ƐZƖKƖƐL 19 - WƖA TENIŊ

Ba ta jembiiŋ a pɩ Iziral sɩpaalaaraa

¹ Ta jembiiŋ a pɩ Iziral sɩpaalaaraa balɩa

² a bʋl: “Ma naaŋ fa ŋaa naachigi-duo nɛ a guoli naachigi-belliŋ tʋɔŋ. Ʋ yie hɛ ba tʋɔŋ nɛ a dɩdɩɛsɛ ʋ biiriŋ.

³ Ʋ dɩɛsɛ ʋ biiri-la dɔŋɔ ʋ ŋaa naachigi-duo. Ʋ gʋnnʋ kɩaa kpʋ diiniŋ, ʋ didii nuhuobiinee.

⁴ Tinteyee nɩaa nɩɩ ʋ wɩaa, a bɛrɛ kɛnʋ ba buotuoŋ lɛ. Ba kɛŋ gbɩamba nɛ kɛnʋ a lɛrʋ kaa mʋ Ijipiti tinteeŋ.

⁵ Naachigi naaŋ-la sɩ na dɩ ʋ yɩɛlaa kala dɛrɛ ʋ bile lɛ, ʋ bɩra dɩɛsɛ ʋ biiri-la dɔŋɔ, ʋ ma bɩrɩmɛ naachigi-duo.

⁶ Ʋ ma guoli naachigee dɔnsʋŋ tʋɔŋ a bɩbagɩlɛ, bɛɛ wɩaa ʋ ŋaa naachigi-duo nɛ. Ʋ ma gʋnnɛ kɩaa kpʋ diiniŋ a didii nuhuobiinee.

⁷ Ʋ chei tinteye-la sɩ kpagʋ nɩaa dɩ-duoruŋ, ka ba tabalaa pɩŋ jikpeeŋ. Ʋ huoso leŋ fawʋllʋŋ kɛŋ nʋʋkala sɩ hɛ tintee-la lɛ.

⁸ Ŋɩɩ nɛ tinteye-la nɩaa vʋʋrɛ a sii chɩŋ ʋ lɛ dɩ ba yuou, nɩaa lɩɩ sɛmɛ na-kala a kʋ gollu chu. Ba yuo ba jomba a bɛrɛ kɛnʋ.

⁹ Ba bɩra kɛŋ gbɩamba nɛ a kɛŋ ʋ ma, a lɛrʋ mʋ hɛ kʋa ba sɩ kpaasa tɔ lɛ, a kɛnʋ kaa mʋ Babɩlɔŋ kuoro teeŋ, ba kɛnʋ tɔ dɩa. Ŋɩɩ lɛ nɛ ba bɩra bɩ ʋ huoso nɩa Iziral peelee nyuŋ.

¹⁰ Ŋ naaŋ fa nagɛ girep tɩɩbɛ nɛ a hɛ girep tɩɩsɩŋ baga lɛ, ba chɔnsʋ kpagɛ lɩɩŋ niiŋ. Lɩɩŋ fa sɩ yʋga ŋɩɩ ʋ kel a nɛŋ nɛnɛɛ yʋgɛ.

¹¹ Ʋ naakelee fa kɛŋ doluŋ nɛ a magɛ dɩ ba kaa ŋaa kuoru dantɩga. Ʋ nɛ fa duomo kɩɩ tɩɩsɩ-la dɔnsʋŋ kala a kɛŋ naakelee woruŋ.

¹² Ama ba na baanɩŋ a kɛnʋ churi a joŋo yuo ta tinteeŋ. Pel-lɩmɩŋ lɩɩ wɩɩpɔsʋŋ dɩɩrɩŋ a kʋ leŋ ʋ hɩl, ʋ nɛnɛɛ kala yuori. Ʋ naakel duoru-la kala hɩl, nyiniŋ joŋo dii.

¹³ Lɛɛlɛ ba chɔnsʋ tintee-hɩlɩŋ lɛ nɛ, lee-la sɩ hɩla, lɩɩŋ tuo.

¹⁴ Nyiniŋ chol ʋ gentine a joŋ ʋ naakelee arɩ ʋ nɛnɛɛ dii. Naakel-duo kala bɩra tuo a magɛ dɩ ba kaa ŋaa kuoru dantɩga. Jembii-la nɛ ŋɩɩ a magɛ dɩ ba tɩtaʋ yoho lɛ.”