MOSIS KƐŊ IZIRAL TƖŊŊAA LƖƖ 19 - WƖA TENIŊ

Iziral tɩŋŋaa mʋ yi Sɩnaɩ peel-la

¹ Iziral tɩŋŋaa sɩ lɩɩ Ijipiti tinteeŋ lɛ, ʋ chɛŋ tori tapʋl bumbuŋ lɛ nɛ ba kʋ yi tintee-hɩlɩɩ-la ba sɩɩ yɩrɛ Sɩnaɩ.

² Ba sɩ lɩɩ Refidim lɛ, ʋ harɩŋ lɛ nɛ ba kʋ jʋʋ Sɩnaɩ tintee-hɩlɩɩ-la, a ŋmoo buguŋ Sɩnaɩ peel-la bʋbʋɔŋ.

³ Ŋɩɩ nɛ Mosis jɩl peel-la nyuŋ dɩ ʋ cheŋ Wɩa. La TƖƖNA yɩrʋ peel-la nyuŋ a bʋl, “Ŋ-la nɛ ŋ jaŋ bʋla pɩ Iziral tɩŋŋaa Jekɔb doho nɩaa:

⁴ ‘Ma tɩtɩa na wɩɩ-la mɩ sɩ ŋaa Ijipiti tɩŋŋaa lɛ nɛ, arɩ ŋɩɩ mɩ sɩ pɔma a nagɛ kachuuŋ sɩ kɛŋ kɩŋkɛnsɩŋ tɔ ʋ biiriŋ a kɛmma kaa kʋ lɩɩ.

⁵ Lɛɛlɛ dɩ ma nɛ jaŋ to mɩ niiŋ woruŋ a kɛŋ nii-la sɩ hɛ mɩ dɩ ma pɛgɛ tɩtɩŋ, dʋnɩa nɩaa kala tʋɔŋ, ma jaŋ ŋaa nɩa mɩ sɩ tɩɩ.

⁶ Ma nɛ jaŋ ŋaa tintee-la nɩaa sɩ bɩ disiniŋ kɛnɛ a laa nɩaa nyuŋ a tɩma pɩpɩmɛ.’ Wɩalɩŋ ŋ sɩ jaŋ bʋla pɩ Iziral tɩŋŋaa nɛ ŋɩɩ.”

⁷ Ŋɩɩ nɛ Mosis tuu yɩrɛ nɩalɩŋ nɩhɩasɩŋ kala hɛ dɔŋɔ a bʋl wɩalɩŋ kala La TƖƖNA sɩ bʋla pʋ a pɩba.

⁸ Nɩalɩŋ kala sɛɩ wɩalɩŋ a bʋl, “La jaŋ ŋaa wɩalɩŋ kala La TƖƖNA sɩ bʋla.” Ŋɩɩ nɛ Mosis mʋ bʋla pɩ La TƖƖNA wɩɩ-la ba sɩ bʋla.

⁹ Ŋɩɩ nɛ La TƖƖNA bʋla pɩ Mosis, “Mɩ jaŋ to duoŋ-bɩlɩmbaaŋ-bine tʋɔŋ a kɔ ma teeŋ. Nɩalɩŋ jaŋ nɩɩ dɩ mɩɩ bʋl wɩaa ŋ teeŋ. Dɩ ba nɛ nɩa dɩ mɩɩ bʋl wɩaa ŋ teeŋ, ba jaŋ laaŋ dii bʋa na-kala.” Ŋɩɩ nɛ Mosis bɩra bʋl wɩɩ-la nɩalɩŋ sɩ bʋla a pɩ La TƖƖNA.

¹⁰ Ŋɩɩ nɛ La TƖƖNA bʋla pɩ Mosis, “Mʋ́ pɩɩsɛ nɩalɩŋ disiniŋ ta jɩnɩŋ arɩ chie, a leŋ dɩ ba chɛsɛ ba gɛnnɩŋ.

¹¹ Má ŋaa siri dɛrɛ chɛ-tori chɛɛŋ, bɛɛ wɩaa chɛɛ-la, mɩ jaŋ kʋ tuu Sɩnaɩ peel-la nyuŋ dɩ nɩalɩŋ kala namɛ.

¹² Tuuri magɩlɩŋ golli peel-la aŋ bʋla pɩ nɩalɩŋ, dɩ ba pɔ ba sɩ́ magɩl-la kielu a kʋ jɩl peel-la nyuŋ koo ba paala sɩ́ ʋ bʋbʋɔŋ ma kʋ yi. Dɩ nʋʋkala nɛ kʋ yi, ʋ maga dɩ ma kpʋʋ.

¹³ Dɩ nuhuobiiŋ nɛ koo dɩ pʋna nɛ ŋaa ŋɩɩ, ba jaŋ yagɩŋ arɩ tabɩaa koo tosuŋ a kpʋ. Nʋʋkala bɩ maga dɩ ʋ digu. Ba bɩ jaŋ kɛŋ nɩsaa ŋmobu. Ama dɩ ba nɛ faasa ŋmʋʋ pie-bel-nyile, má mʋ jɩl peel-la nyuŋ.”

¹⁴ Mosis sɩ lɩɩ peel-la nyuŋ kʋ tuu nɩalɩŋ teeŋ, ʋ pɩɩsɛ ba disiniŋ ta ka ba chɛsɛ ba gɛnnɩŋ.

¹⁵ Ŋɩɩ nɛ ʋ bʋla pɩ nɩalɩŋ, “Má kɛŋ ma tɩtɩa hɛ dɔŋɔ a gbɛrɛ tapʋlaa batori. A lɩɩ jɩnɩŋ a kaa mʋ tapʋlaa batori nʋʋkala pɔ ʋ sɩ́ haal pɩŋ.”

¹⁶ Chɛ-tori-la chɛɛŋ chʋchʋɔŋ, taŋ lɩlɩgɩsɛ aŋ pɛ kpɩkpɩa. Duoŋ-bɩlɩmbaaŋ-bine kʋ tɔ peel-la, ka ba nɩɩ banyile sɩ faasa ŋmʋʋ. Nʋʋkala sɩ hɛ ba bugu-la-lɛ chel.

¹⁷ Ŋɩɩ nɛ Mosis kɛmba lɩɩ ba bugu-la lɛ a mʋ Wɩa teeŋ peel-la bʋbʋɔŋ.

¹⁸ Peel-la ba sɩɩ yɩrɛ Sɩnaɩ kala tɔ arɩ nyʋɔsʋŋ, bɛɛ wɩaa La TƖƖNA kʋ tuu ʋ nyuŋ nɛ a nagɛ nyiniŋ, nyʋɔsʋŋ sii jɩjɩl wɩa-nyuŋ dugugu. Peel-la kala faasa zigili.

¹⁹ Ba sɩ faasa ŋmʋʋ banyile-la, Mosis bʋl wɩaa, ŋɩɩ nɛ Wɩa kpɩa bʋl wɩaa pʋ.

²⁰ Ŋɩɩ nɛ La TƖƖNA kʋ tuu Sɩnaɩ peel-la nyuŋ aŋ yɩrɛ Mosis dɩ ʋ kʋ jɩl peel-la nyuŋ, ʋ jɩl.

²¹ Ŋɩɩ nɛ La TƖƖNA bʋla pʋ, “Tuu bʋla pɩ nɩalɩŋ dɩ ba pʋpɔ dɩ ba sɩ́ daha kʋ jɩl, a chɩchɛ dɩ ba namɛ. Dɩ ba nɛ ŋaa ŋɩɩ, ba jesiŋ jaŋ sʋʋ.

²² Wɩɩsʋllɩ sɩpaalaaraa ma tɩtɩa maga dɩ ba pɩɩsɛ ba disiniŋ ta nɛ aŋ-na kɔ mɩ sɩpaaŋ, dɩ ŋɩɩ dee mɩ-na ma TƖƖNA jaŋ dɔgɩsɛba.”

²³ Ŋɩɩ nɛ Mosis bʋla pɩ La TƖƖNA, “Nɩalɩŋ bɩ jaŋ wuo kʋ jɩl Sɩnaɩ Peeliŋ deeŋ nyuŋ, bɛɛ wɩaa ŋ bʋla pɩla arɩ la tuuri magɩlɩŋ a golli peel-la dɩ ʋ ŋaa ŋ-na Wɩa lee.”

²⁴ La TƖƖNA bʋla pɩ Mosis, “Tuu kɛŋ Arɔŋ dɩ ma kɔ, ama Wɩɩsʋllɩ sɩpaalaaraa dɔnsʋŋ arɩ nɩkaana-la sɩ́ fʋgʋsa kʋ jɩl mɩ teeŋ, dɩ ba nɛ ŋaa ŋɩɩ, mɩ jaŋ dɔgɩsɛba.”

²⁵ Ŋɩɩ nɛ Mosis tuu bʋl wɩɩ-la La TƖƖNA sɩ bʋla pʋ a pɩba.