MOSIS KƐŊ IZIRAL TƖŊŊAA LƖƖ 22 - WƖA TENIŊ

Dʋa pɔnʋŋ

¹ Dɩ nʋʋ nɛ gaa nɛŋ koo piesu a yallɛ koo a kpʋ, dɩ ma kɛnʋ, nɛŋ-la chɩmɩŋ jaŋ ŋaa nɛsɩŋ banɔŋ. Dɩ piese ma nɛ, ʋ chɩmɩŋ jaŋ ŋaa piesee banɛsɛ.

² Dɩ gaara nɛ jʋʋ dɩa tɩtaŋɩŋ dɩ ʋ gaa nʋʋ kʋŋ dɩ ba kɛnʋ a ŋmobu dɩ ʋ to ŋɩɩ lɛ sʋʋ, tɩɩna sɩ ŋmobu bɩ wɩɩkala cheye.

³ Ama dɩ taŋ nɛ pʋla dɩ wɩa pɔsɔ puu gaarʋ-la, ka dɩ ba kpʋʋ, nɩɩ-la sɩ kpʋʋ jaŋ laa cheeriŋ. Gaarʋ-la maga dɩ ʋ tiŋ kɩalɩŋ ʋ sɩ gaa chɩmɩŋ nɛ. Dɩ ʋ nɛ bɩ kʋŋ kɛnɛ, ba jaŋ yallʋ a tiŋ nɩɩ-la kɩaa ʋ sɩ gaa.

⁴ Dɩ gaarɩ kɩalɩŋ nɛ ba na ʋ nɩsɩŋ lɛ dɩ ba ha weye, dɩ nɛŋ nɛ, ʋ maga dɩ ʋ tiŋ nɛsɩŋ balɩa, dɩ kakumo nɛ, ʋ maga dɩ ʋ tiŋ balɩa, dɩ piese ma nɛ, ʋ maga dɩ ʋ tiŋ balɩa.

⁵ Dɩ nʋʋ nɛ leŋe dɩ ʋ pʋsʋŋ mʋ dii nʋʋ baga kɩaa, ʋ maga dɩ ʋ keri ʋ baga dɩ-zɔmʋŋ nɛ a tiŋ nɩɩ-la kɩaa pʋsʋ-la sɩ die.

⁶ Dɩ nʋʋ nɛ nyɩgɛ nyiniŋ dɩ ʋ mʋ dii nʋʋ baga kɩaa, dɩ tɩɩna ta bil nɛ koo dɩ ba chɩna nɛ, ʋ maga dɩ ʋ tiŋ nɛ.

⁷ Dɩ nʋʋ nɛ sɛyɛ a laa ʋ dɔŋɔ moribiee koo chʋgʋsʋŋ bil, dɩ ba gaa kɩalɩŋ, dɩ ba nɛ kɛŋ gaarʋ-la, ʋ maga dɩ ʋ tiŋ kɩalɩŋ naansɩɩŋ bʋlɩa.

⁸ Ama dɩ ba nɛ bɩ gaarʋ-la kɛnɛ, nɩɩ-la sɩ laa kɩalɩŋ bil maga dɩ ʋ mʋ nɩalɩŋ sɩɩ dii sarɩya sɩpaaŋ nɛ dɩ ba bʋl wɩɩ-la a na nɩɩ-la sɩ laa kɩalɩŋ bil jɩŋ ba wɩaa nɛ.

⁹ A mʋ tɩgɛ kʋlɛlɛɛ nɩaa sɩ kaa lɛrɛ wɩaa: nɛsɩŋ, kakusuŋ, piesee arɩ gɛnnɩŋ koo kʋŋkala lɛ, nɩalɩŋ balɩa maga dɩ ba kɛŋ wɩɩ-la mʋ sarɩya diiree leriŋ nɛ dɩ ba bʋl wɩɩ-la. Nɩɩ-la sɩ laa cheeriŋ maga dɩ ʋ tiŋ kʋ-la naansɩɩŋ bʋlɩa nɛ a pɩ nɩɩ-la kɩaa sɩ sɩma.

¹⁰ Dɩ nʋʋ nɛ kɛŋ nɛŋ koo piesu koo kakumo koo pʋŋ doho na-kala mʋ pɩ ʋ dɔŋɔ tɩɩna dɩ ʋ laa ta, dɩ ʋ nɛ sʋba koo dɩ ʋ nɛ pɩra koo dɩ ba gaa kiri nɛ, ka ʋ bɩ pɛ-naarʋ kɛnɛ,

¹¹ ba maga ba kɔ mɩ-na ma TƖƖNA sɩpaaŋ dɩ nɩɩ-la sɩ laa kʋ-la ta ŋmɩɛsɛ a lɩɩsɛ ʋ nɩsɩŋ arɩ ʋ bɩ kʋ-la wɩaa jɩŋ, dɩ nɩɩ-la ma sɩ tɩɩ kʋ-la sɛɩ, a sɩ́ leŋe dɩ ʋ tiŋ kʋ-la chɩmɩŋ.

¹² Ama dɩ tɩɩna sɩ laa pʋsʋ-la ta nɛ jɩŋ ba wɩaa, ʋ jaŋ time pɩ pʋsʋŋ tɩɩna.

¹³ Dɩ baga kʋŋ ma nɛ kɛŋ pʋna-la dii, ʋ maga dɩ ʋ kɛŋ kʋkaanɩŋ kʋ dagɛ pʋna tɩɩna nɛ. Dɩ ʋ nɛ ŋaa ŋɩɩ, ʋ bɩ jaŋ tiŋ chɩŋ-kala.

¹⁴ Dɩ nʋʋ nɛ chɩŋ nʋʋ pʋna, dɩ ʋ bolimi koo dɩ ʋ sʋba nɛ, ka tɩɩna teeŋ ʋ sɩ chɩma tuo, ʋ maga dɩ ʋ tiŋ.

¹⁵ Ama dɩ pʋna-la nɛ jʋʋ wɩɩ, ka nɩɩ-la teeŋ ʋ sɩ chɩma hɛ nɩmɛ, ʋ bɩ maga dɩ ʋ tiŋ. Dɩ ŋ nɛ time laa nʋʋ pʋna a kaa mʋ dɩ ŋ tɩŋ aŋ kaa kʋ pa, dɩ ʋ dʋa wɩɩ, ŋ bɩra bɩ kʋŋ tiŋ, bɛɛ wɩaa ŋ folo tiŋ nɛ.

Ŋɩɩ nɩaa sɩ jaŋ hɔŋ a ŋɩŋaa wɩaa dɔŋɔ lɛ

¹⁶ Dɩ nʋʋ nɛ kɛŋ hatolo sɩ bɩ baal jɩŋ pɩŋ, ka nʋʋ bɩ haal-la sʋga, nɩɩ-la sɩ kɛnʋ pɩŋ jaŋ tiŋ tolo-la jaarɩŋ aŋ jaaʋ.

¹⁷ Dɩ ʋ nyɩmma nɛ bɩ sɛyɛ dɩ tolo-la jaa baal-la sɩ kɛnʋ pɩŋ, nɩɩ-la sɩ kɛnʋ pɩŋ ha maga dɩ ʋ tiŋ ʋ jaarɩŋ nɛ.

¹⁸ Dɩ haal kala nɛ ŋaa chichiribu, má kpʋʋ.

¹⁹ Dɩ nʋʋkala nɛ kɛŋ pʋna pɩŋ, má kpʋʋ.

²⁰ Dɩ nʋʋkala nɛ kpaarɛ vene aŋ vɩa mɩ-na ma TƖƖNA, má kpʋʋ.

²¹ Ma pɔ má sɩ́ nɩwogusuŋ kaa ŋmoo gbɛɛŋ koo a dɔgɩsɛba. Má jɩŋ arɩ ma ma fa ŋaa nʋhʋɔra nɛ Ijipiti tinteeŋ lɛ.

²² Ma pɔ má sɩ́ yo-haalaa arɩ biisinsiŋ kaa ŋmoo gbɛɛŋ.

²³ Dɩ ma nɛ kɛmba ŋmoo gbɛɛŋ dɩ ba yelle pɩmɛ, mɩ-na ma TƖƖNA jaŋ nɩɩ ba yele a pɛ ba lɛ.

²⁴ Mɩ baanɩŋ jaŋ sii dɩ mɩ leŋ dɩ ba yuo kpʋma, ka ma haalaa arɩ ma biiriŋ ma ŋaa yo-haalaa arɩ biisinsiŋ.

²⁵ Dɩ ma kʋŋ nɛ joŋ moribiee chɩŋ ʋ naambie sɩ ŋaa summu, ʋ bɩ maga dɩ ʋ chɩchɛ nyʋʋrʋŋ arɩ nɩaa dɔnsʋŋ sɩ yie joŋ moribiee chɩŋ ba dɔnsʋŋ aŋ chɩchɛ nyʋʋrʋŋ ŋɩɩ.

²⁶ Dɩ ŋ nɛ laa ŋ naambie gɛrɩŋ a tɩŋ ŋ chɩmɩŋ sɩ hɛ ʋ teeŋ wɩaa, joŋ tɩɩna gɛrɩŋ pʋ ka dɩ wɩa-na jʋʋ,

²⁷ bɛɛ wɩaa ʋ gɛrɩ-bɔsɔ kala nɛ ŋɩɩ. Bɛɛ nɛ ʋ jaŋ piliŋ tɩtaŋɩŋ? Dɩ tɩɩna nɛ yele pɩmɛ, mɩ jaŋ nɩɩ ʋ yele, mɩ ŋaa Wɩa sɩɩ fá nɩaa nenige nɛ.

²⁸ Má pɔ dɩ ma sɩ́ wʋbɔŋŋɔɔ bʋl a mʋ tɩgɛ mɩ-na Wɩa lɛ a sɩ́ kalɩba hɛ ma kuoroo lɛ.

²⁹ Má ŋaa ma kʋdiilee arɩ ma tɩɩnɛnɛɛ a sʋl Wɩɩsʋlʋŋ pɩmɛ. Má joŋ ma hambolibii bumbumba ma pɩmɛ.

³⁰ Ma nɛsɩŋ arɩ ma piesee ma, má joŋ ba bii-bumbumba sɩ ŋaa belliŋ a pɩmɛ. Dɩ ba nɛ lʋla, má leŋ dɩ ba hɛ ba naamba teeŋ tapʋlaa balɩpɛ. Tapʋl-chori chɛɛŋ, má joŋo pɩmɛ.

³¹ Ma ŋaa mɩ nɩaa sɩ bɩ disiniŋ kɛnɛ nɛ, nʋʋkala pɔ ʋ sɩ́ nammɩa gɩrɩŋ kʋŋ sɩ die aŋ ka chaŋ, má joŋo pɩ vasɩŋ.