MOSIS KƐŊ IZIRAL TƖŊŊAA LƖƖ 33 - WƖA TENIŊ

¹ Ŋɩɩ nɛ La TƖƖNA bʋla pɩ Mosis, “Sii daha, ŋ dɩ nɩalɩŋ ŋ sɩ kaa lɩɩ Ijipiti tinteeŋ lɛ, a mʋ tintee-la mɩ sɩ chaasa hɛ niiŋ pɩ Abɩraham arɩ Aɩzɩk arɩ Jekɔb arɩ mɩ jaŋ joŋo pɩ ba doho nɩaa.

² Mɩ jaŋ leŋ dɩ mɩ tɩndaara laa ma sɩpaaŋ a yuo kiri Kɛnaŋ tɩŋŋaa, Amɔrɩ tɩŋŋaa, Hiti tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa.

³ Má mʋ tintee-la sɩ sɩma a kɛŋ kɩaa, ama mɩ dɩ ma bɩ jaŋ to dɔŋɔ mʋ nɩmɛ, bɛɛ wɩaa ma ŋaa nɩa sɩ bɩ dagɩŋ ka nɩɩ nɛ. Ma jaŋ wuo ŋaa wɩɩ cheimi wombiiŋ lɛ dɩ mɩ kpʋma.”

⁴ Nɩalɩŋ sɩ nɩɩ wʋlɔrʋŋ deeŋ, ba suomo yiyel, nʋʋkala bɩ ʋ tɩtɩa kpɩɛra,

⁵ bɛɛ wɩaa La TƖƖNA fa bʋla pɩ Mosis, “Bʋla pɩ Iziral tɩŋŋaa arɩ ba ŋaa nɩaa sɩ bɩ dagɩŋ ka nɩɩ nɛ, dɩ mɩ dɩ ba nɛ fa to dɔŋɔ mʋ, magɛ ŋ-la mɩ fa kpʋba. Lɛɛlɛ leŋ ba wuri kpɩɛra-la kala sɩ hɛ ba yaraa lɛ, ka dɩ mɩ na wɩɩ-la mɩ sɩ jaŋ ŋaa ba lɛ.”

⁶ Ŋɩɩ nɛ Iziral tɩŋŋaa wuri ba kpɩɛraa kala ta peel-la ba sɩɩ yɩrɛ Sɩnaɩ bʋbʋɔŋ.

Lɛbɩ-la lɛ La TƖƖNA fa sɩ yie kɔ Iziral tɩŋŋaa teeŋ

⁷ Mosis fa yie mʋ hɛ lɛbɩŋ ba dɩhɔnʋŋ harɩŋ dɩ-bolii a hɛ ʋ yɩrɩŋ, “Lɛbɩ-la lɛ La Tɩɩna sɩ yie kɔ Iziral tɩŋŋaa teeŋ.” Dɩ nʋʋkala nɩɩ chɛ dɩ ʋ chɛ na wɩɩ La TƖƖNA teeŋ, ʋ yie mʋ nɩmɛ nɛ.

⁸ Bʋa na-kala dɩ Mosis nɩɩ jʋʋ lɛbɩ-la lɛ La Tɩɩna sɩ yie kɔ Iziral tɩŋŋaa teeŋ, nʋʋkala yie sii chɩŋ ʋ lɛbɩŋ boiŋ niiŋ nɛ a bibeŋ Mosis ŋɩɩ ʋ mʋ jʋʋ lɛbɩ-la.

⁹ Dɩ Mosis nɛ jʋʋ lɛbɩ-la lɛ La Tɩɩna sɩ yie kɔ Iziral tɩŋŋaa teeŋ, duoŋ-bɩlɩmbaanɩŋ sɩ nagɛ jebiiŋ yie kʋ tuu chɩŋ lɛbɩ-la boiŋ niiŋ nɛ, ka La TƖƖNA bʋbʋl wɩaa Mosis teeŋ.

¹⁰ Bʋa na-kala dɩ nɩalɩŋ nɛ na duoŋ-bɩlɩmbaaŋ-la sɩ nagɛ jebiiŋ dɩ ʋ chɩŋ lɛbɩ-la boiŋ niiŋ, nʋʋkala yie sii chɩŋ ʋ lɛbɩŋ boiŋ niiŋ nɛ aa zil Wɩa.

¹¹ La TƖƖNA arɩ Mosis yie chaasɛ dɔŋɔ nɛ aŋ bʋbʋl wɩaa a nagɛ nʋʋ arɩ ʋ nandɔŋɔ sɩɩ bʋl wɩaa ŋɩɩ, dɩ ba nɛ dɛrɛ, Mosis yie mɩɩra mʋ ba dɩhɔnʋŋ nɛ, ka Nuŋ nanʋala Josua-na yie ka lɛbɩ-la tʋɔŋ. Josua fa ŋaa bapʋɔsɩ-bie nɛ a pɛ Mosis lɛ ba tɩtɩŋ.

Mosis arɩ La TƖƖNA tʋla

¹² Ŋɩɩ nɛ Mosis bʋla pɩ La TƖƖNA, “Ŋ bʋla pɩmɛ arɩ mɩ laa nɩaa deemba sɩpaaŋ a kɛmba mʋ tintee-la ŋ sɩɩ chɛ ŋ joŋo pɩba, ama ŋ bɩ leŋe mɩ jɩŋ mɩ dɩ nɩɩ-la ŋ sɩ jaŋ tɩŋ, aŋ bʋl ŋ jɩŋ mɩ yɩrɩŋ nɛ, dɩ ŋ tʋɔŋ tɔrɛ mɩ nyuŋ.

¹³ Lɛɛlɛ mɩɩ sʋlʋŋ, dɩ ŋ tʋɔŋ nɛ tɔrɛ mɩ nyuŋ, dagɛmɛ ŋ wombie-la dɩ mɩ wuo jɩmba, dɩ ŋ tʋɔŋ wasa tɔrɛ mɩ nyuŋ. Jɩŋ arɩ nɩaa deemba ŋaa ŋ nɩaa nɛ.”

¹⁴ Ŋɩɩ nɛ La TƖƖNA bʋla pɩ Mosis, “Mɩ jaŋ hɛ ŋ teeŋ lee na-kala ŋ sɩɩ mʋ, a leŋ dɩ ŋ na wiese.”

¹⁵ Ŋɩɩ nɛ Mosis bʋl, “Dɩ mɩ dɩŋ nɛ bɩ jaŋ to dɔŋɔ mʋ, sɩ́ leŋe dɩ la sii daha.

¹⁶ Wʋbɛɛ nɛ jaŋ dagɛ arɩ ŋ cho mɩ dɩ ŋ nɩaa nɛ dɩ la dɩŋ nɛ bɩ dɔŋɔ to mʋ? Wʋbɛɛ nɛ jaŋ dagɛ arɩ mɩ dɩ ŋ nɩaa ŋaa dabaŋ nɛ dʋnɩa nɩaa kala tʋɔŋ?”

¹⁷ Ŋɩɩ nɛ La TƖƖNA bʋla pɩ Mosis, “Wɩɩŋ deeŋ ŋ sɩ pɩɛsaa chɛ, mɩ jaŋ ŋaaʋ, bɛɛ wɩaa mɩ jɩmɩŋ nɛ, mɩ tʋɔŋ tɔrɛ ŋ nyuŋ.”

¹⁸ Ŋɩɩ nɛ Mosis bʋl, “Mɩɩ sʋlʋŋ, leŋ dɩ mɩ na ŋ tʋla.”

¹⁹ Ŋɩɩ nɛ La TƖƖNA bʋl, “Mɩ jaŋ leŋ dɩ mɩ tʋla laa ŋ sɩpaaŋ a heele yɩrɛ mɩ yɩrɩ-balɩŋ ‘La TƖƖNA’ ŋ sɩpaaŋ. Nɩalɩŋ mɩ sɩ lɩɩsa dɩ mɩ fá ba nenige, mɩ jaŋ fá ba nenige, nɩalɩŋ mɩ sɩ lɩɩsa dɩ mɩ fá ba nisusuŋ, mɩ jaŋ fá ba nisusuŋ.”

²⁰ La TƖƖNA bɩra bʋl, “Ŋ bɩ jaŋ wuo na mɩ sɩaa, dɩ nʋʋkala nɛ na mɩ sɩaa, ʋ jaŋ sʋʋ.”

²¹ Ŋɩɩ nɛ La TƖƖNA bɩra bʋl, “Na bʋŋ nɛ kpagɛmɛ ŋ-la, jɩla chɩŋ ʋ nyuŋ.

²² Dɩ mɩ nɛ to lee-la bɩbal arɩ mɩ tʋla, mɩ jaŋ joŋuŋ hɛ bʋŋ-la bʋa lɛ a kɛŋ mɩ nɩsɩŋ tɔŋ aŋ-na bal.

²³ Dɩ mɩ nɛ bala dɛrɛ, mɩ jaŋ kɛŋ mɩ nɩsɩŋ dʋɔrɛ ŋ lɛ, ka dɩ ŋ na mɩ harɩŋ, ama ŋ bɩ jaŋ wuo na mɩ sɩaa-na.”