ƐZƖKƖƐL 12 - WƖA TENIŊ

Wɩalɩŋ sɩ daga arɩ ba jaŋ kɛsɛ nɩaa mʋ yoŋ-baga

¹ La TƖƖNA fa bʋl wɩaa pɩmɛ, ʋ sɩ:

² “Nuhuobiiŋ, ŋ hɛ nɩalɩŋ sɩ vɩa mɩ niiŋ tʋɔŋ nɛ. Ba kɛŋ sɩaa nɛ a magɛ dɩ ba nɩna, ama ba bɩ na, a kɛŋ dɩgɩlaa a magɛ dɩ ba nɩnɩɩ ka ba bɩ nɩɩ, bɛɛ wɩaa ba ŋaa nɩa sɩ vɩa mɩ niiŋ nɛ.

³ Ŋɩɩ wɩaa, nuhuobiiŋ, leŋ dɩ ba naŋ ka dɩ ŋ paa ŋ kɩaa wɩɩhɛyɛ a lɩɩ mʋmʋ yoŋ-baga. Lɩɩ lee-la ŋ sɩ hɛ a lɩɩ mʋ lee dɔŋ. Ba ŋaa nɩa sɩ vɩa mɩ niiŋ nɛ, kapo ba jaŋ jɩŋ wɩɩ-la ŋ sɩɩ ŋaa bʋbʋɔŋ.

⁴ Kɛŋ kɩalɩŋ ŋ sɩ paa dɩ ŋ kaa mʋ yoŋ-baga kʋ lɩɩ dɩ-jalɩŋ wɩɩhɛyɛ ka dɩ ba bibeniŋ. Leŋ dɩ ba naŋ dɩdaanɩŋ ka dɩ ŋ lɩɩ a nagɛ nɩaa sɩɩ mʋ yoŋ-baga.

⁵ Ba sɩɩ beniŋ ŋɩɩ, ta jeeŋ luri a paa ŋ kɩaa kaa to nɩmɛ lɩɩ.

⁶ Leŋ dɩ ba naŋ ka dɩ ŋ joŋ kɩalɩŋ baasɛ a kaa lɩɩ sɩɩ-dɩsaa. Joŋ kʋŋ tɔ ŋ sɩaa dɩ ŋ sɩ́ tintee-la lɛ ŋ sɩɩ lɩɩ na. Wɩalɩŋ ŋ sɩɩ ŋaa jaŋ ŋaa magɩl a pɩ Iziral tɩŋŋaa.”

⁷ Ŋɩɩ nɛ mɩ ŋaa wɩalɩŋ kala La TƖƖNA fa sɩ sɩ mɩ ŋaa. Wɩɩhɛyɛ mɩ paa mɩ kɩaa kʋ lɩɩ dɩ mɩ mʋ yoŋ-baga. Dɩdaanɩŋ mɩ ta jeeŋ luri a paa mɩ kɩaa baasɛ a lɩɩ sɩɩ-dɩsaa ka ba bibeŋ.

⁸ Chʋchʋɔŋ La TƖƖNA bʋl wɩaa pɩmɛ:

⁹ “Nuhuobiiŋ, Iziral tɩmma-la sɩ vɩa mɩ niiŋ bɩŋ wɩɩ pɩɛsa arɩ bɛɛ nɛ ŋ ŋɩŋaa ŋɩɩ?

¹⁰ Bʋla pɩba, Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Wɩɩ-la mɩ sɩ joŋo dagɩŋ mʋʋ tɩgɛ sɩpaalaarʋ-la sɩɩ beŋ Jerusalɛm arɩ nɩalɩŋ kala sɩ hɛ nɩmɛ lɛ nɛ.

¹¹ Bɩra bʋla pɩ Iziral tɩŋŋaa, ‘Wɩalɩŋ mɩ sɩ ŋaa, ba ŋaa magɩl nɛ a pɩba.’ Ŋɩɩ mɩ sɩ ŋaa wɩaa, ŋɩɩ nɛ jaŋ ŋaa ba ma lɛ. Ba jaŋ kɛsɛba kaa mʋ yoŋ-baga.

¹² Jerusalɛm sɩpaalaara jaŋ paa ʋ kɩaa baasɛ a lɩɩ sɩɩ-dɩsaa, ba jaŋ ta jeeŋ luro pʋ dɩ ʋ to nɩmɛ lɩɩ. Ʋ jaŋ tɔ ʋ sɩaa dɩ ʋ sɩ́ tintee-la lɛ ʋ sɩɩ lɩɩ na.

¹³ Mɩ jaŋ yuo mɩ jóŋ a kɛnʋ, mɩ jaŋ kɛnʋ mʋ Babɩlɔŋ, Chalɩdɩ tɩŋŋaa tinteeŋ. Ʋ bɩ jaŋ na lee-la, ama nɩmɛ nɛ ʋ jaŋ sʋʋ.

¹⁴ Mɩ jaŋ ŋmoo nɩalɩŋ sɩ hɛ ʋ teeŋ pɩsɛ, nɩalɩŋ sɩɩ dagʋ arɩ laalɩyuoro-la sɩɩ pɔʋ, a kire to kpʋba arɩ tokobiiŋ.

¹⁵ Dɩ mɩ nɛ ŋmoo Jerusalɛm nɩaa pɩsa hɛ tintee-wogusuŋ lɛ, ŋɩɩ nɛ ba jaŋ jɩŋ arɩ mɩ nɛ ba TƖƖNA.

¹⁶ Ama mɩ jaŋ leŋ ba nɩaa baŋmɛnɛ, mɩ bɩ jaŋ kpʋ ba kala laalɩŋ lɛ, losuŋ arɩ nyanyal bɔŋŋɔɔ ma bɩ jaŋ kpʋ ba kala. Dɩ ba nɛ mʋ tinteye-la, dɩ ba wuo liisi wʋkɩsɩa-la kala ba sɩ ŋaa. Ŋɩɩ nɛ ba jaŋ jɩŋ arɩ mɩ nɛ ŋaa ba TƖƖNA.”

¹⁷ La TƖƖNA fa bɩra bʋl wɩaa pɩmɛ:

¹⁸ “Nuhuobiiŋ, didii ŋ kʋdiilee aŋ chichel, aŋ nyʋnyʋa lɩɩŋ ma arɩ fawʋllʋŋ aŋ chichel.

¹⁹ Bʋla pɩ tintee-la nɩaa: Wɩɩ-la mɩ-na ma TƖƖNA Wɩɩjarɩbakɔ sɩ bʋla tɩgɛ nɩalɩŋ sɩ hɛ Jerusalɛm arɩ Iziral tinteeŋ lɛ nɛ ŋ-la: Ba jaŋ dii ba kʋdiilee arɩ fawʋllʋŋ, a nyʋa lɩɩŋ ma arɩ tʋɔ-cheeŋ. Nɩaa jaŋ chei ba tinteeŋ dɩ ʋ pɩŋ hoi, a tɩŋ ba nɩalɩŋ sɩ hɔŋ lee-la sɩ ŋaa yuo-hɛɛrɛɛ wɩaa.

²⁰ Tasɩ-la lɛ nɩaa sɩ hɔnɔ jaŋ pɩŋ jikpeeŋ, dɩ tintee-la kala pɩŋ hoi. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”

²¹ La TƖƖNA fa bɩra bʋl wɩaa pɩmɛ:

²² “Nuhuobiiŋ, bɛɛ kʋŋ namaga nɛ maa magɛ Iziral tinteeŋ lɛ ŋ-la, ‘Tapʋlaa bala a yʋgɛ nɛ ka wɩalɩŋ kala Wɩa sɩ joŋo dagɛ nɩaa a nagɛ duosoo tʋɔŋ bɩ ŋaa.’

²³ Ŋɩɩ wɩaa bʋla pɩba, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩɩ chɛ dɩ mɩ giri namaga-la ta nɛ, ba bɩra bɩ jaŋ magʋ Iziral tinteeŋ lɛ.’ Bɩra bʋla pɩba, ‘Tapʋlaa kpaga nɛ, wɩɩ na-kala mɩ fa sɩ joŋo dagɛ nɩaa a nagɛ duosoo tʋɔŋ jaŋ kʋ ŋaa.

²⁴ Iziral tinteeŋ lɛ, nɩaa bɩra bɩ jaŋ nyɩɛ wɩaa arɩ ba na wɩaa a nagɛ duosoo tʋɔŋ, koo dɩ ba tʋɔŋ nʋʋ hɛ nɩmɛ a vʋga nyɩɛ wɩaa a leŋ dɩ nɩaa yiyeŋŋi.

²⁵ Ama mɩ-na ma TƖƖNA jaŋ bʋl wɩɩ-la mɩ sɩɩ chɛ, ʋ jaŋ sɛnɛ ŋaa, ʋ bɩ dieni. Ma ŋaa nɩa sɩ vɩa mɩ niiŋ nɛ. Ma mɩɩsɩŋ lɛ, mɩ jaŋ ŋaa wɩɩ-la mɩ sɩ bʋla, mɩ-na ma TƖƖNA Wɩɩjarɩbakɔ nɛ bʋla.’ ”

²⁶ La TƖƖNA bʋl wɩaa pɩmɛ, ʋ sɩ:

²⁷ “Nuhuobiiŋ, Iziral tɩŋŋaa sɩ, ‘Wɩalɩŋ Wɩa sɩ joŋo dagɛ Ɛzɩkɩɛl a nagɛ duosoo tʋɔŋ ŋaa jɩ-dandaŋ wɩɩ nɛ, lɛɛlɛ dee. Wɩalɩŋ ma ʋ sɩ bʋla Wɩa doluŋ lɛ ŋaa maachie wɩaa nɛ.’

²⁸ Ŋɩɩ wɩaa bʋla pɩba, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Wɩalɩŋ mɩ sɩ bʋla kʋŋkala bɩ jaŋ dieni. Mɩ wʋbʋlaa kala jaŋ kʋ ŋaa, mɩ-na ma TƖƖNA Wɩɩjarɩbakɔ nɛ bʋla.’ ”