ƐZƖKƖƐL 34 - WƖA TENIŊ

Iziral tɩŋŋaa sɩpaalaaraa

¹ La TƖƖNA fa bʋl wɩaa pɩmɛ, ʋ sɩ:

² Nuhuobiiŋ, mɩ doluŋ lɛ, bʋl wɩalɩŋ sɩ jaŋ ŋaa Iziral tɩŋŋaa sɩpaalaaraa lɛ. Bʋla pɩba, “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Wɩɩŋ puu Iziral tɩŋŋaa sɩpaalaara-la sɩ chɩl ba dʋndʋŋa wɩaa. Mɩ bɩɩna pie-daara nɛ yie bibeŋ ʋ piesee nyuŋ?

³ Ma yie dii nayɩl dɩndɛrɩŋ, a kɛŋ piese-la pʋnaa gɛnnɩŋ tɔ ma tɩtɩa, a kpʋ pʋsʋ-la sɩ zɔmɔ a chaŋ, ama ma bɩ ba nyuŋ ka beŋ.

⁴ Pʋsʋ-la sɩ pʋgʋma, ma bɩ ŋaa ba kɛŋ doluŋ, kɩalɩŋ ma sɩɩ wɩɩlʋ, ma bɩ ba vaara, kɩalɩŋ ma sɩ pɩra, ma bɩ ba naawɩɩlaa vɔɔ tɔ. Kɩalɩŋ sɩ yeŋŋe koo a lɛl, ma bɩ ba chɛ kɛsɛ. Ma bemba arɩ tʋɔhɛɛŋ nɛ a bɩ ba nenige fá.

⁵ Ba fá pɩsɛ nɛ a tɩŋ ba sɩ bɩ pie-daara kɛnɛ. Ba sɩ pɩsa ŋɩɩ, ba mɩɩra bɩrɩmɛ baga kɩaa kʋdiilee.

⁶ Mɩ piesee gɔllɔɔ baarɛ peelee arɩ dundolluŋ nyuŋ kala nɛ. Ba fá pɩsa su dʋnɩa lee-kala nɛ, ka nʋʋkala bɩ bee chɛba.

⁷ Ŋɩɩ wɩaa, ma nɩalɩŋ sɩ ŋaa pie-daaraa, má jegile nɩɩ wɩɩ-la mɩ-na ma TƖƖNA sɩ bʋla.

⁸ Mɩ-na ma TƖƖNA Wɩɩjarɩbakɔ ŋmɩɛsa: Mɩ piesee sɩ bɩ pie-daara kɛnɛ ka baga kɩaa kire kɛsɛ didii wɩaa, a tɩŋ mɩ pie-daaraa sɩ bɩ mɩ piesee chɛ kɛsɛ aŋ chɩl ba tɩtɩa wɩaa,

⁹ ma nɩalɩŋ sɩ ŋaa pie-daara-la, má jegile nɩɩ mɩ teeŋ.

¹⁰ Mɩ-na ma TƖƖNA Wɩɩjarɩbakɔ chɩŋ ma pie-daara-la lɛ nɛ. Mɩ jaŋ kɛmma a tɩŋ wɩalɩŋ ma sɩ leŋe ba ŋaa mɩ piesee lɛ. Mɩ jaŋ laa mɩ piesee ma teeŋ dɩ ma bɩra sɩ́ ba daa a kɛsɛ didii. Mɩ jaŋ lorigo laa mɩ piesee ma niiree lɛ, dɩ ba bɩra sɩ́ ma kʋdiilee ŋaa.

¹¹ Mɩ-na ma TƖƖNA Wɩɩjarɩbakɔ bɩra sɩ: Mɩ tɩtɩa jaŋ chɛ kɛsɛ mɩ piesee a beŋ ba nyuŋ.

¹² A nagɛ pie-daara piesee sɩ pɩsa ʋ kire hɛ dɔŋɔ a beŋ ba nyuŋ ŋɩɩ, ŋɩɩ nɛ mɩ jaŋ beŋ mɩ nɩaa. Mɩ jaŋ lorigo laaba a lɩɩ lere-la kala ba sɩ pɩsa mʋ tapʋlɩɩ-la duoŋ-bɩlɩmbaanaa arɩ birimiŋ sɩ tɔ.

¹³ Mɩ jaŋ lɩɩsɛba tintee-wogusuŋ lɛ, a kɛmba hɛ dɔŋɔ a mɩɩra kɛmba kɔ ba tɩtɩa tinteeŋ. Mɩ jaŋ kɛmba mɩɩra kɔ Iziral tinteeŋ dɩ ba dii yaŋ peelee arɩ ba fuo-luŋoo arɩ lere-la kala ba sɩ hɔnɔ lɛ.

¹⁴ Mɩ jaŋ daaba lee-la ya-zɔmʋŋ sɩ hɛ, Iziral peelee nyuŋ nɛ jaŋ ŋaa ba dɩ-diiliŋ. Nɩmɛ ba jaŋ pɩŋ tintee-la ya-zɔmʋŋ nyuŋ, a didii Iziral peelee nyuŋ ya-zɔmʋŋ.

¹⁵ Mɩ-na tɩtɩa nɛ jaŋ dɩdaa mɩ piesee, a chɛ leriŋ pɩba dɩ ba pɩna wiesi. Mɩ-na ma TƖƖNA Wɩɩjarɩbakɔ nɛ bʋla.

¹⁶ Mɩ jaŋ chɛ kɛsɛ mɩ piese-la sɩ lɛlɛ, aŋ kɛŋ kɩalɩŋ ma sɩ yeŋŋe mɩɩra kɔ, a vɔɔ tɔ kɩalɩŋ ma sɩ pɩra naawɩɩlaa, a pɩ kɩalɩŋ ma sɩ bɩ doluŋ kɛnɛ doluŋ. Ama kɩalɩŋ sɩ nɛrɛ arɩ kɩalɩŋ sɩ kɛŋ doluŋ, mɩ jaŋ cheiba, bɛɛ wɩaa mɩ ŋaa pie-daarʋ-la sɩɩ ŋaa wɩaa ba bʋa lɛ nɛ.

¹⁷ Ma-na mɩ piesee, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ dii ma kala sarɩya, a kɛŋ pie-zɔŋŋɔɔ pɔrɛ pie-bɔŋŋɔɔ lɛ, kɩalɩŋ sɩ ŋaa piesee arɩ kɩalɩŋ sɩ ŋaa bʋʋnaa.

¹⁸ Ma dɔnsʋŋ yie dii ya-zɔŋ-la nɛ, aŋ nʋɔsɛ kʋkaanaa bil tinteeŋ. Ma yie nyʋa lɩɩzɔmʋŋ, aŋ kɛŋ kʋkaanɩŋ vuugi ʋ kala ŋaa gbʋna gbʋna.

¹⁹ Ʋ maga dɩ mɩ piesee dii yaŋ-la ma sɩ nʋɔsa bil tinteeŋ, aŋ nyʋa lɩɩ-la ma, ma sɩ kaa vuugi ʋ ŋaa gbʋna gbʋna nɛɛ?

²⁰ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ tɩtɩa nɛ jaŋ dii pie-duoruŋ arɩ pie-pʋgʋnʋŋ sarɩya.

²¹ Piese-la sɩ dolie kɛŋ ba nyilliŋ nɛ a kiri pie-pʋgʋnʋ-la ta.

²² Mɩ jaŋ laa mɩ piesee ta, nʋʋkala bɩra bɩ jaŋ wʋrɩgɛba. Mɩ jaŋ dii mɩ piesee sarɩya a kɛŋ kʋzɔŋŋɔɔ arɩ kʋbɔŋŋɔɔ pɔrɛ dɔŋɔ lɛ.

²³ Mɩ jaŋ lɩɩsɛ kuoro pɩba dɩ ʋ nagɛ mɩ tɩntɩnna Devit a ŋaa ba pie-daara a bibemba. Ʋ nɛ jaŋ ŋaa ba pie-daara a dɩdaaba.

²⁴ Mɩ-na ba TƖƖNA nɛ jaŋ ŋaa ba Wɩa, dɩ mɩ tɩntɩnna Devit ma ŋaa ba sɩpaalaara. Mɩ-na ma TƖƖNA nɛ bʋla.

²⁵ Mɩ jaŋ hɛ niiŋ mɩ dɩ ba pɛgɛ dɩ fɩɛlɩŋ hɛ ba tinteeŋ lɛ. Mɩ jaŋ kiri baga kʋbɔmɔ-la kala ba tinteeŋ lɛ, ka dɩ mɩ piesee wuo pɩŋ pɔkɔŋ nyuŋ arɩ duuŋ tʋɔŋ ka wɩɩkala bɩ baa ŋaa.

²⁶ Mɩ jaŋ ŋaa wʋzɔŋŋɔɔ mɩ nɩaa lɛ, a leŋ dɩ ba hɔnɔ golli mɩ dundolo-la mɩ sɩ lɩɩsa pɩ mɩ tɩtɩa. Dɩ ba nɩɩ chɛ duonuŋ, mɩ jaŋ leŋ dɩ duoŋ-zɔmʋŋ nɩɩ ʋ bʋa lɛ pɩba.

²⁷ Ba baga tɩɩsɩŋ jaŋ nɛŋ, dɩ ba kʋpɛrɛɛ ma wasɛ. Nʋʋkala jaŋ hɔŋ ʋ tinteeŋ lɛ sɔm. Dɩ mɩ nɛ laa mɩ nɩaa ta nɩalɩŋ sɩ kɛmba bɩrɩmɛ yosuŋ nɩsɩŋ lɛ, ŋɩɩ nɛ ba jaŋ jɩŋ arɩ mɩ nɛ ba TƖƖNA.

²⁸ Tintee-wogusuŋ nɩaa bɩra bɩ jaŋ kʋ laa ba kɩaa. Baga kɩaa ma bɩra bɩ jaŋ kɛsɛba dii. Ba jaŋ hɔŋ sɔm, nʋʋkala bɩ jaŋ joŋ fawʋllʋŋ hɛ ba lɛ.

²⁹ Mɩ jaŋ joŋ tintee-la sɩ kɛŋ kɩaa nʋʋkala jɩŋ ʋ lɛ a pɩba, dɩ losuŋ lɛl ba tinteeŋ lɛ. Tintee-wogusuŋ bɩra bɩ jaŋ sisieri ba lɛ.

³⁰ Ŋɩɩ nɛ nʋʋkala jaŋ jɩŋ arɩ mɩ nɛ ba TƖƖNA Wɩa sɩ chɩŋ ba harɩŋ, ba ma Iziral tɩŋŋaa ŋaa mɩ nɩaa. Mɩ-na ma TƖƖNA Wɩɩjarɩbakɔ nɛ bʋla.

³¹ Ma nagɛ piesee nɛ mɩ teeŋ, mɩ pɩma kʋdiilee ma didii, ma ŋaa mɩ nɩaa nɛ mɩ ma ŋaa ma Wɩa. Mɩ-na ma TƖƖNA Wɩɩjarɩbakɔ nɛ bʋla.”