ƐZƖKƖƐL 26 - WƖA TENIŊ

Ba bʋl wɩalɩŋ sɩ jaŋ ŋaa Taaya lɛ

¹ Jɩ-fii arɩ kʋbala tʋɔŋ, chɛnɛ tapʋl bumbuŋ lɛ nɛ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, a tɩŋ taŋ-la ba sɩɩ yɩrɛ Taaya tʋɔŋ sɩ tɔrɛ Jerusalɛm sɩ tele wɩaa ʋ bʋl, ‘Aŋ haa, boi-baal-la ba sɩ to mʋmʋ tinteyee boro nɛ, ʋ borusuŋ suro chɩŋ a pɩmɛ, lɛɛlɛ ʋ pɩŋ jikpeeŋ nɛ, mɩ jaŋ kuori.’

³ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Taaya, mɩ lɩɩ ŋ harɩŋ nɛ. Mɩ jaŋ kɛŋ tintee daŋ kʋ hɛ ŋ lɛ dɩ ba yuoŋ. Ba jaŋ kʋ yagɩŋ a nagɛ mʋga lɩɩ-peliŋ sɩ sii yɩyagɛ mʋgʋ-balɩŋ niiŋ.

⁴ Ba jaŋ chei Taaya jeyee aŋ ŋmoo ʋ dɩɩ-leŋee lo. Mɩ jaŋ paa kʋ-telie-la kala a kaa viiri aŋ ka bʋ-taala nyɩɩsɛ.

⁵ Taaya bʋ-taala-la nyuŋ nɛ chenfil-kpʋʋraa jaŋ yieni ba jomba mʋgʋ-bal-la leriŋ. Mɩ-na ma TƖƖNA Wɩɩjarɩbakɔ nɛ bʋla. Tinteyee nɩaa jaŋ paa ʋ kɩaa,

⁶ aŋ kpʋ nɩalɩŋ sɩ hɔŋ Taaya tinteeŋ mʋgʋ-balɩŋ niiŋ. Ŋɩɩ nɛ ba jaŋ jɩŋ arɩ mɩ nɛ ba TƖƖNA.

⁷ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ kɛŋ Babɩlɔŋ kuoro Nebukadineza sɩ kɛŋ doluŋ kɩɩ dʋnɩa kuoroo kala kɔ dɩ ʋ yuo Taaya. Ʋ jaŋ lɩɩ wɩɩpɔsʋŋ nagʋa dɩɩrɩŋ a kɛŋ laalɩyuori daŋ, a pɛ janɩŋ, janɩŋ torukoba arɩ ja-jɩllaa sɩ yʋga lɛ.

⁸ Ʋ jaŋ yuo kpʋ nɩalɩŋ sɩ hɔŋ ŋ tintee-la lɛ mʋgʋ-balɩŋ niiŋ. Ʋ jaŋ kʋ chɩna golluŋ, a paa kɩaa a bil dɩ ba sii je dɩ ba chɩŋ ba nyuŋ a bibeŋ taŋ-la kala, aŋ saa vaŋkumba a jɩla tɩgɛ ŋ jeyee lɛ a kɛŋ hɔɔtaalɩ-la laalɩyuoroo sɩ kaa kɛrɛ laa bayuori-hɛŋŋɛɛ a kaa kɩɛla golluŋ.

⁹ Ʋ jaŋ pa wombiiŋ dɩ ʋ laalɩyuoroo kɛŋ doloo ŋmoo ŋ jeyee lo, aŋ giri ŋ dɩɩ-leŋee ma arɩ ʋ bayuori kɩaa.

¹⁰ Ʋ janɩŋ jaŋ yʋgɛ kɩŋkɛŋ dɩ ba kʋŋkɔlʋŋ sii tɔŋ. Ʋ laalɩŋ janɩŋ jaŋ lɛrɛ janɩŋ torukoba arɩ torukoba a to ŋ boi-baalaa jʋʋ a nagɛ tabal-la ba sɩ yuo dii. Dɩ ba nɛ jʋa, ba dɔmɔ jaŋ leŋ dɩ ŋ jeyee jigisi.

¹¹ Ʋ laalɩyuoroo jaŋ jɩl janɩŋ a guu su ŋ womporoo. Ba jaŋ kpʋ ŋ nɩaa. Ŋ jebii duoruŋ jaŋ tel tinteeŋ.

¹² Ba jaŋ paa ŋ dʋa arɩ ŋ bayal kɩaa, ba jaŋ ŋmoo ŋ jeyee lo aŋ giri ŋ dɩɩ zɔŋŋɔɔ, aŋ paa ba tabɩaa, doloo arɩ tɩɛrɩŋ a yuo hɛ mʋgʋ-balɩŋ tʋɔŋ.

¹³ Mɩ jaŋ leŋ dɩ ŋ yɩɩlaa yɩɩnɩŋ dɛrɛ, nʋʋ bɩra bɩ jaŋ nɩɩ dɩ ŋ du cheŋ a yɩyɩɩ yɩɩlaa.

¹⁴ Mɩ jaŋ leŋ dɩ Taaya tinteeŋ ŋaa bʋ-taala, lee-la chenfil-kpʋʋraa sɩ jaŋ yiyieni ba jomba. Ba bɩra bɩ jaŋ paa taŋ-la wasa saa. Mɩ-na ma TƖƖNA Wɩɩjarɩbakɔ nɛ bʋla.”

¹⁵ Wɩɩ-la mɩ-na ma TƖƖNA Wɩɩjarɩbakɔ bɩra sɩ bʋla pɩ Taaya nɛ ŋ-la: “Dɩ ba nɛ yuo diiŋ, nɩalɩŋ ba sɩ bolimo jaŋ huuni, dɩ fawʋllʋŋ kɛŋ nɩalɩŋ sɩ hɔŋ mʋgʋ-balɩŋ niiŋ, ka dɩ ba kpʋkpʋ ŋ nɩaa.

¹⁶ Kuorie-la sɩ hɛ mʋgʋ-balɩŋ niiŋ jaŋ sii ba kuoru kpasɩnɩŋ nyuŋ. Ba jaŋ wuri ba kuori-gɛnnɩŋ arɩ ba gɛrɩ-sʋalaa ta aŋ hɔŋ tinteeŋ a chichel. Wɩɩ-la sɩ ŋaa ŋ lɛ jaŋ leŋ dɩ fawʋllʋŋ kɛmba kɩŋkɛŋ dɩ ba chichel aŋ bibeniŋ.

¹⁷ Ŋɩɩ nɛ ba jaŋ ta jembiiŋ pɩŋ a bʋl: ‘Tabal-la sɩ kɛŋ yɩrɩŋ, ba cheyu, nɩalɩŋ fa sɩ jɩŋ mʋgʋ-balɩŋ. Ŋ dɩ nɩalɩŋ sɩ hɔŋ ŋ lɛ nɛ fa kɛŋ doluŋ mʋgʋsʋŋ lɛ, ŋ fa joŋ fawʋllʋŋ hɛ nɩalɩŋ kala sɩ hɔŋ ŋ tinteeŋ mʋgʋ-balɩŋ niiŋ nɛ.

¹⁸ Tapʋlɩɩ-la ba sɩ yuo diiŋ, nɩalɩŋ sɩ hɔŋ mʋgʋ-balɩŋ niiŋ chele nɛ, ŋ sɩ tele fawʋllʋŋ kɛŋ tinteye-la lɩɩŋ sɩ gollo chu nɩaa nɛ.’

¹⁹ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ leŋ dɩ taŋ-la ba sɩɩ yɩrɛ Taaya pɩŋ hoi a nagɛ tabala-la nɩaa bɩra sɩ́ bɩ jʋʋ. Mɩ jaŋ leŋ dɩ ŋ tuu mʋgʋ-balɩŋ bʋbʋɔŋ dɩ ʋ lɩɩŋ tɔŋ.

²⁰ Mɩ jaŋ leŋ dɩ ŋ mʋ lɛlɛɛ-jaŋ a pɛ faafaa nɩaa tʋɔŋ. Mɩ jaŋ leŋ dɩ ŋ hɛ bʋa tʋɔŋ. Ŋ bɩra bɩ jaŋ wuo guoli nɩweyee tʋɔŋ.

²¹ Mɩ jaŋ leŋ dɩ ŋ dɩdɛrɩŋ chaasa lɔrɛ, dɩ ŋ lɛl. Nɩaa jaŋ chɛŋ, ama ba bɩ jaŋ kɔ dɩ ba naŋ. Mɩ-na ma TƖƖNA Wɩɩjarɩbakɔ nɛ bʋla.”