MOSIS KƐŊ IZIRAL TƖŊŊAA LƖƖ 4 - WƖA TENIŊ

Wɩa pɩ Mosis doluŋ

¹ Ŋɩɩ nɛ Mosis bʋla pɩ Wɩa, “Ka dɩ Iziral tɩŋŋaa nɛ bɩ mɩ laa dii, a bɩ wɩɩ-la mɩ sɩ bʋla jegile nɩɩ, bɛɛ nɛ mɩ jaŋ ŋaa dɩ ba nɛ sɩ, ‘La TƖƖNA bɩ ʋ tɩtɩa kaa dagɩŋ?’ ”

² Ŋɩɩ nɛ La TƖƖNA pɩɛsʋ, “Bɛɛ kʋŋ nɛ ŋ kori ŋɩɩ?” Ŋɩɩ nɛ Mosis bʋl, “Dantɩga nɛ.”

³ Ŋɩɩ nɛ La TƖƖNA bʋl, “Joŋo lo tinteeŋ.” Mosis joŋo lo tinteeŋ, daa-la bɩrɩmɛ dɩmɩŋ, ʋ fá aŋ leŋu.

⁴ La TƖƖNA bʋla pɩ Mosis, “Mʋ kɛŋ dɩŋ-la bʋbʋɔ-doho lɛ a kaa joŋ.” Ŋɩɩ nɛ Mosis mʋ kɛŋ dɩŋ-la bʋbʋɔ-doho lɛ a joŋ, ʋ bɩrɩmɛ dantɩga ʋ nɩsɩŋ lɛ.

⁵ Ŋɩɩ nɛ La TƖƖNA bʋl, “Ŋ-la nɛ jaŋ leŋ dɩ Iziral tɩŋŋaa laa dii arɩ ba naabalɩmaba Abɩraham, Aɩzɩk arɩ Jekɔb Wɩa nɛ kɛŋ ʋ tɩtɩa kʋ dagɩŋ.”

⁶ La TƖƖNA bɩra bʋla pɩ Mosis, “Joŋ ŋ nɩsɩŋ a hɛ ŋ gɛrɩŋ bʋbʋɔŋ.” Mosis joŋo hɛ, ʋ kaa lɩɩsɛ dɩ ʋ keri gbege aŋ pʋllɛ taŋ taŋ.

⁷ Ŋɩɩ nɛ La TƖƖNA bʋla pʋ, “Joŋ ŋ nɩsɩŋ bɩra hɛ ŋ gɛrɩŋ bʋbʋɔŋ.” Ʋ joŋo hɛ, ʋ kaa lɩɩsɛ dɩ ʋ nagɛ ʋ yaraa sɩ nagɛ ŋɩɩ.

⁸ La TƖƖNA bɩra bʋl, “Dɩ ba nɛ bɩ wʋmagɩl-la ŋ sɩ laa sɩpaaŋ ŋaa laa dii koo a jegili ŋ teeŋ, lɩamɩŋ lɛ ba jaŋ laa dii.

⁹ Dɩ wʋmagɩlaa deemba balɩa nɛ ba bɩ laa dii koo a bɩ ŋ teeŋ jegile, ŋaa lɩɩŋ fuo-la ba sɩɩ yɩrɛ Naayɩl lɛ a bɩsa ta tintee-hɩlɩŋ lɛ, ʋ jaŋ bɩrɩmɛ chalɩŋ.”

¹⁰ Ŋɩɩ nɛ Mosis bʋla pɩ La TƖƖNA, “Mɩ TƖƖNA, mɩ-na ŋ tɩntɩnna, mɩ bɩ wʋbʋllʋ ŋaa, a lɩɩ bʋa-la kala lɛ ŋ sɩ suomo bʋl wɩaa mɩ teeŋ arɩ lɛɛlɛ kala. Mɩ nandelimiŋ yuŋŋie arɩ wɩaa bʋlʋŋ.”

¹¹ Ŋɩɩ nɛ La TƖƖNA pɩɛsʋ, “Kʋbɛɛ nɛ ŋaa nuhuobiine niiŋ ʋ kaa bʋl wɩaa? Kʋbɛɛ nɛ ŋaa taŋɩŋ? Kʋbɛɛ nɛ ŋaa nuhuobiine sɩaa ʋ nɩna koo a leŋ ʋ nyʋlɩmɛ? Mɩ-na ma TƖƖNA dee bɩ wɩaa deemba kala ka ŋaa?

¹² Ŋɩɩ wɩaa, mʋ, mɩ jaŋ pɛ ŋ lɛ a dagɩŋ wɩɩ-la ŋ sɩ jaŋ bʋl.”

¹³ Ŋɩɩ nɛ Mosis bʋl, “Mɩ TƖƖNA, mɩɩ sʋlʋŋ mɩɩra tɩŋ nʋʋ dɔŋ.”

¹⁴ Ŋɩɩ nɛ La TƖƖNA Wɩa na baanɩŋ woruŋ Mosis nyuŋ a pɩɛsʋ, “Ka ŋ naambie Arɔŋ, Levi tɩɩna-la? Mɩ jɩma ʋ jaŋ wuo bʋl wɩaa woruŋ. Ʋ paala hɛ wombiiŋ lɛ nɛ aa kɔ ŋ teeŋ dɩ ʋ naŋ. Dɩ ʋ nɛ saa naŋ, ʋ tʋɔŋ jaŋ tɔrɛ.

¹⁵ Ŋ jaŋ bʋl wɩaa pʋ dɩ ʋ laa bʋl. Mɩ jaŋ pɛ ma kala balɩa lɛ dɩ ma bʋl wɩaa a dagɛma wɩɩ-la ma sɩ jaŋ ŋaa.

¹⁶ Arɔŋ jaŋ laa ŋ niiŋ wɩaa bʋlaa pɩ nɩalɩŋ, ŋ ma Mosis jaŋ chɩŋ mɩ-na Wɩa naasɩŋ lɛ aa dagʋ wɩɩ-la sɩ maga dɩ ʋ bʋl.

¹⁷ Kɛŋ dantɩga deeŋ ŋ sɩ koro kaa mʋ, ŋ jaŋ kɛnʋ ŋaa wʋmagɩlaa.”

Mosis mɩɩra mʋ Ijipiti tinteeŋ

¹⁸ Ŋɩɩ nɛ Mosis mɩɩra mʋ ʋ hɩɩlɩ-baala Jeturo teeŋ a bʋla pʋ, “Mɩɩ sʋlʋŋ, leŋ dɩ mɩ mɩɩra mʋ Ijipiti tinteeŋ a na mɩ naambiiriŋ Iziral tɩŋŋaa ha hɛ ba mɩɩsɩŋ lɛ nɛɛ.” Ŋɩɩ nɛ Jeturo bʋl, “Ŋ jaŋ mʋ woruŋ.”

¹⁹ La TƖƖNA fa bʋla pɩ Mosis Midiaŋ tinteeŋ lɛ, “Mɩɩra mʋ Ijipiti tinteeŋ, nɩalɩŋ kala fa sɩɩ chɛ dɩ ba kpʋŋ sʋba nɛ.”

²⁰ Ŋɩɩ nɛ Mosis sii kɛŋ ʋ haala arɩ ʋ hambolibiisiŋ a hɛ kakumo lɛ a mʋmʋ Ijipiti tinteeŋ aŋ pɛ joŋ dantɩga-la Wɩa sɩ sɩ ʋ joŋ.

²¹ Ŋɩɩ nɛ Wɩa bʋla pɩ Mosis, “Dɩ ŋ nɛ mʋ Ijipiti tinteeŋ, ŋaa wʋmagɩla-la kala mɩ sɩ pɩŋ doluŋ dɩ ŋ ŋaa Ijipiti tinteeŋ kuoro sɩpaaŋ. Ama mɩ jaŋ ŋaa dɩ ʋ tʋɔŋ pɩrɛ, ʋ bɩ jaŋ leŋ dɩ mɩ nɩaa lɩɩ mʋ.

²² Dɩ ŋ nɛ mʋa, bʋla pɩ Ijipiti tinteeŋ kuoro arɩ La TƖƖNA Wɩa sɩ, ‘Iziral tɩŋŋaa nagɛ mɩ hambolibii bumbuŋ nɛ.

²³ Mɩ bʋla pɩŋ arɩ ŋ leŋ dɩ mɩ nanʋala mʋ a na wombiiŋ chʋɔlɛmɛ, ama ŋ vɩa nɛ, ŋɩɩ wɩaa mɩ jaŋ kpʋ ŋ hambolibii bumbuŋ.’ ”

²⁴ Ʋ ŋɩɩ harɩŋ lɛ nɛ Mosis mʋmʋ Ijipiti tinteeŋ a mʋ yi lee kʋbala a chʋa nɩmɛ. La TƖƖNA chemu a ŋaa wɩaa nagɛ ʋʋ chɛ ʋ kpʋʋ.

²⁵ Ŋɩɩ nɛ Mosis haala Zipora joŋ tabɩɩŋ sɩ kɛŋ niiŋ a keri ʋ nanʋala peniŋ a kɛŋ chalɩŋ taa Mosis naasɩŋ aŋ bʋl, “Lɛɛlɛ mɩ dɩ ŋ chalɩŋ ŋaa kʋbala nɛ.”

²⁶ Ŋɩɩ nɛ La TƖƖNA bɩ Mosis kpʋa. Zipora bʋl, “A tɩŋ bile peniŋ keriŋ wɩaa mɩ dɩŋ chalɩŋ ŋaa kʋbala nɛ.”

²⁷ Ŋɩɩ nɛ La TƖƖNA bʋla pɩ Arɔŋ, “Jʋʋ tintee-hɩlɩŋ tʋɔŋ a cheŋ Mosis.” Ŋɩɩ nɛ ʋ mʋ chemu Wɩa peeliŋ nyuŋ a guoru.

²⁸ Mosis bʋl wɩalɩŋ kala La TƖƖNA sɩ bʋla pʋ a pɩ Arɔŋ, arɩ wʋmagɩla-la kala Wɩa sɩ dagʋ dɩ ʋ ŋaa.

²⁹ Ŋɩɩ nɛ Mosis arɩ Arɔŋ mʋ Ijipiti tinteeŋ a yɩrɛ Iziral tɩŋŋaa nɩhɩasɩŋ a hilimi.

³⁰ Arɔŋ bʋl wɩalɩŋ kala Wɩa sɩ bʋla pɩ Mosis a pɩba, ŋɩɩ nɛ Mosis ŋaa wʋmagɩla-la Wɩa sɩ dagʋ nɩalɩŋ sɩpaaŋ.

³¹ Ŋɩɩ nɛ nɩalɩŋ laa dii. Ba sɩ nɩa dɩ La TƖƖNA na ba hɛɛ-la ba sɩɩ na Ijipiti tinteeŋ lɛ a chɩl ba wɩaa, ŋɩɩ nɛ ba kɛŋ ba nyusuŋ chugili a chʋɔlɛ Wɩa.