ƐZƖKƖƐL 22 - WƖA TENIŊ

Jerusalɛm Wʋbɔŋŋɔɔ

¹ La TƖƖNA fa pɩɛsɛmɛ:

² Nuhuobiiŋ, ŋ jaŋ dii Jerusalɛm sarɩyaa? Ŋ jaŋ dii tabalɩŋ deeŋ sɩ suo arɩ nɩkpʋʋraa sarɩyaa? Ŋɩɩ-na leŋ dɩ ʋ jɩŋ wɩalɩŋ mɩ sɩɩ kɩsʋ ka ʋ ŋaa.

³ Bʋla pɩ Jerusalɛm tabal-la, “Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Ŋ jaŋ na hɛɛŋ, bɛɛ wɩaa ŋ kpʋ ŋ tɩtɩa nɩaa yʋgɛ nɛ, aŋ mɛ tɔŋŋɔɔ a ŋaa disiniŋ hɛ ŋ tɩtɩa lɛ.

⁴ Ŋ laa cheeriŋ nɛ, a tɩŋ nɩalɩŋ ŋ sɩ kpʋa arɩ tɔmɔ-la ŋ sɩ mɛ a ŋaa disiniŋ hɛ ŋ tɩtɩa lɛ wɩaa. Ŋ tapʋlaa kpagɛ dɛrɩŋ nɛ, ŋ jɩsɩŋ ma dɛrɛ. Ŋɩɩ wɩaa mɩ jaŋ leŋ dɩ tinteyee nɩaa sieri ŋ lɛ, dɩ ŋ ŋaa mɔmɩɩ tinteyee kala lɛ.

⁵ Nɩalɩŋ sɩ kpagɩŋ arɩ nɩalɩŋ sɩ hɛ dɩ-bolii kala jaŋ sieri ŋ lɛ, bɛɛ wɩaa ŋ ŋaa tabal-la sɩ kɛŋ yɩrɩ bɔmʋŋ nɛ.

⁶ Bee na Iziral nɩaa sɩpaalaara-la sɩ hɛ ŋ lɛ sɩ kɛŋ ba doluŋ a kpʋkpʋ nɩaa ŋɩɩ.

⁷ Ŋ lɛ nɛ ba bɩ nyɩmmaba arɩ naamba ka zil. Ba nyagɛ nʋhʋɔra-la sɩ hɔŋ ŋ lɛ bil nɛ, aŋ dʋdɔgɩsɛ biisinsiŋ arɩ yo-haalaa.

⁸ Ŋ bɩ mɩ dɩɩ-bal-la sɩ bɩ disiniŋ kɛnɛ ka zil, a bɩ mɩ chɛ-wiesii-la ma ka to.

⁹ Ŋ lɛ nɛ wʋnyɩɛraa hɛ, a nyɩɛ wɩaa pɩ nɩaa ba kpʋkpʋba. Ŋ lɛ nɛ nɩaa didii vʋɩyaa kʋdiilee peeliŋ nyuŋ, a ŋɩŋaa wʋlɩɩlɩŋ.

¹⁰ Ŋ lɛ nɛ baalaa kɛŋ ba nyɩmmaba haalaa pɩpɩŋ. Haala yie hɛ tɩŋa a kɛŋ disiniŋ, ka ma dɔnsʋŋ joŋ doluŋ a kɛnʋ pɩŋ.

¹¹ Ŋ lɛ nɛ baala yie ŋaa wɩalɩŋ mɩ sɩɩ kɩsʋ a kɛŋ ʋ dɔŋɔ tɩɩna haala pɩŋ, dɔŋɔ ma yie kɛŋ ʋ bii-haala pɩŋ a ŋaa disiniŋ hɩɩsɛ ʋ tɩtɩa. Dɔŋɔ ma yie kɛŋ ʋ dɩhaala pɩŋ, ʋ nyɩmma tɩtɩa tolo.

¹² Nɩalɩŋ sɩ hɛ ŋ lɛ yie laa kpalaa aŋ kpʋ nɩaa. Ba yie joŋ kɩaa chɩŋ nɩaa aŋ chɩchɛ nyʋʋrʋŋ yʋgɛ, aŋ gʋrɛ ma Iziral tɩŋŋaa dɔnsʋŋ a kuori. Ma yʋ mɩ wɩaa nɛ. Mɩ-na ma TƖƖNA Wɩɩjarɩbakɔ nɛ bʋla.

¹³ Mɩ jaŋ na baanɩŋ a gulimi nɩsaa tuu ma nɩalɩŋ sɩ gɩrɩma laa nɩaa kɩaa arɩ nɩkpʋʋra-la sɩ hɛ tabal-la lɛ.

¹⁴ Ma jaŋ wuo kɛŋ bɔɩ-duoŋ a nyalɩmɛ koo a kɛŋ doluŋ tapʋlɩɩ-la mɩ sɩ jaŋ ŋaa wɩaa ma lɛɛ? Mɩ-na ma TƖƖNA nɛ pɩɛsa, mɩ saa jaŋ ŋaa ma.

¹⁵ Mɩ jaŋ kɛmma pɩsa hɛ tintee-wogusuŋ lɛ. Mɩ jaŋ leŋ dɩ ma disiŋ wɩalɩŋ dɛrɛ.

¹⁶ Dɩ tinteyee nɩaa nɛ hɩɩsɛma, ŋɩɩ nɛ ma jaŋ jɩŋ arɩ mɩ nɛ ma TƖƖNA.”

¹⁷ Ŋɩɩ nɛ La TƖƖNA bɩra bʋla pɩmɛ:

¹⁸ “Nuhuobiiŋ, Iziral tɩŋŋaa bɩrɩmɛ hɔɔ-bɩnɩŋ nɛ mɩ teeŋ, a kala nagɛ hɔɔ-fɩaŋ, hɔɔ-la ba sɩ kaa ŋaa kɔŋkɔŋ, hɔɔ-duoŋ arɩ fanɩ. Ba joŋ ba kala hɛ nyiniŋ lɛ nɛ, ba kala ŋaa hɔpʋla bɩnɩŋ.

¹⁹ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: A tɩŋ ma kala sɩ bɩrɩmɛ hɔɔ-bɩnɩŋ wɩaa, mɩ jaŋ kɛmma kʋ hɛ dɔŋɔ Jerusalɛm lɛ.

²⁰ Ŋ jɩŋ ba sɩ joŋ hɔɔ-pʋla, hɔɔ-fɩaŋ, hɔɔ-duoŋ, fanɩ arɩ hɔɔ-la ba sɩ kaa ŋaa kɔŋkɔŋ a hɛ nyiniŋ lɛ ba ŋmɩɛrɛ ŋɩɩ, ŋɩɩ tɩtɩa nɛ mɩ jaŋ na baanɩŋ a kɛmma kʋ hɛ dɔŋɔ Jerusalɛm lɛ, a fuuni nyiniŋ hɛ ma lɛ dɩ ma ŋmɩɛrɛ.

²¹ Mɩ jaŋ na baanɩŋ a kɛmma kʋ hɛ dɔŋɔ Jerusalɛm lɛ, a fuuni nyiniŋ hɛ ma lɛ dɩ ma ŋmɩɛrɛ nɩmɛ.

²² A nagɛ ba sɩ yie joŋ hɔpʋla hɛ nyiniŋ lɛ ʋ ŋmɩɛrɛ ŋɩɩ, ŋɩɩ tɩtɩa nɛ ma ma jaŋ ŋmɩɛrɛ Jerusalɛm lɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA sɩ na baanɩŋ ma nyuŋ.”

²³ La TƖƖNA bɩra bʋla pɩmɛ:

²⁴ “Nuhuobiiŋ, bʋla pɩ Iziral tinteeŋ, ‘Ŋ ŋaa tintee sɩ kɛŋ disiniŋ nɛ, tapʋlɩɩ-la mɩ sɩ na baanɩŋ ŋ nyuŋ duonuŋ bɩ ŋ lɛ nɩa koo a mirisi ma.’

²⁵ Sɩpaalaara-la sɩ hɛ ŋ lɛ nagɛ naachigiŋ sɩ kpʋ kɩaa a didii nɛ. Ba yie kpʋ nɩaa, a lɩlaa ba dʋa aŋ pɩpaa ba kɩalɩŋ ma sɩ kɛŋ yuŋuŋ, a leŋ yo-haalaa yʋgɛ Jerusalɛm lɛ.

²⁶ Wɩɩsʋllɩ sɩpaalaaraa sɩ hɛ Iziral lɛ chei mɩ wombii-la mɩ sɩ bile dɩ ba tuto nɛ. Ba bɩ mɩ kɩalɩŋ sɩ bɩ disiniŋ kɛnɛ ka zil. Ba bɩ nɩaa daga dɩ ba jɩŋ kɩalɩŋ sɩ bɩ disiniŋ kɛnɛ arɩ kɩalɩŋ sɩ kɛŋ disiniŋ mɩ teeŋ pɛgɛ. Ba dagɛ nɩaa arɩ dabaŋ kala tuo kɩalɩŋ sɩ kɛŋ disiniŋ arɩ kɩalɩŋ sɩ bɩ disiniŋ kɛnɛ pɛgɛ, aŋ bɩra bɩ mɩ chɛ-wiesii-la ma ka to. Ŋɩɩ leŋ ba chei mɩ yɩrɩŋ ba tʋɔŋ.

²⁷ Tɩntɩnnɩ-hɩasɩ-la sɩ hɛ ʋ lɛ nagɛ guŋgurusuŋ sɩ kpʋ pʋsʋŋ a kaa pʋɔsa didii nɛ. Ba gɔllɔ kpʋkpʋ nɩaa nɛ, a leŋ chalɩŋ jaasɛ aŋ gɩrɩma lɩlaa nɩaa dʋa.

²⁸ Wɩa wʋlaabʋlla-la sɩ hɛ Iziral lɛ gbaa tʋtɔ wʋbɔŋŋɔɔ deemba kala nɛ, a nagɛ ba sɩ ŋaa tʋɔrʋŋ bʋgɛ kʋa. Ba yie nyɩɛ wɩaa bʋl dɩ ba na wɩaa a nagɛ duosoo tʋɔŋ nɛ, a vʋga dɩdagɛ wɩalɩŋ maachie sɩ jaŋ ŋaa. Ba sɩ, ‘Wɩɩ-la la TƖƖNA Wɩɩjarɩbakɔ sɩ bʋla nɛ ŋɩɩ,’ ka mɩ-na ma TƖƖNA bɩ wɩɩkala bʋla.

²⁹ Nɩalɩŋ sɩ hɛ tintee-la lɛ ka gʋrɛ nɩaa nɛ, a gurigoo laa nɩaa kɩaa. Ba yie dʋdɔgɩsɛ summoo arɩ nɩalɩŋ sɩ bɩ ba tɩtɩa lɛ wuo pɛ nɛ, a kɛŋ nʋhʋɔraa jɩla tutuu, aŋ vɩa dɩ ba to wʋtɩtɩɩ lɛ.

³⁰ Mɩ beŋ ba tʋɔŋ a chɩchɛ nʋʋ sɩ jaŋ saa jeeŋ a chɩŋ mɩ sɩpaaŋ wuol-la sɩ hɛ mɩ dɩ ba pɛgɛ lɛ, a pɔ tintee-la dɩ mɩ sɩ́ ʋ chei, ama mɩ bɩ nʋʋ na.

³¹ Ŋɩɩ wɩaa mɩ baanɩŋ jaŋ sii ba nyuŋ, mɩ baanɩŋ jaŋ nagɛ nyiniŋ a jomba dii. Wɩalɩŋ kala ba sɩ ŋaa jaŋ gʋra nyʋa ba nyuŋ lɛ. Mɩ-na ma TƖƖNA Wɩɩjarɩbakɔ nɛ bʋla.”