ƐZƖKƖƐL 35 - WƖA TENIŊ

Ba bʋl wɩalɩŋ sɩ jaŋ ŋaa Ɛdɔm tinteeŋ nɩaa lɛ

¹ La TƖƖNA fa bʋl wɩaa pɩmɛ, ʋ sɩ:

² Nuhuobiiŋ, joŋ ŋ sɩaa chaasɛ Ɛdɔm tinteeŋ, a bʋl wɩalɩŋ sɩ jaŋ ŋaa ʋ lɛ mɩ doluŋ lɛ.

³ Bʋla pɩba, “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ-na nɛ ŋaa ma Ɛdɔm tɩŋŋaa dʋndɔmɔ lɛɛlɛ. Mɩ jaŋ leŋ dɩ ma tinteeŋ pɩŋ hoi.

⁴ Mɩ jaŋ leŋ dɩ ma tasɩŋ pɩŋ jikpeeniŋ a ŋaa hoi. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

⁵ Ma joŋ Iziral tɩŋŋaa ba ŋaa ma dʋndɔŋ-bɩnɩa nɛ, ma fa leŋe ba kpʋba nɛ bʋa-la lɛ wʋlɔrʋnʋŋ sɩ jʋʋba, mɩ dʋdɔgɩsɛba a tɩŋ ba wʋbɔŋŋɔɔ wɩaa.

⁶ Ŋɩɩ wɩaa, mɩ-na ma TƖƖNA Wɩɩjarɩbakɔ ŋmɩɛsa, mɩ jaŋ jomma hɛ nɩkpʋʋraa nɩsɩŋ lɛ dɩ ba paa puuma. Ma sɩ bɩ nɩaa kpʋnʋŋ bɛrɛ ŋɩɩ, nɩkpʋʋraa jaŋ paa puuma.

⁷ Mɩ jaŋ leŋ dɩ Ɛdɔm tinteeŋ kala pɩŋ hoi, aŋ kpʋ nɩalɩŋ sɩɩ walɩmɛ dɩ ba fá lɩɩ ʋ lɛ arɩ nɩalɩŋ sɩɩ chɛ dɩ ba kʋ jʋʋ.

⁸ Mɩ jaŋ leŋ dɩ sʋʋnʋŋ su ma peelee nyuŋ. Nɩalɩŋ ba sɩ kpʋa laalɩŋ lɛ kʋsʋʋnʋŋ jaŋ pɩŋ ma dundolluŋ, ma fuonaasɩŋ arɩ fuonaa luŋoo kala lɛ.

⁹ Mɩ jaŋ leŋ dɩ ma tinteeŋ pɩŋ hoi a kaa mʋ wuu, nʋʋkala bɩ jaŋ hɛ ma tasɩŋ lɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

¹⁰ Ma sɩ, ‘Tinteyee deemba balɩa, Juda arɩ Iziral kala jaŋ ŋaa la kɩaa, la jaŋ laaba a tɩɩ,’ arɩ mɩ-na ba TƖƖNA sɩ hɛ lee-la ma kala.

¹¹ Ŋɩɩ wɩaa, mɩ-na ma TƖƖNA ŋmɩɛsa, mɩ jaŋ dɔgɩsɛma a tɩŋ baaŋ-la arɩ yarɩ-bierii-la arɩ tʋɔ-bɔŋ-la ma sɩ kɛnɛ mɩ nɩaa lɛ. Dɩ mɩ nɛ ŋaama ŋɩɩ, ma jaŋ jɩŋ arɩ mɩɩ dɔgɩsɛma a tɩŋ ŋɩɩ ma sɩ joŋo to ba lɛ nɛ.

¹² Ŋɩɩ nɛ ma jaŋ jɩŋ arɩ mɩ-na ba TƖƖNA nɩɩ ŋɩɩ ma sɩ mɔŋ Iziral peelee lɛ, a bʋl ba tinteeŋ jaŋ pɩŋ jikpeeŋ, dɩ ma laaʋ tɩɩ.

¹³ Ma bigisi ma tɩtɩa lɛ nɛ mɩ teeŋ, a bʋl wɩalɩŋ sɩ bɩ maga mɩ lɛ. Mɩ nɩɩ ba kala nɛ.

¹⁴ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ leŋ dɩ ma tinteeŋ pɩŋ hoi, dɩ dʋnɩa nɩaa kala jʋjʋɔsɛ,

¹⁵ bɛɛ wɩaa, ma ma faa jʋɔsʋ nɛ mɩ nɩaa Iziral tɩŋŋaa tinteeŋ sɩ pɩŋ hoi. Ŋɩɩ nɛ mɩ jaŋ joŋo to ma ma lɛ. Ɛdɔm peelee arɩ ʋ tinteeŋ kala jaŋ pɩŋ hoi. Ŋɩɩ nɛ ma jaŋ jɩŋ arɩ mɩ nɛ ba TƖƖNA.”