ƐZƖKƖƐL 27 - WƖA TENIŊ

Ɛzɩkɩɛl ta jembiiŋ a pɩ Taaya

¹ La TƖƖNA fa bʋl wɩaa pɩmɛ, ʋ sɩ,

² “Nuhuobiiŋ, ta jembiiŋ a tɩgɛ taŋ-la ba sɩɩ yɩrɛ Taaya lɛ,

³ tabal-la sɩ chɩŋ wombii-la ba sɩ to a mʋmʋ mʋgʋ-balɩŋ, a didii yɔbɔ nɩalɩŋ kala sɩ hɛ mʋgʋ-balɩŋ niiŋ teeŋ. Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Taaya, ŋ bigisi ŋ tɩtɩa lɛ a bʋl, ‘Mɩ chaasa zɔŋ nɛ woruŋ.’

⁴ Ŋ fa nagɛ lɩɩŋ daboro nɛ mʋgʋ-balɩŋ tʋɔŋ, nɩalɩŋ sɩ saaŋ leŋe ŋ zɔŋ nɛ woruŋ.

⁵ Ba keri bʋtʋŋ daasɩŋ Hamɔŋ peel-la nyuŋ nɛ a ŋaa ŋ doloo, a keri kuolu daasɩŋ ma a kaa lɩɩ Lɛbanɔŋ a kaa ŋaa ŋ tʋɔŋ daaduduosuŋ.

⁶ Piiŋ daasɩŋ sɩ hɛ Basaŋ lɛ nɛ ba kaa ŋaa ŋ danyinsiŋ, Kanchal daasɩŋ sɩ hɛ mʋgʋ-balɩŋ niiŋ nɛ ba kaa ŋaa ŋ tʋɔŋ a kɛŋ batu-nyɩlɩŋ a taarɛ.

⁷ Ijipiti tɩŋŋaa gɛrɩpɛ fʋfʋlʋŋ ba sɩ sʋa nɛ ba kaa ŋaa ŋ jɔnjɔŋ ŋ kaa duori lɩɩŋ. Gɛrɩpɛ diibelimbine arɩ gɛrɩpɛ vachalɩŋ ba sɩ kaa lɩɩ lee-la ba sɩɩ yɩrɛ Ɛlɩsa a hɛ mʋgʋ-balɩŋ niiŋ nɛ ŋ kaa kɛrɛ wɩa.

⁸ Baala-la sɩ lɩɩ tasɩ-la ba sɩɩ yɩrɛ Sɩdɔŋ arɩ Aavad nɛ kori ŋ danyinsiŋ. Taaya, ŋ nɩalɩŋ sɩ kɛŋ jɩma nɛ kɛnɩŋ duduori lɩɩŋ.

⁹ Taŋ-la ba sɩɩ yɩrɛ Gɛbal gɔgɔɔ sɩ jɩŋ lɩɩŋ daborusuŋ wasɩŋ hɛ ŋ lɛ nɛ, dɩ daboro-la nɛ luro dɩ ba tɔ. Lɩɩŋ daborusuŋ arɩ nɩalɩŋ sɩ kɛmba vɩvɛŋ kala yie kɔ ŋ leriŋ nɛ a didii yɔbɔ.

¹⁰ Baalaa sɩ lɩɩ tinteyee deemba: Pɛsɩa, Lidiya arɩ Puti hɛ ŋ laalɩyuoroo tʋɔŋ nɛ. Ba joŋ ba hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ arɩ nyuŋ-chugbaŋkogunuŋ a sagɛ ŋ jeyee nyuŋ nɛ a laa yɩrɩŋ pɩŋ.

¹¹ Baalaa sɩ lɩɩ tabal-la ba sɩɩ yɩrɛ Aavad arɩ tintee-la ba sɩɩ yɩrɛ Hɛlɛk nɩɩ pɔŋ, ka baalaa sɩ lɩɩ Gamad ma sagɛ dɩɩ-leŋee nyuŋ a bibeŋ leriŋ, aŋ ma joŋ ba hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ sagɛ ŋ jeyee lɛ. Ba nɛ leŋe ŋ chaasa zɔŋ.

¹² Ŋ dɩ tintee-la ba sɩɩ yɩrɛ Taasɩs nɩɩ dii yɔbɔ a tɩŋ ŋ dʋa sɩ yʋga wɩaa, ba yie joŋ hɔpʋla, hɔ-duoŋ, hɔɔ-la ba sɩ kaa ŋaa kɔŋkɔŋ arɩ fanɩ a lenni ŋ bayal kɩaa.

¹³ Ŋ dɩ tinteyee deemba nɩaa: Giriisi tɩŋŋaa, Tubal tɩŋŋaa arɩ Mɛsɛk tɩŋŋaa ma dii yɔbɔ nɛ, ba joŋ yosuŋ arɩ kɩalɩŋ ba sɩ kɛŋ kɔlɩɩŋ ŋaa a lenni ŋ bayal kɩaa.

¹⁴ Ŋ dɩ taŋ-la ba sɩɩ yɩrɛ Bɛf Togaama tɩŋŋaa ma dii yɔbɔ nɛ. Ba joŋ janɩ-la ba sɩ kaa tɩtɩŋ arɩ ba laalɩŋ janɩŋ arɩ kakusuŋ a lenni ŋ bayal kɩaa.

¹⁵ Ŋ dɩ Dɛdaŋ tɩŋŋaa ma dii yɔbɔ nɛ. Nɩalɩŋ sɩ hɔŋ mʋgʋ-balɩŋ niiŋ jesiŋ kala ka dii yɔbɔ ŋ lɛ nɛ. Ba yie joŋ batu-nyɩlaa arɩ kalɩ-daasɩŋ a kaa lenni ŋ kɩaa.

¹⁶ Ŋ dɩ Ɛdɔm tɩŋŋaa ma dii yɔbɔ nɛ, a tɩŋ ŋ kʋŋaalaa sɩ yʋga wɩaa. Ba ma joŋ tabɩa-la sɩ nagɛ jɔgɩlɩɩŋ, gɛrɩpɛ vachalɩŋ, gɛrɩ sʋalaa, gɛrɩpɛ fʋfʋlaa kalɩnjʋasʋŋ arɩ tabɩɩ-fɩɛsɩŋ sɩɩ tʋl a lenni ŋ bayal kɩaa nɛ.

¹⁷ Ŋ dɩ Juda nɩaa arɩ Iziral tɩŋŋaa ma dii yɔbɔ nɛ. Ba kɛŋ mɛmpɛ a kaa lɩɩ taŋ-la ba sɩɩ yɩrɛ Mɩnɩf a pɛ kʋlɛnlɛmba lɛ: Tʋʋŋ, nʋʋŋ arɩ daalusuŋ ba sɩɩ tɩsʋ a lenni ŋ bayal kɩaa.

¹⁸ Ŋ dɩ Damasɩkʋs nɩaa ma dii yɔbɔ nɛ. A tɩŋ ŋ kʋŋaalaa sɩ yʋga ŋ kɛŋ dʋa a yʋgɛ, ŋɩɩ nɛ ba kɛŋ girep nɛnɛɛ sɩnɩŋ ba sɩ kaa lɩɩ taŋ-la ba sɩɩ yɩrɛ Hɛlɩbɔŋ arɩ pie-pʋnaa ma ba sɩ kaa lɩɩ taŋ-la ba sɩɩ yɩrɛ Zaha, a kaa kʋ lenni ŋ bayal kɩaa.

¹⁹ Ŋ dɩ Vɛdaŋ tɩŋŋaa arɩ Giriisi tɩmma-la sɩ lɩɩ Uzal ma dii yɔbɔ nɛ. Ba yie kɛŋ hɔɔ-la sɩ bɩ sʋ, tegisi-la ba sɩ yie joŋo guoli kɩaa lɛ ba sɩŋ baa yɩrɛ Kaasɩa arɩ Kalamus a kʋ lenni ŋ bayal kɩaa.

²⁰ Dɛdaŋ tɩŋŋaa ma kɛŋ janɩŋ kpɩɛraa nɛ kʋ yalla pɩŋ.

²¹ Arebia arɩ Kɛda tinteeŋ kuoroo kala ŋaa ŋ yɔɔ-diire nɛ. Ba yie kɛŋ pie-pɔrɔɔ, pie-belliŋ arɩ bʋʋnaa kʋ lenni ŋ bayal kɩaa.

²² Ŋ dɩ bayalɩa-la sɩ lɩɩ Sɛɛba arɩ Rama ma dii yɔbɔ nɛ. Ba joŋ tegisi doho kala sɩ zɔmɔ arɩ tabɩɩ-tʋlaa arɩ sɛlɩmɛ a lenni ŋ bayal kɩaa.

²³ Ŋ dɩ tabalaa deemba: Haraŋ, Kannɛ, Ɛdɩŋ arɩ Sɛɛba, Asu arɩ Kɩlɩma bayalaa ma ka dii yɔbɔ nɛ.

²⁴ Ŋ yɔbɔ lɛ nɛ ba faa yallɛ gɛrɩ-zɔŋŋɔɔ, gɛrɩ-diibelimbisiŋ, gɛrɩ-sʋalaa arɩ gɛrɩ-ŋmʋŋmʋnaa sɩ kɛŋ jʋɔsaa, ba sɩ kaa mɩlɩmɛ mɩlɩmɛ a kaa gul woruŋ ba joŋoo tɔ tinteeŋ.

²⁵ Taasɩs lɩɩŋ daborusuŋ nɩɩ chʋŋ ŋ bayal kɩaa. Ŋ kala suo nɛ arɩ chʋgʋsʋ-la sɩ yuŋŋie a chɩŋ mʋgʋ-balɩŋ tʋɔŋ.

²⁶ Nɩalɩŋ sɩ kori ŋ danyinsiŋ kɛnɩŋ duoroo gɔllɛ mʋgʋ-balɩŋ tʋɔŋ nɛ. Ama peliŋ jaŋ lɩɩ wɩɩpɔsʋŋ dɩɩrɩŋ a kʋ ŋmobuŋ yɛrɛ muno muno mʋgʋ-balɩŋ tʋɔŋ.

²⁷ Ŋ dʋa, ŋ bayal kɩaa, ŋ lɩɩ-duoroo, ŋ nɩalɩŋ sɩɩ tɩŋ lɩɩŋ tʋɔŋ arɩ nɩalɩŋ sɩɩ kpaasɛ lɩɩŋ daborusuŋ, ŋ bayalaa arɩ ŋ laalɩyuoroo arɩ nʋʋ na-kala sɩ hɛ ŋ lɛ jaŋ tuu mʋgʋ-balɩŋ tʋɔŋ tapʋlɩɩ-la ŋ sɩ jaŋ yɛrɛ.

²⁸ Nɩalɩŋ sɩɩ tɩŋ mʋgʋ-balɩŋ tʋɔŋ jaŋ ŋmoo niiŋ dɩ tinteeŋ zigili.

²⁹ Nɩalɩŋ sɩ kori ŋ danyinsiŋ jaŋ vɩa ba lɩɩŋ daborusuŋ ta, lɩɩ-duoroo arɩ nɩalɩŋ sɩɩ tɩŋ lɩɩŋ daborusuŋ tʋɔŋ kala jaŋ lɩɩ chɩŋ lɩɩŋ niiŋ.

³⁰ Ba jaŋ suri niiŋ a yel ŋ wɩaa woruŋ, aŋ ŋaa hagɩla hɛ ba nyusuŋ lɛ aŋ bibilimi tʋɔrʋŋ lɛ.

³¹ Ba jaŋ fʋŋ ba nyusuŋ a tɩŋ ŋ wɩaa, aŋ laalɛ tʋɔ-chei gɛnnɩŋ. Ba tʋɔŋ jaŋ faasa chei dɩ ba yel ŋ wɩaa woruŋ.

³² Dɩ ba nɩɩ yel ŋ lɛ, ba jaŋ ta jembiiŋ tɩgɛ ŋ lɛ a bʋl, ‘Kʋbɛɛ nɛ ŋaa fʋlʋlʋ, a nagɛ Taaya mʋgʋ-balɩŋ sɩ gollo chu?’

³³ Ŋ sɩ kɛŋ ŋ bayal kɩaa chol mʋgʋ-balɩŋ cholo, ŋ leŋe tintee daŋ nɛ na ba kʋchɛɛlɛɛ, ŋ dʋa daŋ-la arɩ ŋ bayal kɩaa leŋe dʋnɩa kuoroo ŋaa kɩa tɩmma nɛ.

³⁴ Ama lɛɛlɛ ŋ yɛrɛ nɛ mʋgʋ-balɩŋ tʋɔŋ, a tuu lɩɩŋ bʋbʋɔŋ dɩ-luŋuŋ. Ŋ bayal kɩaa arɩ ŋ nɩaa kala nɛ to ŋ harɩŋ tuu lɩɩŋ bʋbʋɔŋ.

³⁵ Wɩɩ-la sɩ ŋaa ŋ lɛ kperi nɩalɩŋ kala sɩ hɔŋ mʋgʋ-balɩŋ niiŋ nɛ, fawʋllʋŋ chaasa kɛŋ ba kuoroo. Ba sɩaa ŋaa forumo forumo.

³⁶ Tinteyee nɩaa bayallaa vigisi nyusuŋ nɛ ŋ wɩaa. Ŋ dɩdɛrɩŋ lɔrɔ nɛ, ŋ tuo a kaa mʋ wuu.”