ƐZƖKƖƐL 11 - WƖA TENIŊ

Wɩa jaŋ dii Iziral sɩpaalaaraa sarɩya

¹ Ŋɩɩ nɛ Wɩa Dɩma-la jommi a kaa mʋ La TƖƖNA dɩɩ-balɩŋ boi-baal-la sɩ chaasɛ wɩɩpɔsʋŋ dɩɩrɩŋ. Nɩmɛ nɛ mɩ na baalaa mara arɩ banɔŋ, ba tʋɔŋ mɩ na Azuri nanʋala Jaazanɩa arɩ Bɛnaaya nanʋala Pɛlatɩa, sɩ ŋaa Iziral tɩŋŋaa sɩpaalaaraa.

² La TƖƖNA fa bʋla pɩmɛ, “Nuhuobiiŋ, baalaa deemba nɩɩ vʋʋrɛ wʋbɔŋŋɔɔ aŋ dɩdagɛ nɩaa nɩbɔŋ wɩaa tabalɩŋ deeŋ lɛ.

³ Ba pɩɛsɛ dɔŋɔ, ‘Bʋa deeŋ lɛ dee bɩ maga dɩ la saa dɩɩsɩŋ? Tabalɩŋ deeŋ ŋaa pupoiŋ nɛ, ka la ma nagɛ nammɩa a hɛ ʋ tʋɔŋ, ama ʋ ha tɔla nɛ dɩ nyiniŋ sɩ́ la dii.’

⁴ Ŋɩɩ wɩaa Nuhuobiiŋ, bʋl wɩaa mɩ doluŋ lɛ a hɛ ba lɛ.”

⁵ Ŋɩɩ nɛ Wɩa Dɩma-la kʋ jʋʋmɛ a bʋla pɩmɛ dɩ mɩ bʋla pɩba, “Wɩɩ-la La TƖƖNA sɩ bʋla nɛ ŋ-la: Iziral tɩmma, mɩ jɩŋ wɩɩ-la ma sɩɩ bʋl arɩ wɩɩ-la ma sɩɩ bɩɩnʋ nɛ.

⁶ Nɩ-daŋ nɛ ma kpʋ tabalɩŋ deeŋ lɛ, ʋ womporunuŋ kala su arɩ sʋʋnʋŋ.

⁷ Ŋɩɩ wɩaa wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Sʋʋnʋ-la ma sɩ joŋo yuo ta nɛ ŋaa nammɩa-la, tabal-la ma nɛ ŋaa pupoiŋ, ama mɩ jaŋ kirima ta dɩ ma lɩɩ ʋ lɛ.

⁸ Maa fá laalɩŋ nɛ, laalɩŋ nɛ saa mɩ jaŋ joŋo hɛ ma lɛ. Ma TƖƖNA Wɩɩjarɩbakɔ nɛ bʋla.

⁹ Mɩ jaŋ kirima ta dɩ ma lɩɩ tabal-la lɛ a jomma hɛ nɩwogusuŋ nɩsɩŋ lɛ a dɔgɩsɛma.

¹⁰ Ba jaŋ kpʋma laalɩŋ lɛ, mɩ jaŋ dii ma Iziral tɩŋŋaa sarɩya ma tɩtɩa tinteeŋ lɛ. Ŋɩɩ nɛ ma jaŋ jɩŋ arɩ mɩ nɛ ma TƖƖNA.

¹¹ Tabalɩŋ deeŋ bɩra bɩ jaŋ ŋaa ma pupoiŋ ka dɩ ma ma ŋaa nammɩa a hɛ ʋ lɛ, mɩ jaŋ dii ma Iziral tɩŋŋaa sarɩya ma tɩtɩa tinteeŋ lɛ.

¹² Ŋɩɩ nɛ ma jaŋ jɩŋ arɩ mɩ-na nɛ ma TƖƖNA, ka ma bɩ wɩalɩŋ mɩ sɩ daga arɩ mɩ wombie-la mɩ sɩ bile to, aŋ mɩɩra tuto tinteye-la sɩ gollima wʋŋaalaa.”

¹³ Mɩ fa ha sɩɩ bʋl wɩaa Wɩa doluŋ lɛ ŋɩɩ, Bɛnaaya nanʋala Pɛlatɩa tele sʋʋ. Ŋɩɩ nɛ mɩ tele kɛŋ mɩ sɩaa chu tinteeŋ, aŋ ŋmoo niiŋ bogi bogi a pɩɛsɛ, “La TƖƖNA Wɩɩjarɩbakɔ, ŋ jaŋ kpʋ Iziral tɩŋŋaa nɩkaanaa kalaa?”

¹⁴ La TƖƖNA fa bɩra bʋl wɩaa pɩmɛ:

¹⁵ “Nuhuobiiŋ, ŋ naambiiriŋ arɩ Iziral tɩŋŋaa kala sɩ hɛ yoŋ-baga lɛ, ma wɩaa nɛ nɩalɩŋ sɩ hɛ Jerusalɛm lɛ bʋl, ‘Ba dɩ La TƖƖNA pɛgɛ bolie nɛ, La TƖƖNA joŋ tinteeŋ deeŋ pɩla nɛ dɩ ʋ ŋaa la kʋŋ.’

La TƖƖNA sɩ Iziral tɩŋŋaa jaŋ mɩɩra kɔ

¹⁶ Ŋɩɩ wɩaa, bʋla pɩ nɩalɩŋ sɩ hɛ yoŋ-baga lɛ, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ nɛ fa leŋe ba mʋ tintee-wogusuŋ a kɛmba pɩsa hɛ tinteyee sɩ bolie lɛ, ama mɩ hɛ ba teeŋ nɛ a pɔba tinteye-la kala lɛ ba sɩ mʋa.’

¹⁷ Ŋɩɩ wɩaa bʋla pɩba, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ jaŋ kɛmma hɛ dɔŋɔ a kaa lɩɩ tinteyee arɩ tinteye-la lɛ mɩ fa sɩ kɛmma pɩsa hɛ kɔ. Mɩ jaŋ bɩra joŋ ma Iziral tɩŋŋaa tinteeŋ pɩma.’

¹⁸ Dɩ ba nɛ mɩɩra kɔ, ba jaŋ chei tɔŋŋɔɔ sɩ ŋaa disiŋ kɩaa arɩ vesiŋ mɩ sɩɩ kɩsʋ kala sɩ hɛ tintee-la lɛ.

¹⁹ Mɩ jaŋ leŋ dɩ ba kɛŋ tʋɔ-bala a tutomi, a pɩba dɩŋ-falɩŋ. Mɩ jaŋ lɩɩsɛ tʋɔ-dol-la sɩ nagɛ tabɩɩŋ a hɛ ba lɛ ta, aŋ pɩba tʋɔ-la sɩ pʋnyɛ.

²⁰ Ŋɩɩ nɛ ba jaŋ to mɩ wʋdagaa a fɩɛlɛ ba sɩaa a to mɩ wombie-la mɩ sɩ bile dɩ ba tuto. Ba jaŋ ŋaa mɩ nɩaa, dɩ mɩ ma ŋaa ba Wɩa.

²¹ Ama nɩalɩŋ sɩɩ to tɔŋŋɔɔ sɩ ŋaa disiŋ kɩa arɩ vesiŋ mɩ sɩɩ kɩsʋ, mɩ jaŋ dɔgɩsɛba a tɩŋ wɩalɩŋ ba sɩ ŋaa wɩaa. Mɩ-na ma TƖƖNA Wɩɩjarɩbakɔ nɛ bʋla.”

²² Ŋɩɩ nɛ kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ, gɩrɩŋgɩrɩmba hɛ ba sɛsɩŋ lɛ file jɩl wɩa-nyuŋ, ka Iziral tɩŋŋaa Wɩa tʋla chuguli ba lɛ.

²³ La TƖƖNA tʋla-la faa sii tabal-la lɛ a mʋ chɩŋ peeliŋ nyuŋ, tabal-la wɩɩpɔsʋŋ dɩɩrɩŋ.

²⁴ Wɩalɩŋ mɩ fa sɩ na arɩ duosoo tʋɔŋ, Wɩa Dɩma-la jommi kaa mʋ nɩalɩŋ sɩ hɛ yoŋ-baga lɛ Babɩlɔŋ tinteeŋ. Ŋɩɩ nɛ wɩalɩŋ mɩ fa sɩ na a nagɛ duosoo tʋɔŋ lɛl.

²⁵ Ŋɩɩ nɛ mɩ bʋl wɩalɩŋ kala La TƖƖNA fa sɩ joŋo dagɛmɛ a pɩ nɩalɩŋ sɩ hɛ yoŋ-baga lɛ.