ƐZƖKƖƐL 1 - WƖA TENIŊ

Kɩalɩŋ sɩ weye a nagɛ nuhuobiinee arɩ La TƖƖNA tʋla

¹ Ba sɩ yuo kɛsɛ Juu tɩŋŋaa kaa mʋ yoŋ-baga Babɩlɔŋ lɛ, ʋ jɩsɩŋ mara arɩ fii, chɛŋ-nɛsɩmɩŋ tapʋl-nɔŋ chɛɛŋ, dɩ mɩ-na Ɛzɩkɩɛl sɩ ŋaa Wɩɩsʋllɩ sɩpaalaara, a ŋaa Buzi nanʋala, fa hɛ Juu tɩmma-la ba sɩ kɛsɛ mʋ Babɩlɔŋ tʋɔŋ. La fa hɛ fuo-la ba sɩɩ yɩrɛ Keba niiŋ nɛ. Ŋɩɩ nɛ wɩa-nyuŋ suri, Wɩa kɛŋ wɩaa dagɛmɛ a nagɛ duosoo tʋɔŋ.

² Chɛŋ-nɔŋ tapʋl-nɔŋ lɛ, dɩ ba sɩ kɛŋ kuoro Jehoyachiŋ mʋ yoŋ-baga, ʋ jɩ-nɔŋ tʋɔŋ nɛ ŋɩɩ.

³ Ŋɩɩ nɛ La TƖƖNA bʋl wɩaa pɩmɛ Babɩlɔŋ tinteeŋ lɛ Keba fuo-la niiŋ. Nɩmɛ nɛ La TƖƖNA doluŋ kʋ jʋʋmɛ.

⁴ Ŋɩɩ nɛ mɩ beŋ a na pel-duoŋ sɩ du lɩɩ wɩɩpɔsʋŋ nagʋa dɩɩrɩŋ kʋkɔ, taŋ lɩlɩgɩsɛ duoŋ-bɩlɩmbaaŋ-bal kʋbala tʋɔŋ, ka pʋlʋmʋŋ golli ʋ kala. Nyiŋ-la sɩɩ lɩgɩsɛ tʋtʋɔbaanɩŋ fɩɛsɛ a nagɛ hɔɔŋ sɩ hɛ nyiniŋ lɛ.

⁵ Nyiŋ-la tʋɔŋ, mɩ na kɩaa banɛsɛ sɩ weye a nagɛ nuhuobiine.

⁶ Ama kɩalɩŋ kʋŋkala kɛŋ sɩaa banɛsɛ ba sɛsɩŋ lɛ, a kɛŋ kɩŋkɛnsɩŋ ma banɛsɛ.

⁷ Ba naasɩŋ fa ŋaa tegi tegi nɛ, ba naachɛyɛɛ ma nagɛ nɛ-bie kɩaa, a tʋtʋl a nagɛ kɔlɩɩŋ.

⁸ Ba kɩŋkɛnsɩŋ bʋbʋɔŋ, ba sɛsɩŋ banɛsɛ-la lɛ ba kɛŋ nɩsaa nɛ ba nagɛ nuhuobiine kɩaa. Kɩalɩŋ kʋŋkala fa kɛŋ sɩaa nɛ ba sɛsɩŋ banɛsɛ-la lɛ arɩ kɩŋkɛnsɩŋ ma banɛsɛ.

⁹ Ba kɩŋkɛnsɩ-la fa tɩgɛ dɔŋɔ lɛ nɛ. Ba kala faa vɛŋ nɛ tegi tegi, ba bɩ bɩrɩmɛ.

¹⁰ Kɩalɩŋ kʋŋkala fa kɛŋ sɩaa sɩ bɩ dɔŋɔba naga banɛsɛ nɛ: Sɛmɛ dɔŋɔ sɩaa nagɛ nuhuobiine sɩaa a hɛ sɩpaaŋ, sɛmɛ dɔŋɔ ma sɩaa nagɛ naachigiŋ sɩaa a hɛ nadiiŋ, sɛmɛ dɔŋɔ ma sɩaa nagɛ nɛ-bele sɩaa a hɛ nagʋa, ka sɛmɛ dɔŋɔ ma sɩaa nagɛ kachuuŋ sɩaa a hɛ harɩŋ.

¹¹ Ba sɩaa nagɩŋ nɛ fa ŋɩɩ. Ba kɩŋkɛnsɩŋ balɩa balɩa fa je wɩa-nyuŋ nɛ, ba niipinee mʋ tɩgɛ dɔŋɔ lɛ, ka ba kɛŋ kɩŋkɛnsɩ-la balɩa balɩa ma kaa tɔ ba yaraa.

¹² Kɩalɩŋ kʋŋkala ka vɛŋ tegi tegi nɛ. Lee na-kala ba dɩma sɩɩ mʋ, ba yie mʋ nɩmɛ nɛ, ba bɩ gɛbɛ.

¹³ Kɩalɩŋ sɩ weye fa fɩɛsa nɛ a nagɛ nyiŋ-halaa koo tʋʋ-diiri kapɩlaa nyiniŋ. Nyiniŋ faa villi kɩalɩŋ pɛgɛ nɛ, a pʋllɛ woruŋ aŋ lɩlɩgɩsɛ a nagɛ taŋ sɩɩ lɩgɩsʋ.

¹⁴ Kɩalɩŋ yie faasa fá mʋ sɩpaaŋ aŋ kʋkɔ harɩŋ a nagɛ taŋ sɩɩ lɩgɩsʋ.

¹⁵ Mɩ fa sɩɩ beŋ kɩalɩŋ sɩ weye ŋɩɩ, mɩ na dɩ gɩrɩŋgɩrɩŋ hɛ ba kʋŋkala sɛsɩ-la banɛsɛ sɩ kɛŋ sɩaa lɛ a didigi tinteeŋ.

¹⁶ Ŋ-la nɛ gɩrɩŋgɩrɩmba-la banɛsɛ fa nagɛ: Ba kala fa nagɛ dɔŋɔ nɛ, aŋ tʋtʋl a nagɛ tabɩɩ-zɔŋ kʋbala baa yɩrɛ kirisola, ba fa ŋaaba ba gɩrɩgɛ dɔŋɔ lɛ nɛ.

¹⁷ Dɩ gɩrɩŋgɩrɩmba-la nɩɩ vɛŋ, lee na-kala kɩalɩŋ sɩaa sɩ chaasa nɛ ba ma yie chaasɛ, ba bɩ bɩrɩmɛ.

¹⁸ Gɩrɩŋgɩrɩmba-la niipinee fa sii jeje nɛ a kɛŋ fawʋllʋŋ. Ba fa kɛŋ sɩaa nɛ a golli.

¹⁹ Dɩ kɩalɩŋ sɩ weye nɩɩ vɛŋ, gɩrɩŋgɩrɩmba-la sɩ hɛ ba sɛsɩŋ lɛ ma yie vɩvɛŋ nɛ. Dɩ ba nɛ sii tinteeŋ, gɩrɩŋgɩrɩmba-la ma yie sii nɛ.

²⁰ Lee na-kala ba dɩma-la sɩɩ mʋ, ba ma yie mʋ nɛ, gɩrɩŋgɩrɩmba-la ma tuto, bɛɛ wɩaa kɩalɩŋ sɩ weye dɩma-la fa hɛ gɩrɩŋgɩrɩmba-la lɛ nɛ.

²¹ Bʋa na-kala dɩ kɩalɩŋ nɩɩ vɛŋ koo a chɩŋ, koo dɩ ba sii wɩa-nyuŋ nɛ, gɩrɩŋgɩrɩmba-la ma yie ŋaa ŋɩɩ tɩtɩa nɛ, bɛɛ wɩaa kɩalɩŋ sɩ weye dɩma-la fa hɛ gɩrɩŋgɩrɩmba-la lɛ nɛ.

²² Kɩalɩŋ sɩ weye nyuŋ, kʋŋ nɛ fa chugilo a nagɛ wɩa-nyuŋ a tʋtʋl a nagɛ lɩɩŋ sɩ faasa fɩɛlɛ a gulimi a kɛŋ fawʋllʋŋ.

²³ Kʋ-la sɩ chugili ba nyuŋ a nagɛ wɩa-nyuŋ, ʋ bʋbʋɔŋ ba kɛŋ ba kɩŋkɛnsɩŋ balɩa balɩa je a chaasɛ dɔŋɔ, aŋ kɛŋ kɩŋkɛnsɩŋ balɩa balɩa ma tɔ ba yaraa.

²⁴ Kɩalɩŋ fa sɩ file, mɩ nɩɩ ba kɩŋkɛnsɩŋ dɔmɔ, baa huuru a nagɛ lɩɩŋ sɩ faasa pɛllɛ a dʋdɔŋ nɛ, a bɩra nagɛ Wɩa doluŋ kala Tɩɩna yikoro, a bɩra nagɛ laalɩyuoroo sɩ yʋga a ŋɩŋaa goŋ. Dɩ ba nɛ chɩna, ba yie kɛŋ ba kɩŋkɛnsɩŋ kaa tuu nɛ.

²⁵ Ba sɩ chɩna ŋɩɩ, mɩ nɩɩ kʋŋ dɔmɔ sɩ lɩɩ kʋ-la sɩ nagɛ wɩa-nyuŋ a chugili kɩalɩŋ sɩ weye nyuŋ.

²⁶ Kʋ-la sɩ nagɛ wɩa-nyuŋ a chugili kɩalɩŋ sɩ weye nyuŋ ma nyuŋ, kʋŋ kʋbala chɩŋ a nagɛ kuoru kpasa ba sɩ kɛŋ tabɩɩ kʋbala sɩ nagɛ diibelimbine a tʋtʋl a ŋaa, ka kʋŋ hɔŋ kuoru kpasa-la nyuŋ a nagɛ nuhuobiine.

²⁷ Mɩ na a chɩŋ kʋ-la tɩŋa lɛ a kaa jɩl fɩɛsa nɛ a nagɛ hɔɔŋ sɩ hɛ nyiniŋ lɛ, a chɩŋ ʋ tɩŋa ma kaa tuu nagɛ nyiŋgeliŋ. Pʋlʋŋ fɩrɩtɩtɩ kʋbala nɛ fa golli kʋ-la.

²⁸ Duoŋ-sɩa sɩ yie nagɛ ŋɩɩ duoŋ-bɩlɩmbaanaa tʋɔŋ, ŋɩɩ nɛ tʋla ma fa nagɛ a golli kʋ-la. Pʋlʋŋ-la sɩ dagɛ La TƖƖNA tʋla nɛ ŋɩɩ. Mɩ fa sɩ naʋ, mɩ kɛŋ sɩaa chu tinteeŋ, aŋ nɩɩ nʋʋ sɩɩ bʋl wɩaa.