ƐZƖKƖƐL 13 - WƖA TENIŊ

Ɛzɩkɩɛl bʋl wɩaa a hɛ nɩalɩŋ sɩ nyɩɛ wɩaa arɩ ba ŋaa Wɩa wʋlaabʋlla lɛ

¹ La TƖƖNA bʋl wɩaa pɩmɛ, ʋ sɩ:

² “Nuhuobiiŋ, bʋl wɩaa mɩ doluŋ lɛ a hɛ nɩalɩŋ sɩɩ nyɩɛ wɩaa arɩ ba ŋaa mɩ wʋlaabʋllaa nɛ a hɛ Iziral tinteeŋ lɛ a bʋbʋl wɩaa naabʋɔsʋŋ deemba lɛ. Bʋla pɩ nɩalɩŋ sɩɩ bʋl ba tɩtɩa tʋɔbɩɩnaa wɩaa: ‘Má jegile nɩɩ wɩɩ-la mɩ-na ma TƖƖNA sɩ bʋla.’

³ Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Hɛɛŋ jaŋ jʋʋ ba nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa nɛ, ba ŋaa nɩ-yaraa nɛ, baa bʋl ba tɩtɩa tʋɔbɩɩnaa wɩaa nɛ. Ba bɩ wɩɩkala na a nagɛ duosoo tʋɔŋ.

⁴ Iziral tɩmma, ma wʋlaabʋllaa nagɛ jolluŋ sɩ hɛ jikpeeniŋ lɛ nɛ.

⁵ Ba bɩ chɩna pɔ jee-la lere-la sɩ tele, a bɩ jee-la paa wasa saa ma dɩ Iziral tinteeŋ chɩŋ kpaŋkpaŋ dɩ La TƖƖNA tapʋlɩɩ-la nɛ yie dɩ laalɩŋ sii.

⁶ Wɩalɩŋ ba sɩ na a nagɛ duosoo tʋɔŋ, arɩ ba vʋgʋrʋ wɩaa ŋaa wʋnyɩɛrɩŋ nɛ. Ba sɩ, ‘La TƖƖNA nɛ bʋla,’ ka mɩ-na ma TƖƖNA bɩ ba tɩma, ka ba ha bɩɩnɛ arɩ wɩalɩŋ ba sɩ bʋla jaŋ kʋ ŋaa wʋtɩtɩɩ.

⁷ Ba nyɩɛ wɩaa arɩ ma na wɩaa a nagɛ duosoo tʋɔŋ nɛ a vʋga nyɩɛ wɩaa ma, bʋa-la lɛ ba sɩ sɩ, ‘La TƖƖNA nɛ bʋla,’ ka mɩ bɩ wɩɩ bʋla.

⁸ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: A tɩŋ wʋnyɩɛrɩ wɩalɩŋ ma sɩ bʋla arɩ wɩalɩŋ ma sɩ na a nagɛ duosoo tʋɔŋ sɩ ŋaa wʋnyɩɛrɩŋ ŋɩɩ, mɩ chɩŋ ma lɛ nɛ. Mɩ-na ma TƖƖNA Wɩɩjarɩbakɔ nɛ bʋla.

⁹ Mɩ jaŋ dɔgɩsɛ ma nɩalɩŋ sɩ nyɩɛ wɩaa arɩ maa na wɩaa a nagɛ duosoo tʋɔŋ nɛ, a vʋgaa nyɩɛ wɩaa. Ma bɩra bɩ jaŋ guoli mɩ nɩalɩŋ sɩ yie hilime vʋvʋʋrɛ wɩaa tʋɔŋ, koo dɩ ba ŋmʋnsɛ ma yɩraa hɛ Iziral tɩŋŋaa tʋɔŋ koo ma jʋʋ Iziral tinteeŋ. Ŋɩɩ nɛ ma jaŋ jɩŋ arɩ mɩ nɛ ma TƖƖNA Wɩɩjarɩbakɔ.

¹⁰ Nɩalɩŋ sɩ nyɩɛ wɩaa a leŋ mɩ nɩaa yeŋŋi yie bʋl, ‘Fɩɛlɩŋ hɛ nɩmɛ nɛ,’ ka fɩɛlɩŋ tuo. Mɩ nɩaa saa jeeŋ sɩ bɩ doluŋ kɛnɛ nɛ, nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa kʋ ŋaa tʋɔrʋŋ bʋgɛ.

¹¹ Ŋɩɩ wɩaa, bʋla pɩ nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa arɩ jee-la ba sɩ ŋaa tʋɔrʋŋ bʋgɛ jaŋ tel. Mɩ jaŋ leŋ dɩ duonuŋ lɔgɔ jaasɛ, dɩ duoŋ-tabɩaa tel, dɩ pel-duoŋ lu a ŋmoo jee-la lo.

¹² Dɩ jee-la sɩ bɩ doluŋ kɛnɛ nɛ tele, nɩaa jaŋ pɩɛsɛma, ‘Tʋɔrʋ-la ma sɩ joŋo bʋgɛ jee-la hɛ nɩa?’

¹³ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ faasa na baanɩŋ a leŋ dɩ pel-duoŋ lu dɩ duonuŋ lɔgɔ jaasɛ, dɩ duoŋ-tabɩaa tele yagɛ jee-la lo.

¹⁴ Mɩ jaŋ yigi jee-la ma sɩ joŋ tʋɔrʋŋ bʋgɛ a lo, a yɛrɛ ʋ kala muno muno ka dɩ ʋ gentine nyɩɩsɛ, dɩ jee-la nɛ tele, ʋ jaŋ kpʋ ma kala. Ŋɩɩ lɛ nɛ ma jaŋ jɩŋ arɩ mɩ nɛ ma TƖƖNA.

¹⁵ Mɩ jaŋ joŋ mɩ baanɩŋ fɩɩsɛ jee-la arɩ nɩalɩŋ sɩ joŋ tʋɔrʋŋ bʋgʋ kala nyuŋ a cheiba. Mɩ jaŋ bʋla pɩma: Jee-la arɩ nɩalɩŋ sɩ joŋ tʋɔrʋŋ bʋgʋ kala lɛlɛ nɛ.

¹⁶ Nɩalɩŋ sɩ nyɩɛ wɩaa arɩ ba ŋaa mɩ wʋlaabʋlla nɛ Iziral tinteeŋ lɛ, a bʋla pɩ Jerusalɛm nɩaa arɩ ba na wɩaa a nagɛ duosoo tʋɔŋ dɩ fɩɛlɩŋ hɛ ʋ lɛ nɛ, ka fɩɛl kala tuo. Mɩ-na ma TƖƖNA Wɩɩjarɩbakɔ nɛ bʋla.”

¹⁷ La TƖƖNA sɩ, “Nuhuobiiŋ, joŋ sɩaa chaasɛ haala-la sɩ hɛ Iziral tinteeŋ lɛ a nyɩɛ wɩaa arɩ ba ŋaa mɩ wʋlaabʋlla nɛ aŋ bʋbʋl ba tɩtɩa tʋɔbɩɩnaa wɩaa. Bʋl wɩaa mɩ doluŋ lɛ a hɛ ba lɛ,

¹⁸ a bʋla pɩba, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Hɛɛŋ jaŋ jʋʋ haala-la sɩ yɛrɛ chichiribi kɩalɩŋ ba sɩ kaa bugumi nɩaa a vɔɔ ba nachɩgɩsɩŋ, aŋ yɛrɛ nyu-kpal-duduosuŋ ma ba sɩ kaa bɛrɛɛ kɛsɛ nɩaa a vɔɔ nyusuŋ. Ma bɩɩna ma jaŋ wuo bɛrɛ kɛsɛ mɩ nɩaa dɩ ba sʋʋ, aŋ ka dɩ ma-na kɛŋ mɩɩsɩŋ koo?

¹⁹ Ma chei mɩ yɩrɩŋ nɛ mɩ nɩaa tʋɔŋ, aŋ laa mɩaa nɩsɩŋ sɩɩŋ arɩ boroboro biisiŋ mʋa. Ma nyɩɛ wɩaa pɩ mɩ nɩaa nɛ ba laa wʋnyɩɛrɩ-la dii, ka ma kpʋ nɩalɩŋ sɩ bɩ maga dɩ ba sʋʋ, aŋ leŋ nɩalɩŋ fa sɩ maga dɩ ba sʋʋ kɛŋ mɩɩsɩŋ.

²⁰ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ bɛrɛ chichiribi kɩalɩŋ ma sɩ kaa bɛrɛɛ kɛsɛ nɩaa a nagɛ ba ŋaa diibiisiŋ nɛ, mɩ jaŋ kɛŋ kɩalɩŋ kɛrɛ ma nɩsaa lɛ, aŋ laa nɩalɩŋ ma sɩ bɛrɛ kɛsɛ a nagɛ ba ŋaa diibiisiŋ nɛ a ta.

²¹ Mɩ jaŋ kɛŋ ma nyu-kpal-duduosu-la puri aŋ laa mɩ nɩaa ta ma nɩsaa lɛ, dɩ ma bɩra sɩ́ doluŋ kɛŋ ba lɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

²² Ma nyɩɛ wɩaa a ŋaa tʋɔpʋl tɩmma-la mɩ sɩ bɩ chɛ mɩ leŋ dɩ ba tʋɔŋ chei, nandaasɩŋ yʋɔrɛ nɛ, aŋ leŋ nɩbɔŋŋɔɔ nyuŋ nyaasɛ dɩ ba sɩ bɩrɩma lɩɩ ba wʋbɔŋŋɔɔ lɛ a laa ba mɩɩsɩŋ.

²³ Ŋɩɩ wɩaa, ma bɩra bɩ jaŋ nyɩɛ wɩaa arɩ maa na wɩaa a nagɛ duosoo tʋɔŋ nɛ, koo a ŋaa vʋgʋra. Mɩ jaŋ laa mɩ nɩaa ta ma nɩsɩŋ lɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.’ ”