ƐZƖKƖƐL 21 - WƖA TENIŊ

Babɩlɔŋ nɛ Wɩa tokobiiŋ dɩ ʋ kaa dii sarɩya

¹ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, joŋ ŋ sɩaa chaasɛ Jerusalɛm a bʋl wɩaa mɩ doluŋ lɛ a hɛ lee-la ba sɩɩ dɛnnɛmɛ lɛ. Bʋl wɩaa mɩ doluŋ lɛ a hɛ Iziral tinteeŋ lɛ.

³ Bʋla pʋ, ‘Wɩɩ-la mɩ-na ma TƖƖNA sɩ bʋla nɛ ŋ-la: Mɩ ŋaa ŋ dʋndɔŋ nɛ. Mɩ jaŋ lɩɩsɛ mɩ tokobiiŋ ʋ pɛɛŋ lɛ a kpʋ ŋ tʋɔpʋl tɩŋŋaa arɩ ŋ nɩbɔŋŋɔɔ kala.

⁴ Mɩ jaŋ kɛŋ mɩ tokobii-la kpʋ ŋ nɩalɩŋ a chɩŋ wɩɩpɔsʋŋ nadiiŋ a kaa mʋ wɩɩpɔsʋŋ nagʋa.

⁵ Ŋɩɩ nɛ nɩaa kala jaŋ jɩŋ arɩ mɩ-na ma TƖƖNA lɩɩsɛ mɩ tokobiiŋ nɛ ʋ pɛɛŋ lɛ, mɩ bɩra bɩ jaŋ joŋo hɛ.’

⁶ Ŋɩɩ wɩaa nuhuobiiŋ, huuni! Huuni ba sɩpaaŋ a nagɛ hɛɛŋ sɩ jʋʋ nʋʋ, ʋ tʋɔŋ faasa chei.

⁷ Dɩ ba nɛ pɩɛsɩŋ, ‘Bɛɛ nɛ tɩɩ ŋ huhuuni?’ Bʋla pɩba, ‘Wɩalɩŋ sɩɩ kɔ nɛ tɩɩ. Nʋʋkala tʋɔŋ jaŋ faasa chei, dɩ nʋʋkala nɩsaa ŋaa gbɛlɛɛ, dɩ nʋʋkala nandaasɩŋ yʋɔrɛ, dɩ fawʋllʋŋ jʋʋ nʋʋkala dɩ ba naadʋsʋŋ chichel.’ Wɩɩ-la ka kɔ nɛ, ʋ sɛnɛ jaŋ ŋaa, mɩ-na ma TƖƖNA Wɩɩjarɩbakɔ nɛ bʋla.”

⁸ La TƖƖNA bɩra bʋl wɩaa pɩmɛ, ʋ sɩ:

⁹ “Nuhuobiiŋ, bʋl wɩaa mɩ doluŋ lɛ a pɩ Iziral tɩŋŋaa, wɩɩ-la mɩ-na ma TƖƖNA sɩ bʋla nɛ ŋ-la: ‘Tokobiiŋ, tokobiiŋ nɛ ba taa a chɛsɛ ʋ tʋtʋl.

¹⁰ Ba taaʋ nɛ dɩ ba kaa kpʋ nɩaa, ʋ tʋtʋl a nagɛ duonuŋ sɩɩ lɩgɩsʋ.’ La jaŋ wuo jʋɔsɛ mɩ nanʋala Juda kuoru dantɩga wɩaa? Tokobii-la bee gʋʋnɛ daa-doho-la nɛ.

¹¹ Ba joŋ tokobiiŋ pa ba chɛsɛ nɛ ʋ tʋtʋl, ʋ hɛ nɩkpʋʋra nɩsɩŋ lɛ. Ba taa nɛ a chɛsɛ ʋ tʋtʋl, a joŋo hɛ nɩkpʋʋra nɩsɩŋ lɛ.

¹² Nuhuobiiŋ, ŋmoo niiŋ a yel, mɩ nɩaa Iziral tɩŋŋaa arɩ ba sɩpaalaaraa nyuŋ nɛ tokobii-la kʋkɔ. Baa chɛ dɩ ba kpʋba nɛ, ŋɩɩ wɩaa paa ŋ nɩsaa chʋŋ ŋ nyuŋ lɛ.

¹³ Mɩɩ magɩsɛ mɩ nɩaa nɛ, dɩ ba nɛ vɩa ba bɩrɩma lɩɩ ba wʋbɔŋŋɔɔ lɛ, wɩaa deemba kala jaŋ ŋaa ba lɛ. Mɩ-na ma TƖƖNA Wɩɩjarɩbakɔ nɛ bʋla.

¹⁴ Ŋɩɩ wɩaa nuhuobiiŋ, bʋl wɩaa mɩ doluŋ lɛ aŋ porisi nɩsaa. Leŋ dɩ tokobiiŋ viisi bʋlɩa koo butori. Ʋ ŋaa nɩ-kpʋʋrɩ tokobii nɛ, ʋ jaŋ kpʋ nɩaa yʋgɛ, ʋ tɔba hɛ nɛ sɛmɛ na-kala,

¹⁵ dɩ ŋɩɩ leŋ dɩ ba nandaasɩŋ yʋɔrɛ, dɩ nɩaa sʋʋ yʋgɛ. Mɩ leŋe ba kɛŋ tokobiiŋ chɩŋ ba boi-baalaa lɛ nɛ dɩ ba kpʋ nɩaa. Ʋʋ tʋl nɛ a nagɛ duonuŋ sɩɩ lɩgɩsʋ, ba koru nɛ dɩ ba kaa kpʋ nɩaa.

¹⁶ Ba jaŋ kɛŋ tokobii-la viisi nadiiŋ arɩ nagʋa kala, lee na-kala ʋ niiŋ sɩ chaasa.

¹⁷ Mɩ ma jaŋ porisi mɩ nɩsaa, ka dɩ mɩ baanɩŋ fɩɛlɛ. Mɩ-na ma TƖƖNA nɛ bʋla.”

¹⁸ La TƖƖNA bɩra bʋla pɩmɛ:

¹⁹ “Nuhuobiiŋ, bil wombiee balɩa dɩ Babɩlɔŋ kuoro kori ʋ tokobiiŋ to nɩmɛ kɔ. Leŋ dɩ wombie-la kala suomi tintee-bala lɛ. Bil kɩaa sɩ ŋaa magɩl wɛŋ-chɛŋŋɛɛ lɛ a dagɛ wɛŋ-la sɩ gɛbɛ jʋjʋʋ tabal-la.

²⁰ Bɩra magɩlɛ wombii-la dɔŋɔ tokobii-la sɩ jaŋ to mʋ Amɔŋ tɩŋŋaa tabal-la ba sɩɩ yɩrɛ Raba, aŋ magɩlɛ wombii-la dɔŋɔ ma sɩɩ mʋ Juda arɩ Jerusalɛm tabal-la ba sɩ saa kɛrɛ golli.

²¹ Babɩlɔŋ kuoro jaŋ kʋ chɩŋ magɩla-la sɩ hɛ wɛŋ-chɛŋŋɛ-la lɛ, aŋ bee joŋ wombii-la ʋ sɩ jaŋ to. Ʋ jaŋ kɛŋ ʋ to-hɛŋŋɛɛ vʋgɛ, a pɩɛsɛ ʋ tɔŋŋɔɔ, aŋ beŋ vʋɩŋ pʋna chʋɩŋ lɛ a jɩŋ wɩɩ-la ʋ sɩ jaŋ ŋaa.

²² To-hɛŋ-la sɩ hɛ ʋ nadiiŋ nɩsɩŋ lɛ nɛ ʋ jaŋ kaa tɔnsɔ lɩɩsɛ Jerusalɛm. Ŋɩɩ nɛ ba jaŋ ŋaa laalɩyuori goŋ, a pa wombiiŋ dɩ ba kpʋ nɩaa, a ŋaa doloo ma ba sɩ jaŋ kaa ŋmoo boi-baalaa lo, aŋ saa lusuŋ-chol-sɩaa a tɩgɛ jebii-la lɛ, a paa kɩaa bil dɩ ba sii je dɩ ba chɩŋ ba lɛ aŋ bibeŋ taŋ-la kala.

²³ Nɩalɩŋ sɩ hɛ Jerusalɛm lɛ bɩ jaŋ laa wɩɩŋ deeŋ dii, a tɩŋ nii-la ba dɩ Babɩlɔŋ kuoro sɩ pɛ wɩaa. Ama Babɩlɔŋ kuoro jaŋ liisiba wɩalɩŋ ba sɩ ŋaa chei, aŋ yuo kɛsɛba.

²⁴ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: ‘Ma wʋbɔŋŋɔɔ lɩɩ dɩ-jalɩŋ nɛ. Nʋʋkala jɩŋ ma wʋcheelee nɛ. Ma wʋŋaalaa daga arɩ ma ŋaa wʋbɔŋ ŋaara nɛ. A tɩŋ ma sɩ ŋaa ŋ-la, ma dʋndɔŋŋɔɔ jaŋ yuo kɛsɛma.

²⁵ Iziral kuoro, ŋ ŋaa nɩbɔŋ nɛ a kɛŋ disiniŋ. Tapʋlɩɩ-la ba sɩ jaŋ dɔgʋsʋŋ yie nɛ.

²⁶ Wɩɩ-la mɩ-na ma TƖƖNA Wɩɩjarɩbakɔ sɩɩ bʋl nɛ ŋ-la: Puri ŋ nyu-bɛlɛ aŋ suri ŋ kuoru nyunchuulo. Wɩaa bɩra bɩ jaŋ nagɛ ŋɩɩ ba fa sɩ naga. Nɩbiisiŋ jaŋ bɩrɩmɛ nɩbalaa aŋ ka dɩ nɩbalaa ma bɩrɩmɛ nɩbiisiŋ.

²⁷ Jerusalɛm jaŋ pɩŋ jikpeeŋ, ʋ jaŋ pɩŋ jikpeeŋ. Mɩ jaŋ leŋ dɩ ʋ pɩŋ jikpeeŋ deeŋ deeŋ a mʋ yi bʋa-la lɛ nɩɩ-la sɩ tɩɩʋ sɩ jaŋ kɔ, dɩ mɩ joŋo hɛ ʋ nɩsɩŋ lɛ.’

²⁸ Nuhuobiiŋ, bʋl wɩaa mɩ doluŋ lɛ, wɩɩ-la mɩ-na ma TƖƖNA Wɩɩjarɩbakɔ sɩ bʋla a tɩgɛ Amɔŋ tɩmma-la sɩɩ tʋʋsɛ Iziral joŋoo lɛ nɛ ŋ-la: ‘Tokobiiŋ, tokobiiŋ nɛ ba lɩɩsɛ dɩ ba kaa kpʋ nɩaa. Ba chɛsʋ nɛ ʋ tʋtʋl a lɩlɩgɩsɛ a nagɛ duonuŋ sɩɩ lɩgɩsʋ.

²⁹ Má sɩ́ wɩalɩŋ ba sɩ na a nagɛ duosoo tʋɔŋ arɩ wɩalɩŋ ba sɩ vʋga na a tɩgɛ ma lɛ kaa tɩŋ. Ba ŋaa wʋnyɩɛrɩŋ nɛ. Ma ŋaa nɩbɔmɔ nɛ a ŋɩŋaa wʋbɔŋŋɔɔ. Tapʋlɩɩ-la ba sɩ jaŋ dɔgɩsɛma yie nɛ. Tokobiiŋ nɛ ba jaŋ kaa keri ma baŋŋaa.

³⁰ Joŋ tokobiiŋ hɛ ʋ pɛɛŋ lɛ. Mɩ jaŋ dii ma sarɩya tintee-la lɛ ba sɩ lʋlma, tintee-la ma naabalɩmaba sɩ lɩa lɛ.

³¹ Mɩ jaŋ na baanɩŋ ma nyuŋ, mɩ baanɩŋ jaŋ sii ma nyuŋ a nagɛ nyiniŋ. Mɩ jaŋ jomma hɛ ma dʋndɔmɔ-la sɩ bɔmɔ kɩŋkɛŋ nɩsɩŋ lɛ, nɩalɩŋ sɩ kɛŋ nɩaa kpʋnʋŋ jɩma.

³² Nyiniŋ jaŋ diima, ma chalɩŋ jaŋ jaasɛ ma tɩtɩa tinteeŋ lɛ. Nʋʋkala bɩ jaŋ liisi ma wɩaa a kaa mʋ wuu, bɛɛ wɩaa mɩ-na ma TƖƖNA nɛ bʋla.’ ”