MOSIS KƐŊ IZIRAL TƖŊŊAA LƖƖ 23 - WƖA TENIŊ

Wʋtɩtɩɩ wombiee arɩ nɩaa nenige fánɩŋ

¹ Má pɔ ma sɩ́ wɩaa gɔllɔ nyɩnyɩa, má sɩ́ laa bʋla pɛ nɩɩ-la kɩaa sɩ bɩ sɩŋ lɛ.

² Dɩ nɩaa nɛ yʋga a ŋɩŋaa wɩɩ sɩ bɩ zɔŋ, sɩ́ ba lɛ pɛ. Dɩ ma nɛ mʋ sarɩya dɩ-diiliŋ dɩ nɩ-daŋ bʋbʋl wɩɩ, ka ba kɩaa bɩ sɩŋ, sɩ́ wʋtɩtɩɩ joŋo faa a tɩŋ nɩ-daŋ-la wɩaa.

³ Sɩ́ nʋʋ kɩaa sɩ bɩ sɩŋ lɛ pɛ a tɩŋ ʋ sɩ ŋaa summu wɩaa sarɩya dɩ-diiliŋ.

⁴ Dɩ ŋ dʋndɔmɔ kakumo koo ʋ nɛŋ nɛ lɛlɛ, dɩ ŋ naʋ, kɛŋ a kaa mʋ pʋ.

⁵ Dɩ ŋ dʋndɔmɔ kakumo nɛ tele a tɩŋ ʋ chʋgʋsʋŋ sɩ yuŋŋie wɩaa, sɩ́ kiele bal, mʋ pɛ a kɛnʋ chʋʋlɛ.

⁶ Sɩ́ summo harɩŋ lɩɩ a tɩŋ ʋ sɩ bɩ kʋŋ kɛnɛ wɩaa sarɩya dɩ-diiliŋ.

⁷ Má pɔ ma sɩ́ wɩaa nyɩɛ pɩ nɩaa. Má pɔ dɩ ma sɩ́ nɩɩ-la sɩ bɩ wɩɩ cheye kpʋ. Dɩ nʋʋ nɛ chei wɩɩ, mɩ bɩ jaŋ leŋu pɛɩ.

⁸ Dɩ nʋʋ nɛ kɛŋ kɩaa kɔ dɩ ʋ kpalma, má sɩ́ laa. Kpalaa nɛ yie leŋ ma joŋ wʋtɩtɩɩ faa aŋ kɛŋ wʋtɩtɩɩ bɩrɩmɛ wʋnyɩɛrɩŋ.

⁹ Má sɩ́ nɩwogusuŋ dɔgʋsʋ. Má jɩŋ ŋɩɩ ʋ sɩ naga nɛ dɩ ŋ nɛ ŋaa nʋhʋɔrʋ. Ma ma fa ŋaa nɩwogusuŋ nɛ Ijipiti tinteeŋ lɛ.

Chɛ-wiesii-la wɩaa

¹⁰ Jɩsɩŋ balɩdʋ tʋɔŋ má jaŋ duu kɩaa ma bagɩsɩŋ lɛ a ŋɩŋaa.

¹¹ Ama jɩ-pɛɩ-la lɛ, má sɩ́ kʋŋkala duu ma bagɩsɩŋ lɛ. Dɩ kʋŋ nɛ wasɛ nɩmɛ ma, má leŋe pɩ summoo arɩ baga kɩaa. Má sɩ́ tɩɩnɛnɛɛ arɩ kʋŋkala ŋaa ma bagɩsɩŋ lɛ.

¹² Tapʋlaa balɩdʋ nɛ ma jaŋ kaa tɩŋ ma tɩntɩŋŋaa aŋ wiesi tapʋl-pɛɩ chɛɛŋ. Ma nɛ-pɛrɛɛ, ma kakusuŋ, ma yoŋ-biiriŋ arɩ ma nʋhʋɔraa kala maga dɩ ba wiesi nɛ tapʋlʋŋ deeŋ.

¹³ Má jegile nɩɩ wɩalɩŋ kala mɩ-na ma TƖƖNA sɩ bʋla pɩma. Má pɔ dɩ ma sɩ́ vʋɩyaa kpaarʋ, a sɩ́ ba yɩrɩŋ yɩrʋ.

¹⁴ Má gbieli gbiele naansɩɩŋ butori jɩna na-kala tʋɔŋ a liliisi mɩ wɩaa.

¹⁵ Chɛnɛ-la ba sɩɩ yɩrɛ Abib tʋɔŋ, chɛnɛ-la lɛ mɩ sɩ kɛmma lɩɩ Ijipiti tinteeŋ lɛ, má gbieli gbiele-la ba sɩ yie gbieli a dii boroboro-la sɩ bɩ sɩbʋrʋŋ kɛnɛ. Tapʋlaa balɩpɛ ma jaŋ dii boroboro-la sɩ bɩ sɩbʋrʋŋ kɛnɛ arɩ mɩ sɩ dagɛma ŋɩɩ. Nʋʋkala pɔ dɩ ʋ sɩ́ mɩ sɩpaaŋ kɔ arɩ na-hɩllɩŋ.

¹⁶ Dɩ ma nɛ bumoo ŋaa ma baga kʋdii falaa, má gbieli gbiele-la ba sɩɩ yɩrɛ kʋdii falaa gbiele. Dɩ ma nɛ bɩra kʋ tɔrɛ ma tɩɩnɛnɛɛ, má bɩra gbieli gbiele-la ba sɩɩ yɩrɛ bagasieu gbiele.

¹⁷ Jɩna na-kala dɩ ma nɩɩ gbieli gbielee deemba batori, baalaa kala maga dɩ ba kɔ mɩ-na ma TƖƖNA Wɩɩjarɩbakɔ sɩpaaŋ nɛ a chʋɔlɛmɛ.

¹⁸ Dɩ ma nɛ kɛŋ pʋna chalɩŋ kaa kɔ dɩ ma ŋaa Wɩɩsʋlʋŋ, má pɔ dɩ ma sɩ́ boroboro-la sɩ kɛŋ sɩbʋrʋŋ to kaa kɔ, a sɩ́ leŋe dɩ pʋna-la ma sɩ kaa kʋ kpʋ pɩmɛ nʋʋŋ chɩna chʋa.

¹⁹ Má kɛŋ ma kʋdii falaa ma sɩ ŋaa kʋzɔŋŋɔɔ kaa kɔ mɩ-na ma TƖƖNA Wɩa dɩa a zilmi. Ma pɔ má sɩ́ bʋ-bie koo pie-bie joŋo hɛ ʋ naaŋ yɩlɩŋ lɛ a chɔ.

La TƖƖNA sɩ ʋ jaŋ laa Iziral tɩŋŋaa sɩpaaŋ

²⁰ Má bee na, mɩ jaŋ tɩŋ mɩ tɩndaara dɩ ʋ laa ma sɩpaaŋ a pɔma a kɛmma kaa mʋ lee-la mɩ sɩ wasa bil ma lɛ.

²¹ Má sɛɩ a tuto wɩɩ-la kala ʋ sɩ jaŋ bʋla pɩma. Má pɔ dɩ ma sɩ́ ʋ niiŋ wɩaa vɩa. Dɩ nʋʋkala nɛ vɩa ʋ niiŋ, ʋ bɩ jaŋ joŋo chɛ tɩɩna, bɛɛ wɩaa mɩ yɩrɩŋ nɛ ʋ kaa tɩŋ.

²² Dɩ ma nɛ jegili ʋ teeŋ woruŋ, a ŋaa wɩɩ-la kala mɩ sɩ dagɛma, ma dʋndɔŋŋɔɔ jaŋ ŋaa mɩ dʋndɔŋŋɔɔ, nɩɩ-la sɩ bɩ sɛyɛ pɩma, mɩ ma bɩ jaŋ sɛyɛ pʋ.

²³ Mɩ tɩndaara jaŋ laa ma sɩpaaŋ a kɛmma mʋ Amɔrɩ tɩŋŋaa, Hiti tɩŋŋaa, Pɛrɛs tɩŋŋaa, Kɛnaŋ tɩŋŋaa, Hivi tɩŋŋaa arɩ Jebus tɩŋŋaa tintee-la. Mɩ jaŋ chei ba kala.

²⁴ Má sɩ́ ba vesiŋ sɩpaaŋ kpirimi a kpaarɛba a to ba wʋŋaalaa lɛ. Má ŋmoo kɩalɩŋ kala ba sɩɩ kpaarʋ chei.

²⁵ Dɩ ma nɛ to mɩ-na ma TƖƖNA Wɩa, mɩ jaŋ pɛ ma lɛ dɩ ma na kʋdiilee arɩ lɩɩŋ, a pɔ dɩ nyanyalɩɩ kala sɩ́ ma kɛŋ.

²⁶ Ma tinteeŋ haal kala bɩ jaŋ chei ta koo a ŋaa hapɩrɛ. Nʋʋkala jaŋ kɛŋ mɩɩ-duduoŋ.

²⁷ Mɩ jaŋ leŋ dɩ fawʋllʋŋ kɛŋ tinteye-la nɩaa ma sɩ jaŋ mʋ cheŋ. Mɩ jaŋ leŋ dɩ ba wɩaa vʋgʋmɛ, dɩ ma dʋndɔŋŋɔɔ kala fá lɛl.

²⁸ Mɩ jaŋ leŋ dɩ kɛntɛrɩsɩŋ laa ma sɩpaaŋ a kiri Hivi tɩŋŋaa, Kɛnaŋ tɩŋŋaa arɩ Hiti tɩŋŋaa dɩ ma nɛ kʋʋ yiba.

²⁹ Mɩ bɩ jaŋ kiriba jɩ-bala pɛgɛ. Mɩ nɛ ŋaa ŋɩɩ, tintee-la jaŋ wuoli, dɩ baga-kɩaa pʋŋa yʋgɛ a wʋwalɩmɛma.

³⁰ Mɩ jaŋ kikiriba mʋa mʋa, a kʋ yi bʋa-la lɛ ma sɩ jaŋ pʋŋ a wuo su tintee-la kala.

³¹ Mɩ jaŋ dagɛ ma tinteeŋ bʋa pɩma, a chɩŋ mʋga-la ba sɩɩ yɩrɛ Mʋgʋ-fɩaŋ a kaa mʋ mʋgʋ-bal-la ba sɩɩ yɩrɛ Mediterenia, a bɩra chɩŋ tintee-hɩlɩɩ-la lɛ a kaa mʋ Yufireti fuo-la. Mɩ jaŋ joŋ nɩalɩŋ kala sɩ hɛ tinteeŋ deeŋ lɛ a hɛ ma nɩsɩŋ lɛ, dɩ ma kiriba aŋ laa lee-la.

³² Ma pɔ má sɩ́ nii kala hɛ arɩ ba, koo a ta niiŋ ba vesiŋ teeŋ.

³³ Má sɩ́ leŋe dɩ ba hɔŋ ma tinteeŋ lɛ, dɩ ŋɩɩ leŋ dɩ ma tuto ba vesiŋ a ŋaa wʋbɔŋŋɔɔ tɩgɛ mɩ lɛ. Ʋ ŋɩɩ jaŋ ŋaa bɛrɛ a pɩma.”