ƐZƖKƖƐL 29 - WƖA TENIŊ

Ba bʋl wɩalɩŋ sɩ jaŋ ŋaa Ijipiti lɛ

¹ La fa sɩ hɛ yoŋ-baga lɛ jɩsɩŋ fii tʋɔŋ chɛŋ fii, tapʋl fii arɩ balɩa chɛɛŋ, La TƖƖNA bʋl wɩaa pɩmɛ, ʋ sɩ:

² Nuhuobiiŋ, joŋ sɩaa chaasɛ Ijipiti tinteeŋ kuoro a bʋl wɩalɩŋ sɩ jaŋ ŋaa ʋ dɩ ʋ nɩaa kala lɛ.

³ Bʋla pʋ, Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Mɩ chɩŋ ŋ-na Ijipiti tinteeŋ kuoro lɛ nɛ. Ŋ nagɛ peribanyeŋŋu nɛ a pɩŋ ŋ fuonaasɩŋ lɛ. Ŋ sɩ, ‘Mɩ nɛ tɩɩ Naayɩl fuo-la, mɩ-na nɛ luu a pɩ mɩ tɩtɩa.’

⁴ Ama mɩ jaŋ joŋ gbɩamba hɛ ŋ tapaŋaa lɛ, aŋ leŋ dɩ chenfile-la sɩ hɛ ŋ fuonuŋ lɛ kʋ mɛrɛ ŋ horuŋ lɛ. Mɩ jaŋ lɛrɩŋ lɩɩsɛ ŋ fuonu-la lɛ, a pɛ chenfile-la sɩ mɛrɛ ŋ horuŋ lɛ.

⁵ Mɩ jaŋ joŋ ŋ dɩ chenfile-la kala ta tintee-hɩlɩŋ lɛ. Ma jaŋ pɩŋ pɔkɔŋ nyuŋ, nʋʋkala bɩ jaŋ paama. Mɩ jaŋ jomma pɩ baga kɩaa arɩ zaaraa dɩ ba dii.

⁶ Ŋɩɩ nɛ nʋʋkala sɩ hɛ Ijipiti tinteeŋ lɛ jaŋ jɩŋ arɩ mɩ nɛ ba TƖƖNA. Ma nagɛ mɔrʋŋ nɛ Iziral tɩŋŋaa teeŋ.

⁷ Dɩ ba nɛ kɛmma, ma yie bori nɛ, dɩ ba nɛ yellima, ma yie bori nɛ ka ba tel ba tɩnsɩŋ tʋgɛ.

⁸ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ kɛŋ laalɩyuoroo kʋ hɛ ŋ lɛ, dɩ ba kpʋ ŋ nɩaa arɩ ba pʋsʋŋ.

⁹ Ijipiti tinteeŋ jaŋ pɩŋ hoi. Ŋɩɩ nɛ ba jaŋ jɩŋ arɩ mɩ nɛ ba TƖƖNA. A tɩŋ ŋ fa sɩ sɩ, ‘Naayɩl fuo-la ŋaa mɩ kʋa nɛ, mɩ-na nɛ luo.’

¹⁰ Ŋɩɩ wɩaa mɩ chɩŋ ŋ dɩ ŋ fuonuŋ kala lɛ nɛ. Mɩ jaŋ leŋ dɩ Ijipiti tinteeŋ pɩŋ hoi a ŋaa jikpeeŋ, a chɩŋ taŋ-la ba sɩɩ yɩrɛ Mɩgɩdɔl a kaa mʋ taŋ-la ba sɩɩ yɩrɛ Asɩwaŋ, a kɛŋ ŋɩɩ mʋ yi Kus tinteeŋ bʋa.

¹¹ Nuhuobiiŋ koo pʋna kala naaŋ bɩ jaŋ to lee-la bal. Nʋʋkala bɩ jaŋ hɔŋ nɩmɛ a kaa mʋ yi jɩsɩŋ mahɩŋ balɩa.

¹² Mɩ jaŋ leŋ dɩ Ijipiti tinteeŋ faasa pɩŋ hoi dʋnɩa kala lɛ, dɩ ʋ tabalaa ma pɩŋ hoi a kɩɩ tabala-la sɩ pɩŋ jikpeeniŋ lɛ a kaa mʋ yi jɩsɩŋ mahɩŋ balɩa. Mɩ jaŋ kɛŋ Ijipiti tɩŋŋaa pɩsa hɛ tintee-wogusuŋ lɛ.”

¹³ La TƖƖNA Wɩɩjarɩbakɔ ha sɩ: “Dɩ jɩsɩŋ mahɩŋ balɩa-la nɛ bala, mɩ jaŋ mɩɩra kɛŋ Ijipiti tɩmma-la lɩɩ tinteye-la lɛ mɩ sɩ kɛmba pɩsa hɛ a kʋ hɛ dɔŋɔ.

¹⁴ Mɩ jaŋ mɩɩra kɛmba lɩɩ lee-la ba sɩ yuo kɛsɛba kaa mʋ, a kɛmba mɩɩra kɔ Ijipiti tinteeŋ lee-la ba sɩɩ yɩrɛ Patʋrɔs, ba naabalɩmaba tinteeŋ. Nɩmɛ ba jaŋ ŋaa kuori-gentine nɩaa sɩ bɩ doluŋ kɛnɛ.

¹⁵ Ʋ nɛ jaŋ ŋaa kuori-gentisi-la kala tʋɔŋ kʋpʋgʋŋ. Ʋ bɩra bɩ jaŋ kɛŋ ʋ tɩtɩa je arɩ ʋ nɛ kɩɩ tinteye-la dɔnsʋŋ. Mɩ jaŋ leŋ dɩ ba faasa pʋgʋmɛ a sɩ́ wuo kɛŋ doluŋ tintee kala lɛ a bibemba.

¹⁶ Ijipiti tinteeŋ bɩra bɩ jaŋ ŋaa lee Iziral tɩŋŋaa sɩ jaŋ joŋ ba yɩɛlaa hɛ. Ama ba jaŋ liliisi wʋbɔmɔ-la ba sɩ ŋaa, ba sɩ kɛŋ ba tɩtɩa mʋ mɛrɛ Ijipiti tɩŋŋaa lɛ dɩ ba pɛ ba lɛ. Ŋɩɩ nɛ Iziral tɩŋŋaa jaŋ jɩŋ arɩ mɩ nɛ ba TƖƖNA Wɩɩjarɩbakɔ.”

¹⁷ La fa sɩ hɛ yoŋ-baga lɛ jɩsɩŋ mara arɩ balɩpɛ, chɛŋ-bumbuŋ tʋɔŋ tapʋl-bumbuŋ chɛɛŋ, La TƖƖNA bʋl wɩaa pɩmɛ:

¹⁸ Ʋ sɩ, “Nuhuobiiŋ, Babɩlɔŋ kuoro Nebukadineza kɛŋ ʋ laalɩyuoroo ba chaasa mʋ yuo tabal-la ba sɩɩ yɩrɛ Taaya nɛ. Ʋ leŋ ʋ laalɩyuoroo chʋŋ kʋyuŋŋoo ba nyusuŋ kala puori, ba vaasɩŋ ma kala fol fol. Ama ʋ dɩ ʋ laalɩyuoro-la sɩ na kɩalɩŋ bɩ ŋɩɩ ba sɩ lɔlɔ Taaya lɛ maga.

¹⁹ Lɛɛlɛ, wɩɩ-la mɩ-na ma TƖƖNA Wɩɩjarɩbakɔ sɩɩ bʋl nɛ ŋ-la: Mɩ jaŋ joŋ Ijipiti tɩŋŋaa a hɛ Babɩlɔŋ kuoro Nebukadineza nɩsɩŋ lɛ dɩ ʋ chʋŋ ba dʋa kala kaa viiri. Ʋ jaŋ yuo paa Ijipiti tɩŋŋaa dʋa kala a joŋo tiŋ ʋ laalɩyuoroo.

²⁰ Mɩ joŋ Ijipiti tɩŋŋaa dʋa a titimu, bɛɛ wɩaa wɩalɩŋ kala ʋ dɩ ʋ laalɩyuoroo sɩɩ ŋaa, ba ŋaa pɩpɩmɛ nɛ. Mɩ-na ma TƖƖNA Wɩɩjarɩbakɔ nɛ bʋla.

²¹ Dɩ wɩɩŋ deeŋ mɩ sɩ bʋla nɛ kʋ ŋaa, mɩ jaŋ leŋ dɩ Iziral tɩŋŋaa kɛŋ doluŋ, aŋ pɩ ŋ ma Ɛzɩkɩɛl doluŋ dɩ ŋ wuo bʋl wɩaa pɩba. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”