MOSIS KƐŊ IZIRAL TƖŊŊAA LƖƖ 6 - WƖA TENIŊ

¹ Ŋɩɩ nɛ La TƖƖNA bʋla pɩ Mosis, “Lɛɛlɛ ŋ jaŋ na wɩɩ-la mɩ sɩ jaŋ ŋaa Ijipiti tinteeŋ kuoro lɛ. Mɩ jaŋ fʋgʋ dɩ ʋ leŋ dɩ mɩ nɩaa mʋ. Mɩ jaŋ fʋgʋ dɩ ʋ kiriba dɩ ba lɩɩ ʋ tinteeŋ lɛ.”

² Ŋɩɩ nɛ Wɩa bɩra bʋla pɩ Mosis, “Mɩ nɛ ma TƖƖNA.

³ Mɩ kɛŋ mɩ tɩtɩa dagɛ Abɩraham, Aɩzɩk arɩ Jekɔb arɩ mɩ nɛ Wɩa doluŋ kala Tɩɩna, ama mɩ bɩ leŋe ba jɩŋ arɩ mɩ yɩrɩŋ nɛ ‘ma TƖƖNA.’

⁴ Mɩ hɛ niiŋ mɩ dɩ ba pɛgɛ nɛ arɩ mɩ jaŋ joŋ Kɛnaŋ tintee-la lɛ ba sɩ hɔnɔ a ŋaa nʋhʋɔra pɩba.

⁵ Ŋɩɩ harɩŋ lɛ, mɩ nɩɩ Iziral tɩŋŋaa bunso nɛ, Ijipiti tɩŋŋaa sɩ kɛmba bɩrɩmɛ yosuŋ. Ŋɩɩ nɛ mɩ liise yi nii-la sɩ hɛ mɩ dɩ ba pɛgɛ.

⁶ Ŋɩɩ wɩaa, bʋla pɩ Iziral tɩŋŋaa: ‘Mɩ nɛ ŋaa Wɩa, ma TƖƖNA, mɩ jaŋ lɩɩsɛma hɛɛ-la ma sɩɩ na Ijipiti tɩŋŋaa nɩsɩŋ lɛ. Mɩ jaŋ laama ta arɩ mɩ doluŋ, dɩ ma bɩra sɩ́ yosi ŋaa. Mɩ jaŋ dɔgɩsɛ Ijipiti tɩŋŋaa.

⁷ Mɩ jaŋ jomma dɩ ma ŋaa mɩ nɩaa, ka dɩ mɩ ŋaa ma Wɩa. Ŋɩɩ nɛ ma jaŋ jɩŋ arɩ mɩ nɛ ma Wɩa, ma TƖƖNA, Wɩa-la sɩ laama ta hɛɛ-la ma fa sɩɩ na Ijipiti tɩŋŋaa nɩsɩŋ lɛ.

⁸ Mɩ jaŋ kɛmma mʋ tintee-la mɩ sɩ chaasa hɛ niiŋ arɩ mɩ jaŋ joŋo pɩ Abɩraham, Aɩzɩk, arɩ Jekɔb. Mɩ jaŋ joŋo pɩma dɩ ʋ ŋaa ma kʋŋ. Mɩ-na ma TƖƖNA nɛ bʋla.’ ”

⁹ Ŋɩɩ nɛ Mosis bʋl wɩaa deemba kala La TƖƖNA sɩ bʋla pʋ a pɩ Iziral tɩŋŋaa. Ama ba bɩ jegile nɩɩ, bɛɛ wɩaa ba nandaasɩŋ fa yʋɔra nɛ a tɩŋ hɛɛ-la ba sɩɩ na Ijipiti tɩŋŋaa nɩsɩŋ lɛ.

¹⁰ Ŋɩɩ nɛ La TƖƖNA bʋla pɩ Mosis,

¹¹ “Mʋ bʋla pɩ Ijipiti tinteeŋ kuoro dɩ ʋ leŋ dɩ Iziral tɩŋŋaa lɩɩ ʋ tinteeŋ lɛ.”

¹² Ŋɩɩ nɛ Mosis bʋla pɩ La TƖƖNA, “Mɩ sɩ paala bʋl wɩaa Iziral tɩŋŋaa teeŋ, ba bɩ jegile nɩɩ mɩ teeŋ, ɛɛ nɛ saa Ijipiti tinteeŋ kuoro-na jaŋ jegile nɩɩ mɩ teeŋ? Mɩ paala bɩ wɩaa bʋlʋŋ jɩŋ woruŋ.”

¹³ Ŋɩɩ nɛ Wɩa bʋla pɩ Mosis arɩ Arɔŋ dɩ ba mʋ Ijipiti tinteeŋ kuoro teeŋ a bʋla pʋ dɩ ʋ leŋ dɩ Iziral tɩŋŋaa lɩɩ Ijipiti tinteeŋ lɛ.

Mosis arɩ Arɔŋ doho nɩaa

¹⁴ Rubiŋ, Jekɔb bii-hɩaŋ kɛŋ hambolibiisiŋ banɛsɛ nɛ: Hanɔk, Pallu, Hɛzɩrɔŋ arɩ Kaamɩ. Rubiŋ doho nɩaa nɛ ŋɩɩ.

¹⁵ Simioŋ ma kɛŋ hambolibiisiŋ balɩdʋ nɛ: Jɛmʋɛl, Jamɩŋ, Ohad, Jakɩŋ, Zoha arɩ Sawʋl. Sawʋl naaŋ ŋaa Kɛnaŋ tɩŋŋaa tolo nɛ. Simioŋ ma doho nɩaa nɛ ŋɩɩ.

¹⁶ Levi ma kɛŋ hambolibiisiŋ batori nɛ, ba yɩraa nɛ Gɛsɔŋ, Kohaf arɩ Mɛrarɩ. Levi fa ŋaa jɩsɩŋ zɔlɔ arɩ mara arɩ fii arɩ balɩpɛ nɛ aŋ sʋʋ.

¹⁷ Gɛsɔŋ ma lʋl hambolibiisiŋ balɩa nɛ: Libini arɩ Sɩmɛɩ. Ba kʋŋkala kɛŋ doho nɩaa nɛ.

¹⁸ Kohaf ma hambolibiisiŋ nɛ Amɩram, Iziha, Hɛbʋrɔŋ arɩ Ʋzɩɛl. Kohaf fa ŋaa jɩsɩŋ zɔlɔ arɩ mara arɩ fii arɩ batori nɛ aŋ sʋʋ.

¹⁹ Mɛrarɩ ma hambolibiisiŋ nɛ Mali arɩ Musi. Levi doho nɩaa nɛ ŋɩɩ.

²⁰ Amɩram nɛ jaa ʋ nyɩmma dɩ-haala Jochebed a lʋl Arɔŋ arɩ Mosis. Amɩram fa ŋaa jɩsɩŋ zɔlɔ arɩ mara arɩ fii arɩ balɩpɛ nɛ aŋ-na sʋʋ.

²¹ Iziha ma hambolibiisiŋ nɛ: Kora, Nɛfɛg arɩ Zikiri.

²² Ʋzɩɛl ma hambolibiisiŋ nɛ Mɩsɩɛl, Ɛlɩzafaŋ arɩ Sɩtɩrɩ.

²³ Arɔŋ nɛ jaa Eliseba, Amɩnadab tolo. Eliseba ŋaa Nasɔŋ dɩhaala nɛ. Nasɔŋ nɛ lʋl Nadab, Abihu, Elieza arɩ Ɩtama.

²⁴ Kora ma hambolibiisiŋ nɛ: Asɛɛ, Ɛlɩkaana arɩ Abɩasaf. Kora doho nɩaa nɛ ŋɩɩ.

²⁵ Arɔŋ nanʋala Elieza jaa Pʋtɩɛl tolo dɔŋɔ nɛ ʋ lʋl Finihas. Levi doho arɩ ba nɩhɩasɩŋ nɛ ŋɩɩ.

²⁶ Arɔŋ arɩ Mosis deeŋ tɩtɩa nɛ La TƖƖNA bʋla pa, “Má kɛŋ Iziral tɩŋŋaa doho doho kʋ lɩɩ Ijipiti tinteeŋ lɛ.”

²⁷ Ba nɛ bɩra bʋla pɩ Ijipiti tinteeŋ kuoro arɩ ʋ leŋ dɩ Iziral tɩŋŋaa lɩɩ Ijipiti tinteeŋ lɛ.

Wɩa sɩ bʋl wɩɩ-la a pɩ Mosis arɩ Arɔŋ

²⁸ Wɩa sɩ bʋl wɩaa pɩ Mosis Ijipiti tinteeŋ lɛ,

²⁹ ʋ sɩ, “Mɩ nɛ ŋaa ma Tɩɩna. Mʋ́ bʋl wɩalɩŋ kala mɩ sɩ bʋla pɩŋ a pɩ Ijipiti tinteeŋ kuoro.”

³⁰ Ama Mosis bʋla pɩ La TƖƖNA, “Ŋ jɩma mɩ bɩ wɩaa bʋlʋŋ jɩŋ, Ijipiti tinteeŋ kuoro bɩ jaŋ jegile nɩɩ mɩ teeŋ.”