ƐZƖKƖƐL 14 - WƖA TENIŊ

Wɩalɩŋ Wɩa sɩ bʋla hɛ vʋɩ-kpaaraa lɛ

¹ Tapʋlɩɩ kʋbala Iziral tɩŋŋaa nɩhɩasɩŋ dɔnsʋŋ sii kɔ mɩ teeŋ la hɔŋ.

² Ŋɩɩ nɛ La TƖƖNA bʋl wɩaa pɩmɛ:

³ “Nuhuobiiŋ, nɩaa deemba joŋ vʋɩyaa kpaarɩŋ nɛ hɛ ba nyuŋ lɛ, a leŋ nɩbɔŋ wɩaa kɛrɛba. Ɛɛ nɛ saa ba jaŋ pɩɛsɛmɛ dɩ mɩ dagɛba wɩaa?

⁴ Ŋɩɩ wɩaa, bʋla pɩ Iziral tɩmma-la, ‘Wɩɩ-la mɩ-na ba TƖƖNA Wɩɩjarɩbakɔ sɩ bʋla nɛ ŋ-la: Iziral tɩɩna kala nɛ joŋ vʋɩyaa kpaarɩŋ hɛ ʋ nyuŋ lɛ, a leŋ nɩbɔŋ wɩaa kɛrʋ, aŋ sii mʋ Wɩa wʋlaabʋlla teeŋ dɩ ʋ pɩɛsa na wɩɩ mɩ teeŋ, mɩ-na ma TƖƖNA tɩtɩa nɛ jaŋ bʋl wɩɩ-la sɩ hɛ nɩmɛ a mʋ tɩgɛ ʋ vʋɩ-kpaarɩ-daŋ-la lɛ a pʋ.

⁵ Ŋɩɩ nɛ mɩ jaŋ ŋaa a kɛŋ Iziral tɩmma-la kala sɩ vɩamɛ aŋ kpʋkpaarɛ vʋɩyaa tʋɔbɩɩnaa bɩrɩmɛ dɩ ba tutomi.’

⁶ Ŋɩɩ wɩaa bʋla pɩ Iziral tɩŋŋaa, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Má bɩrɩma lɩɩ ma wʋbɔŋŋɔɔ lɛ. Má leŋ ma vʋɩya-la arɩ wʋkɩsɩa-la kala ma sɩɩ ŋaa.

⁷ Dɩ Iziral tɩɩna koo dɩ nʋhʋɔrʋ sɩ hɔŋ ma tʋɔŋ nɛ vɩamɛ aŋ joŋ vʋɩyaa kpaarɩŋ hɛ ʋ nyuŋ lɛ, a leŋ nɩbɔŋ wɩaa kɛrʋ, aŋ sii mʋ mɩ wʋlaabʋlla teeŋ dɩ ʋ pɩɛsa na wɩɩ mɩ teeŋ, mɩ-na ma TƖƖNA tɩtɩa nɛ jaŋ bʋl wɩɩ-la sɩ hɛ nɩmɛ a pʋ.

⁸ Mɩ jaŋ dɔgɩsɛ tɩɩna a leŋ dɩ ŋɩɩ ŋaa wɩɩ a chagɩlɛ nʋʋkala sɩɩ chɛ dɩ ʋ ŋaa wɩalɩŋ tɩtɩa tɩɩna sɩ ŋaa, dɩ ba liisi ʋ wɩaa a bʋbʋl. Mɩ jaŋ keri tɩɩna ta mɩ nɩaa tʋɔŋ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

⁹ Dɩ nʋʋ nɛ nyɩsɛ mɩ wʋlaabʋllʋ hɛ dɩ ʋ nyɩɛ bʋl wɩaa mɩ doluŋ lɛ, mɩ-na ma TƖƖNA tɩtɩa nɛ nyɩsʋ ŋɩɩ. Ama mɩ jaŋ lɩɩsɛ mɩ nɩsɩŋ liesu a cheyu a lɩɩsʋ ta mɩ nɩaa Iziral tɩŋŋaa tʋɔŋ.

¹⁰ Mɩ jaŋ dɔgɩsɛ nɩɩ-la sɩ mʋ mɩ wʋlaabʋllʋ-la teeŋ dɩ ʋ pɩɛsa na wɩaa arɩ mɩ wʋlaabʋllʋ-la kala a magɛ dɔŋɔ.

¹¹ Ŋɩɩ nɛ jaŋ leŋ dɩ Iziral nɩaa bɩra sɩ́ mɩ vɩa, koo a ŋaa wʋbɔŋ a kɛŋ disiniŋ. Ba jaŋ ŋaa mɩ nɩaa, dɩ mɩ ma ŋaa ba Wɩa. Mɩ-na ma TƖƖNA Wɩɩjarɩbakɔ nɛ bʋla.’ ”

Sarɩya-la nʋʋ sɩ bɩ jaŋ wuo fa kagɛ

¹² La TƖƖNA bʋl wɩaa pɩmɛ, ʋ sɩ:

¹³ “Nuhuobiiŋ, dɩ tinteeŋ nɩa nɛ ŋaa wʋbɔŋ a bɩ wʋtɩtɩɩ kɛnɛ mɩ teeŋ, mɩ jaŋ dɔgɩsɛba a leŋ dɩ ba kʋduuloo chei ka dɩ losuŋ jʋʋba, dɩ nuhuobiine arɩ pʋsʋŋ kala sʋʋ.

¹⁴ Dɩ nɩaa deemba batori, Nowa, Danɩɛl arɩ Job nɛ fa paala hɛ tintee-la lɛ ma, ba tʋɔpʋla jaŋ wuo laa ba tɩtɩa mɩɩsɩŋ nɛ, ama nʋʋkala dee. La TƖƖNA Wɩɩjarɩbakɔ nɛ bʋla.

¹⁵ Koo dɩ baga kʋbɔŋŋɔɔ nɛ mɩ leŋ ba jʋʋ tintee-la a kpʋ nɩaa, ka dɩ ʋ pɩŋ hoi nʋʋkala bɩ nɩmɛ wuo to bɩbal a tɩŋ baga kʋbɔmɔ-la wɩaa.

¹⁶ Mɩ-na ma TƖƖNA Wɩɩjarɩbakɔ ŋmɩɛsa, dɩ baalaa deemba batori nɛ fa paala hɛ ʋ lɛ ma, ba bɩ ba tɩtɩa hambolibiisiŋ arɩ ba toloo ma mɩɩsɩŋ wuo laa. Ba tɩtɩa mɩɩsɩŋ nɛ ba fa jaŋ wuo laa, ka dɩ tintee-la pɩŋ hoi.

¹⁷ Koo dɩ laalɩyuoroo nɛ mɩ kaa kʋ jʋʋ tintee-la aŋ bʋl, ‘Má gɔllɛ tintee-la kala, a kpʋ ʋ nɩaa arɩ ba pʋsʋŋ kala,’

¹⁸ mɩ-na ma TƖƖNA Wɩɩjarɩbakɔ ŋmɩɛsa, dɩ baalaa deemba batori nɛ fa paala hɛ tintee-la nɩaa tʋɔŋ ma, ba bɩ ba tɩtɩa hambolibiisiŋ arɩ ba toloo mɩɩsɩŋ wuo laa. Ba tɩtɩa mɩɩsɩŋ nɛ ba fa jaŋ wuo laa.

¹⁹ Koo dɩ nyanyal-bɔŋ sɩɩ kpʋ nɩaa nɛ mɩ na baanɩŋ a joŋo hɛ tintee-la lɛ, dɩ ʋ kpʋkpʋ tintee-la nɩaa arɩ ba pʋsʋŋ kala,

²⁰ mɩ-na ma TƖƖNA Wɩɩjarɩbakɔ ŋmɩɛsa: Dɩ Nowa, Danɩɛl arɩ Job nɛ fa paala hɛ tintee-la nɩaa tʋɔŋ ma, ba bɩ jaŋ wuo laa ba tɩtɩa hambolibie koo ba tolo mɩɩsɩŋ. Ba tʋɔpʋla jaŋ laa ba tɩtɩa mɩɩsɩŋ nɛ.

²¹ Wɩɩ-la mɩ-na ma TƖƖNA Wɩɩjarɩbakɔ sɩɩ bʋl nɛ ŋ-la: Ʋ jaŋ ŋaa wʋlɔrʋ a pɩ Jerusalɛm nɩaa dɩ mɩ nɛ joŋ wɩaa deemba banɛsɛ dɔgɩsɛba: laalɩŋ, losuŋ, baga kɩaa arɩ nyanyal bɔŋŋɔɔ, dɩ ba kpʋ ʋ nɩaa arɩ ʋ pʋsʋŋ.

²² Arɩ ŋɩɩ kala, ba hambolibiisiŋ arɩ ba toloo dɔnsʋŋ ha jaŋ ka dɩ ba kɛmba lɩɩ ba tinteeŋ lɛ a kaa kɔ ma teeŋ Babɩlɔŋ lɛ. Dɩ ma nɛ na mɛl-bɔŋ-la ba sɩ kɛnɛ arɩ wɩalɩŋ ba sɩɩ ŋaa, ma tʋɔŋ jaŋ pɩŋ dɩ-bala a mʋ tɩgɛ wʋlɔrʋnʋ-la mɩ sɩ joŋo ŋaa Jerusalɛm nɩaa lɛ.

²³ Dɩ ma nɛ na ba mɛlɛ arɩ wɩalɩŋ ba sɩɩ ŋaa, ma tʋɔŋ jaŋ pɩŋ dɩ-bala dɩ ma jɩŋ arɩ wɩalɩŋ mɩ fa sɩ joŋo ŋaa ba lɛ kɛŋ bʋbʋɔŋ nɛ. Mɩ-na ma TƖƖNA Wɩɩjarɩbakɔ nɛ bʋla.”