MOSIS KƐŊ IZIRAL TƖŊŊAA LƖƖ 37 - WƖA TENIŊ

Wɩa niiriŋ daga-la

¹ Ŋɩɩ nɛ Bɛzalɛl kɛŋ sɔjaamɩŋ daaŋ a ŋaa Wɩa niiriŋ daga. Ʋ duomuŋ ŋaa naakieli-bala arɩ mʋa, ka ʋ jalɩŋ ŋaa naakieliŋ kpaa magɛ dɔŋɔ arɩ mʋa, ʋ leŋiŋ ma ŋaa naakieliŋ kpaa magɛ dɔŋɔ arɩ mʋa.

² Ʋ kɛŋ sɛlɩmɛ sɩ chaasa zɔŋ nɛ a taarɛ ʋ tʋɔŋ arɩ ʋ harɩŋ kala, a kɛŋ sɛlɩmɛ-la mɛ giriŋ a golli Wɩa niiriŋ daga-la kala.

³ Ʋ libi sɛlɩmɛ nenii-pɩraa banɛsɛ nɛ a joŋo hɛ daga-la naasɩŋ lɛ. Balɩa hɛ sɛmɛ dɔŋɔ, balɩa ma hɛ sɛmɛ dɔŋɔ.

⁴ Ʋ keri sɔjaamɩŋ daaterigeba nɛ a kɛŋ sɛlɩmɛ taarɛba.

⁵ Ŋɩɩ nɛ ʋ joŋ daaterigeba-la a tʋʋ nenii-pɩra-la sɩ hɛ daga-la sɛsɩŋ lɛ a kaa jujoŋ daga-la.

⁶ Ʋ kɛŋ sɛlɩmɛ sɩ chaasa zɔŋ nɛ a ŋaa Wɩa niiriŋ daga-la nii-tɔlɔ. Ʋ duomuŋ ŋaa naakiel bala arɩ mʋa, ʋ jalɩŋ ma ŋaa naakieliŋ kpaa magɛ dɔŋɔ arɩ mʋa.

⁷ Ŋɩɩ nɛ ʋ kɛŋ sɛlɩmɛ a libi kɩaa balɩa ba nagɛ Wɩa tɩndaara a kɛŋ kɩŋkɛnsɩŋ, a mɛrɛ daga-la nii-tɔlɔ lɛ.

⁸ Dɔŋɔ hɛ sɛmɛ dɔŋɔ, dɔŋɔ ma hɛ sɛmɛ dɔŋɔ, ba dɩ daga-la nii-tɔlɔ kala mɛrɛ dɔŋɔ lɛ.

⁹ Ʋ ŋaa kɩalɩŋ ba kɛŋ kɩŋkɛnsɩŋ jɛrɛ a tɔ Wɩa niiriŋ daga-la. Ka ba sɩaa chaasɛ dɔŋɔ a bibeŋ daga-la nii-tɔlɔ.

Wɩa dɩ-zɔŋ-la teebʋl

¹⁰ Ŋɩɩ nɛ Bɛzalɛl kɛŋ sɔjaamɩŋ daaŋ a ŋaa teebʋl, ʋ duomuŋ ŋaa naakiel bala, ʋ jalɩŋ ma ŋaa naakieliŋ kpaa magɛ dɔŋɔ. Ka ʋ leŋiŋ ma ŋaa naakieliŋ kpaa magɛ dɔŋɔ arɩ mʋa.

¹¹ Ʋ kɛŋ sɛlɩmɛ sɩ chaasa zɔŋ taarɛ teebʋl-la kala aŋ kɛŋ sɛlɩmɛ mɛ giriŋ golli.

¹² Ʋ ŋaa giriŋ, ʋ jalɩŋ magɛ nachala a kɛŋ sɛlɩmɛ biere golli.

¹³ Ŋɩɩ nɛ ba kɛŋ sɛlɩmɛ libi nenii-pɩraa banɛsɛ hɛ teebʋl-la gʋnaa banɛsɛ-la lɛ naasɩŋ leriŋ.

¹⁴ Ba joŋ nenii-pɩra-la hɛ a kpagɛ giri-la nɛ, ba chaga kɛŋ daaterigeba-la ba sɩ kaa joŋ teebʋl-la.

¹⁵ Daaterigeba-la ba sɩ kaa jujoŋ teebʋl-la ŋaa sɔjaamɩŋ daasɩŋ nɛ, ba kɛŋ sɛlɩmɛ taarɛ ba kala.

¹⁶ Ŋɩɩ nɛ ba kɛŋ sɛlɩmɛ sɩ chaasa zɔŋ libi teebʋl-la nyuŋ tɩntɩnnɩ kɩaa: pɩrataba, hɛntɛrɛɛ, gbansɩŋ arɩ tagɩsɩŋ ba sɩ jaŋ kaa ta lɩɩŋ.

Chaaŋ-daaŋ

¹⁷ Ŋɩɩ nɛ ba kɛŋ sɛlɩmɛ sɩ chaasa zɔŋ libi chaaŋ-daaŋ, ʋ bʋbʋɔ-chɛlɛ arɩ ʋ nyuŋ kerikee, ba libi nyʋnyʋalʋsʋŋ sɩ nagɛ tɩɩ-lugoo arɩ tɩɩfɩɩlaa sɩ pɔsɔ a hɛ kerike-la lɛ ba kala mɛrɛ dɔŋɔ a ŋaa kʋbala.

¹⁸ Chaaŋ-daa-la kɛŋ kerikee balɩdʋ nɛ, batori hɛ sɛmɛ dɔŋɔ, batori ma hɛ sɛmɛ dɔŋɔ.

¹⁹ Ŋɩɩ nɛ ba libi nyʋnyʋalʋsʋŋ batori ba nagɛ fʋfʋl nɛnɛɛ sɩ pɔsɔ a hɛ keriki kala lɛ. Ba libi nyʋnyʋalʋsʋŋ deemba doho a hɛ kerike-la kala balɩdʋ sɩ mɛrɛ chaaŋ-daaŋ lɛ nɛ.

²⁰ Ba bɩra libi nyʋnyʋalʋsʋ-la doho banɛsɛ a hɛ chaaŋ-daaŋ tʋtʋɔbaanɩŋ daaŋ lɛ.

²¹ Ba libi nyʋnyʋalʋsʋ-la sɩ nagɛ fʋfʋl nɛnɛɛ sɩ pɔsɔ a hɛ chaaŋ-daa-la kerikee balɩdʋ lɛ nɛ. Kerikee balɩa na-kala pɛgɛ kʋbala hɛ nɩmɛ.

²² Sɛlɩmɛ tɩtɩa nɛ ba kaa libi kerike-la arɩ nyʋnyʋalʋsʋ-la sɩ nagɛ fʋfʋl nɛnɛɛ sɩ pɔsɔ, ba kala mɛrɛ dɔŋɔ.

²³ Ŋɩɩ nɛ ba kɛŋ sɛlɩmɛ sɩ chaasa zɔŋ a libi chaanaa balɩpɛ, a ŋaa kɩalɩŋ ba sɩ kaa dɩdɩsɛ chaanɩa-la arɩ ba tʋɔrʋŋ pɩrataba.

²⁴ Ŋɩɩ nɛ ba magɩsɛ sɛlɩmɛ yuŋuŋ sɩ ŋaa kilo mara arɩ fii arɩ banɔŋ a kaa libi chaaŋ-daaŋ arɩ ʋ tɩntɩnnɩ kɩaa kala.

Kʋsʋɔrʋsʋŋ koruŋ

²⁵ Ba kɛŋ sɔjaamɩŋ daaŋ nɛ a ŋaa Wɩɩsʋllɩ koruŋ ba sɩ jaŋ nyɩnyɩgɛ kʋsʋɔrʋsʋŋ a pɩpɩ Wɩa, ʋ kɛŋ gʋnaa banɛsɛ. Ʋ duomuŋ ŋaa naakieliŋ kpaa magɛ dɔŋɔ, ʋ jalɩŋ ma ŋaa naakieliŋ kpaa magɛ dɔŋɔ, ka ʋ leŋiŋ ŋaa naakiel bala, ba ŋaa nyilliŋ hɛ.

²⁶ Ŋɩɩ nɛ ba kɛŋ sɛlɩmɛ sɩ chaasa zɔŋ a taarɛ koru-la sɛsɩŋ, ʋ nyuŋ arɩ ʋ nyilliŋ aŋ kɛŋ sɛlɩmɛ-la tɩtɩa mɛ giriŋ golli koru-la kala.

²⁷ Ba libi sɛlɩmɛ nenii-pɩraa balɩa a hɛ giri-la bʋbʋɔŋ, koru-la sɛsɩŋ balɩa-la kala lɛ dɩ ba chagɛ daaterigeba-la ba sɩ kaa jujoŋ koru-la kɩɩ.

²⁸ Daaterigeba-la ŋaa sɔjaamɩŋ daasɩŋ nɛ, ba kɛŋ sɛlɩmɛ taara tɔ ba kala.

²⁹ Ŋɩɩ nɛ ba ŋaa Wɩɩsʋllɩ nʋʋŋ arɩ kʋsʋɔrʋsʋŋ sʋɔra sɩ sɩma. Tʋlaalɩɩ ŋaara nɛ ŋaa.