ƐZƖKƖƐL 25 - WƖA TENIŊ

Ba bʋl wɩalɩŋ sɩ jaŋ ŋaa Amɔŋ tɩŋŋaa lɛ

¹ La TƖƖNA bʋl wɩaa pɩmɛ, ʋ sɩ:

² “Nuhuobiiŋ, joŋ sɩaa chaasɛ Amɔŋ tɩŋŋaa tinteeŋ a bʋl wɩalɩŋ sɩ jaŋ ŋaa ba lɛ a pɩba.

³ Bʋla pɩba, dɩ ba jegile nɩɩ wɩɩ-la mɩ-na ma TƖƖNA Wɩɩjarɩbakɔ sɩ bʋla. Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: A tɩŋ ma tʋɔŋ sɩ tɔrɔ bʋa-la lɛ mɩ dɩɩ-bal-la sɩ cheye arɩ Iziral tinteeŋ sɩ pɩŋ jikpeeŋ, arɩ bʋa-la lɛ Juda nɩaa sɩ hɛ yoŋ-baga lɛ wɩaa,

⁴ mɩ jaŋ jomma hɛ nɩalɩŋ sɩ hɛ wɩɩpɔsʋŋ dɩɩrɩŋ nɩsɩŋ lɛ dɩ ba tɩɩma. Ba jaŋ ŋmoo bugoo ma tinteeŋ lɛ a hɛ lɛŋŋɛɛ ma tʋɔŋ, ba jaŋ dii ma tɩɩnɛnɛɛ aŋ nyʋa ma nayɩlɩŋ.

⁵ Mɩ jaŋ kɛŋ ma tabal-la ba sɩɩ yɩrɛ Raba a bɩrɩmɛ bʋntaŋŋaba dɩ-diiliŋ, aŋ leŋ dɩ Amɔŋ tinteeŋ kala ŋaa piesee dɩjʋʋlʋŋ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

⁶ Wɩɩ-la mɩ-na ma TƖƖNA Wɩɩjarɩbakɔ bɩra sɩ bʋla nɛ ŋ-la: A tɩŋ ma tʋɔŋ sɩ tɔrɔ ma porisi nɩsaa a fɩla jʋɔsɛ Iziral tinteeŋ sɩ cheye wɩaa,

⁷ mɩ jaŋ jomma hɛ tinteyee nɩaa nɩsɩŋ lɛ dɩ ba kɛsɛma a nagɛ ba sɩ yuo laalɩŋ dii nɩaa aŋ paa kɩaa. Mɩ jaŋ cheima ta tinteyee tʋɔŋ, dɩ ma bɩra sɩ́ nɩa ŋaa tinteeŋ lɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.”

Ba bʋl wɩalɩŋ sɩ jaŋ ŋaa Mʋab tɩŋŋaa lɛ

⁸ “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: A tɩŋ tinteye-la ba sɩɩ yɩrɛ Mʋab arɩ Sɛɛ sɩ sɩ, ‘Má bee na, Juda dɩa nɩaa ma nagɛ tinteyee dɔnsʋŋ nɩaa kala nɛ,’

⁹ ŋɩɩ wɩaa mɩ jaŋ kɛŋ lere-la sɩ kɛrɛ Mʋab suri, a suomi tasɩ-la sɩ hɛ ʋ sɩpaaŋ, ba yɩyɩrɛ Bɛf Jɛsɛmɔ, Baal Mioŋ arɩ Kɩrɩatam, taŋ-la sɩ kɛŋ yɩrɩŋ woruŋ tintee-la lɛ.

¹⁰ Mɩ jaŋ leŋ dɩ nɩalɩŋ sɩ hɛ wɩɩpɔsʋŋ dɩɩrɩŋ yuo dii Mʋab, a pɛ Amɔŋ tɩŋŋaa lɛ a tɩɩba, dɩ ba bɩra sɩ́ Amɔŋ tɩŋŋaa wɩaa liisu tinteyee tʋɔŋ.

¹¹ Mɩ jaŋ dɔgɩsɛ Mʋab tɩŋŋaa. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”

Ba bʋl wɩalɩŋ sɩ jaŋ ŋaa Ɛdɔm tɩŋŋaa lɛ

¹² “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Ɛdɔm nɩaa sɩ ŋaa wɩaa a tiŋ chɩmɩŋ Juda nɩaa lɛ ŋɩɩ, ba laa cheeriŋ nɛ.

¹³ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ dɔgɩsɛ Ɛdɔm nɩaa a kpʋ nʋʋkala arɩ pʋsʋ-la kala sɩ hɛ nɩmɛ. Mɩ jaŋ leŋ dɩ tintee-la pɩŋ jikpeeŋ a chɩŋ taŋ-la ba sɩɩ yɩrɛ Tɛmaŋ lɛ a kaa mʋ yi taŋ-la ba sɩɩ yɩrɛ Dɛdaŋ. Ba jaŋ sʋʋ laalɩŋ lɛ.

¹⁴ Mɩ jaŋ leŋ dɩ mɩ nɩaa Iziral tɩŋŋaa ŋaa wɩaa tiŋ chɩmɩŋ Ɛdɔm tɩŋŋaa lɛ a pɩmɛ. Ba jaŋ kɛŋ mɩ baanɩŋ a ŋaa wɩaa Ɛdɔm tɩŋŋaa lɛ. Ɛdɔm tɩmma-la jaŋ jɩŋ ŋɩɩ mɩ baanɩŋ sɩ naga. Mɩ-na ma TƖƖNA Wɩɩjarɩbakɔ nɛ bʋla.”

Ba bʋl wɩalɩŋ sɩ jaŋ ŋaa Fɩlɩsɩtɩa tɩŋŋaa lɛ

¹⁵ “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Fɩlɩsɩtɩa tɩŋŋaa sɩ kɛŋ tʋɔŋ arɩ Juda nɩaa faafaa kala ŋɩɩ, ba ŋaa wɩaa ba lɛ nɛ a tiŋ chɩmɩŋ a cheiba.

¹⁶ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ bɩra sɩ bʋla nɛ ŋ-la: Mɩ jaŋ dɔgɩsɛ Fɩlɩsɩtɩa tɩŋŋaa, a kpʋ ba nɩalɩŋ kala sɩ hɔŋ mʋgʋ-balɩŋ niiŋ.

¹⁷ Mɩ jaŋ joŋ mɩ baanɩŋ tiŋ ba lɛ kɩŋkɛŋ. Baanɩŋ nɛ mɩ jaŋ kaa dɔgɩsɛba. Dɩ mɩ nɛ kɛŋ mɩ baanɩŋ ŋaa wɩaa tiŋ chɩmɩŋ ba lɛ, ŋɩɩ nɛ ba jaŋ jɩŋ arɩ mɩ nɛ ba TƖƖNA.”