ƐZƖKƖƐL 18 - WƖA TENIŊ

Nɩɩ-la sɩ ŋaa wʋbɔmʋŋ nɛ jaŋ sʋʋ

¹ La TƖƖNA fa bʋl wɩaa pɩmɛ, ʋ sɩ:

² “Namaga deeŋ ma sɩ yie magɛ Iziral tinteeŋ lɛ bʋbʋɔŋ nɛ bɛɛ? ‘Nyɩmmaba nɛ chaŋ girep nɛŋ huoruŋ, aŋ ka ba biiriŋ nyɩlaa mɩɩra nyal.’

³ Mɩ-na ma TƖƖNA Wɩɩjarɩbakɔ ŋmɩɛsa, ma bɩra bɩ jaŋ magɛ namaga deeŋ Iziral tinteeŋ lɛ.

⁴ Mɩ nɛ tɩɩ nuhuobiiŋ kala, nyɩmmaba, naamba arɩ ba biiriŋ kala. Nɩɩ-la kala sɩ ŋaa wʋbɔmʋŋ nɛ jaŋ sʋʋ.

⁵ Leŋ la joŋ arɩ tʋɔpʋl tɩɩna nɛ hɛ nɩmɛ, a ŋaa nʋʋ sɩ kɛŋ wʋtɩtɩɩ a ŋɩŋaa wɩaa ba bʋa lɛ.

⁶ Ʋ bɩ vesiŋ kʋdiilee ka dii peelee nyuŋ, koo a kpʋkpaarɛ vʋɩya-la Iziral tɩŋŋaa sɩɩ kpaarʋ. Ʋ bɩ ʋ dɔŋɔ tɩɩna haala kaa pɩpɩŋ, koo a kɛŋ haala pɩŋ bʋa-la lɛ ʋ sɩ hɛ tɩŋa.

⁷ Ʋ bɩ nʋʋkala nyaga bil, ama dɩ nʋʋ nɛ dii ʋ chɩmɩŋ aŋ joŋ kʋŋ bil bʋbʋɔŋ, ʋ yie mɩɩra joŋ tɩɩna kʋa pʋ nɛ. Ʋ bɩ nɩaa kɩaa kaa lɩlaa arɩ doluŋ, ama ʋ yie ŋaa kʋdiilee pɩpɩ nɩalɩŋ losuŋ sɩ kɛnɛ nɛ, a joŋ gɛnnɩŋ ma pɩpɩ nɩalɩŋ sɩ kɛŋ yarɩ-biree.

⁸ Ʋ bɩ kɩaa joŋo chɩŋ nɩaa aŋ chɩchɛ dɩ ba tiŋ nyʋʋrʋŋ yʋgɛ. Ʋ bɩ wʋbɔŋŋɔɔ ka ŋaa, dɩ nɩaa nɛ kɛŋ kaalɛrɛ, ʋ yie bʋl wɩɩ-la ʋ bʋa lɛ nɛ a pɩba.

⁹ Ʋ yie fɩɛlɛ ʋ sɩaa nɛ a tuto wɩalɩŋ mɩ sɩ daga arɩ wombiee mɩ sɩ bile dɩ ba tuto. Nɩdoho deeŋ ŋaa tʋɔpʋl tɩɩna nɛ, ʋ jaŋ kɛŋ mɩɩsɩŋ. Mɩ-na ma TƖƖNA Wɩɩjarɩbakɔ nɛ bʋla.

¹⁰ La joŋ arɩ baala deeŋ nɛ kɛŋ hambolibie sɩ ŋaa yuo-hɛɛrʋ, a kpʋkpʋ nɩaa, a ŋɩŋaa wɩaa deemba

¹¹ ʋ nyɩmma sɩ bɩ ŋaa aŋ ka, a didii vesiŋ kʋdiilee peelee nyuŋ, a kɛŋ ʋ dɔŋɔ tɩɩna haala pɩpɩŋ.

¹² Ʋ yie nyagɛ summoo arɩ nɩalɩŋ sɩ bɩ ba tɩtɩa lɛ wuo pɛ bil, a kɛŋ nɩaa kɩaa lɩlaa arɩ doluŋ. Dɩ nʋʋ nɛ dii ʋ chɩmɩŋ aŋ joŋ kʋŋ bil bʋbʋɔŋ, ʋ bɩra bɩ kʋ-la joŋo pɩpɩ tɩɩna. Ʋʋ kpaarɛ tɔŋŋɔɔ a ŋɩŋaa wɩalɩŋ mɩ sɩɩ kɩsʋ.

¹³ Ʋ yie joŋ kɩaa chɩŋ nɩaa aŋ leŋ ba tiŋ nyʋʋrʋŋ yʋgɛ. Nɩdoho deeŋ jaŋ wuo kɛŋ mɩɩsɩŋ? Ʋ bɩ jaŋ kɛŋ mɩɩsɩŋ, bɛɛ wɩaa ʋ ŋaa wɩaa deemba kala mɩ sɩɩ kɩsʋ nɛ. Ʋ maga dɩ ba kpʋʋ nɛ, ʋ tɩtɩa nɛ chɛ ʋ sʋʋŋ.

¹⁴ Ama dɩ baala deeŋ ma nɛ kɛŋ hambolibie, dɩ bile na wʋbɔmɔ-la kala ʋ nyɩmma fa sɩ ŋaa, aŋ bɩ baa ŋaa:

¹⁵ Ʋ bɩ vesiŋ kʋdiilee ka dii peelee nyuŋ, koo a kpʋkpaarɛ vʋɩya-la Iziral tɩŋŋaa sɩɩ kpaarʋ. Ʋ bɩ ʋ dɔŋɔ haala kaa pɩpɩŋ.

¹⁶ Ʋ bɩ nʋʋkala nyagaa bil, koo a bɩ leŋe nɩaa joŋ kɩaa bibil bʋbʋɔŋ aŋ lɩlaa chɩnnɩŋ. Ʋ bɩ nɩaa kɩaa kaa lɩlaa arɩ doluŋ, ama ʋ yie ŋaa kʋdiilee pɩpɩ nɩalɩŋ losuŋ sɩ kɛnɛ nɛ, a joŋ gɛnnɩŋ ma pɩpɩ nɩalɩŋ sɩ kɛŋ yarɩ-biree.

¹⁷ Ʋ lɩɩsɛ ʋ nɩsɩŋ wʋbɔŋ kala lɛ nɛ, a bɩ kɩaa joŋo chɩŋ nɩaa aŋ chɩchɛ dɩ ba tiŋ nyʋʋrʋŋ yʋgɛ. Ʋʋ to mɩ wombie-la mɩ sɩ bile dɩ ba tuto arɩ wɩalɩŋ mɩ sɩ daga nɛ. Ʋ bɩ jaŋ sʋʋ a tɩŋ ʋ nyɩmma wʋbɔŋŋɔɔ wɩaa, ʋ jaŋ kɛŋ mɩɩsɩŋ.

¹⁸ Ama ʋ nyɩmma tɩtɩa nɛ jaŋ sʋʋ a tɩŋ ʋ wʋbɔŋŋɔɔ wɩaa, bɛɛ wɩaa ʋ nɛ gɩrɩmɛ nɩaa a kɛŋ ʋ naambiiriŋ kɩaa laa arɩ doluŋ, a ŋaa wɩalɩŋ sɩ bɩ zɔŋ ʋ nɩaa tʋɔŋ.

¹⁹ Ama ma pɩɛsa, ‘Bɛɛ nɛ tɩɩ bile bɩ maga dɩ ʋ na hɛɛŋ a tɩŋ ʋ nyɩmma wʋbɔŋŋɔɔ wɩaa?’ A tɩŋ bile sɩ ŋaa wɩaa ba bʋa lɛ arɩ wʋtɩtɩɩ, a fɩɛlɛ ʋ sɩaa a to mɩ wombie-la mɩ sɩ bile dɩ ba tuto, ʋ sɛnɛ jaŋ kɛŋ mɩɩsɩŋ.

²⁰ Nɩɩ-la kala sɩ ŋaa wʋbɔmʋŋ nɛ jaŋ sʋʋ. Bie bɩ jaŋ na hɛɛŋ a tɩŋ ʋ nyɩmma arɩ ʋ naaŋ wʋbɔŋŋɔɔ wɩaa. Nyɩmmaba bɩ jaŋ na hɛɛŋ a tɩŋ ba biiriŋ wʋbɔŋŋɔɔ wɩaa. Tʋɔpʋl tɩŋŋaa kala jaŋ laa ba tʋɔpʋl wʋŋaalaa time, dɩ nɩbɔŋŋɔɔ ma laa ba nɩbɔŋ wʋŋaalaa time.

²¹ Ama dɩ nɩbɔmʋŋ nɛ leŋ wʋbɔŋŋɔɔ ŋaanɩŋ aŋ tuto mɩ wombiee mɩ sɩ bile dɩ ba tuto, a ŋɩŋaa wɩaa ba bʋa lɛ arɩ wʋtɩtɩɩ, ʋ jaŋ kɛŋ mɩɩsɩŋ, ʋ bɩ jaŋ sʋʋ.

²² Mɩ jaŋ joŋ wʋbɔmɔ-la kala ʋ fa sɩ ŋaa a chɛʋ, aŋ ka dɩ ʋ kɛŋ mɩɩsɩŋ a tɩŋ tʋɔpʋl wɩalɩŋ ʋ sɩ ŋaa wɩaa.

²³ Mɩ-na ma TƖƖNA Wɩɩjarɩbakɔ pɩɛsa: Ma bɩɩna mɩ cho dɩ nɩbɔŋŋɔɔ sʋsʋʋ nɛɛ? Mɩ yie cho dɩ ba bɩrɩma lɩɩ ba wʋbɔŋŋɔɔ ŋaanɩŋ lɛ nɛ a kɛŋ mɩɩsɩŋ.

²⁴ Ama dɩ tʋɔpʋl tɩɩna nɛ leŋ tʋɔpʋl wɩaa ŋaanɩŋ aŋ mɩɩra ŋɩŋaa wʋbɔŋŋɔɔ arɩ wɩalɩŋ mɩ sɩɩ kɩsʋ ka nɩbɔŋŋɔɔ ŋɩŋaa, ʋ jaŋ kɛŋ mɩɩsɩŋ? Aɩ, mɩ jaŋ yʋ tʋɔpʋl wɩalɩŋ kala ʋ sɩ ŋaa, a tɩŋ ʋ sɩ bɩ wʋtɩtɩɩ kɛnɛ arɩ mɩ aŋ ŋaa wʋbɔŋ wɩalɩŋ, ʋ jaŋ sʋʋ.

²⁵ Ama ma sɩ, ‘Wɩalɩŋ La TƖƖNA sɩɩ ŋaa, ba bʋa lɛ dee.’ Iziral tɩmma, má jegile nɩɩ: Ma bɩɩna wɩalɩŋ mɩ sɩɩ ŋaa bɩ ba bʋa lɛ ŋaa koo? Ma wʋŋaalaa nɛ bɩ ba bʋa lɛ ŋaa.

²⁶ Dɩ tʋɔpʋl tɩɩna nɛ leŋ tʋɔpʋl wɩaa ŋaanɩŋ aŋ ŋɩŋaa wʋbɔŋŋɔɔ, ʋ jaŋ sʋʋ, a tɩŋ wʋbɔmɔ-la ʋ sɩ ŋaa wɩaa.

²⁷ Ama dɩ nɩbɔmʋŋ nɛ leŋ nɩbɔŋ wɩaa ŋaanɩŋ aŋ ŋɩŋaa wɩaa ba bʋa lɛ arɩ wʋtɩtɩɩ, ʋ bɩ jaŋ sʋʋ, ʋ jaŋ kɛŋ mɩɩsɩŋ.

²⁸ Dɩ ʋ nɛ bee na arɩ wɩalɩŋ ʋ sɩɩ ŋaa ba bʋa lɛ dee, a leŋ wʋbɔmɔ-la ŋaanɩŋ, ʋ bɩ jaŋ sʋʋ, ʋ jaŋ kɛŋ mɩɩsɩŋ.

²⁹ Ama ma Iziral tɩŋŋaa ha sɩ, ‘Wɩalɩŋ La TƖƖNA sɩɩ ŋaa, ba bʋa lɛ dee.’ Iziral tɩmma, má jegile nɩɩ: Ma bɩɩna wɩalɩŋ mɩ sɩɩ ŋaa ba bʋa lɛ dee koo? Ma wʋŋaalaa nɛ bɩ ba bʋa lɛ ŋaa.

³⁰ Ŋɩɩ wɩaa ma Iziral tɩmma, mɩ jaŋ dii ma kʋŋkala sarɩya a magɛ ŋɩɩ ma sɩ ŋaa wɩaa. Mɩ-na ma TƖƖNA Wɩɩjarɩbakɔ nɛ bʋla. Má bɩrɩma lɩɩ wʋbɔmɔ-la kala ma sɩɩ ŋaa lɛ, a sɩ́ leŋe dɩ wʋbɔŋŋɔɔ cheima.

³¹ Má lɩɩsɛ ma tɩtɩa wʋbɔmɔ-la ma sɩɩ ŋaa lɛ, aŋ ka dɩ mɩ pɩma tʋɔ-falɩŋ arɩ dɩŋ-falɩŋ. Bɛɛ nɛ tɩɩ ma Iziral tɩŋŋaa cho dɩ ma sʋba?

³² Mɩ-na ma TƖƖNA Wɩɩjarɩbakɔ nɛ bʋla, mɩ bɩ cho dɩ nʋʋkala sʋba, má bɩrɩma lɩɩ ma wʋbɔŋŋɔɔ lɛ a kɛŋ mɩɩsɩŋ.”