋɩɩ nɛ ma jaŋ liisi wʋbɔmɔ-la ma sɩ ŋaa, dɩ ma tʋɔŋ lɩɩ ma tɩtɩa a tɩŋ ma wʋbɔŋŋɔɔ arɩ wʋkɩsɩa-la ma sɩ ŋaa wɩaa.

³² Iziral tɩmma, mɩɩ chɛ ma jɩŋ arɩ mɩ bɩ wɩaa deemba ka ŋaa a tɩŋ ma wɩaa nɛ. Má leŋ dɩ hɩɩsɩŋ kɛmma dɩ ma gʋrɛ nyuŋ a tɩŋ wɩalɩŋ ma sɩ ŋaa wɩaa. Mɩ-na ma TƖƖNA Wɩɩjarɩbakɔ nɛ bʋla.”

³³ Wɩɩ-la mɩ-na ma TƖƖNA Wɩɩjarɩbakɔ bɩra sɩ bʋla nɛ ŋ-la: “Dɩ mɩ nɛ pɩɩsɛ ma wʋbɔŋŋɔɔ ta, mɩ jaŋ leŋ dɩ ma bɩra hɔŋ ma tasɩŋ lɛ, a wasa paa jikpeeni-la saa.

³⁴ Nɩaa fa sɩ yie to ma tinteeŋ bɩbal dɩ ʋ pɩŋ hoi ŋɩɩ, nʋʋkala bɩ nɩmɛ ka pɛrɛ, mɩ jaŋ leŋ dɩ ma pɛrʋ.

³⁵ Ba jaŋ bʋl, ‘Tinteeŋ deeŋ fa sɩ pɩŋ kʋŋkʋlʋŋ ŋɩɩ, lɛɛlɛ ʋ mɩɩra nagɛ Ɛdɩŋ ŋmaŋkaa-la nɛ, tabalaa deemba fa pɩŋ jikpeeŋ nɛ a ŋaa hoi a kala chei, ba lɛ nɛ nɩaa lɛɛlɛ hɛ ŋɩɩ a saa kɛrɩsɩŋ golli.’

³⁶ Ŋɩɩ nɛ tinteye-la ha sɩ ka a gollima jaŋ jɩŋ arɩ mɩ-na ma TƖƖNA nɛ wasa paa tasɩ-la ba fa sɩ cheye saa, a pɛrɛ baga-la fa sɩ pɩŋ hoi. Mɩ-na ma TƖƖNA nɛ bʋla, mɩ jaŋ ŋaa wɩɩ-la mɩ sɩ bʋla.”

³⁷ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Mɩ jaŋ bɩra jegile nɩɩ Iziral tɩŋŋaa sʋla a pɛ ba lɛ. Mɩ jaŋ leŋ dɩ ba faasa pʋŋa yʋgɛ a nagɛ pie-laalɩŋ.

³⁸ Tabala-la lɛɛlɛ sɩ pɩŋ jikpeeniŋ jaŋ su arɩ nɩaa, a nagɛ Jerusalɛm fa sɩ yie su arɩ Wɩɩsʋlʋŋ piesee ŋɩɩ ba gbielee tapʋlʋŋ. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”