ƐZƖKƖƐL 28 - WƖA TENIŊ

Ba bʋl wɩalɩŋ sɩ jaŋ ŋaa Taaya kuoro lɛ

¹ La TƖƖNA fa bʋl wɩaa pɩmɛ, ʋ sɩ:

² Nuhuobiiŋ, bʋla pɩ Taaya kuoro, “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Ŋ bigisi ŋ tɩtɩa lɛ a bʋl, ‘Mɩ ŋaa wɩa nɛ, a hɔŋ wɩa kuoru kpasa nyuŋ mʋgʋ-balɩŋ tʋɔŋ.’ Ama ŋ ŋaa nuhuobiiŋ nɛ, ŋ bɩ wɩa ŋaa, ŋ sɩ bɩɩna ŋ jɩŋ wɩaa a nagɛ wɩa ŋɩɩ.

³ Ŋ bɩɩna ŋ jɩŋ wɩaa kɩɩ Danɩɛl nɛ, a jɩŋ wɩɩ-kalaa?

⁴ Ŋ kɛŋ ŋ wʋjɩmɩŋ arɩ ŋ sɩ jɩŋ wɩaa sɩaa nɛ a dʋa kɩaa pɩ ŋ tɩtɩa, a dʋa sɛlɩmɛ arɩ hɔpʋla a su ŋ chʋgʋsʋŋ dɩɩsɩŋ.

⁵ Ŋ sɩ jɩŋ bayalɩŋ wɩaa woruŋ, ŋɩɩ leŋe ŋ dʋa pʋŋa pɛ nɛ. Ŋ dʋa sɩ pʋŋa pɛ ŋɩɩ, ŋ kɛŋ babii-ballɩŋ.

⁶ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩɩ bʋl nɛ ŋ-la: A tɩŋ ŋ sɩ bɩɩna ŋ jɩŋ wɩaa a nagɛ wɩa ŋɩɩ,

⁷ mɩ jaŋ kɛŋ nɩwogusuŋ kʋ hɛ ŋ lɛ, tinteye-la nɩaa tʋɔŋ sɩ chaasa hɛɩ woruŋ. Ba jaŋ chei kʋzɔmɔ-la kala ŋ sɩ kɛŋ ŋ jɩma arɩ ŋ wʋjɩmɩŋ chɛ, a chei ŋ tʋla kala.

⁸ Ba jaŋ kpʋŋ, dɩ ŋ sʋʋ nɩduo sʋʋŋ a tuu mʋgʋ-balɩŋ tʋɔŋ.

⁹ Dɩ ba nɛ kɔ dɩ ba kpʋŋ, ŋ jaŋ wuo bʋl dɩ ŋ ŋaa wɩa nɛ nɩalɩŋ sɩɩ kpʋŋ sɩpaaŋ? Ŋ jaŋ ŋaa nuhuobiiŋ nɩalɩŋ sɩɩ kpʋŋ nɩsɩŋ lɛ, ŋ bɩ jaŋ ŋaa wɩa.

¹⁰ Ŋ jaŋ sʋʋ a nagɛ disiŋ tɩɩna tintee-wogusuŋ nɩaa sɩ bɩ Wɩa ka to nɩsɩŋ lɛ. Mɩ-na ma TƖƖNA Wɩɩjarɩbakɔ nɛ bʋla.”

¹¹ La TƖƖNA bɩra bʋla pɩmɛ, ʋ sɩ:

¹² “Nuhuobiiŋ, ta jembiiŋ a mʋ tɩgɛ Taaya kuoro lɛ: Bʋla pʋ wɩɩ-la mɩ-na ma TƖƖNA Wɩɩjarɩbakɔ sɩɩ bʋl nɛ ŋ-la: Ŋ fa bɩ wʋcheeli kala kɛnɛ, nʋʋkala bibeŋ ŋ lɛ, a kɛŋ wʋjɩmɩŋ, a zɔŋ ma woruŋ.

¹³ Ŋ fa hɛ Ɛdɩŋ lɛ nɛ, mɩ-na Wɩa ŋmaŋkaa-la lɛ. Ŋ faa laalɛ tabɩɩ-zɔŋ dosunu-la ba sɩ kaa ŋaa yaraa kpɩɛraa nɛ. Ba yɩraa nɛ rubi, topas arɩ ɛmɛral, kirisola, ɔnɩs, jasɩpa, safɩya, takʋa arɩ bɛrɛl. Ŋ fa kɛŋ sɛlɩmɛ kpɩɛraa nɛ. Bʋa-la lɛ mɩ sɩ ŋaaŋ, kɩaa deemba kala hɛ dɔŋɔ lɛ nɛ a gbɛrɩŋ.

¹⁴ Mɩ lɩɩsɛ mɩ-na Wɩa tɩndaara sɩ kɛŋ fawʋllʋŋ nɛ ʋ pɔŋ. Ŋ hɛ mɩ peel-la sɩ bɩ disiniŋ kɛnɛ nyuŋ nɛ, a vɩvɛŋ tabɩa-la sɩɩ chol nyiniŋ tʋɔŋ.

¹⁵ Bʋa-la lɛ mɩ sɩ ŋaaŋ, ŋ fa bɩ wʋcheeli kala kɛnɛ a kʋʋ yi bʋa-la lɛ ŋ sɩ suomoo ŋaa wʋbɔŋŋɔɔ.

¹⁶ Ŋ bayalɩŋ fa yʋga, ŋɩɩ leŋ ŋ ŋaa nii-jɩgɛ tɩɩna a ŋaa wʋbɔŋŋɔɔ. Ŋɩɩ nɛ mɩ kiriŋ ta mɩ-na Wɩa peel-la nyuŋ, mɩ tɩndaarʋ-la sɩɩ pɔŋ nɛ kiriŋ ta ŋ lɩɩ tabɩa-la sɩɩ chol nyiniŋ tʋɔŋ.

¹⁷ Ŋ faa dagɛ ŋ tɩtɩa nɛ a tɩŋ ŋ sɩ zɔmɔ wɩaa. Ŋ yɩrɩŋ sɩɩ sii ŋɩɩ ŋ wʋjɩmɩŋ leŋ ŋ chei ŋ tɩtɩa. Mɩ joŋuŋ yuo ta tinteeŋ, kuoroo kala chaarɛ sɩaa pɛ ŋ lɛ.

¹⁸ Ŋ ŋaa wʋbɔŋŋɔɔ yʋgɛ nɛ ŋ bayalɩŋ lɛ a chei ŋ Wɩɩchʋɔlɛ leree kala. Ŋɩɩ nɛ mɩ joŋ nyiniŋ hɛ ŋ taŋ lɛ, ʋ kala dii buru a pɩŋ tinteeŋ. Nɩalɩŋ kala sɩɩ beniŋ na arɩ ŋ die nɛ a bɩrɩmɛ tʋɔrʋŋ.

¹⁹ Tinteye-la kala sɩ jɩmɩŋ naŋ a hihirigi nɛ. Ŋ dɩdɛrɩŋ chaasa lɔrɛ nɛ, ŋ bɩra bɩ jaŋ hɛ nɩmɛ a kaa mʋ wuu.”

Ba bʋl wɩalɩŋ sɩ jaŋ ŋaa Sɩdɔŋ lɛ

²⁰ La TƖƖNA fa bʋl wɩaa pɩmɛ, ʋ sɩ:

²¹ “Nuhuobiiŋ, joŋ ŋ sɩaa chaasɛ Sɩdɔŋ a bʋl wɩalɩŋ sɩ jaŋ ŋaa ʋ lɛ

²² a bʋl, Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Sɩdɔŋ, mɩ chɩŋ ŋ lɛ nɛ, mɩ jaŋ yuoŋ a laa yɩrɩŋ. Dɩ mɩ nɛ dɔgɩsɛ nɩalɩŋ sɩ hɛ ŋ lɛ, ba jaŋ jɩŋ arɩ mɩ nɛ ma TƖƖNA. Dɩ ŋɩɩ dagɛ arɩ mɩ bɩ disiniŋ kɛnɛ.

²³ Mɩ jaŋ joŋ nyanyal bɔŋŋɔɔ hɛ ŋ lɛ dɩ chalɩŋ jaasɛ ŋ womporunuŋ lɛ. Nɩaa jaŋ lɩɩ sɛmɛ na-kala a kʋ yuoŋ, a kpʋ ŋ nɩaa. Ŋɩɩ nɛ nɩaa jaŋ jɩŋ arɩ mɩ nɛ ma TƖƖNA.

²⁴ Tinteye-la kala sɩ golli Iziral tɩŋŋaa a kɛmba ŋmuŋmoo gbɛɛŋ bɩra bɩ jaŋ nagɛ sɔsʋŋ a tʋtɔɔba. Ŋɩɩ nɛ ba jaŋ jɩŋ arɩ mɩ nɛ ba TƖƖNA Wɩɩjarɩbakɔ.

²⁵ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Dɩ mɩ nɛ kɛŋ Iziral tɩŋŋaa lɩɩ lere-la kala ba sɩ pɩsa hɛ a kaa kʋ hɛ dɔŋɔ, tinteye-la jaŋ jɩŋ arɩ mɩ bɩ disiniŋ kɛnɛ. Iziral tɩŋŋaa jaŋ hɔŋ ba tɩtɩa tinteeŋ lɛ, tintee-la mɩ fa sɩ joŋo pɩ mɩ tɩntɩnna Jekɔb.

²⁶ Ba jaŋ hɔŋ nɩmɛ, wɩɩkala bɩ baa walɩmɛ, a saa dɩɩsɩŋ a pɛrɛ girep tɩɩsɩŋ bagɩsɩŋ. Mɩ jaŋ dɔgɩsɛ nɩalɩŋ kala sɩ hɔnɔ kpagɛba a bene gʋʋnɛba. Iziral tɩŋŋaa jaŋ hɔŋ sɔm, ŋɩɩ nɛ ba jaŋ jɩŋ arɩ mɩ nɛ ba TƖƖNA.”