ƐZƖKƖƐL 2 - WƖA TENIŊ

La TƖƖNA yɩrɛ Ɛzɩkɩɛl

¹ La TƖƖNA fa bʋla pɩmɛ, “Nuhuobiiŋ, sii chɩŋ ŋ naasɩŋ nyuŋ dɩ mɩ bʋl wɩaa pɩŋ.”

² Ʋ sɩɩ bʋl wɩaa ŋɩɩ, Wɩa Dɩma kʋ jʋʋmɛ, a kɛmmɛ chʋʋla kɩɩ mɩ naasɩŋ nyuŋ, ka mɩ nɩɩ dɩ ʋʋ bʋl wɩaa mɩ teeŋ.

³ Ʋ sɩ, “Nuhuobiiŋ, mɩɩ tɩmɩŋ Iziral tɩŋŋaa teeŋ nɛ, ba ŋaa tintee nɩa sɩ vɩa mɩ niiŋ nɛ, ba dɩ ba naabalɩmaba bɩ mɩ niiŋ ka to a kaa kɔ arɩ jɩnɩŋ.

⁴ Nɩalɩŋ teeŋ mɩ sɩɩ tɩmɩŋ ŋaa tʋɔ-dol tɩmma nɛ, a kɛŋ nyuduoŋ woruŋ. Bʋla pɩba, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la.’

⁵ Ba ŋaa nɩa sɩ bɩ dagɩŋ ka sɛɩ nɛ. Dɩ ba jegile nɩɩ koo dɩ ba vɩa, ba jaŋ jɩŋ arɩ mɩ wʋlaabʋlla fa hɛ ba tʋɔŋ nɛ.

⁶ Ama ŋ-na nuhuobiiŋ, sɩ́ ba fá, a sɩ́ ba wʋbʋlaa ma fá. Ʋ jaŋ nagɛ ŋ hɛ chɛyɛɛ arɩ sɔpʋllʋŋ arɩ nʋɔmaa tʋɔŋ nɛ, ama sɩ́ leŋe dɩ ŋ bɔyɛ joŋ ba wʋbʋlaa lɛ, sɩ́ ba fá. Jɩŋ arɩ ba ŋaa nɩa sɩ bɩ dagɩŋ ka sɛɩ nɛ.

⁷ Dɩ ba jegile nɩɩ koo ba bɩ jegile nɩɩ, ʋ maga ŋ bʋl mɩ wɩaa a pɩba nɛ.

⁸ Ama ŋ-na nuhuobiiŋ, jegile nɩɩ mɩ teeŋ, pʋpɔ ŋ sɩ́ mɩ niiŋ vɩa a nagɛ nɩalɩŋ sɩ vɩa mɩ niiŋ ŋɩɩ. Kɛŋ ŋ niiŋ suri a dii kʋ-la mɩ sɩ jaŋ joŋo pɩŋ.”

⁹ Ŋɩɩ nɛ mɩ beŋ a na nɩa nɩsɩŋ tɩɛna a chaasɛmɛ. Nɩsɩ-la tʋɔŋ teniŋ hɛ nɩmɛ,

¹⁰ ʋ kaa suri mɩ sɩpaaŋ. Teŋ-la sɛsɩŋ balɩa kala lɛ, ba ŋmʋnsɛ tʋɔ-chee wɩaa arɩ wʋlɔrʋnʋŋ nɛ a hɛ.