MOSIS KƐŊ IZIRAL TƖŊŊAA LƖƖ 35 - WƖA TENIŊ

Chɛ-wiesii-la wombiee

¹ Mosis sii yɩrɛ Iziral tɩŋŋaa kala hɛ dɔŋɔ a bʋla pɩba, “Wɩaa deemba nɛ La TƖƖNA dagɛ dɩ ma ŋaa:

² Tapʋlaa balɩdʋ nɛ ma jaŋ tɩtɩŋ ma tɩntɩŋŋaa. Ama chɛ-pɛɩ chɛɛŋ ŋaa tapʋl-zɔŋ nɛ a pɩma, a ŋaa chɛ-wiesii a pɩ La TƖƖNA ma. Dɩ nʋʋkala nɛ tɩŋ tɩntɩŋŋaa chɛɛ-la, ʋ maga dɩ ma kpʋʋ nɛ.

³ Ma pɔ má sɩ́ nyiniŋ hɛ ma dɩhɔnʋŋ kala chɛ-wiesii-la chɛɛŋ.”

Kɩalɩŋ ba sɩ jaŋ kaa ŋaa Wɩa dɩ-zɔŋ-la

⁴ Ŋɩɩ nɛ Mosis bʋla pɩ Iziral tɩŋŋaa kala, “Wɩɩŋ deeŋ nɛ La TƖƖNA dagɛ, ʋ sɩ:

⁵ Ma dʋa tʋɔŋ, má lɩɩsɛ dɔnsʋŋ a kaa kʋ ŋaa Wɩɩsʋlʋŋ pɩ mɩ-na ma TƖƖNA. Nɩɩ-la kala sɩ cho dɩ ʋ ŋaa Wɩɩsʋlɩɩ-la, ʋ jaŋ wuo kɛŋ sɛlɩmɛ, hɔpʋla, kɔlɩɩŋ,

⁶ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ, gɛrɩpɛ fʋfʋlʋŋ, bʋ-pʋnaa,

⁷ pie-bel tenniŋ ba sɩ hɛ biriŋ ʋ fɩɛsɛ arɩ lɩɩ-nɛŋ tenniŋ arɩ sɔjaamɩŋ daaŋ,

⁸ chaanaa nʋʋŋ, arɩ tegisi-la ba sɩ jaŋ kaa ŋaa Wɩɩsʋllɩ nʋʋŋ arɩ tegisi-la ba sɩ jaŋ kaa ŋaa kʋsʋɔrʋsʋŋ sʋɔra sɩ sɩma,

⁹ tabɩɩ-tʋlaa ba sɩɩ yɩrɛ ɔnɩs arɩ tabɩɩ-zɔŋŋɔɔ dɔnsʋŋ ba sɩ jaŋ joŋo hɛ gɛrɩ-laala-daŋɩɩ-la arɩ bɔɩ-tɔɔrɩ gɛrɩ-la lɛ.

¹⁰ Jɩma tɩŋŋaa kala sɩ hɛ ma tʋɔŋ maga dɩ ba kɔ a ŋaa wɩalɩŋ kala mɩ-na ma TƖƖNA sɩ daga:

¹¹ Wɩa dɩ-zɔŋ-la arɩ gɛrɩpɛyɛ-la sɩ jaŋ tɔʋ, arɩ tenni-la sɩ jaŋ tɔ ʋ nyuŋ, ʋ jolluŋ, ʋ daapɛsɩŋ, ʋ daa-gɛsɛɛ, ʋ daa-doloo arɩ hɔɔtaalɩ-la nyuŋ daapɛsɩ-la sɩ jaŋ chɩŋ,

¹² Wɩa niiriŋ daga arɩ daaterigeba arɩ ʋ nii-tɔlɔ, arɩ patɩɩsaŋ-la sɩ kɛrʋ,

¹³ teebʋl-la arɩ ʋ daaterigeba arɩ ʋ nyuŋ tɩntɩnnɩ kɩaa arɩ kʋdiile-la sɩɩ chɩŋ La TƖƖNA sɩpaaŋ,

¹⁴ chaaŋ daaŋ, arɩ ʋ nyuŋ tɩntɩnnɩ kɩaa arɩ chaana-la arɩ ba nʋʋŋ,

¹⁵ koru-la nyuŋ ba sɩɩ nyɩgɛ kʋsʋɔrʋsʋŋ arɩ ʋ daaterigeba arɩ Wɩɩsʋllɩ nʋʋŋ arɩ kʋsʋɔrʋsʋŋ sʋɔra sɩ sɩma arɩ patɩɩsaŋ-la sɩ jaŋ tɔ Wɩa dɩ-zɔŋ-la boiŋ niiŋ,

¹⁶ kʋnyɩgaa Wɩɩsʋlʋŋ koruŋ arɩ kʋ-la ba sɩ kɛŋ kɔlɩɩŋ ŋaa ʋ kɛŋ bʋɔsʋŋ a nagɛ nanchɛbɩrɩ kʋa a tagɩlɛ ʋ tʋɔŋ, ʋ daaterigeba arɩ ʋ nyuŋ tɩntɩnnɩ kɩaa, kɔlɩɩŋ taasɩ-gbaŋ-bal-la arɩ kʋ-la nyuŋ ʋ sɩ chɩna,

¹⁷ patɩɩsamba-la ba sɩ kaa kɛrɛ golli lɛbɩ-la lɛ La TƖƖNA sɩ yie kɔ Iziral tɩŋŋaa teeŋ arɩ ʋ daapɛsɩŋ arɩ ʋ hɔ-taalɩsɩŋ, a pɛ lɩga-la boiŋ niiŋ patɩɩsaŋ lɛ,

¹⁸ Wɩa dɩ-zɔŋ-la daapɛ-biisiŋ, arɩ daapɛsɩ-la lɛ lɩga-la patɩɩsaŋ ŋmɛsɩŋ sɩ jaŋ vɔɔ,

¹⁹ gɛnnɩ-la ba sɩ laala tɩtɩŋ Wɩa tɩntɩŋŋaa, kɩalɩŋ Arɔŋ sɩ jaŋ laalɛ a ŋaa Wɩɩsʋllɩ sɩpaalaara arɩ kɩalɩŋ ʋ hambolibiisiŋ sɩ jaŋ laalɛ a tɩtɩŋ Wɩɩsʋllɩ sɩpaalaaraa tɩntɩŋŋaa.”

²⁰ Ŋɩɩ nɛ Iziral tɩŋŋaa kala sii Mosis sɩpaaŋ a viiri.

²¹ Ba sɩ mɩɩra kɔ, nɩalɩŋ tʋɔbɩɩnaa sɩ suo, arɩ nɩɩ-la na kala sɩ kɛŋ tʋɔpʋla suomo kɛŋ Wɩɩsʋllɩ kɩaa kʋʋ pɩ La TƖƖNA, dɩ ba laa kaa ŋaa lɛbɩ-la lɛ La TƖƖNA sɩ yie kɔ Iziral tɩŋŋaa teeŋ, aŋ pɛ kaa tɩŋ ʋ tɩntɩŋŋaa aŋ pɛ kaa yɛrɛ Wɩa tɩntɩŋŋaa gɛnnɩ-la sɩ kɛŋ yɩrɩŋ ma.

²² Baalaa arɩ haala-la kala tʋɔbɩɩnaa sɩ suo kɛŋ sɛlɩmɛ kpɩɛraa deemba kɔ: dɩgɩlɩŋ-kpɛnsɩŋ, banzɔlɔba, nanjɔlɔba, nenii-pɩraa arɩ kɩalɩŋ dɔnsʋŋ ba sɩ kaa kpɩɛrɛ ba tɩtɩa. Nʋʋkala kɛŋ ʋ kɩaa kʋ ŋaa Wɩɩsʋlʋŋ a pɩ La TƖƖNA.

²³ Nɩalɩŋ kala sɩ kɛŋ ŋmɛŋ-diibelimbine, koo ŋmɛŋ-vachalɩŋ koo ŋmɛŋ-fɩaŋ koo gɛrɩpɛ fʋfʋlʋŋ, koo bʋ-pʋnaa, pie-bel tenniŋ ba sɩ hɛ biriŋ ba fɩɛsɛ koo lɩɩ-nɛŋ tenniŋ kaa kɔ.

²⁴ Nɩalɩŋ kala sɩ kɛŋ hɔpʋla koo kɔlɩɩŋ kaa kʋ ŋaa Wɩɩsʋlʋŋ a pɩ La TƖƖNA. Nɩalɩŋ ma sɩ kɛŋ sɔjaamɩŋ daasɩŋ ba sɩ jaŋ wuo kaa tɩŋ tɩntɩmɩɩ-la ma kaa kɔ.

²⁵ Haala-la ma kala sɩ jɩŋ gɛrɩ-ŋmɛnɩŋ koo gɛnnɩŋ yuonuŋ ma kɛŋ ŋmɛŋ-diibelimbine koo ŋmɛŋ-vachalɩŋ koo ŋmɛŋ-fɩaŋ koo gɛrɩpɛ fʋfʋlʋŋ kaa kʋ pɩ La TƖƖNA.

²⁶ Haala-la dɔnsʋŋ ma kala tʋɔbɩɩnaa sɩ suo aŋ kɛŋ jɩma kɛŋ bʋ-pʋnaa ŋaa gɛnnɩŋ.

²⁷ Sɩpaalaara-la ma kɛŋ tabɩɩ-tʋlaa ba sɩɩ yɩrɛ ɔnɩs, arɩ tabɩɩ-zɔŋŋɔɔ dɔnsʋŋ ba sɩ jaŋ joŋo hɛ gɛrɩ-laala-daŋɩɩ-la arɩ bɔɩ-tɔɔrɩ gɛrɩ-la lɛ kɔ.

²⁸ Ba pɛ kɛŋ tegisiŋ dɔnsʋŋ arɩ nʋʋŋ ba sɩ jaŋ kaa nyɩgɛ chaanaa arɩ tegisiŋ ba sɩ jaŋ kaa ŋaa Wɩɩsʋllɩ nʋʋŋ arɩ kʋsʋɔrʋsʋŋ sʋɔra sɩ sɩma kaa kɔ.

²⁹ Iziral tɩŋŋaa baalaa arɩ haala-la kala tʋɔbɩɩnaa sɩ suo kɛŋ tʋɔtɔrɛ Wɩɩsʋlʋŋ kɩaa kʋ pɩ La TƖƖNA, dɩ Mosis laa a kaa tɩŋ tɩntɩmɩɩ-la La TƖƖNA sɩ dagʋ.

Bɛzalɛl arɩ Oholiab

³⁰ Ŋɩɩ nɛ Mosis bʋla pɩ Iziral tɩŋŋaa, “Má bee na, La TƖƖNA lɩɩsɛ Uri nanʋala Bɛzalɛl nɛ, Huu sɩ ŋaa Juda doho nʋʋ nihiŋ.

³¹ Ʋ joŋ ʋ Dɩma hɛ ʋ lɛ nɛ ʋ kɛŋ jɩma, doluŋ arɩ wʋjɩmɩŋ a jɩŋ nɩsɩŋ tɩntɩŋŋaa kala tɩmɩŋ,

³² dɩ ʋ wuo kɛŋ jɩma-la a kɛŋ sɛlɩmɛ, hɔpʋla arɩ kɔlɩɩŋ a kaa libi kɩaa,

³³ dɩ ʋ jɩŋ tabɩaa yɛrɩŋ arɩ ba kaa tɩmɩŋ, a jɩŋ daasɩŋ tɩntɩŋŋaa a wuo tɩŋ gɔgɔ tɩntɩmɩɩ kala.

³⁴ La TƖƖNA joŋ nɩaa dagɩŋ jɩma a pɩ Bɛzalɛl arɩ Oholiab nɛ. Oholiab nyɩmma nɛ Ahɩsama a ŋaa Daŋ doho nʋʋ.

³⁵ Ʋ joŋ wʋjɩmɩŋ pɩba nɛ ba jɩŋ nɩsɩŋ tɩntɩmɩɩ kala, a jɩŋ ŋmɛŋ-mʋɔlaa, ŋmɛŋ-vachalɩŋ, ŋmɛŋ-fɩɛsɩŋ arɩ gɛrɩpɛ-fʋfʋlaa yuonuŋ wɩɩkala, dɩ ba nɛ ŋaa gɔgɔ wɩɩkala nɩhɩasɩŋ.