MOSIS KƐŊ IZIRAL TƖŊŊAA LƖƖ 5 - WƖA TENIŊ

Mosis arɩ Arɔŋ mʋ Ijipiti tinteeŋ kuoro sɩpaaŋ

¹ Ŋɩɩ harɩŋ Mosis arɩ Arɔŋ mʋ Ijipiti tinteeŋ kuoro teeŋ a bʋla pʋ, “Wɩɩ-la La TƖƖNA Iziral tɩŋŋaa Wɩa sɩ bʋla nɛ ŋ-la, ‘Pɩ mɩ nɩaa wombiiŋ dɩ ba mʋ a gbiele pɩmɛ tintee-hɩlɩŋ lɛ.’ ”

² Ŋɩɩ nɛ Ijipiti tinteeŋ kuoro pɩɛsɛ, “Kʋbɛɛ nɛ ŋaa ma TƖƖNA, aa chɛ dɩ mɩ sɛɩ ʋ niiŋ, a leŋ dɩ ma mʋ? Mɩ bɩ ma TƖƖNA jɩŋ, mɩ bɩ jaŋ leŋ dɩ Iziral tɩŋŋaa mʋ.”

³ Ŋɩɩ nɛ Mosis arɩ Arɔŋ bɩra bʋl, “Hiburu tɩŋŋaa Wɩa nɛ kɛŋ ʋ tɩtɩa dagɛla. Ŋɩɩ wɩaa, leŋ dɩ la vɛŋ wombiiŋ tapʋlaa batori a jʋʋ tintee-hɩlɩŋ tʋɔŋ a kpʋ pʋsʋŋ a ŋaa Wɩɩsʋlʋŋ pɩ La TƖƖNA Wɩa. Dɩ ŋɩɩ dee, ʋ jaŋ joŋ nyanyal bɔŋŋɔɔ hɛ la lɛ koo dɩ ʋ kpʋla.”

⁴ Ŋɩɩ nɛ Ijipiti tinteeŋ kuoro pɩɛsɛ Mosis arɩ Arɔŋ, “Bɛɛ nɛ tɩɩ maa chɛ dɩ nɩalɩŋ leŋ ba tɩntɩŋŋaa? Má mɩɩra mʋ ma tɩntɩŋŋaa.”

⁵ Ŋɩɩ nɛ Ijipiti tinteeŋ kuoro bʋl, “Lɛɛlɛ nɩalɩŋ yʋga nɛ aŋ ka ma bɩ chɛ dɩ ba faasa tɩŋ.”

⁶ Tapʋlɩɩ-la tɩtɩa nɛ Ijipiti tinteeŋ kuoro bʋla pɩ nɩalɩŋ sɩ fʋgɛ Iziral tɩŋŋaa ba tɩtɩŋ yoŋ tɩntɩŋŋaa arɩ nɩalɩŋ sɩɩ beŋ tɩntɩmɩa-la,

⁷ “Lɛɛlɛ má bɩra sɩ́ nɩalɩŋ viri-yaŋ pa dɩ ba hɛ tɩɛrɩŋ lɛ a pɛɛsɛ tiebiee, má leŋ dɩ ba tɩtɩa mʋ chɛ.

⁸ Ama, má leŋ dɩ ba pɛɛsɛ tiebiee magɛ ŋɩɩ ba fa sɩ vɛnɛɛ pɛɛsɛ. Ba ŋaa yarɩ-wɩɩ tɩmma nɛ. Ŋɩɩ nɛ tɩɩ ba ŋɩŋaa goŋ a bʋl, ‘Má leŋ dɩ la mʋ a ŋaa Wɩɩsʋlʋŋ a pɩ la Wɩa.’

⁹ Má leŋ dɩ nɩalɩŋ faasa tɩŋ a kɩɩ ŋɩɩ ba fa sɩɩ tɩŋ, a sɩ́ wombiiŋ na a chɩnaa nɩɩ wʋnyɩɛrɩŋ.”

¹⁰ Ŋɩɩ nɛ nɩalɩŋ sɩɩ beŋ tɩntɩmɩa-la arɩ nɩalɩŋ sɩ fʋgɛba ba tɩtɩŋ kʋ lɩɩ bʋla pɩ Iziral tɩŋŋaa, “Ijipiti tinteeŋ kuoro sɩ, la bɩra sɩ́ ma viri-yaŋ pa nɛ dɩ ma kaa pɛɛsɛ tiebiee.

¹¹ Má mʋ chɛ ma tɩtɩa viri-yaŋ, lee-la kala ma sɩ jaŋ naba, ama la bɩ jaŋ keri tɩntɩmɩɩ-la ma sɩ vɛnɛ tɩmaa magɛ ŋɩɩ ta.”

¹² Ŋɩɩ nɛ nɩalɩŋ pɩsɛ Ijipiti tinteeŋ kala lɛ a gɔllɔ chɩchɛ viri-yaŋ.

¹³ Ŋɩɩ nɛ nɩalɩŋ sɩ fʋgɛba ba tɩtɩŋ yoŋ tɩntɩŋŋaa bʋl, “Má dɛrɛ tɩntɩmɩɩ-la ma sɩ maga dɩ ma tɩŋ tapʋlɩɩ kala, arɩ la fa sɩ pɩma viri-yaŋ ma tɩmaa magɛ ŋɩɩ.”

¹⁴ Ŋɩɩ nɛ nɩalɩŋ sɩ fʋgɛba ba tɩtɩŋ yoŋ tɩntɩŋŋaa ŋmuŋmoo Iziral tɩmma-la ba ma sɩ lɩɩsa dɩ ba bibeŋ tɩntɩnnaa, aŋ pɩɛsɛba, “Bɛɛ nɛ tɩɩ ma bɩ tiebiee pɛɛsɛ jɩnɩŋ a magɛ ŋɩɩ ma sɩ vɛnɛɛ pɛɛsɛ?”

¹⁵ Ŋɩɩ nɛ Iziral tɩmma-la sɩɩ beŋ tɩntɩnna-la mʋ yele pɩ Ijipiti tinteeŋ kuoro, “Bɛɛ nɛ tɩɩ ŋ dʋdɔgɩsɛ la ŋ-la?

¹⁶ Ba bɩ la viri-yaŋ pa aŋ kpɩkpɩa la lɛ, ‘Má pɩpɛɛsɛ tiebiee,’ aŋ pɛ vɩvɩɩrɛla. Ŋ nɩaa nɛ ŋaa chei.”

¹⁷ Ŋɩɩ nɛ Ijipiti tinteeŋ kuoro bʋl, “Ma kɛŋ yarɩ-wɩɩŋ, ŋɩɩ nɛ tɩɩ ma bʋbʋl arɩ mɩ leŋ dɩ ma mʋ a kpʋ pʋsʋŋ a ŋaa Wɩɩsʋlʋŋ pɩ ma TƖƖNA.

¹⁸ Má mɩɩra mʋ ma tɩntɩŋŋaa, nʋʋkala bɩ jaŋ pɩma viri-yaŋ. Ama ma ha maga ma pɛɛsɛ tiebiee magɛ ŋɩɩ ma sɩ vɛnɛɛ pɛɛsɛ nɛ.”

¹⁹ Ŋɩɩ nɛ Iziral tɩmma-la sɩɩ beŋ tɩntɩnna-la jɩŋ arɩ wɩɩŋ jʋʋba nɛ, arɩ ba sɩsɩ, “Má bɩ maga dɩ ma lɩɩsɛ tiebiee magɛ ŋɩɩ ma sɩ vɛnɛɛ pɛɛsɛ a ta.”

²⁰ Ba sɩ sii Ijipiti tinteeŋ kuoro sɩpaaŋ, baa mʋ dɩ Mosis arɩ Arɔŋ hɔnɔ gbɩgbɛrɛba.

²¹ Ŋɩɩ nɛ ba bʋla pɩ Mosis arɩ Arɔŋ, “La TƖƖNA na wɩɩ-la ma sɩ ŋaa nɛ, ʋ jaŋ dɔgɩsɛma. Ma leŋe Ijipiti tinteeŋ kuoro arɩ ʋ nɩhɩasɩŋ bɛrɛla nɛ a joŋ dʋndɔnnʋŋ hɛ la pɛgɛ dɩ ba kpʋla.”

Wɩa sɩ ʋ jaŋ laa Iziral tɩŋŋaa ta

²² Ŋɩɩ nɛ Mosis sʋl Wɩa a bʋl, “Ou mɩ Tɩɩna, bɛɛ nɛ tɩɩ ŋ joŋ hɛɛŋ deeŋ hɛ nɩaa deemba lɛ? Ŋ-la wɩaa nɛ ŋ tɩmmɛ daha?

²³ Bʋa-la kala lɛ ŋ sɩ tɩmmɛ Ijipiti tinteeŋ kuoro teeŋ ŋ yɩrɩŋ lɛ, ʋ dɔgɩsɛ nɩaa deemba nɛ, ka ŋ bɩ wɩɩkala ŋaa dɩ ŋ laaba ta.”