MOSIS KƐŊ IZIRAL TƖŊŊAA LƖƖ 28 - WƖA TENIŊ

Wɩɩsʋllɩ sɩpaalaaraa gɛrɩ-laalaa

¹ Ŋɩɩ nɛ La TƖƖNA bʋla pɩ Mosis, “Kɛŋ ŋ naambie Arɔŋ arɩ ʋ hambolibiisiŋ Nadab, Abihu, Elieza arɩ Ɩtama lɩɩsɛ Iziral tɩŋŋaa tʋɔŋ, ba nɛ jaŋ ŋaa mɩ Wɩɩsʋllɩ sɩpaalaaraa.

² Yɛrɛ gɛnnɩŋ sɩ zɔmɔ a kɛŋ yɩrɩŋ a pɩ ŋ naambie Arɔŋ dɩ ʋ kaa tɩtɩŋ mɩ tɩntɩŋŋaa.

³ Bʋla pɩ nɩalɩŋ mɩ sɩ joŋ jɩma pa ba jɩŋ gɛnnɩŋ yɛrɩŋ, dɩ ba yɛrɛ gɛnnɩ-la dɩ ŋ joŋ Arɔŋ hɛ mɩ nɩsɩŋ lɛ dɩ ʋ ŋaa mɩ Wɩɩsʋllɩ sɩpaalaara.

⁴ Gɛnnɩ-la ba sɩ jaŋ yɛrɛ nɛ ŋ-la: Bɔɩ-tɔɔrɩ gɛrɩŋ, gɛrɩ-laala-daŋɩŋ, gɛrɩ-duduoŋ sɩ nagɛ diibelimbine a tuu magɛ naasolluŋ, gɛrɩ-pʋl-duduoŋ sɩ tuu magɛ naachɩgɩsɩŋ, nyu-bɛlɛ arɩ gɛrɩ-laala-daŋɩɩ-la gɛrɩpɛlɩɛɛ-bie, dɩ ŋ naambie Arɔŋ arɩ ʋ hambolibiisiŋ laalɛ a ŋaa mɩ Wɩɩsʋllɩ sɩpaalaaraa.

⁵ Ŋmɛŋ-sumunuŋ, ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ nɛ maga dɩ ba kaa yɛrɛba.

Gɛrɩ-laala-daŋɩŋ

⁶ Kɛŋ ŋmɛŋ-sumunuŋ, ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ a yuo gɛrɩ pɛɛŋ a yɛrɛ gɛrɩ-laala-daŋɩɩ-la ma. Leŋ dɩ gɔgɔ nɛ yuo a yɛrɛ.

⁷ Yɛrɛ jolluŋ balɩa hɛ gɛrɩ-laala-daŋɩɩ-la vaasɩŋ lɛ, dɩ ba wuo kɛŋ jollu-la vʋvɔɔ.

⁸ Ŋmɛŋ-la ŋ sɩ kaa yɛrɛ gɛrɩ-laala-daŋɩɩ-la nɛ ŋ jaŋ kaa yɛrɛ ʋ gɛrɩpɛ-bie ma a mɛrɛ.

⁹ Paa tabɩɩ-tʋlɩa-la ba sɩɩ yɩrɛ ɔnɩs balɩa a ŋmʋnsɛ Iziral biiri-la fii arɩ balɩa yɩraa hɛ ba lɛ.

¹⁰ Ŋmʋnsɛ balɩdʋ yɩraa hɛ dɔŋɔ lɛ, aŋ ŋmʋnsɛ kʋkaanaa balɩdʋ-la ma yɩraa hɛ dɔŋ-la ma lɛ, leŋ dɩ yɩra-la chɩŋ ba kʋhɩaŋ lɛ a kʋʋ tuu ba kʋbie.

¹¹ Leŋ dɩ nɩɩ-la sɩ kɛŋ jɩma arɩ tabɩaa kaa tɩmɩŋ ŋmʋnsɛ Iziral hambolibiisiŋ yɩraa hɛ tabɩa-la lɛ, a joŋo hɛ ba sɩ kɛŋ sɛlɩmɛ libi kʋ-taalɩsɩŋ balɩa a luri bʋɔsʋŋ balɩdʋ balɩdʋ a kɛŋ sɛlɩmɛ taarɛ.

¹² Joŋo vɔɔ mɛrɛ gɛrɩ-laala-daŋɩɩ-la vaasɩŋ lɛ. Tabɩa-la sɩ hɛ gɛrɩ-laala-daŋɩɩ-la vaasɩŋ lɛ jaŋ liliisi mɩ-na ma TƖƖNA Iziral tɩŋŋaa wɩaa, dɩ Arɔŋ nɛ laalʋ mʋ mɩ-na ma TƖƖNA sɩpaaŋ.

¹³ Kɛŋ sɛlɩmɛ libi kʋtaalɩsɩŋ balɩa a hɛ bʋɔsʋŋ.

¹⁴ Kɛŋ sɛlɩmɛ libi chɔrʋmɔɔ, dɩ ba nagɛ ŋmɛsɩŋ, dɩ ŋ joŋo vɔɔ a mɛrɛ sɛlɩmɛ kʋtaalɩsɩ-la lɛ.

Bɔɩ-tɔɔrɩ gɛrɩŋ

¹⁵ Kɛŋ gɛrɩpɛyɛ-la tɩtɩa ŋ sɩ kaa yɛrɛ gɛrɩ-laala-daŋɩɩ-la a yɛrɛ bɔɩ-tɔɔrɩ gɛrɩŋ ma, dɩ ba kaa jɩŋ wɩalɩŋ Wɩa sɩɩ chɛ. Leŋ dɩ gɔgɔ nɛ yɛrɛ.

¹⁶ Kaa kpeŋ bʋlɩa a yɛrʋ dɩ ʋ kɛŋ gʋnaa banɛsɛ, dɩ ʋ duomuŋ arɩ ʋ jalɩŋ kala ŋaa vama.

¹⁷ Paa tabɩɩ-zɔŋŋɔɔ kɩɛlɛ naaderee banɛsɛ bɔɩ-tɔɔrɩ gɛrɩ-la lɛ. Naaderi-bumbuŋ lɛ mɛrɛ tabɩaa deemba: ‘rubi’ a ŋaa tabɩɩ-fɩaŋ, ‘topas’ a ŋaa tabɩɩ-sumunuŋ arɩ ‘bɛrɛl’ a ŋaa tabɩɩ-jɔgɩlɩɩŋ.

¹⁸ Naaderi-lɩamɩŋ lɛ mɛrɛ tabɩaa deemba: ‘takʋa’ a ŋaa tabɩɩŋ sɩ nagɛ diibelimbine arɩ ‘safɩya,’ a ŋaa tabɩɩŋ sɩ faasa nagɛ diibelimbine arɩ ‘amɛral’ a ma ŋaa tabɩɩ-jɔgɩlɩɩŋ sɩ faasa biri.

¹⁹ Naaderi-torimuŋ lɛ, mɛrɛ tabɩaa deemba: ‘jasɩŋ’ ʋ ma ŋaa tabɩɩ-diibelimbine nɛ, ‘agɛtɩ’ a ŋaa tabɩɩ-tʋlʋŋ arɩ ‘amɛtɩs’ ʋ ma nagɛ diibelimbine nɛ.

²⁰ Naaderi-nɛsɩmɩŋ lɛ, mɛrɛ tabɩaa deemba: ‘kirisola’ a ŋaa tabɩɩ-sumunuŋ sɩɩ tʋl, ‘ɔnɩs’ a ŋaa tabɩɩ-jɔgɩlɩɩŋ sɩɩ tʋl arɩ ‘jasɩpa’ a ŋaa tabɩɩŋ sɩ fɩɛsa aŋ pɛ nagɛ sumunuŋ. Jomba hɛ ba sɩ kɛŋ sɛlɩmɛ libi kʋtaala-la a luri bʋɔsʋŋ lɛ, a taara tɔ.

²¹ Tabɩa-la jaŋ ŋaa fii arɩ balɩa, dɩ ŋ ŋmʋnsɛ Jekɔb hambolibiisi-la fii arɩ balɩa yɩraa hɛ, dɩ tabɩɩ na-kala chɩŋ doho kala nyuŋ lɛ.

²² Kɛŋ sɛlɩmɛ libi bɔɩ-tɔɔrɩ gɛrɩ-la chɔrʋmɔɔ dɩ ba nagɛ ŋmɛsɩŋ.

²³ Kɛŋ sɛlɩmɛ libi nenii-pɩraa balɩa a hɛ bɔɩ-tɔɔrɩ gɛrɩ-la gʋnaa balɩa lɛ.

²⁴ Kɛŋ sɛlɩmɛ chɔrʋmɔ-la sɩ nagɛ ŋmɛsɩŋ a vɔɔ mɛrɛ sɛlɩmɛ nenii-pɩra-la sɩ hɛ bɔɩ-tɔɔrɩ gɛrɩ-la gʋnaa lɛ,

²⁵ a kɛŋ sɛlɩmɛ chɔrʋmɔ-la niipiŋ-kaanaa jɩla vɔɔ mɛrɛ gɛrɩ-laala-daŋɩɩ-la vaasɩŋ jolluŋ lɛ sɩpaaŋ dɩɩrɩŋ.

²⁶ Ŋ jaŋ bɩra kɛŋ sɛlɩmɛ libi nenii-pɩraa balɩa a vɔɔ mɛrɛ bɔɩ-tɔɔrɩ gɛrɩ-la sɩɩ-bɔŋŋɔɔ gʋnaa balɩa-la sɩ tɩgɛ gɛrɩ-laala-daŋɩɩ-la lɛ.

²⁷ Bɩra libi sɛlɩmɛ nenii-pɩraa balɩa a mɛrɛ gɛrɩ-laala-daŋɩɩ-la tɩŋa dɩɩrɩŋ a kpagɛ gɛrɩ-laala-daŋɩɩ-la gɛrɩpɛlɩɛɛ-bie.

²⁸ Kɛŋ ŋmɛŋ-diibelimbine a vɔɔ gɛrɩ-laala-daŋɩɩ-la nenii-pɩraa arɩ bɔɩ-tɔɔrɩ gɛrɩ-la nenii-pɩraa a mɛrɛ dɔŋɔ lɛ, aŋ kɛŋ ŋmɛsɩ-la kiele tuu vɔɔ gɛrɩpɛlɩɛɛ-bie lɛ, dɩ bɔɩ-tɔɔrɩ gɛrɩ-la sɩ́ sʋʋsʋ, aŋ ka gɛrɩ-laala-daŋɩɩ-la.

²⁹ Arɔŋ maga dɩ ʋ laalɛ bɔɩ-tɔɔrɩ gɛrɩ-la lɛ Iziral hambolibiisiŋ yɩraa sɩ hɛ, ʋ kaa jɩjɩŋ wɩalɩŋ Wɩa sɩɩ chɛ, bʋa na-kala lɛ dɩ ʋ nɩɩ jʋʋ Wɩa dɩ-zɔŋ-la tʋɔŋ, dɩ mɩ-na ma TƖƖNA liliisi Iziral tɩŋŋaa wɩaa a kaa mʋ wuu.

³⁰ Joŋ kɩalɩŋ ba sɩɩ yɩrɛ Urim arɩ Tumim a hɛ bɔɩ-tɔɔrɩ gɛrɩ-la tʋɔŋ. Dɩ Arɔŋ nɛ laalʋ mʋ mɩ-na ma TƖƖNA sɩpaaŋ, dɩ kɩalɩŋ leŋ dɩ ʋ wuo dagɛ wɩalɩŋ Wɩa sɩɩ chɛ a pɩ Iziral tɩŋŋaa.

Wɩɩsʋllɩ sɩpaalaaraa gɛrɩ-laalaa dɔnsʋŋ

³¹ Kɛŋ gɛrɩpɛ diibelimbine a yɛrɛ gɛrɩ-duduoŋ-la sɩ tuu yi naasolluŋ.

³² Hɛ gɛrɩ-la baŋŋaa tʋtʋɔbaanɩŋ a sʋa ʋ kala golli, dɩ ʋ sɩ́ kɩɛsʋ.

³³ Kɛŋ ŋmɛŋ-diibelimbine, ŋmɛŋ-vachalɩŋ arɩ ŋmɛŋ-fɩaŋ a yɛrɛ kʋguguloo sɩ nagɛ kampoi nɛnɛɛ a hɛ gɛrɩ-la bʋbʋɔŋ niipinee lɛ a golli. Kɛŋ sɛlɩmɛ libi bimbelimee a yɛrɛ hɛ ba pɛgɩsɩŋ.

³⁴ Kʋgugulie-la sɩ nagɛ kampoi nɛnɛɛ arɩ sɛlɩmɛ bimbelime-la jaŋ chagɩsɛ chagɩsɛ a golli gɛrɩ-la niipinee.

³⁵ Arɔŋ maga dɩ ʋ laalɛ gɛrɩŋ deeŋ nɛ bʋa na-kala dɩ ʋ nɩɩ chɛ ʋ tɩŋ Wɩa tɩntɩŋŋaa, dɩ ʋ nɩɩ jʋʋ Wɩa dɩ-zɔŋ-la tʋɔŋ mɩ-na ma TƖƖNA sɩpaaŋ koo dɩ ʋ nɩɩ lɩɩ. Bimbelime-la sɩ hɛ gɛrɩ-la niipinee lɛ jaŋ dʋdɔŋ, dɩ ŋɩɩ leŋ ʋ sɩ́ sʋʋ.

³⁶ Ŋ jaŋ kɛŋ sɛlɩmɛ libi pɩrata a ŋmʋnsa hɛ ʋ lɛ a bʋl, ‘Ʋ ŋaa La TƖƖNA kʋzɔŋ nɛ.’

³⁷ Joŋ pɩrata-la a kɛŋ ŋmɛŋ-diibelimbine a vɔɔ mɛrɛ nyu-bɛlɛ-la sɩpaaŋ.

³⁸ Arɔŋ jaŋ joŋo vɔɔ ʋ tile lɛ, dɩ ŋɩɩ dagɛ dɩ Iziral tɩŋŋaa nɛ ŋaa wɩɩ chei a mʋʋ tɩgɛ ba Wɩɩsʋllɩ kɩaa lɛ, aŋ kaa mʋ La TƖƖNA sɩpaaŋ bʋa na-kala, ʋ ha jaŋ laa ba sʋla.

^39-40 Kɛŋ gɛrɩpɛ fʋfʋlʋŋ a yɛrɛ gɛrɩ-pʋl-duduoŋ-la sɩ tuu yi naachɛyɛɛ arɩ nyu-bɛlɛ, arɩ gɛrɩpɛlɩɛɛ-bie. Leŋ dɩ gɛrɩ-yɛrɩrɩ gɔgɔ nɛ sʋa gɛrɩpɛlɩɛɛ-bie-la pɩ Arɔŋ hambolibiisiŋ.

⁴¹ Joŋ gɛnnɩŋ deemba a laalɛ ŋ naambie Arɔŋ arɩ ʋ hambolibiisiŋ, aŋ joŋ Wɩɩsʋllɩ nʋʋŋ a sʋl Wɩa hɛ ba lɛ a jomba hɛ mɩ-na Wɩa nɩsɩŋ lɛ dɩ ba ŋaa Wɩɩsʋllɩ sɩpaalaaraa.

⁴² Kɛŋ gɛrɩpɛ fʋfʋlʋŋ a yɛrɛ kpuŋkpel-biisiŋ a pɩ Arɔŋ arɩ ʋ hambolibiisiŋ.

⁴³ Arɔŋ arɩ ʋ hambolibiisiŋ maga dɩ ba vɔɔ kpuŋkpelliŋ deemba nɛ, dɩ ba nɩɩ jʋʋ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ, koo dɩ ba nɩɩ jʋʋ Wɩa dɩ-zɔŋ-la tʋɔŋ koru-la teeŋ dɩ ba tɩŋ Wɩa tɩntɩŋŋaa, dɩ wʋbɔŋ sɩ́ ba lɛ ŋaa koo dɩ ba sɩ́ sʋʋ. Wɩɩŋ deeŋ maga dɩ ʋ chɩŋ nɛ a pɩ Arɔŋ arɩ ʋ doho nɩaa kala dɩ ba tuto a kaa mʋ wuu.