ƐZƖKƖƐL 16 - WƖA TENIŊ

Jerusalɛm nɩaa bɩ wʋtɩtɩɩ kɛnɛ arɩ Wɩa

¹ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, chaasa dagɛ wʋkɩsɩa-la Jerusalɛm sɩɩ ŋaa a pʋ,

³ bʋla pʋ, wɩɩ-la La TƖƖNA Wɩɩjarɩbakɔ sɩ bʋla pɩ Jerusalɛm nɛ ŋ-la: Ba lʋl ŋ naabalɩma Kɛnaŋ tɩŋŋaa tinteeŋ lɛ nɛ, ŋ nyɩmma fa ŋaa Amɔrɩ tɩɩna nɛ, ka ŋ naaŋ ma ŋaa Hiti tɩɩna.

⁴ Tapʋlɩɩ-la ba sɩ lʋlʋŋ, ba fa bɩŋ kawul-jʋa kere, koo a foŋ lɩɩŋ koo a ŋaa yɩsɩŋ tɩsɩŋ koo a joŋ gɛrɩŋ pilimiŋ.

⁵ Nʋʋkala bɩŋ nenige koo nisusuŋ fá a ŋaa wɩaa deemba kʋŋ ŋ lɛ. Ba fa mɩɩra joŋuŋ yuo ta ŋmaŋkaaŋ nyuŋ nɛ. Tapʋlɩɩ-la ba sɩ lʋlʋŋ, ba kɛnɩŋ ŋmoo gbɛɛŋ nɛ.

⁶ Ŋɩɩ nɛ mɩ kʋʋ bal a naŋ dɩ ŋ pɩŋ ŋ tɩtɩa chalɩŋ lɛ a yuyuo naasɩŋ, ŋ fa sɩ pɩŋ chal-la lɛ ŋɩɩ mɩ bʋla pɩŋ: Kɛŋ mɩɩsɩŋ.

⁷ Mɩ nɛ leŋe ŋ waa a nagɛ tɩa sɩ hɛ ŋmaŋkaaŋ lɛ. Ŋɩɩ nɛ ŋ waa a ŋaa hatol-zɔŋ, a kpʋrɛ yɩlaa, ŋ nyu-pʋnaa waa a duomi, ama ŋ fa kɛŋ yarɩ-biree nɛ.

⁸ Harɩŋ mɩ bɩra kʋʋ bal, a naŋ dɩ ŋ waa a magɛ baalaa chɛnɩŋ. Mɩ joŋ mɩ gɛrɩŋ a tɔ ŋ yarɩ-bire-la, aŋ chaasa bʋla pɩŋ arɩ mɩ jaŋ jaaŋ, ŋɩɩ nɛ mɩ dɩŋ bil niiŋ pɩ dɔŋɔ ŋ ŋaa mɩ kʋŋ. Mɩ-na ma TƖƖNA Wɩɩjarɩbakɔ nɛ bʋla.

⁹ Mɩ ŋaa lɩɩŋ fo ŋ chal-la ta aŋ tɩsɩŋ nʋʋŋ,

¹⁰ a joŋ gɛrɩ-la ba sɩ sʋa ʋ zɔŋ a laalɩŋ, a joŋ teniŋ nɛntɛŋŋɛɛ hɛŋ. Mɩ joŋ gɛrɩpɛ fʋfʋlʋŋ gɛnnɩŋ arɩ gɛnnɩ-la yalɩŋ sɩ hɛyɛ nɛ a kaa kpɩɛrɩŋ.

¹¹ Mɩ joŋ kpɩɛra-la a kpɛrɩŋ ŋɩɩ a joŋ nɩsɩŋ hɔɔnʋŋ hɛ ŋ nɩsaa a bɩra joŋ banzɔlɔ hɛ ŋ baŋŋaa,

¹² a joŋ nenii-pɩrɩ-la ba sɩ yie joŋo hɛ mɩɩsɩŋ a hɛŋ, a joŋ dɩgɩlɩŋ-kpɛnsɩŋ hɛ ŋ dɩgɩlaa, a joŋ nyunchuulo ba sɩ kpɩɛra ʋ zɔŋ woruŋ a chuŋ.

¹³ Sɛlɩmɛ arɩ hɔpʋla nɛ mɩ kaa kpɩɛrɩŋ, ŋ gɛnnɩŋ ma nɛ fa gɛrɩpɛ fʋfʋlaa arɩ gɛrɩ-la yalɩŋ sɩ hɛyɛ arɩ gɛrɩ-la ba sɩ sʋa ʋ zɔŋ. Ŋ kʋdiilee ma nɛ fa ŋaa munuŋ sɩ bɩɩ nʋgʋgʋ, tʋʋŋ arɩ olif nʋʋŋ. Ŋ ŋaa hazɔŋ nɛ woruŋ a ŋaa ha-kuoru.

¹⁴ Ŋ yɩrɩŋ teeli tinteyee a tɩŋ ŋ sɩ zɔmɔ wɩaa, bɛɛ wɩaa tʋla-la mɩ sɩ joŋo pɩŋ nɛ leŋe ŋ chaasa zɔŋ. Mɩ-na ma TƖƖNA Wɩɩjarɩbakɔ nɛ bʋla.

¹⁵ Ama ŋ mɩɩra joŋ ŋ yɩɛlaa kala hɛ ŋ zɔmʋŋ lɛ nɛ, ŋ yɩrɩŋ sɩɩ sii ŋɩɩ mɩɩra leŋ ŋ ŋɩŋaa hachɔrʋŋ wɩaa. Ŋ ŋaa hachɔrʋŋ nɛ a joŋ ŋ zɔmʋŋ a pɩpɩ nʋʋkala sɩ kʋʋ bal.

¹⁶ Ŋ mɩɩra joŋ ŋ gɛrɩ-zɔmɔ-la dɔnsʋŋ a kpɩɛrɛ vesiŋ dɩ-kpaaraa nɛ, lere-la ŋ sɩɩ ŋaa ŋ hachɔrʋŋ wɩaa. Wʋdosunuŋ deemba saa bɩ maga dɩ baa ŋaa, ŋɩɩ bɩ maga dɩ ʋ ŋaa.

¹⁷ Ŋ bɩra joŋ kpɩɛrɩ-zɔmɔ-la ba sɩ kɛŋ mɩ sɛlɩmɛ arɩ hɔpʋla ŋaa mɩ joŋo pɩŋ, a kaa libi tɔŋŋɔɔ nɛ ba nagɛ baala ŋ kaa ŋaa hachɔrʋŋ wɩaa.

¹⁸ Ŋ joŋ gɛnnɩ-la ba sɩ sʋa ba zɔŋ mɩ joŋo pɩŋ a laalɛ tɔmɔ-la nɛ, a joŋ mɩ olif nʋʋ-la arɩ kʋsʋɔrʋsʋŋ a pɩpɩba.

¹⁹ Kʋdiile-la ma mɩ sɩ joŋo pɩŋ dɩ ŋ dii, munuŋ sɩ bɩɩ nʋgʋgʋ, olif nʋʋŋ arɩ tʋʋ-la, ŋ joŋ ba ma a pɩpɩ tɔmɔ-la nɛ, wɩɩ-la ŋ sɩ ŋaa nɛ ŋɩɩ. Mɩ-na ma TƖƖNA Wɩɩjarɩbakɔ nɛ bʋla.

²⁰ Ŋ joŋ ŋ hambolibiisi-la arɩ hantolibiisi-la ŋ sɩ lʋla pɩmɛ a kpaarɛ tɔŋŋɔɔ nɛ. Hachɔrʋŋ wɩalɩŋ ŋ sɩ ŋaa bɩ magaa?

²¹ Ŋ kɛsɛ mɩ biiriŋ nɛ a kaa kpaarɛ tɔŋŋɔɔ.

²² Wʋkɩsɩa-la arɩ hachɔrʋŋ wɩalɩŋ ŋ sɩ ŋaa, ŋ bɩ liise yi tapʋlɩa-la ŋ fa sɩ ŋaa bii-mulo lɛ, a kɛŋ yarɩ-biree a pɩŋ ŋ tɩtɩa chalɩŋ lɛ a yuyuo naasɩŋ.

²³ Mɩ-na ma TƖƖNA Wɩɩjarɩbakɔ nɛ bʋla, wɩɩŋ puuŋ nɛ. A pɛ nɩbɔŋ wɩalɩŋ kala ŋ sɩ ŋaa lɛ,

²⁴ ŋ ha saa vesiŋ dɩ-kpaaraa nɛ a pɩ ŋ tɩtɩa, lere-la kala nɩaa sɩɩ hɔŋ lɛ.

²⁵ Womporii na-kala nyuŋ nɛ ŋ saa vesiŋ dɩ-kpaaraa a chei ŋ zɔmʋŋ, a joŋ ŋ tɩtɩa a pɩ nʋʋ na-kala sɩ to lee-la bɩbal, ŋ hachɔrʋŋ wɩaa pʋŋa pɩpɛ.

²⁶ Ŋ ŋaa hachɔrʋŋ wɩalɩŋ nɛ a joŋ ŋ tɩtɩa pɩ Ijipiti tɩŋŋaa sɩ hɔnɔ kpagɩŋ. Nɩalɩŋ sɩ cho wʋlɩɩlɩŋ kɛnɩŋ pɩpɩŋ a leŋ mɩ baanɩŋ sii.

²⁷ Lɛɛlɛ, mɩ chɩna dɩ mɩ dɔgʋsʋŋ nɛ a keri ŋ tinteeŋ ta. Mɩ joŋuŋ hɛ ŋ dʋndɔŋŋɔɔ Fɩlɩsɩtɩa tɩmma-la sɩ kɛŋ tʋɔ-luŋuŋ nɩsɩŋ lɛ nɛ. Ŋ hachɔrʋŋ wʋŋaalaa leŋe hɩɩsɩŋ kɛmba nɛ.

²⁸ Ŋ kɛŋ ŋ hachɔrʋŋ wɩalɩŋ yi Asiiria tɩŋŋaa ma nɛ, a leŋ ba kɛnɩŋ pɩpɩŋ a tɩŋ baalaa sɩ bɩŋ ka vɔgɛ wɩaa. Ka ŋ ha paala bɩ vɔgɔ.

²⁹ Ŋɩɩ nɛ ŋ bɩra kɛŋ ŋ hachɔrʋŋ wɩalɩŋ kire to Babɩlɔŋ tɩŋŋaa ma harɩŋ, tintee-la nɩaa sɩ ŋaa bayallaa, ama ŋ ha bɩ vɔgɔ.

³⁰ Mɩ-na ma TƖƖNA Wɩɩjarɩbakɔ nɛ bʋla: Ŋ tʋɔŋ nyaa ɛɛ nɛ, ŋ ŋaa wɩaa deemba a nagɛ hachɔrʋŋ sɩ bɩ hɩɩsɩŋ ka fá.

³¹ Ŋ sɩ saa vesiŋ dɩ-kpaaraa womporii na-kala nyuŋ, aŋ saa vʋɩyaa lee-la taŋ nɩaa sɩɩ hɔŋ, ŋ fa bɩ hachɔrʋŋ naga, bɛɛ wɩaa ŋ bɩ moribiee ka laa.

³² Ŋ ŋaa hachɔrʋŋ nɛ, a cho nʋhʋɔraa ba kɛnɩŋ pɩpɩŋ, aŋ vɩa ŋ bala.

³³ Hachɔrʋŋ na-kala yie laa time nɛ, ama ŋ-na yie mɩɩra joŋ kɩaa a pɩ ŋ hɩɩlaba sɩ lɩɩ lee na-kala nɛ a kpalba, ka ba kɛnɩŋ pɩpɩŋ.

³⁴ Ŋ-na bɩ hachɔrʋmɔɔ dɔnsʋŋ naga, baal kala bɩ kire to ŋ harɩŋ dɩ ʋ kɛnɩŋ pɩŋ, ama ŋ nɛ yie mɩɩra timba ka ba pɩnɩŋ, ŋ-na bɩ kʋŋkala ka laa.

³⁵ Ŋɩɩ wɩaa Jerusalɛm, ŋ ŋaa hachɔrʋŋ nɛ, jegile nɩɩ wɩɩ-la mɩ-na ŋ TƖƖNA sɩ bʋla.

³⁶ Wɩɩ-la mɩ-na ŋ TƖƖNA Wɩɩjarɩbakɔ sɩ bʋla nɛ ŋ-la: Ŋ wuri ŋ gɛnnɩŋ nɛ aŋ ka ŋ yarɩ-biree a nagɛ hachɔrʋŋ a joŋ ŋ tɩtɩa pɩ ŋ hɩɩlaba arɩ ŋ vʋɩyaa kala, aŋ kɛsɛ ŋ biiriŋ kpaarɛ tɔŋŋɔɔ sɩ ŋaa disiŋ kɩaa mɩɩ kɩsɛ.

³⁷ Ŋɩɩ wɩaa, mɩ jaŋ kɛŋ ŋ hɩɩlaba-la kala sɩma ŋ sɩ nɩa kʋ hɛ dɔŋɔ, nɩalɩŋ ŋ sɩ cho arɩ nɩalɩŋ ŋ sɩ bɛrɛ. Mɩ jaŋ kɛmba kʋ golluŋ aŋ wuri ŋ gɛnnɩŋ ba sɩpaaŋ aŋ leŋ dɩ ba na ŋ yarɩ-biree.

³⁸ Mɩ jaŋ joŋ cheeriŋ pɩŋ a dɔgʋsʋŋ a tɩŋ ŋ sɩ ŋaa hachɔrʋŋ arɩ nɩkpʋʋrʋ wɩaa. Mɩ jaŋ na baanɩŋ kɩŋkɛŋ ŋ nyuŋ, a leŋ dɩ ba kpʋŋ.

³⁹ Mɩ jaŋ joŋuŋ hɛ ŋ hɩɩlaba nɩsɩŋ lɛ, ba jaŋ ŋmoo ŋ vesiŋ dɩ-kpaara-la ŋ sɩ kaa ŋaa hachɔrʋŋ wɩaa lo. Ba jaŋ wuri ŋ gɛnnɩŋ arɩ ŋ kpɩɛra-la, aŋ ka dɩ ŋ kɛŋ yarɩ-biree.

⁴⁰ Ba jaŋ kɛŋ nɩ-daŋ kʋ golluŋ a yagɩŋ arɩ tabɩaa, aŋ keriŋ muno muno arɩ ba tokobiee.

⁴¹ Ba jaŋ nyɩgɛ ŋ dɩɩsɩŋ aŋ dɔgʋsʋŋ, ka dɩ haalaa yʋgɛ a bibeŋ. Mɩ jaŋ leŋ dɩ ŋ hachɔrʋŋ wɩalɩŋ dɛrɛ, ŋ bɩra bɩ jaŋ titiŋ ŋ hɩɩlaba-la.

⁴² Ŋɩɩ lɛ nɛ mɩ yarɩ-bieri baaŋ-la mɩ sɩ na ŋ nyuŋ jaŋ fɩɛlɛ. Mɩ bɩra bɩ jaŋ na baanɩŋ ŋ nyuŋ.

⁴³ Ŋ sɩ bɩ liise yi wɩalɩŋ mɩ fa sɩ ŋaa pɩŋ ŋ hambiiriŋ lɛ wɩaa, aŋ ŋaa wɩaa deemba kala a leŋ mɩ baanɩŋ sii, ŋɩɩ nɛ tɩɩ mɩ leŋ wɩalɩŋ kala ŋ sɩ ŋaa nyʋa ŋ nyuŋ lɛ ŋɩɩ. Mɩ-na ŋ TƖƖNA Wɩɩjarɩbakɔ pɩɛsɩŋ nɛ: Bɛɛ nɛ tɩɩ ŋ ŋaa hachɔrʋŋ wɩaa a pɛ disiŋ wɩalɩŋ kala mɩ sɩɩ kɩsʋ lɛ?

⁴⁴ Nʋʋ na-kala sɩɩ magɛ namagaba jaŋ magɛ namaga deeŋ a tɩgɛ ŋ-na Jerusalɛm lɛ: Naaŋ sɩ nagɛ ŋɩɩ, ŋɩɩ nɛ tolo ma nagɛ.

⁴⁵ Ŋ sɛnɛ laa ŋ naaŋ wɩɩŋ nɛ. Ŋ naaŋ vɩa ʋ bala arɩ ʋ biiriŋ nɛ. Ŋ nagɛ ŋ naambiiriŋ nɛ, ba vɩa ba balaba arɩ ba biiriŋ nɛ. Ŋ naaŋ fa ŋaa Hiti tɩɩna nɛ, ŋ nyɩmma ma fa ŋaa Amɔrɩ tɩɩna.

⁴⁶ Ŋ malɩma nɛ fa taŋ-la ba sɩɩ yɩrɛ Samarɩa, a hɛ wɩɩpɔsʋŋ nagʋa dɩɩrɩŋ arɩ ʋ tabiisiŋ. Ŋ ŋaana ma nɛ taŋ-la ba sɩɩ yɩrɛ Sodom, a hɛ wɩɩpɔsʋŋ nadiiŋ dɩɩrɩŋ arɩ ʋ ma tabiisiŋ.

⁴⁷ Ba naabʋɔsʋŋ dʋndʋŋa dee ŋ to a chesiba wʋkɩsɩa-la ba sɩ ŋaa, ama ʋ bɩ diene ka ŋ wʋŋaalaa paala bɔmɔ kɩɩba.

⁴⁸ Mɩ-na ŋ TƖƖNA Wɩɩjarɩbakɔ sɩ weye bʋla, ŋ naambie Sodom arɩ ʋ tabiisiŋ bɩ wʋbɔmɔ-la ŋ dɩ ŋ tabiisiŋ sɩ ŋaa, ŋaa.

⁴⁹ Wʋbɔmɔ-la ŋ naambie Sodom arɩ ʋ tabiisiŋ sɩ ŋaa nɛ ŋ-la: Ʋ fa kɛŋ sɩɩ-duoŋ nɛ, a kɛŋ kʋdiilee kɩŋkɛŋ a didii aŋ bɩ nʋʋkala wɩaa chɩla. Ba bɩ summoo arɩ nɩalɩŋ sɩ bɩ ba tɩtɩa lɛ wuo pɛ lɛ ka pɛ.

⁵⁰ Ba fa kɛŋ sɩɩ-duoŋ a ŋaa disiŋ wɩalɩŋ mɩ sɩɩ kɩsʋ nɛ. Ŋɩɩ wɩaa nɛ mɩ cheiba, ma na ŋɩɩ.

⁵¹ Samarɩa bɩ wʋbɔmɔ-la ŋ sɩ ŋaa kpaa magɛ dɔŋɔ ma ŋaa. Ŋ nɛ ŋaa wɩalɩŋ mɩ sɩɩ kɩsʋ a kɩɩba, ŋ wʋŋaalaa leŋe ŋ naambiiriŋ Sodom arɩ Samarɩa mɩɩra nagɛ arɩ ba-na ŋaa tʋɔpʋl tɩmma nɛ.

⁵² Leŋ dɩ hɩɩsɩŋ kɛnɩŋ, ŋ wʋŋaalaa daga arɩ ŋ naambiiri-la bɩ wʋbɔŋ ŋaa. Ŋ wʋbɔŋŋɔɔ nɛ yʋga kɩɩ ba wʋbɔŋŋɔɔ, ba-na mɩɩra nagɛ tʋɔpʋl tɩmma nɛ. Gʋrʋ nyuŋ a leŋ dɩ hɩɩsɩŋ kɛnɩŋ, ŋ leŋe ŋ naambiiriŋ mɩɩra nagɛ tʋɔpʋl tɩmma nɛ.

⁵³ Ama tapʋlɩɩ kʋbala, mɩ jaŋ pɛ ŋ naambiiriŋ Sodom arɩ Samarɩa arɩ ba tabiisiŋ lɛ dɩ ba bɩra kuori, aŋ pɛ ŋ ma lɛ dɩ ŋ kuori.

⁵⁴ Hɩɩsɩŋ jaŋ kɛnɩŋ a tɩŋ ŋ wʋŋaalaa wɩaa, hɩɩsɩ-la sɩ jaŋ kɛnɩŋ daga arɩ ŋ naambiiri-la wʋŋaalaa kpɩa ŋ kɩaa nɛ.

⁵⁵ Ŋ naambiiriŋ Sodom arɩ Samarɩa arɩ ba tabiisiŋ jaŋ bɩra kuori a nagɛ ŋɩɩ ba fa sɩ naga. Ŋ dɩ ŋ tabiisiŋ ma jaŋ bɩra kuori a nagɛ ma fa sɩ nagɛ ŋɩɩ.

⁵⁶ Bʋa-la lɛ ŋ fa sɩɩ dagɛ ŋ tɩtɩa, ŋ bɩ ŋ naambie Sodom kaa tɩtɩŋ,

⁵⁷ a mʋ yi bʋa-la lɛ ŋ wʋbɔŋŋɔɔ sɩ kʋ lɩɩ pʋlʋmʋŋ nʋʋkala jɩŋ. Ama lɛɛlɛ Ɛdɔm tɩŋŋaa arɩ tabiisi-la sɩ kpagɛba arɩ Fɩlɩsɩtɩa tɩŋŋaa ka sieri ŋ lɛ nɛ, nɩalɩŋ kala sɩ golluŋ a bɩ ŋ wɩaa cho.

⁵⁸ Mɩ jaŋ dɔgʋsʋŋ a tɩŋ hachɔrʋŋ wɩalɩŋ arɩ wʋkɩsɩa-la ŋ sɩ ŋaa wɩaa. Mɩ-na ma TƖƖNA nɛ bʋla.

⁵⁹ Wɩɩ-la mɩ-na ŋ TƖƖNA Wɩɩjarɩbakɔ bɩra sɩ bʋla nɛ ŋ-la: Jerusalɛm, mɩ jaŋ joŋ wɩalɩŋ ŋ sɩ ŋaa chɩmɩŋ a tiŋ ŋ lɛ, bɛɛ wɩaa ŋ bɩ nii-la mɩ sɩ hɛ kaa tɩŋ aŋ chei nii-la sɩ hɛ mɩ dɩŋ pɛgɛ.

⁶⁰ Ama mɩ-na ha jaŋ liise yi nii-la mɩ fa sɩ bile mɩ dɩŋ pɛgɛ ŋ hatulluŋ kala lɛ, mɩ jaŋ leŋ dɩ nii-la chɩŋ kpaŋkpaŋ a kaa mʋ wuu.

⁶¹ Ŋɩɩ lɛ nɛ ŋ jaŋ liise yi wʋbɔmɔ-la ŋ sɩ ŋaa lɛ, dɩ hɩɩsɩŋ kɛnɩŋ. Dɩ mɩ nɛ mɩɩra joŋ ŋ naambiiriŋ pɩŋ, nɩalɩŋ sɩ hɩaŋ arɩ nɩalɩŋ ŋ ma sɩ hɩa. Mɩ jaŋ jomba pɩŋ a leŋ dɩ ba nagɛ ŋ toloo, ama ʋ bɩ naga arɩ nii-la sɩ hɛ mɩ dɩŋ pɛgɛ wɩaa nɛ tɩɩ.

⁶² Mɩ jaŋ leŋ dɩ nii-la sɩ hɛ mɩ dɩŋ pɛgɛ chɩŋ kpaŋkpaŋ, dɩ ŋ jɩŋ arɩ mɩ nɛ ŋ TƖƖNA.

⁶³ Dɩ mɩ nɛ joŋ wɩalɩŋ kala ŋ sɩ ŋaa a chɛŋ, ŋ jaŋ liise yi wʋbɔmɔ-la ŋ sɩ ŋaa lɛ, dɩ hɩɩsɩŋ kɛnɩŋ kɩŋkɛŋ dɩ ŋ bɩra bɩ ŋ niiŋ wuo suri. Mɩ-na ma TƖƖNA Wɩɩjarɩbakɔ nɛ bʋla.”