ƐZƖKƖƐL 24 - WƖA TENIŊ

Kʋchɔɔrʋ pupoiŋ

¹ La fa sɩ hɛ yoŋ-baga lɛ jɩ-nibi tʋɔŋ, chɛŋ-fii tapʋl fii lɛ nɛ La TƖƖNA bʋl wɩaa pɩmɛ, ʋ sɩ:

² “Nuhuobiiŋ, ŋmʋnsɛ jɩnɩŋ tapʋlʋŋ bil, bɛɛ wɩaa tapʋlʋŋ deeŋ tɩtɩa nɛ Babɩlɔŋ kuoro suomo yuyuo Jerusalɛm.

³ Magɛ namaga deeŋ pɩ Jerusalɛm nɩaa deemba sɩ vɩa dagɩŋ: Wɩɩ-la Mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Joŋ pupoiŋ chɔ, a ŋaa lɩɩŋ hɛ.

⁴ Joŋ nammɩa a kaa keri muno muno a hɛ, lere-la kala sɩ zɔmɔ huiyee arɩ vaasɩŋ. Paa haŋgbele-la sɩ zɔmɔ pɛ a su pupoi-la.

⁵ Nammɩa-la maga ʋ ŋaa pie-zɔmʋŋ ŋ sɩ lɩɩsa piesee tʋɔŋ nɛ. Hɛ daasɩŋ pupoi-la bʋbʋɔŋ dɩ lɩɩ-la kpɛrɛ dɩ haŋgbele-la arɩ nammɩa-la kala sɩ hɛ ʋ lɛ bɩɩ.

⁶ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Wɩɩŋ puu tabal-la nɩaa sɩ ŋaa nɩkpʋʋraa. Ʋ nagɛ pupoiŋ sɩ faasa fisi nɛ, ba bɩ jaŋ wuo paasɛ dɩ ʋ lɩɩ. Liliiri nammɩa-la kʋŋ kʋŋ a sɩ́ bagɩsʋ ka dɩ ba dɛrɛ.

⁷ Jerusalɛm nɩaa sɩ kpʋ nɩalɩŋ chalɩŋ jaasɛ ba tabalɩŋ lɛ nɛ. Chal-la jaasɛ bʋ-taala nyuŋ nɛ, ʋ bɩ tinteeŋ jaasa, lee-la hagɩla sɩ bɩ jaŋ wuo tɔ.

⁸ Mɩ baanɩŋ sɩ jaŋ sii dɩ mɩ ŋaa wɩaa tiŋ chɩmɩŋ ba lɛ nɛ tɩɩ, mɩ leŋ chal-la bʋ-taala-la nyuŋ ŋɩɩ, dɩ ba sɩ́ wuo gbaa tɔ.

⁹ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Wɩɩŋ puu tabal-la nɩaa sɩ ŋaa nɩkpʋʋraa. Mɩ ma jaŋ chɛ daasɩŋ gɩrɛ dɩ ba sii chʋɔrɛ.

¹⁰ Gɩrɛ daasɩŋ a chaanɛ nyiniŋ hɛ. Chɔ nammɩa-la woruŋ, a hɛ tegisiŋ, leŋ dɩ haŋgbele-la fisi.

¹¹ Joŋ pupoi-la kʋwuoluŋ chɔ nyiŋ-halaa lɛ dɩ ʋ faasa lɩŋ dɩ hɔɔ-fɩaŋ-la ba sɩ kaa ŋaaʋ fɩɛsɛ, dɩ disiŋ-la ma ŋmɩɛrɛ, dɩ ʋ sɩ sʋa ŋɩɩ ma dii.

¹² Mɩ ŋaa ŋɩɩ ma kala nɛ, ka ʋ sɩ chaasa sʋ ŋɩɩ ha bɩ lɩa, arɩ mɩ sɩ joŋo chɔ nyiniŋ lɛ ma kala.

¹³ Jerusalɛm, ŋ disiniŋ nɛ ŋaa hachɔrʋŋ wɩalɩŋ ŋ sɩ ŋaa. Mɩ hɛ doluŋ dɩ mɩ chɛsɛ disiŋ-la ta nɛ, ama ŋ bɩ sɛyɛ. Ŋ disiniŋ bɩra bɩ jaŋ lɩɩ, see dɩ mɩ joŋ baaŋ-la kala mɩ sɩ na ŋ nyuŋ a fɩɩsɛ ŋ lɛ ŋɩɩ deeŋ deeŋ dɩ ʋ mʋ fɩɛlɛ.

¹⁴ Mɩ-na ma TƖƖNA nɛ bʋla. Bʋa-la yie nɛ dɩ mɩ ŋaa wɩaa. Mɩ bɩ jaŋ leŋ, mɩ bɩ jaŋ fá nʋʋ nenige, koo a kɛŋ mɩ tʋɔbɩɩnaa bɩrɩmɛ. Mɩ jaŋ dɔgʋsʋŋ a tɩŋ ŋɩɩ ŋ mɛlɛ arɩ ŋ wʋŋaalaa sɩ naga. Mɩ-na ma TƖƖNA Wɩɩjarɩbakɔ nɛ bʋla.”

Ɛzɩkɩɛl haala sʋba

¹⁵ La TƖƖNA fa bʋl wɩaa pɩmɛ, ʋ sɩ:

¹⁶ “Nuhuobiiŋ, mɩɩ chɛ dɩ mɩ guu lɩɩsɛ nɩɩ-la ŋ sɩ cho woruŋ mɩɩsɩŋ nɛ. Ama sɩ́ leŋe dɩ ŋ tʋɔŋ chei koo a yel koo dɩ ŋ sɩlɩɩrɩŋ lɩɩ.

¹⁷ Fɩɛla huuni, sɩ́ sʋʋ-la lɛ yel. Bɛ ŋ nyu-bɛlɛ a hɛ ŋ nɛntɛŋŋɛɛ, sɩ́ kʋŋ kaa tɔ ŋ sɩaa koo a dii ma naaba kʋdiile-la nɩalɩŋ sɩɩ yel yoho sɩɩ dii.”

¹⁸ Ŋɩɩ nɛ chʋchʋɔŋ mɩ dɩ nɩaa bʋl wɩaa, dɩdaanɩŋ mɩ haala sʋʋ. Taŋ sɩ pʋla chʋchʋɔŋ, mɩ ŋaa ŋɩɩ Wɩa sɩ sɩ dɩ mɩ ŋaa.

¹⁹ Nɩalɩŋ pɩɛsɛmɛ, “Bɛɛ nɛ tɩɩ ŋ bɩ ŋ haala lɛ ka yel, ʋ bʋbʋɔŋ nɛ bɛɛ?”

²⁰ Ŋɩɩ nɛ mɩ bʋla pɩba, “La TƖƖNA bʋl wɩaa pɩmɛ, ʋ sɩ:

²¹ Bʋla pɩ Iziral tɩŋŋaa, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩɩ chɛ dɩ mɩ chei mɩ dɩɩ-bal-la nɛ, dɩ-duo-la ma sɩ kɛnɛ a kɛŋ babii-ballɩŋ ma tʋɔŋ tɔrɛ ʋ nyuŋ ma chou woruŋ. Ma hambolibiisiŋ arɩ ma hantolibiisi-la ma sɩ leŋe ta Jerusalɛm lɛ, ba jaŋ kpʋba laalɩŋ lɛ.

²² Ma ma jaŋ ŋaa wɩalɩŋ tɩtɩa mɩ sɩ ŋaa. Ma bɩ jaŋ joŋ kʋŋ a tɔ ma sɩaa koo a dii ma naaba kʋdiile-la nɩalɩŋ sɩɩ yel yoho sɩɩ dii.

²³ Ma jaŋ bɛ nyu-bɛllɩŋ aŋ hɛ ma nɛntɛŋŋɛɛ. Ma bɩ jaŋ yel koo dɩ sɩlɩɩrɩŋ lɩɩ ma sɩaa lɛ, ama ma wʋbɔŋŋɔɔ jaŋ leŋ dɩ ma jagɛ a huuno hɛ dɔŋɔ.

²⁴ Ɛzɩkɩɛl-na ŋaa magɩl nɛ a chɩchagɩlɛma, ma ma jaŋ ŋaa wɩalɩŋ tɩtɩa ʋ sɩ ŋaa. Dɩ wɩɩŋ deeŋ nɛ ŋaa, ŋɩɩ nɛ ma jaŋ jɩŋ arɩ mɩ nɛ ma TƖƖNA Wɩɩjarɩbakɔ.’

²⁵ Ŋ-na, nuhuobiiŋ, tapʋlɩɩ jaŋ yi dɩ mɩ kɛŋ mɩ dɩɩ-bal-la sɩ ŋaa ba dɩ-duoŋ laa ba teeŋ. Ʋ ŋaa ba babiibal arɩ ba tʋɔtɔrɛ lee nɛ, ba tʋɔŋ tɔrɛ ʋ nyuŋ woruŋ ba chou. Mɩ jaŋ kɛsɛ ba hambolibiisiŋ arɩ ba hantolibiisiŋ ma tapʋlɩɩ-la.

²⁶ Chɛɛ-la mɩ sɩ jaŋ ŋaa ŋɩɩ, nʋʋ jaŋ foro fá a kʋ bʋl wɩɩ-la sɩ ŋaa a pɩŋ.

²⁷ Bʋa-la lɛ nɛ ŋ jaŋ wuo suri ŋ niiŋ bʋl wɩaa ʋ teeŋ, ŋ niiŋ bɩra bɩ jaŋ tɔ. Ŋ jaŋ ŋaa magɩl nɩaa teeŋ a chɩchagɩlɛba, dɩ ba jɩŋ arɩ mɩ nɛ ba TƖƖNA.”