ƐZƖKƖƐL 23 - WƖA TENIŊ

Hatoloo balɩa sɩ ŋaa hachɔrʋmɔɔ

¹ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, haalaa balɩa nɛ fa hɛ nɩmɛ, ba naaŋ ŋaa kʋbala.

³ Ijipiti tinteeŋ lɛ nɛ ba bɩrɩmɛ hachɔrʋmɔ, ba ŋaa hachɔrʋŋ wɩaa ba hatulluŋ kala lɛ nɛ. Tintee-la lɛ nɛ ba chagɩsɛ ba yɩlaa a pʋrʋmɛ ba yɩl niiriŋ.

⁴ Nɩhɩaŋ yɩrɩŋ nɛ fa Ohola, ʋ ŋaana ma yɩrɩŋ nɛ Oholiba. Mɩ fa jaa ba nɛ ba lʋl hambolibiisiŋ arɩ hantolibiisiŋ kala. Ohola nɛ chɩŋ taŋ-la ba sɩɩ yɩrɛ Samarɩa nyuŋ, Oholiba ma nɛ chɩŋ taŋ-la ba sɩɩ yɩrɛ Jerusalɛm nyuŋ.

⁵ Ohola fa ŋaa mɩ haala nɛ, aŋ ŋaa hachɔrʋŋ wɩaa a hɩɩlɛ Asiiria laalɩyuoroo a kire to ba harɩŋ.

⁶ Laalɩyuoro-la sɩ laalɛ gɛrɩ-diibelimbine. Ba nɩhɩasɩŋ arɩ laalɩyuori-hɩasɩŋ, ba kala ŋaa bapʋɔsɛ zɔmɔ nɛ sɩ jɩl janɩŋ.

⁷ Hachɔrʋŋ wɩalɩŋ nɛ ʋ fa ŋaa a joŋ ʋ tɩtɩa pɩ Asiiria nɩalɩŋ dɩchɩnɩŋ sɩ yuŋŋie. Ŋɩɩ leŋ ʋ kpaarɛ nʋʋ na-kala sɩ kɛnʋ pɩŋ tɔŋŋɔɔ a kɛŋ disiniŋ.

⁸ Ʋ bɩ hachɔrʋŋ wɩalɩŋ ʋ sɩ suomo Ijipiti lɛ leŋe, ʋ hatulluŋ bʋa lɛ, baalaa kɛnʋ pɩŋ a ŋaa wɩaa ʋ lɛ a nagɛ hachɔrʋmʋŋ.

⁹ Ŋɩɩ wɩaa mɩ joŋu hɛ ʋ hɩɩlaba nɩsɩŋ lɛ nɛ, Asiiria tɩmma-la ʋ sɩɩ hɩɛnʋ.

¹⁰ Ba wuri ʋ gɛnnɩŋ nɛ aŋ ka ʋ yarɩ-biree, a kɛsɛ ʋ hambolibiisiŋ arɩ ʋ toloo, aŋ kpʋʋ. Ba fa sɩ dɔgɩsɛ Ohola ŋɩɩ, ʋ laa yɩrɩ bɔmʋŋ haalaa kala tʋɔŋ.

¹¹ Ʋ ŋaana Oholiba na wɩɩ-la sɩ ŋaa, aŋ ha hɩhɩɛnɛ baalaa a ŋaa hachɔrʋŋ wɩaa yʋga kɩɩ ʋ malɩma.

¹² Ʋ ma ha chɩchɛ Asiiria nɩhɩasɩŋ arɩ ba laalɩyuori-hɩasɩŋ sɩ laalɛ ba gɛrɩ-zɔŋŋɔɔ, ba kala ŋaa bapʋɔsɛ zɔmɔ nɛ a jɩl janɩŋ.

¹³ Mɩ na dɩ ʋ ma ŋaa disiniŋ hɛ ʋ tɩtɩa lɛ, wombii bala nɛ ba kala joŋ.

¹⁴ Ʋ ma fa ha joŋ hachɔrʋŋ wɩaa a chʋŋ ʋ nyuŋ lɛ kɩŋkɛŋ nɛ. Ʋ na ba sɩ tuuri Babɩlɔŋ tɩŋŋaa baalaa a mɛrɛ jeeŋ lɛ a joŋ kʋfɩaŋ taarɛ taarɛ.

¹⁵ Ba fa vɔɔ gɛrɩpɛlɩɛɛ biisiŋ nɛ ba tɩnsɩŋ lɛ aŋ bɛ nyu-bɛllɩŋ sɩɩ biegu. Ba kala nagɛ Babɩlɔŋ nɩaa laalɩyuoroo janɩŋ torukoba nɩhɩasɩŋ nɛ, a lɩɩ Babɩlɔŋ tinteeŋ.

¹⁶ Ʋ sɩ naba dɩdɛrɛ, ʋ hɩɛnɛba a tɩŋ tɩndaaraa ba mʋ ba teeŋ Babɩlɔŋ lɛ.

¹⁷ Ŋɩɩ nɛ Babɩlɔŋ baalaa kɔ ʋ teeŋ a kɛnʋ pɩŋ ʋ kɛŋ disiniŋ. Ba sɩ ŋaa ʋ kɛŋ disiniŋ harɩŋ lɛ nɛ, ʋ mɩɩsɩŋ fɩɩba ʋ mɩɩrɛ ba harɩŋ.

¹⁸ Ʋ fa sɩ joŋ hachɔrʋŋ wɩalɩŋ chʋŋ ʋ nyuŋ lɛ ŋɩɩ, nɩaa kala jɩŋ ʋ bʋbʋɔŋ. Mɩ mɩɩsɩŋ fɩɩ mɩ joŋ harɩŋ yɩaʋ a nagɛ mɩ fa sɩ joŋ harɩŋ yɩa ʋ malɩma ŋɩɩ.

¹⁹ Ama ŋɩɩ bɩ ʋ walɩma, ka ʋ ha chaasa ŋɩŋaa hachɔrʋŋ wɩalɩŋ kɩŋkɛŋ, ʋ sɩ liise mʋ yi ʋ hatulluŋ bʋa lɛ, hachɔrʋŋ wɩalɩŋ kala ʋ fa sɩɩ ŋaa Ijipiti tinteeŋ lɛ.

²⁰ Nɩmɛ ʋ faa hɩɛnɛ baalaa nɛ woruŋ a kire to ʋ hɩɩlaba harɩŋ, nɩalɩŋ penee sɩ barɩma a nagɛ kakusuŋ penee, ba bafɩɩrɩŋ ma nagɛ jaaba fɩɩrɩŋ.

²¹ Oholiba, ŋ cho hachɔrʋŋ wɩaa nɛ woruŋ ŋ hatulluŋ kala lɛ, Ijipiti tinteeŋ lɛ baalaa chagɩsɛ ŋ yɩlaa nɛ aŋ pʋrʋmɛ ŋ yɩl niiriŋ.

²² Ŋɩɩ wɩaa Oholiba, wɩɩ-la mɩ-na ŋ TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ lɛrɛ ŋ hɩɩlaba kʋ hɛ ŋ lɛ, nɩalɩŋ ŋ mɩɩsɩŋ sɩ fɩa ŋ mɩɩrɛ ba harɩŋ. Mɩ jaŋ kɛmma lɩɩ lee-kala kʋ hɛ ŋ lɛ.

²³ Mɩ jaŋ lɛrɛ Babɩlɔŋ tɩŋŋaa arɩ Chalɩdɩ tɩŋŋaa kala a kʋ hɛ ŋ lɛ, a pɛ Pɛkɔd, Sʋa arɩ Kʋa baalaa arɩ Asiiria tɩŋŋaa kala. Ba kala ŋaa bapʋɔsɛ zɔmɔ nɛ a kala ŋaa sɩpaalaara, a ŋaa laalɩyuori hɩasɩ, a ŋaa laalɩŋ janɩŋ torukoba nɩhɩasɩŋ, a kala ŋaa nɩ-bála a jɩl janɩŋ.

²⁴ Ba jaŋ kɛŋ laalɩyuori kɩaa, laalɩŋ janɩŋ torukoba arɩ torukoba arɩ nɩ-daŋ a kɔ ŋ lɛ. Ba jaŋ kʋ chɩna golluŋ a kori hɔɔtaalɩ-la laalɩyuori sɩ kaa kɛrɛɛ laa bayuori hɛŋŋɛɛ kʋjalaa arɩ kʋbiisiŋ a chu nyunchu-gbaŋkogunuŋ. Mɩ jaŋ joŋuŋ a hɛ ba nɩsɩŋ lɛ dɩ ba dɔgʋsʋŋ. Ba jaŋ dɔgʋsʋŋ a magɛ ŋɩɩ ba wombiiŋ sɩ daga.

²⁵ Mɩ jaŋ joŋ mɩ yarɩ-bieri baanɩŋ a fɩɩsɛ ŋ lɛ, dɩ ba chaasa dɔgʋsʋŋ arɩ baanɩŋ woruŋ. Ba jaŋ keri ŋ mɩɩsɩŋ arɩ ŋ dɩgɩlaa ta, aŋ kpʋ ŋ nɩalɩŋ sɩ ka arɩ tokobiiŋ. Ba jaŋ kɛsɛ ŋ hambolibiisiŋ arɩ ŋ hantolibiisiŋ kala viiri aŋ nyɩgɛ nɩkaanaa.

²⁶ Ba jaŋ wuri ŋ gɛnnɩŋ arɩ ŋ yaraa kpɩɛrɩ-zɔmɔ-la kala.

²⁷ Mɩ jaŋ leŋ dɩ ŋ wʋlɩɩlɩŋ arɩ ŋ hachɔrʋŋ wɩalɩŋ ŋ fa sɩ ŋaa Ijipiti lɛ dɛrɛ. Ŋ bɩra bɩ jaŋ hɩhɩɛnɛ wɩalɩŋ koo a liliisi Ijipiti wɩaa.

²⁸ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ joŋuŋ hɛ nɩalɩŋ ŋ sɩ bɛrɛ nɩsɩŋ lɛ, nɩalɩŋ ŋ mɩɩsɩŋ sɩ fɩa ŋ mɩɩrɛ ba harɩŋ.

²⁹ Ba jaŋ joŋ nɩ-bɛrɛ wɩaa ŋaa ŋ lɛ a laa kʋŋ na-kala ŋ sɩ tɩma na. Ba jaŋ wuri ŋ gɛnnɩŋ ka dɩ ŋ kɛŋ yarɩ-biree dɩ hɩɩsɩŋ kɛnɩŋ a tɩŋ ŋ hachɔrʋŋ wɩalɩŋ wɩaa, dɩ nʋʋkala na. Ŋ wʋlɩɩlɩŋ arɩ hachɔrʋŋ wɩalɩŋ ŋ sɩ ŋaa nɛ

³⁰ kɛŋ wɩɩŋ deeŋ kʋ hɛ ŋ lɛ, bɛɛ wɩaa ŋ hɩɛnɛ baalaa nɛ a kire to tinteyee nɩaa harɩŋ a kpaarɛ ba vʋɩyaa a ŋaa disiniŋ hɛ ŋ tɩtɩa lɛ.

³¹ Ŋ malɩma naabʋɔsʋŋ nɛ ŋ tuto, ŋɩɩ wɩaa mɩ jaŋ dɔgɩsɛ ŋ ma arɩ mɩ fa sɩ dɔgʋsʋʋ ŋɩɩ.”

³² Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Ŋ ma jaŋ nyʋa nyʋnyʋala-la tʋɔŋ ŋ malɩma sɩ nyʋa, nyʋnyʋala-la jalɩa nɛ aŋ luŋ ma. Ʋ jaŋ leŋ dɩ nɩaa sieri ŋ lɛ a mɔmʋŋ, bɛɛ wɩaa ʋ tʋɔŋ kɩaa yʋga nɛ woruŋ.

³³ Ŋ jaŋ bugi dɩ ŋ tʋɔŋ kala chei. Ʋ ŋaa nyʋnyʋala sɩ jaŋ leŋ dɩ ŋ chei a chɩŋ ŋ dʋndʋŋa nɛ. Ŋ malɩma Samarɩa nyʋnyʋala nɛ.

³⁴ Ŋ jaŋ nyʋaʋ a suosi ʋ kala dɩ ʋ hɩl, aŋ yɛrʋ muno muno a kaa kpɛrɛ kpɛrɛ ŋ yɩlaa. Mɩ-na ŋ TƖƖNA Wɩɩjarɩbakɔ nɛ bʋla.

³⁵ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Ŋ sɩ folo yʋ mɩ wɩaa a joŋ harɩŋ yɩamɛ, ʋ maga dɩ ŋ na hɛɛŋ a tɩŋ wʋlɩɩlɩ-la arɩ hachɔrʋŋ wɩalɩŋ ŋ sɩ ŋaa wɩaa nɛ.”

³⁶ La TƖƖNA fa pɩɛsɛmɛ: “Nuhuobiiŋ, ŋ jaŋ dii Ohola arɩ Oholiba sarɩyaa? Ŋɩɩ-na leŋ dɩ ba jɩŋ wɩalɩŋ sɩɩ kɩsʋ ka ba ŋaa.

³⁷ Ba ŋaa hachɔrʋŋ wɩaa nɛ a kpʋ nɩaa. Ba to tɔŋŋɔɔ nɛ a ŋaa hachɔrʋŋ wɩaa, a paala kɛsɛ hambolibiisi-la ba sɩ lʋla pɩmɛ a kpʋ nyɩga pɩ ba tɔŋŋɔɔ.

³⁸ Ba bɩra joŋ wɩɩŋ deeŋ ma nɛ ŋaa mɩ lɛ: Bʋa-la tɩtɩa lɛ nɛ ba ŋaa disiniŋ hɛ mɩ dɩɩ-bal-la lɛ, aŋ chei mɩ chɛ-wiesii-la ma.

³⁹ Tapʋlɩɩ-la tɩtɩa ba sɩ kɛsɛ ba biiriŋ kpʋ nyɩga pɩ ba tɔŋŋɔɔ nɛ ba jʋʋ mɩ dɩɩ-bal-la a ŋaa disiniŋ cheyu. Wɩɩ-la ba sɩ ŋaa mɩ dɩa lɛ nɛ ŋɩɩ.

⁴⁰ Ba fa paala tɩŋ tɩndaaraa ba mʋ dɩ-bolii nɛ a yɩrɛ baalaa. Ba sɩ kɔ, ma fo lɩɩŋ nɛ a ŋaa kɩaa tuuri ma sɩɩ-kuŋkoŋŋoo a laalɛ ma kpɩɛraa.

⁴¹ Ma hɔŋ ma kumpuŋŋu-zɔmʋŋ nyuŋ nɛ, ka teebʋl chɩŋ ma sɩpaaŋ, kʋsʋɔrʋsʋŋ arɩ olif nʋʋŋ sɩ ŋaa mɩ kɩaa daŋ ʋ nyuŋ.

⁴² Ka nɩ-daŋ sɩ ta jɩa ŋɩŋaa goŋ a golli haal-la. Ba fa kɛŋ sɩ-nyʋaraa sɩ lɩɩ tintee-hɩlɩŋ arɩ nɩdoho kala kʋ jaasɛ leriŋ kala. Baala-la joŋ na-hɔɔnʋŋ a hɛ haala-la balɩa nɩsaa a joŋ kuoru nyunchuuluŋ sɩ zɔmɔ a chuba.

⁴³ Mɩ bʋl ŋ-la a mʋ tɩgɛ haal-la sɩ lɔl hachɔrʋŋ wɩaa lɛ: ‘Leŋ dɩ ba kɛnʋ ŋaa hachɔrʋŋ wɩaa, bɛɛ wɩaa ʋ paala ŋaa hachɔrʋŋ nɛ.’

⁴⁴ Ŋɩɩ nɛ ba kɛmba pɩŋ a nagɛ ba sɩ tigisi hachɔrʋmʋŋ. Ba fa tigisi Ohola arɩ Oholiba sɩ ŋaa hachɔrʋmɔɔ ŋɩɩ nɛ.

⁴⁵ Baalaa sɩ kɛŋ tʋɔpʋla jaŋ joŋ cheeriŋ pɩ haala-la sɩ ŋaa hachɔrʋŋ wɩaa a kpʋ nɩaa. Ba jaŋ dɔgɩsɛba, bɛɛ wɩaa ba gɔllɔ saarɛ baalaa a kpʋ nɩaa nɛ.

⁴⁶ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Kɛŋ nɩ-daŋ kʋ hɛ ba lɛ dɩ ba dii doluŋ ba lɛ aŋ paa ba kɩaa.

⁴⁷ Nɩ-daŋ-la jaŋ yagɛba arɩ tabɩaa a kpʋba arɩ ba tokobiee, ba jaŋ kpʋ ba hambolibiisiŋ arɩ ba hantolibiisiŋ kala aŋ nyɩgɛ ba dɩɩsɩŋ.

⁴⁸ Ŋɩɩ lɛ nɛ mɩ jaŋ to a leŋ dɩ wʋlɩɩlɩŋ ŋaanɩŋ dɛrɛ tintee-la lɛ, a chagɩlɛ haalaa kala dɩ ba sɩ́ ma nagʋ.

⁴⁹ Mɩ jaŋ dɔgɩsɛma a tɩŋ ma wʋlɩɩlɩŋ arɩ ma sɩ kpaarɛ tɔŋŋɔɔ a ŋaa wʋbɔmɔ-la wɩaa. Ŋɩɩ nɛ ma jaŋ jɩŋ arɩ mɩ nɛ ma TƖƖNA Wɩɩjarɩbakɔ.”