ƐZƖKƖƐL 17 - WƖA TENIŊ

Namaga-la sɩ mʋ tɩgɛ kachuunuŋ balɩa arɩ girep tɩɩbɛ lɛ

¹ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, magɛ namaga deeŋ a pɩ Iziral tɩŋŋaa,

³ a leŋ dɩ ba jɩŋ wɩɩ-la mɩ-na ma TƖƖNA Wɩɩjarɩbakɔ sɩɩ bʋl: Kachuu-bal kʋbala nɛ fa hɛ nɩmɛ ʋ kɩŋkɛnsɩŋ dol woruŋ, ʋ pʋnaa ma duomi a tɔ ʋ yaraa aŋ zɔŋ woruŋ a ŋaa dabaŋ dabaŋ. Ʋ sii file mʋ Lɛbanɔŋ, a kɛŋ kuolo nyu-gbaŋa naakeliŋ bori,

⁴ a kaa mʋ tintee-la nɩaa sɩ ŋaa bayalaa, a joŋo chɔnsɛ ba tabalɩŋ lɛ.

⁵ Kachuu-la bɩra churi tɩɩ-nyʋʋlʋ-bie kʋbala Iziral tinteeŋ lɛ a joŋo chɔnsɛ tintee-la sɩ sɩma lɛ a kpagɛ lɩɩŋ sɩ yʋga leriŋ.

⁶ Tɩa-la tɔsɛ a jɛrɛ. Baa yɩrɛ tɩa-la girep nɛ. Ʋ naakelee mɩɩra chaasɛ kachuu-la, ka ʋ naapoloo hɛ ʋ bʋbʋɔŋ. Tɩa-la tɔsɛ naakel-duoruŋ a kɛŋ pɩpaarɩŋ woruŋ.

⁷ Ama kachuuŋ dɔŋɔ ma fa hɛ nɩmɛ a yʋgɛ woruŋ ʋ kɩŋkɛnsɩŋ dol, ʋ pʋnaa ma yʋgɛ a tɔ ʋ yaraa. Girep tɩɩbɛ-la kɛŋ ʋ naapoloo arɩ ʋ naakelee jɛrɛ lɩɩ lee-la ba sɩ chɔnsʋ a chaasɛ kachuuŋ deeŋ, a chɩchɛ lɩɩŋ.

⁸ Ama ba fa paala chɔnsɛ girep tɩɩbɛ-la tintee-la sɩ sɩma lɛ nɛ, lee-la lɩɩŋ sɩ yʋga, dɩ ʋ wuo waa a chaarɛ naakelee, a nɛŋ nɛnɛɛ a zɔŋ woruŋ.

⁹ Bʋla pɩ Iziral tɩŋŋaa, ‘Wɩɩ-la mɩ-na ma TƖƖNA Wɩɩjarɩbakɔ sɩ pɩɛsa nɛ ŋ-la: Ŋ bɩɩna girep tɩɩbɛ-la jaŋ wei? Bumbuŋ kachuu-la bɩ jaŋ churi ʋ dɩ ʋ naapoloo a pʋrɛ ʋ nɛnɛɛ ta dɩ tɩa-la hɩl? Ʋ dɩ ʋ pɩpaa falɩa-la kala jaŋ hɩl. Nɩpʋgʋŋ ma paala jaŋ wuo kɛŋ ʋ dɩ ʋ naapoloo kala lɛrɛ churi, nɩ-daŋ dee.

¹⁰ Dɩ ba nɛ paala joŋ girep tɩɩbɛ-la wasa chɔnsɛ ma, ʋ bɩ jaŋ waa. Dɩ pel-lɩmɩŋ nɛ lɩɩ wɩɩpɔsʋŋ dɩɩrɩŋ kʋ ŋmobu, ʋ jaŋ sʋʋ lee-la ʋ fa sɩ chɩna.’ ”

¹¹ Ŋɩɩ nɛ La TƖƖNA fa bɩra bʋla pɩmɛ:

¹² “Pɩɛsɛ Iziral nɩaa deemba sɩ vɩa mɩ niiŋ, ‘Ma bɩ wɩaa deemba bʋbʋɔŋ jɩŋ?’ Bʋla pɩba: ‘Babɩlɔŋ kuoro nɛ sii mʋ Jerusalɛm a yuo kɛŋ ʋ kuoro arɩ ʋ nɩhɩasɩŋ a kɛmba mɩɩra mʋ Babɩlɔŋ.

¹³ Ŋɩɩ nɛ ʋ lɩɩsɛ Juda kuoro dɩa nɩaa dɔŋɔ ba pɛ niiŋ, ʋ leŋ ʋ ŋmɩɛsɛ arɩ ʋ jaŋ tutou. Ʋ fa pɛ kɛsɛ tintee-la sɩpaalaaraa ma nɛ,

¹⁴ dɩ ŋɩɩ leŋ dɩ Juda tinteeŋ nɩaa tutou, aŋ bɩra sɩ́ doluŋ kɛŋ a wuo beŋ ba tɩtɩa.

¹⁵ Ama Juda kuoro nɩɩ-la kʋ magɛ ŋɩɩ, a vɩa dɩ ʋ to Babɩlɔŋ kuoro niiŋ aŋ tɩŋ nɩaa dɩ ba mʋ Ijipiti tinteeŋ a kɛsɛ janɩŋ arɩ laalɩyuori-daŋ kɔ. Kuoro deeŋ jaŋ wuo na wɩɩ-la ʋ sɩɩ chɛɛ? Ʋ jaŋ wuo fori wɩaa deemba lɛɛ? Ʋ jaŋ wuo chei nii-la ba sɩ pɛ aŋ fori?

¹⁶ Mɩ-na ma TƖƖNA Wɩɩjarɩbakɔ ŋmɩɛsa: Juda kuoro jaŋ sʋʋ Babɩlɔŋ lɛ, tintee-la kuoro sɩ leŋe ʋ dii kuoruŋ aŋ bɩ ŋɩɩ ʋ sɩ ŋmɩɛsa kaa tɩŋ, a chei nii-la ʋ dɩ ʋ sɩ pɛ.

¹⁷ Dɩ Ijipiti tinteeŋ kuoro arɩ ʋ laalɩyuori-duoru-la arɩ ʋ nɩ-daŋ-la nɛ pɛ Juda tinteeŋ kuoro lɛ a yuo laalɩŋ ma, ba bɩ jaŋ wuo ŋaa wɩɩkala dɩ Babɩlɔŋ tɩŋŋaa nɛ saa vaŋkumba dɩ ba to ba lɛ a jʋʋ kpʋ ba nɩ-daŋ-la sɩ hɛ Jerusalɛm lɛ.

¹⁸ Juda tinteeŋ kuoro bɩ ŋɩɩ ʋ sɩ ŋmɩɛsa kaa tɩŋ, aŋ chei nii-la sɩ hɛ ba pɛgɛ. A tɩŋ ʋ sɩ ŋaa wɩaa deemba kala, ʋ bɩ jaŋ fori.’

¹⁹ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ ŋmɩɛsa, mɩ jaŋ dɔgɩsʋ a tɩŋ ʋ sɩ ŋmɩɛsɛ mɩ yɩrɩŋ lɛ aŋ bɩ kaa tɩŋ, aŋ chei nii-la sɩ hɛ mɩ dɩ ʋ pɛgɛ.

²⁰ Mɩ jaŋ hɛ bɛrɛ a kɛnʋ. Mɩ jaŋ kɛnʋ mʋ Babɩlɔŋ a dɔgɩsʋ nɩmɛ a tɩŋ ʋ sɩ bɩ wʋtɩtɩɩ kɛnɛ mɩ teeŋ.

²¹ Ba jaŋ kpʋ ʋ laalɩyuoro-la kala sɩ jɩŋ laalɩŋ yuonuŋ, aŋ ka nɩkaanaa fá pɩsɛ lee-kala. Ŋɩɩ nɛ ma jaŋ jɩŋ arɩ mɩ-na ma TƖƖNA nɛ bʋla.

²² Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ tɩtɩa jaŋ keri kuolu tɩa-la nyu-gbaŋa naakeliŋ sɩ tɔsɔ, mɩ jaŋ bori naakel-pɔrʋ-la a joŋo chɔnsɛ peel-la sɩ leŋie kɩŋkɛŋ nyuŋ.

²³ Iziral peel-la sɩ leŋie nyu-gbaŋa nɛ mɩ jaŋ chɔnsʋ, ʋ jaŋ kel woruŋ a nɛŋ nɛnɛɛ a bɩrɩmɛ kuolu tɩɩ-zɔŋ. Diibii doho kala jaŋ sʋa ba dɛllɩŋ ʋ lɛ, ba jaŋ sagɛ ʋ naakele-la lɛ a wiwiesi ʋ fɩɛlɩŋ lɛ.

²⁴ Tɩɩsɩŋ kala sɩ hɛ baga lɛ jaŋ jɩŋ arɩ mɩ-na ba TƖƖNA jaŋ wuo ŋaa dɩ tɩɩ-duduosuŋ kui, a ŋaa tɩɩ-kuunuŋ ma duomi. Mɩ jaŋ wuo ŋaa tɩɩsɩ-la pɩpaarɩŋ sɩ lɛyɛ hɩl, a ŋaa tɩɩsɩ-la ma pɩpaarɩŋ sɩ hɩla lɛɩ. Mɩ-na ma TƖƖNA nɛ bʋla, mɩ jaŋ ŋaa wɩɩ-la mɩ sɩ bʋla.”